I LUKASI 16

Potundaano mongkona puu pompekaria anu nahi moleo aroa

16:1-9

1Ka Dopotae i Yesu a ana guru-Do, ”Hinao asa mia kaea anu hinao puu pompekariano. Pinohawe pontuluri ndi onae, nine puu pompekariano atuu mesala-salao arataano. 2Ka i'amba moboio puu pompekariano atuu ka ipotaeakono: Hapake anu rinongeku mongkona omue? Wee akumo doano luwuno pinekariamu, hangano nami komo'angga mbo'u gagi puu pompekaria. 3Motae puu pompekaria atuu i laro aroano: Hapake anu asalakono aku weweuo? Ipokompenaa-naa aku ueku inso a mpo'anggaaku gagi puu pompekaria. Mobingku nahi kupolio, mo'ema-ema mokoko'iiku. 4Kuto'orio hapa anu aku weweuo, tewala pinokompenaa-naa aku inso a mpo'anggaaku gagi puu pompekaria, ka ihina koa mia anu behe aku mo'ia a rahado. 5Ka i'amba moboi ira nte'o'asa mia anu mpepasua a ueno. Ipotaeakono anu amba-ambano: Opiake pasuamu a ueku? 6Sumangki mia atuu: Asa etu kusi lana. Ka i'amba motaeakono mia atuu: Ndiomo wunta pasuamu, pentoromo ka weweuomo wunta pasua susua kanandiomo isa'a: Lima pulu kusi. 7Ka i'amba motaeakono anu ko'orua: Opiake pasuamu? Sumangki mia atuu: Asa etu kampili gandu. Ipotaeakono mia atuu: Ndiomo wunta pasuamu, weweuomo wunta pasua susua: Halu pulu kampili. 8Ka i'amba ueno atuu umunde-undeo puu pompekaria anu molengku atuu, hangano moweweuomo akalano. Hangano anano wawontolino andio mempande irapo mpe'akala a mpe'asa miado sekonopo luwuno anano mewine.

9Ka Kupauakomiu: Weweuomo pesambe'ea saru pakeomo Kaeaa anu molengku, ka tewala Kaeaa atuu nami pokompotulungi mbo'u, omiu mentinarima a laro kema anu nahina tampulaano.”

Petenunu a mpoweweua anu kodei

Patudu

16:10-18

10”Ba isema metenunu a luwuno wineweu kodei, onae metenunu koa mbo'u a luwuno wineweu anu langkai. Ka ba isema nahi mentee a luwuno wineweu anu kodei, onae nahi mentee koa mbo'u a luwuno wineweu anu langkai. 11Gaagi, tewala nahi mpetenunu a ngkaeaa anu molengku, isemake anu ta me'ala-alaakomiu arataa anu menteeano? 12Ka tewala nahi mpetenunu a arataado mia susua, isemake anu ta meweengakono arataamu omuemu ndi omue?

13 # Mat. 6:24 Aasa ata nahi polio mepe'ata a orua ue. Hangano tewala kanandio onae ta umo'aliaakono anu asa mia ka mehohawao anu susua, ke ta metenunuio anu asa mia ka anu susua nahi perioo. Nahi komiu mpokompe'ue ndi Ondae Ue Ala ka a ngkaeaa.”

14Luwuno atuu domerongeo to Parisi, anu memodokoako doi atuu, ka dompokoko'awatiako Ira. 15Ka Do'amba motaeako ira, ”Omiu mpokomenteeo koroimiu i arodo mia, sine Ondae Ue Ala tumo'orio aroamiu. Hangano hapa anu tinudu langkai a mia, Do'o'aliaakono Ue Ala. 16#Mat. 11:12-13 Songka Taura ka wuntado nabi pinake mpiha hawe a tempono i Yohane morosono; ka mompu'u i tempo atuu Poparentaa-Do Ue Ala pinalele ka sompo mia mpedada mpewui mpewinsokio. 17#Mat. 5:18 Moruanaopo itampula langi ka tolino sekonopo aasa titi inso a songka Taura nahi tinonda.

18 # Mat. 5:32; 1Kor. 7:10-11 Sompo mia anu monteposuaako beineno, ka i'amba mekombiaako beine susua, onae monsosabo; ka ba isema mekombiaako beine anu tineposuaakono tamano, onae monsosabo.”

Mia kaea ka i Lasaru anu mongkokolaro

16:19-31

19”Hinao asa mia kaea anu wela mesangkaako lemba meloe wungo ka sawu alusu, ka sompo oleo onae mo'unde a laro mare'ea. 20Ka hinao asa mia anu mo'ema-ema meneeako i Lasaru, koroino bukeako kumbi mewoo, mepombole umpeda a mpewowa rahano mia kaea atuu, 21ka mingki tumadiakono mokoninggono hapa anu ntedonta inso a medano mia kaea atuu. Tendeano mehawe ira dahu mensile'io kumbino. 22Ka i'amba mateomo mia mongkokolaro atuu, ka do'amba mewawao mala'eka a mpo'awiano i Burahima. 23Mia kaea mbo'u atuu mate, ka i'amba kinaburu. Ka kontongaano mompemarasai a mpo'iangado mia mate ka ipentombu, inso olai ikitao i Burahima, ka i Lasaru mentoro i'awio. 24Ka i'amba mebooli, ipotae: Ama Burahima, ipehohawa akumo. Tenaomo i Lasaru, ka i'emoo untu wunga ngkaeno a uwoi ka ipokomoriniakune eloku, hangano tedoa aku mompemahaki a laro langano api andio. 25Sine motae i Burahima: Ana, pewowoloomo, nine utarimaomo anu moiko tempono utuwu, sine i Lasaru luwuno anu mosa'o. Kanandio-andio onae mohawe pontarero ka omue tedoa marasai. 26Ka aasa mbo'u i oloto hinao bangano anu mo'oloti, ondae anu me'inso i ndi'ai ira melako ndi omue ke maupo anu inso i tu'ai ira me'aiwa ndi omami ka si dompokompe'asambaliako. 27Motae mia atuu: Tewala kanatuu, ku'emao ndi omiu, ama, ka itenao lumako a rahado amaku, 28hangano da hinao olima irapo pepaekompoku, ka dopopoto'oriako ira ntu'u, ka si dompewinso te'ipua a mpo'ianga marasaia andio. 29Sine motae i Burahima: Hinao ndi ondae ponsakosiino i Musa ka luwuno nabi; moikoomo domperorongeakono ponsakosii atuu. 30Sumangki mia atuu: Naahi, Ama Burahima, sine tewala hinao te'asa mia inso i olodo mia mate hawe ndi ondae, ira koa ntepidi. 31Ipotaeakono i Burahima: Tewala nahi domperorongeakono ponsakosiino i Musa ka luwuno nabi, nahi ira koa mbo'u mebehe mpompe'ala-ala, maupo hangano asa mia anu mewangu inso i olodo mia mate.”

Currently Selected:

I LUKASI 16: XMZ

Highlight

Copy