I LUKASI 11

Mongkona Mekakai

11:1-13

(Mat. 6:9-13; 7:7-11)

1Pohona Ondae i Yesu kontongaa-Do mekakai i aasa po'ianga. Mansa-Do menaa-naa mekakai, motaemo aasa ana guru-Do ndi Ondae, ”Ue, Ipaguru kamimo mpekakai, mengkena kana anu ipaguruako ira i Yohane a ana guruno.” 2Dosangki ira i Yesu, ”Tewala komiu mpekakai, impotaemo:

Ama, nee-Miu ka ipinokomempori;

Poparentaa-Miu ka ihawe.

3Ipowee kami kaangamami sompo oleo ka isompo

4ka I'ampuniakamimo halamami,

hangano omami mbo'u me'apunio sompo mia anu sala ndi omami;

ka siimo Iwawa kami a mpo'ara-arahakoa.”

5Ka Do'amba motaeako ira, ”Tewala asa mia i olomiu lumako porontonga wongi a rahano asa mia sambe'eno ka ipotaeakono: Pepaekompo, poweeakune roti te'otolu ka kuponsabo, 6hangano asa mia sambe'eku anu kontongaano a laro pelempaa tetoro i rahaku ka nahina hapa-hapa aku mompatindaakono; 7komba ta sumangki anu i laro raha atuu: Si pokonsusa aku, tinondoomo pewowa ka mpoturi kamimo saru nana'ote; nahi kupokompewangu moweeko pepaekompo. 8Kupauakomiu: Maupo nahi behe pewangu ka moweeakono hangano mia atuu sambe'eno, sine hangano nahina mokoko'iino atuu, onae ta koa mewangu ka moweeakono hapa anu kinereno.

9Onaemo pu'uno Kupauakomiu: Impo'emamo, ka komiu mempinoweeako; impo'ungkemo ka komiu mpohawe; impetingko-tingkomo ka komiu me'inungkahiako pewowa. 10Hangano sompo mia anu mo'ema, montarima ka sompo mia anu mo'ungke, mohawe ka sompo mia anu metingko-tingko, onae inungkahiako pewowa. 11Ama isuake i olomiu, tewala anano mo'ema bou ndi onae, ta moweeakono ule anano atuu euno bou? 12Ke, tewala onae mo'ema su'ului manu, ta moweeakono kasi-kasi molea? 13Gagi tewala omiu anu memosa'o mponto'ori mpopeweengako pompowee anu moiko a anamiu, tamoako Amamiu anu i suruga! Ira mompowee Penaa Mempori a mia anu mpo'ema ndi Ondae.”

Ondae i Yesu ka i Beelesebu

11:14-23

(Mat. 12:22-30; Mrk. 3:22-27)

14Pohona Ondae i Yesu monsaari aasa onitu nsa'o anu mompokobebe inso a aasa mia. Mansano meluarako onitu nsa'o atuu, mia beebe atuu mokompepau. Ka mengkohali-hali iramo mia hadio. 15#Mat. 9:34; 10:25 Sine hinao i olodo anu mepau, ”Doponsaariako onitu nsa'o pabawano i Beelesebu, tadulakodo onitu nsa'o.” 16#Mat. 12:38; 16:1; Mrk. 8:11 Hinao mbo'u anu mo'ema ndi Ondae aasa petondoni inso i suruga, ta umara-arahako Ira. 17Sine Doto'orio i Yesu pinewowolodo ka Do'amba motae, ”Sompo poparentaa anu tetia-tia manasa tekale-kale, ka sompo sombori anu tetia-tia manasa tekale-kale. 18Tewala i Mosa'o atuu tetia-tia mbo'u ka i'ewaio koroino onaeno, kana'umpeke ka ta mo'ia mpiha poparentaano? Hangano mpotae komiu, nine Ongkue monsaariako onitu nsa'o pabawano i Beelesebu. 19Gagi tewala Ongkue monsaariako onitu nsa'o pabawano i Beelesebu, saru pabawano hapake domposaariako anu mentonda komiu? Onaemo pu'uno ondaemo anu ira megagi puu mpobitaramiu. 20Sine tewala pabawa-Do Ue Ala Kuponsariako onitu nsa'o, ka menteeano Poparentaa-Do Ue Ala haweomo ndi omiu. 21Tewala aasa mia anu moroso ka anu sompo parewa mpeteano dumagaio rahano onaeno, ka tekaduduiomo luwuno arataano. 22Sine tewala asa mia anu morosoopo sekono onae sumapoio ka inangio, asalakono mia atuu ta rumontuo parewa mpeteano, anu pinerorohino, ka ta tumia-tiao rinontuno.

