I LUKASI 12

Pompaguru butu tiado ana guru

12:1-12

(Mat. 10:26-27)

1 # Mat. 16:6; Mrk. 8:15 Kontongaano atuu sowu-sowuno mia hadio mpengowo iramo, ranta ka dompehihidi. Ka Do'amba i Yesu mompu'u mompaguru, amba-ambano a ana guru-Do, Dopotae, ”Impetangkoromo a ragi, onaemo po'onde-ondedo to Parisi. 2#Mrk. 4:22; Luk. 8:17 Nahina maupo te'asa anu tetutuwi anu nahi ta inungkahi ka nahina maupo te'asa anu tewuni anu nahi ta tino'ori. 3Onaemo pu'uno hapa anu pinaumiu a wongi-wongiano ta teronge a mewineano, ka hapa anu impetanga-tangaako a biri a laro bolongko ta pinalele inso a wawo atono raha. 4Kupauakomiu, hei luwuno sambe'e-Ku, si medoitoako ira anu polio mompepate koroi ka umarino atuu nahi polio mbo'u moweweu hapa-hapa. 5Aku koa tumisoakomiu isemake anu asalakono imedoitoako Ira. Imedoitoako Iramo, anu umari mompepate, hinao pabawa mompetadiako mia a laro naraka. Menteeano Kupauakomiu, imedoitoako Iramo! 6Kombake manu-manu dena olima inasa orua doi? Maupo kanatuu nahina maupo te'asa inso ndi onae anu Dokolupeo Ue Ala, 7sekonopo wuu a ulumiu dinoaomo luwu. Onaemo pu'uno si medoito, hangano masuliopo olimiu sekono manu-manu dena mehadio. 8Kupauakomiu: Sompo mia umakui Aku i arodo mia, i ana Manusia mbo'u Ira umakuio i arodo mala'eka-Do Ue Ala. 9Sine ba isema humapu Aku i arodo mia, onae ta hinapu i arodo mala'eka-Do Ue Ala. 10#Mat. 12:32; Mrk. 3:29 Sompo mia anu mompau te'asa umewai Ira i Ana Manusia, onae ta inampuni; sine ba isema anu mompepaukiako Penaa Mempori, onae nahi ta inampuni. 11#Mat. 10:19-20; Mrk. 13:11; Luk. 21:14-15 Tewala mia mompo'arokomiu a luwuno majelisi ke a luwuno anu mpeparenta ka anu mempabawa, siimo imensala-laro ba kana'umpe ke hapa anu asalakono komiu mempauo umalaakono koroimiu. 12Hangano i tempo koa mbo'u atuu Penaa Mempori ta paguruakomiu hapa anu asalakono komiu mempauo.”

Mia kaea anu benge-benge

12:13-21

13Asa mia inso a mia hadio atuu motaeako ira i Yesu, ”Guru, ipauakonomo pepaekompoku ka kipetiao pusaka.” 14Sine Dopotaeakono i Yesu, ”Pepaekompo, isemake anu motoro Akumo gagi puu mpobitara ke po'oloti i olomiu?” 15Dopotaeako ira mbo'u, ”Impedaga-dagaimo ka impetangkoromo a luwuno modokoa, hangano maupo hadio ntu'u arataano te'asa mia, tuwuno nahi ta sompo butu inso a ngkaeano atuu.”

16Ka i'amba Dopauako ira mbo'u aasa potundaano, Dopotae, ”Hinao asa mia kaea, hadio ntu'u hasilino witano. 17Mesikenoomo i laro aroano: Hapake anu asalakono aku weweuo, hangano nahina ponaapaku ka kupokonaa ira hasilino witaku. 18Ka i'amba motae: Ndiomo anu aku weweuo; aku beta ira si'eku ka aku mowangu anu lalu langkai ka aku numaao i larono luwuno gandu ka parewaku. 19Umarino atuu aku motaeakono sumangaku: Sumangaku, ndi omue hadio parewa, tehowu tiano mapata'u-ta'u tehineno; penaa-naamo, pongkaamo, po'inumo ka pesana-sanaamo! 20Sine pau-Do Ue Ala ndi onae: Hei omue mia benge-benge, ia wongi koa mbo'u andio penaamu ta inala inso ndi omue, ka hapa anu upatindaomo, tiano isemake te'ingka? 21Kanandiomo gagiano mia anu mopumpu arataa tiano koroino onaeno, ba nahi kaea i aro-Do Ue Ala.”

Mongkona sala-laroa

12:22-34

(Mat. 6:25-34)

22Dopotae i Yesu a ana guru-Do, ”Onaemo pu'uno ka Kupauakomiu: Si sala-laroakono tuwumiu, mongkona hapa anu komiu mengkaano, ka si mensala-laroanono mbo'u koroimiu, mongkona hapa anu komiu mpesangkaako. 23Hangano tuwua atuu laluaopo sekono kaanga ka koroi atuu laluaopo sekono sangka. 24Impekokoongakono manu-manu paa-paa anu nahi porawo inii ka nahi ponsowi ka nahina goda ke si'eno, maupo kanandio Ondae Ue Ala moweeako ira kaangado. Olaiopo imelaloi ira manu-manu atuu! 25Isemake i olomiu anu hangano sala-larono mokotiangio te'asa hiku a salantumuwuno? 26Gagi, Tewala nahi imempolio meweweuo anu lalu kodei, tembio ka imesala-laroako ira mongkona anu mehano? 27#1Mok. 10:4-7; 2Taw. 9:3-6 Impekokoongakono sisi bonse, anu nahi pongkoloro ka nahi pohoru, sine Kupauakomiu: I Salomo maupo a laro luwuno marambano nahi pesangka kana tekosino aasa inso a nsisino bonse atuu. 28Gagi, tewala ewo a lere, anu oleo andio kongko ka tisomo tinende a laro api kanandiomo Doramba-rambao Ue Ala, tamoako mbo'u omiu, hei mia anu makura pompe'ala-ala! 29Gagi, Si imesala-laroakono hapa anu ta kaangamiu ke hapa ta inuamiu ka siimo isalalaro aroamiu. 30Luwuno atuu dome'ungkeo tongku i wawontolino anu nahi domento'ori Ira Ue Ala. Sine Doto'orio Amamiu, nine lano imengkereo luwuno atuu. 31Sine Ime'ungkeomo Poparentaa-Do, ka luwuno atuu ta tiniangi mbo'u ndi omiu.

