I LUKASI 14

Pompokotompaa mbo'u a oleo Saba

14:1-6

1Pohona oleo Saba Ondae i Yesu aiwa a rahano aasa petewawado to Parisi Ira mongkaa i tu'ai. Luwuno anu mehawe mempoporoo Ira ntu'u. 2Borono ka ihawe asa mia mahaki mengkokamba koroino mentade i aro-Do. 3Ka Do'amba i Yesu motaeako ira anu mponto'ori Taura ka to Parisi atuudo, Dopotae, ”Ineheako koake mompokotompa mia a oleo Saba ke naahi?” 4Ondae atuu mengkomino luwu. Ka Do'amba uminio kaeno mia mahaki atuu ka Dopokotompao ka Dotenao lumako. 5#Mat. 12:11 Ka Do'amba motaeako ira, ”Isemake i olomiu anu nahi ronga padiio meluarako anano ke sapino tewala tedonta a laro aasa sumuru, maupo a oleo Saba?” 6Nahi dompokosangki Ira.

Po'ianga anu lalua ntu'u ka anu i totono ntu'u

14:7-11

7Hangano Dokitao i Yesu, nine dompete'umalao totoka mpentoroki ira po'ianga pompelangkaia, Dopauako ira potundaano andio, 8#Pow. 25:6-7 ”Tewala asa mia umoluko a gawe mpetaoa, si pentoro a mpo'ianga pompelangkaia, hangano bara'ura mia atuu mo'oluomo asa mia anu lalu pinelangkai sekono omue, 9ka si aiwa mia atuu, anu umoluko ka onae ka ipotaeakomu: Po'ianga andio weeakono mia atuu. Ka i'amba omue saru mokoko'ii asalakono lumako a mpo'ianga anu i totono ntu'u. 10Sine, tewala inoluko, lakomo pentoro a mpo'ianga anu i totono ntu'u. Bara'ura umbu raha ta aiwa ka ipotaeakomu: Sambe'e, pentoromo i arono. Ba kanandio komohawe pompelangkai i arodo luwuno totoka anu mehano. 11#Mat. 23:12; Luk. 18:14 Hangano ba isema melangkaio koroino, onae ta pinokongkodei a ba isema me'urumako, onae ta pinelangkai.”

Isema anu asalakono ta inolu

14:12-14

12Ka motae Ira mbo'u i Yesu a mia anu umolu Ira, ”Tewala moweweuko pelimbua meene ke wongi, si olu ira sambe'emu ke pepaekompomu ke pe'etumu ke pehori rahamu anu kaea, hangano ira koa mensuloo me'oluko mbo'u ka ba kanandio omue mohawe sulono. 13Sine tewala moweweuko pelimbua, olu iramo mia memongkokolaro, mia hinao tataano, mia mepungku ka mia memorawu. 14Ka kome'ura, hangano nahina hapa-hapa ira mensuloakomu. Hangano komohawe sulono a oleo pewanguado mia mentee.”

Potundaano mongkona mia anu melelengkupi

14:15-24

(Mat. 22:1-10)

15Rumongeo atuu motaeomo asa mia inso a ntotoka atuu ndi Ondae i Yesu, ”Me'uraomo mia anu ta inolu a Poparentaa-Do Ue Ala.” 16Sine motae Ira i Yesu ndi onae, ”Hinao asa mia moweweu pelimbua langkai ka onae mo'olu hadio mia. 17Tamo pinu'u pelimbua atuu, itenao atano motaeako ira inolu: Ime'aiwamo, hangano luwuakoano tetindaomo. 18Sine mperonga-ronga ira mpotae: Tabeamiu nahi kami mpoko'aiwa. Anu amba-ambano motae: Mo'oli akumo lere ka asalakono aku lumako kumitao; tabeamiu nahi kupoko'aiwa. 19Anu mehano motae: Mo'oli akumo sapi olima pasa anu sinu'uluiomo ka asalakono aku lumako umarahakono; tabeamiu nahi kupoko'aiwa. 20Anu mehano mbo'u motae: Da sarai kupetao onaemo pu'uno nahi kupoko'aiwa. 21Ka mekuleomo ata atuu ka ipohaweo luwuno atuu a ueno. Ka i'amba tekudaomo umbu raha atuu ka ipotaeakono atano: Pontuturakomo lako a luwuno sala ka batatanano kota ka wawa iramo ramai mia memongkokolaro ka mia anu hinao tataano ka mia memorawu ka mia mepungku. 22Ka i'amba ata atuu pauakono ueno: Ue, hapa anu iparentaakune kuweweuomo, sine maupo kanatuu da hinao po'ianga. 23Ka i'amba ueno atuu motaeakono atano: Lakomo a luwuno sala ka a ntelaloa ka dadai iramo mia, anu mekongko i tu'ai ka dompewinso, hangano rahaku asalakono ka ibuke. 24Hangano Kupauakomiu: Nahina maupo te'asa mia inso a luwuno mia anu me'inolu iramo atuu ta monsaamoako pogawe-Ku.”

Tumonda Ira i Yesu asalakono pinotola luwuakoano

14:25-35

25I asa tempo hadio mia ntehuhu tumonda Ira i Yesu a laro pelempaa-Do. Mewolili Ira ka Dopotaeako ira, 26#Mat. 10:37-38 ”Tewala asa mia aiwa ndi Ongkue ka nahi o'aliaakono amano, ineno, beineno, anano, pepaekompono tama ke beine, maupo penaano onaeno, nahi ta polio gagi ana guru-Ku. 27#Mat. 16:24; Mrk. 8:34; Luk. 9:23 Ba isema nahi po'ahao keu pinotambano ka itonda Aku, nahi ta polio gagi ana guru-Ku.

28Hangano isemake i olomiu anu tewala ta mowangu menara nahi pentoro ari dumoao olino parewano ka pontambo, ba ta koa sompo doino ranta ka i'umari anggaa atuu? 29Ka tewala iponaakonomo empehino ka nahi poko'umario, ba mansa domengkitao luwuno mia ka dompopodeu-deuo, 30saru mpotae: Mia arau ipu'uo wanguo, sine nahi polio moko'umario.

31Ke, mokole isuake tewala ta lumako metea mo'ewai mokole susua nahi pentoro ari ka ipontimbanga, ba ta koa polio umaropiakono mia hopulu nsowu iwali anu hawe sumapoio rua pulu nsowu mia? 32Tewala naahi, tekonai da me'olai ira iwali atuu onae ta montena mia lumako mesikenoakono ba kana'umpe pesalaano pesintuwua. 33Kanandiomo mbo'u sompo-sompo mia i olomiu, anu nahi potolao koroino inso a luwuno arataano, nahi pokogagi ana guru-Ku.

34 # Mat. 5:13; Mrk. 9:50 Ohia lano moiko, sine tewala ohia gagi motewe, saru hapa mbo'uke ipinokomopa'iako? 35Nahina mbo'u tuduno moiko a lere maupo pompokomewalo pinopaho, ka domentadio mpena mia. Isema hinao biri porongeno, ka iporongemo!”

Currently Selected:

I LUKASI 14: XMZ

Highlight

Copy