23 # Mrk. 9:40 Isema nahi pe'asaa-Kune, i'ewai Aku ka isema nahi popumpu saru Ongkue, onae morawo-rawo.”

Pekuleno onitu nsa'o

11:24-26

(Mat. 12:43-45)

24”Tewala meluarako onitu nsa'o inso a mia, onae mo'itu-itu a luwuno po'ianga anu londa mo'ungke penaa-naaano, ka hangano nahi pohawe, ipotae: Aku mekule a raha anu kubintaomo atuu. 25Onaemo ka ilako ka ihaweo raha atuu morina rinoahi ka te'atora moiko. 26Ka i'amba meluarako umoluako ira opitu onitu nsa'o susua anu memosa'o irapo sekono onae, ka dompewinso mpo'ia i tu'ai. Ka poko'ariano teweweuno mia atuu mosa'oopo sekono teweweuno amba-ambano.”

Isema anu me'ura

11:27-28

27Tempono da mepau Ira i Yesu, mebooliomo aasa beine inso i olodo mia hadio ka ipotae ndi Ondae, ”Me'uraomo ine anu mentiaa-Komiu ka uo anu mopo'uo Komiumo.” 28Sine Dopotae, ”Anu me'ura onaemo ondae anu mporonge pau-Do Ue Ala ka anu mpekariao.”

Petondonino i Yunu

11:29-32

(Mat. 12:38-42)

29 # Mat. 16:4; Mrk. 8:12 Tempono domenggowo Ira mia hadio, motae Iramo i Yesu, ”Mia andiodo ondaemo mia anu memosa'o. Inehedo ka ihina te'asa petondoni, sine ndi ondae nahi ira mempinoweeako petondoni sangkadio petondonino Nabi Yunu. 30#Yun. 3:4 Hangano kana i Yunu gagi petondonido to Niniwe, kanandio koa mbo'u i Ana Manusia Ira gagi petondonido mia andiodo. 31#1Mok. 10:1-10; 2Taw. 9:1-12 I tempono pebitaraa, mokole beine inso i Selata atuu ta mentade saru mia andiodo ka onae ta humuku ira. Hangano mokole beine andio hawe inso i tompano tolino ta rumongeo ponto'orino i Salomo, ka menteeano anu kongko i ndi'ai lauaopo sekono i Salomo! 32#Yun. 3:5 I tempono pebitaraa, to Niniwe ira mpentade saru mia andiodo ka ondae anu humuku ira. Hangano to Niniwe atuudo ntepidi tempono domerongeo pompaleleno i Yunu, ka menteeano anu kongko i ndi'ai laluaopo sekono i Yunu!”

Huluno koroi

11:33-36

33 # Mat. 5:15; Mrk. 4:21; Luk. 8:16 ”Nahina maupo te'asa mia anu mompolanga hulu ka i'amba numaao a ntoto raha ke a ntoto basu, tendeano a wawo ngkaruno hulu, ka dompokokitao koa luwuno mia anu mpewinso wantano. 34#Mat. 6:22-23 Matamu onaemo huluno koroimu. Tewala mata moiko, mewineomo asa ngkoroimu, sine tewala matamu mosa'o, wongi-wongiomo koroimu. 35Onaemo pu'uno impekokoongakono ka si gagi wongi-wongi mewine anu kongko ndi omiu. 36Tewala asa ngkoroimu mewine ka nahina te'asa ntia anu wongi-wongi, asalakono luwuno ta mewine, mengkena kana hulu tewala ipokomewineakomu wantano.”

