I LUKASI 15

Potundaano mongkona bimba anu tetadi

15:1-7

(Mat. 18:12-14)

1 # Luk. 5:29-30 Luwuno puu popumpu sima'ulu ka mia ntehala eheano mehawe ndi Ondae i Yesu ira mperorongeako Ira. 2Ka mpewuruki iramo to Parisi ka guru agama, dompotae, ”Dotarima ira mia ntehala ka mongkaa merongaako ira.” 3Ka Do'amba pauako ira potundaano andio, 4”Isemake i olomiu anu hinao bimbano asa etu, ka tewala tetadi aasa i olodo, ka nahi bintao anu sio pulu ka osio i pada one ka ilako umungkeo anu tesaa atuu ranta ka ihaweo? 5Ka tewala ihaweomo, inaao a wawo oweano saru mawongko, 6ka sahaweno i raha ipoboi ira sambe'eno ka pehori rahano ka ipotaeako ira: Impo'undemo saru ongkue, hangano bimbaku anu tetadi atuu kuhaweomo. 7Kupauakomiu: Kanandio koa mbo'u ta hina po'undea i suruga hangano aasa mia tehala anu tepidi, laluaopo sekono mo'undeakono sio pulu ka osio mia mentee anu nahi pongkere tepidia.”

Potundaano mongkona dirihami anu tetadi

15:8-10

8”Ke beine isuake anu hinao dirihamino hopulu, ka tewala tetadi aasa i olono, nahi polangao hulu ka iroahio raha saru mompesu'ui umungkeo ranta ka ihaweo? 9Ka tewala ihaweomo, ipoboi ira sambe'eno ka pehori rahano ka ipotae: Impo'undemo saru ongkue, hangano dirihamiku kuhaweomo. 10Kupauakomiu: Kanandio koa mbo'u ta hina po'undea a luwuno mala'eka-Do Ue Ala hangano aasa mia tehala anu tepidi.”

Potundaano mongkona ana anu tetadi

15:11-32

11Dopotae mbo'u i Yesu, ”Hinao asa mia orua ira anano tama. 12Motae anu tompasusu ndi amano: Ama, iwee akumo inso a arataato anu gagi tiaku. Ka i'amba amado tumia-tiaako ira arataa kaeado atuu. 13Ba opia oleo umarino atuu tompasusu atuu umasao luwu tiano atuu ka i'amba lumako a wita anu olai. I ra'ai ipesala-salao arataa tiano atuu a ntuwua nahina mentuduano. 14Mansano ipingkoomo luwu, haweakoomo tempo mokoninggoa i wita atuu ka onae mbo'u mompu'uomo marasai. 15Ka i'amba lumako ka ipo'angga a aasa mia anu moweeakono anggaa i wita atuu. Mia atuu tumenao ka ilako i lere modagai boeno. 16Ka i'amba mingki umihiakono kompono upe anu gagi kaangano boe atuu, sine nahina maupo te'asa mia anu moweeakono. 17Ka i'amba mokompewowoloo teweweuno, ipotae: Hadio ntu'u mia tinambodo amaku anu mare'eako kaanga, sine ongkue i ndi'ai mate mokoninggo. 18Aku mentade lumako ndi ondae amaku ka motaeako ira: Ama, tehala akumo i suruga ka ndi omiu ama, 19nami pototoku mbo'u pinotaeako anamiu ama; ipokogagi akumo kana aasa mia tinambomiu. 20Ka mentadeomo ka ilako ndi amano. Tempono onae da olai, ikitaomo amano, ka i'amba teleluomo aroano mehohawao. Amano atuu melulu tepohaweakono ka i'amba kumopuio ka iwoo-wooo. 21Motae ana atuu ndi onae: Ama, tehala akumo i suruga ka ndi omiu, nami pototoku mbo'u pinotaeako anamiu. 22Sine amano atuu motaeako ira atano: Impotuturako mewawao ramai lemba meloe anu moiko ntu'u, impokonaakonomo atuu ka impokonaakono sinsi a wunga ngkae ka sapatu a ngkaruno. 23Ka ime'alaomo ana nsapi mewalo atuu, imensumbeleomo ka aiwamo ka tompongkaa ka mpo'unde. 24Hangano anaku andio mateomo ka wali tuwu, onae umari tetadi ka wali hinawe. Ka mpompu'u iramo mpo'unde. 25Sine anano anu aka kongko i lere ka tempono ipekule ka umpeda a raha, irongeo unino siloli ka penani melense-lense. 26Ka i'amba moboio aasa ata ka ipesikenoakono hapa pengkonaano luwuno atuu. 27Sumangki ata atuu: Uaimiu mekuleomo ka amamiu monsumbele iramo ana nsapi mewalo, hangano dowali humaweo madoo. 28Ka tekudaomo ana aka atuu nahi behe mewinso. Ka i'amba meluarako amano ka ipepauakono. 29Sine isangkio amano, ipotae: Mapata'u-ta'uomo kupekakaakomiu ka napi kuhori umewaio parentamiu, sine napi hori ama moweeakune te'asa ana bembe ka kupo'unde saru luwuno sambe'eku. 30Sine da iaopo ihawe anamiu anu mesala-salao arataa kaeaamiu meronga saru beine mebelesu, onaemo ka iponsumbeleakono ana nsapi mewalo atuu. 31Ipotaeakono amano: Anaku, omue kongkoko mpiha saru ongkue, ka luwuno arataaku onaemo arataamu. 32Tekona tompo'unde ka memawongko hangano uaimu anu mateomo wali tuwu, umari tetadi ka wali hinawe.”

Currently Selected:

I LUKASI 15: XMZ

Highlight

Copy