I LUKASI 3

I Yohane Puu Mpobaho

3:1-20

(Mat. 3:1-12; Mrk. 1:1-8; Yoh. 1:19-28)

1I larono ta'u kohopulu ka olima inso a poparentaano Datu Tiberiu, tempono i Pontiu Pilatu gagi petewawa i wita Yudea, ka i Herode mokole i wita Galilea, i Pilipu, pepaekompono, mokole i wita Iturea ka Tarakoniti, ka i Lasania mokole i wita Abilene, 2i tempono i Hanasi ka i Kayapa gagi Sando Mpesomba Langkai, haweomo pau-Do Ue Ala ndi Yohane, anano i Sakaria, i pada one. 3Ka aiwaomo i Yohane i asa wawo wita Yarade ka ipebooliakono, ”Intepidimo ka impepatindamo mebinaho ka Ondae Ue Ala Ira umampunio halamiu, 4#Yes. 40:3-5 kana hinao teburi a wuntano i Yesaya luwuno pinauno anu ta gagi:

Hinao suara anu meboo-booli i pada one:

Patindaako Iramo i Ue pesalaa-Do,

pokomoleoako Iramo sala.

5Sompo bangano ta hinowui

ka sompo torukuno ka pongku ta gagi merete,

anu makulengku ta pinokomoleo,

anu makuntoruku ta pinokomerete,

6ka luwuno mia ira mengkitao tekaduduia inso ndi Ondae i Ue.”

7 # Mat. 12:34; 23:33 Ka i'amba motaeako ira mia hadio anu me'aiwa ndi onae ka domebinaho, ipotae, ”Hei omiu inuleno ule me'ipo! Isemake anu mompauakomiu ka impolai inso a pontekudaako anu ta hawe? 8#Yoh. 8:33 Gagi impopokitaomo luwuno wua anu menunu saru tepidia. Ka si mpompewowolo i laro aroamiu: I Burahima onaemo amamami! Hangano kupauakomiu: Ondae Ue Ala Dopolio weweu ira anano i Burahima inso a watu andiodo! 9#Mat. 7:19 Tetindaomo uase a hakano keu ka a sompo keu anu nahi pehasiliako wua anu moiko, ta tinuehi ka tinadi a laro api.”

10Mia hadio mpesikeno ndi onae, ”Tewala kanandio, hapake anu asalakono kami mpoweweu?” 11Isangki ira, ”Ba isema hinao orua lembano, ka itiaakono anu nahina, ka ba isema anu hinao kaanga, ka iweweu mbo'u kanatuu.” 12#Luk. 7:29 Mehawe ira koa mbo'u puu popumpu sima'ulu ka domebinaho ka mpesikeno ira ndi onae, ”Guru, hapake anu asalakono kami mpoweweu?” 13Isangki ira, ”Si mposinga hadioopo sekono anu imempinakosiako.” 14Ka sorodadu mpesikeno ira koa mbo'u ndi onae, ”Ka omami hapake anu asalakono kami mpoweweu?” Isangki ira i Yohane, ”Si mporontu ka si mpodadai ka impesompoomo tambomiu.”

15Sine hangano mia hadio kontongaado mpesikori ka mpomperorohi, ka luwudo mpesikeno i laro aroado mongkona i Yohane, ba mansa Ondaemo i Mesia, 16Sumangki i Yohane ka ipotaeako ira luwuno mia atuu, ”Ongkue bahoakomiu uwoi, sine Ondae anu lalu pabawa sekono ongkue Ira hawe ka maupo kumaleo onggono sapatu-Do nahi pototoku. Ira bahoakomiu Penaa Mempori ka api. 17Parewa poduku kongkoomo a ngkae-Do Ira mokomorinao ponsesaa-Do ka Ira pumpuo gandu-Do a laro nsi'e-Do, sine awuno seami atuu Ira tumunuo a laro api anu nahi pinokompepate.”

18Saru hadio patuduno susua i Yohane paleleo Lele Mawongkoa a mia hadio. 19#Mat. 14:3-4; Mrk. 6:17-18 Sine mansano kumuahakono mokole Herode hangano teweweuno i Herodia, beineno pepaekompono, ka hangano luwuno wineweuno susua anu mosa'o, 20mokole atuu tumiangio wineweuno mosa'o iwinsoo i Yohane a laro torungku.

Ondae i Yesu, Ana-Do Ue Ala, binaho

3:21-22

(Mat. 3:13-17; Mrk. 1:9-11; Yoh. 1:32-34)

21Tempono mebinaho iramo luwu mia hadio atuu ka tempono Ondae mbo'u i Yesu binaho ka tekonai mekakai, te'ungkahiomo langi 22#Teg. 22:2; Pud. 2:7; Yes. 42:1; Mat. 3:17; Mrk. 1:11; Luk. 9:35 ka metiiomo Penaa Mempori a laro rupano manu-manu marapatii i wawo-Do. Ka terongeomo suara inso i langi, ”Omuemo Ana-Ku anu pinehohawa-Ku, ndi Omuemo Kupemoikoo.”

Potudano anu umule Ira i Yesu

3:23-38

(Mat. 1:1-17)

23Tempono Dopu'uo i Yesu anggaa-Do, tinuwu-Do bara'ura tolu pulu nta'u ka montonda potaedo mia, Ondae anano i Yusupu, anano i Eli, 24anano i Matati, anano i Lewi, anano i Malaki, anano i Yanai, anano i Yusupu, 25anano i Matisa, anano i Amosi, anano i Nahumi, anano i Heseli, anano i Nagai, 26anano i Ma'ati, anano i Matisa, anano i Simei, anano i Yoseki, anano i Yoda, 27anano i Yohanani, anano i Resa, anano i Serubabe, anano i Sealatie, anano i Neri 28anano i Malaki, anano i Adi, anano i Kosami, anano i Elimada, anano i Ere, 29anano i Yesua, anano i Eliese, anano i Yorimi, anano i Matati, anano i Lewi, 30anano i Simeo, anano i Yehuda, anano i Yusupu, anano i Yona, anano i Eliaki, 31anano i Melea, anano i Mina, anano i Matata, anano i Nata, anano i Daudi, 32anano i Isai, anano i Obe, anano i Boasi, anano i Salomo, anano i Nahaso, 33anano i Aminada, anano i Adimi, anano i Arini, anano i Heseroni, anano i Peresi, anano i Yehuda, 34anano i Yako, anano i Saki, anano i Burahima, anano i Tera, anano Nahoro, 35anano i Serugi, anano i Rehu, anano i Pelegi, anano i Ebere, anano i Salomo, 36anano i Kenani, anano i Aripakasadi, anano i Semu, anano i Noho, anano i Lameki, 37anano i Metusala, anano i Heno, anano i Yeredi, anano i Mahalaleeli, anano i Kenani, 38anano i Enosi, anano i Seti, anano i Adama, ana-Do Ue Ala.

Currently Selected:

I LUKASI 3: XMZ

Highlight

Copy