Ondae i Yesu kumuahako ira to Parisi ka anu mponto'ori Taura

11:37-54

(Mat. 23:1-36; Mrk. 12:38-40; Luk. 20:45-47)

37Mansa-Do umari mompaguru i Yesu, aasa to Parisi umolu Ira ka Dopongkaa i rahano. Ka mewinso Iramo a laro raha atuu, ka Do'amba mentoro mongkaa. 38To Parisi atuu kumitao anu gagi atuu ka onae kohali-hali, hangano Ondae i Yesu nahi Dowo'ohio kae-Do ka Do'amba mongkaa. 39Sine motae Ira i Ue ndi onae, ”Omiu to Parisi, impokomorinao bungkuno tonde ka sempe, sine i laromiu buke rinontu ka mosa'oa. 40Hei mia mebenge-benge, komba Ondaeke anu mokogagio bungkuno, Ondae koa mbo'u anu mokogagio larono? 41Sine, impeweengakonomo ihino gagi pontulungi ka menteeano luwuno ta gagi morina ndi omiu. 42#Ima. 27:30 Sine memasola komiumo, hei to Parisi, hangano ime'owahio tia hopuluno solasi, timbowane ka luwuno rupano inahu, sine nahi impebungkuio moleoa ka pompehohawa-Do Ue Ala. Anu aasa asalakono wineweu ka anu susua si mpebungkuio. 43Memasola komiumo, hei to Parisi, hangano inehemiu mpentoro a mpo'ianga i arono ntu'u a raha tepumpua ka inehemiu mpontarima pompelangkai a olu. 44Memasola komiumo, hangano mengkana komiu kaburu anu nahina tondonino; mia mpelempa i wawono, nahi to'orio.”

45Asa mia inso i olodo anu mponto'ori Taura atuu sumangki ka ipotaeako Ira, ”Guru, Ipepau kanandio, Ipokongkodei kami mbo'u.” 46Sine sumangki Ira, ”Memasola komiumo mbo'u, hei guru agama, hangano impopotembiako ira mia anu nahi dompokotembio, sine omiu-miu nahi medanggiakono maupo te'asa wunga ngkaemiu tinembi atuu. 47Memasola komiumo, hangano imeweweuo kaburudo nabi, sine uempu'umiu mpepate ira. 48Hangano kanandio memangaku komiu, nine impementeeo luwuno wineweudo uempu'umiu, hangano dompepate iramo nabi atuudo ka imeweweuo kaburudo. 49Onaemo pu'uno ponto'ori-Do Ue Ala mepau: Aku tumena ira nabi ka tinena ndi ondae ka entongano inso i olodo nabi ka tinena atuu ira mempinepate ka bobarasai ira, 50ka itinuntu a mia andiodo reado luwuno nabi anu te'uwuomo mompu'u ipinokogagi wawontolino, 51#Teg. 4:8; 2Taw. 24:20-21 mompu'u inso a reano i Habeli hawe a reano i Sakaria anu pinepateomo i olono meda pontunua pesomba ka Raha-Do Ue Ala. Tendeano Kupauakomiu: Luwuno atuu ta tinuntu inso a mia andiodo. 52Memasola komiumo, hei guru agama, hangano ime'alaomo kunsino ponto'ori; omiu-miu nahi mpewinso i larono ka mia anu me'ungkeakono ira mpewinso i larono ime'onsoio.”

53Ka mansa-Do melungka i Yesu inso a mpo'ianga atuu, anu mponto'ori Taura ka to Parisi mpoporoo ira mpiha ka hadio rupa pesikenodo ndi Ondae. 54Onaemo atuu inungkeakodo mete'umala Ira, ka dompokorako ira me'empehiako te'asa anu pinau-Do.

Currently Selected:

I LUKASI 11: XMZ

Highlight

Copy