32Si medoito, hei omiu bawaa kodei! Hangano Ondae Amamiu Dopemoikomo weeakomiu Poparentaa atuu.

33Ime'asaomo luwuno arataamiu ka imeweeako iramo mia memongkokolaro! Impoweweumo kadu-kadumiu anu nahi ta teberi, asa arataa anu nahi ta pingko, anu nahi pokorangkuhio mia monako ka anu nahi solangio ane. 34Hangano ba isua po'iangano arataamu, i tu'ai koa mbo'u ipo'ia aroamu.”

Petangkoroa

12:35-48

(Mat. 24:43-51)

35 # Mat. 25:1-13 ”Asalakono ka impeboo ntonga mpiha ka hulumiu melanga mpiha. 36#Mrk. 13:34-36 Ka impengkenamo kana mia anu mponsisikori uedo anu mekule inso a mpetaoa, nde ba ihawe metingko-tingko a ntondo, ka doronga inungkahiako. 37Meme'ura iramo ata anu ihawe ira uedo mpedaga-dagai tempono ihawe. Kupauakomiu: Menteeano onae ta meboo ntonga ka itena ira mpentoro mpongkaa, ka onae ta aiwa mekakaako ira. 38Ka tewala onae hawe ntonga wongi ke umpeda meene ka ihawe ira mpoweweu kanandio, ka meme'ura iramo. 39#Mat. 24:43-44 Sine ka imento'oriomo andio: Tewala ito'orio umbu raha langku opia ta hawe mia monako, nahi ta mo'ineeo rahano rinongka. 40Omiu mbo'u asalakono ka impepatinda, hangano hawe-Do i Ana Manusia a tempo anu nahi imengkoo-kooo.”

41Motae i Peturu, ”Ue, omamike anu tinoo-Miu a mpotundaano atuu ke luwuno mbo'u mia?” 42Sumangki Ira i Ue, ”Gagi, isemake anu metenunu mompekakaako raha ka pande mosongka anu ta motoroo ueno gagi petewawa a luwuno atano ka ipoweeako ira kaanga a tempono? 43Me'uraomo ata, anu hinaweno ueno umanggao anggaano atuu, tempono ihawe ueno atuu. 44Kupauakomiu: Menteeano onae ta motoroo ueno atuu gagi puu mpodagai luwuno arataano. 45Sine, tewala ata atuu mosa'o ka motae i laro aroano: Ondae ueku nahi dohori hawe, ka i'amba mompu'u tumunduhi ira ata tama ka beine, ka ipongkaa ka mo'inu ranta molangu, 46ka ueno ata atuu ta hawe a oleo anu nahi koo-kooo, ka a tempo anu nahi to'orio, ka ta mepateo ka iweweuo mengkena kana teweweudo mia anu nahi dompetenunu. 47Ndiomo ata anu tumo'orio po'eheno ueno, sine anu nahi pepatinda ke nahi weweuo hapa ineheno ueno, onae ta montarima hadio pontuduhi. 48Sine ba isema nahi to'orio po'eheno ueno ka iweweuo hapa anu asalakono ka itinunduhi, onae ta mohawe tedei potunduhi. Sompo mia anu ndi onae hadio ipinowee, inso ndi onae ta hadio inema, ka ndi sema anu hadio ipine'ala-alaako, inso ndi onae ta lalu hadio mbo'u inema.”

Ondae i Yesu mowawa teponsiaa

12:49-53

(Mat. 10:34-36)

49”Ongkue hawe montende api i tolino ka tedoa Kuperorohio api atuu melangaomo! 50#Mrk. 10:38 Ongkue asalakono binaho, ka tedoa masusa aroa-Ku, se'eluno mongkona atuu iwineweu! 51Potaemiu, nine hawe-Ku mowawa sintuwu i wawontolino? Naahi, Kupauakomiu, komba sintuwu, tendeano teposisalaa. 52Hangano mompu'u kanandio-andio ta hina teposisalaa olono olima mia i larono aasa raha, otolu mo'ewai orua ka orua mo'ewai otolu. 53#Mik. 7:6 Ira pada nteposisala, ama umewaio anano tama ka ana ntama umewaio amano, ine umewaio anano beine ka ana anu beine umewaio ineno, poni anu ine umewaio poni ana anu beine ka poni ana anu beine umewaio ponino anu ine.”

Pompetondonia tempo

12:54-59

54 # Mat. 16:2-3 Dopotae mbo'u i Yesu a mia hadio, ”Tewala imengkitao seru mewuatako i sumooano oleo ronga komiu mpotae: Ta metii usa, ka lano gagi koa ntu'u. 55Ka tewala imengkitao angi selata mepuuri, mpotae komiu: Ta tedoa mokula oleo, ka mongkona atuu lano gagi. 56Hei mia mpo'onde-onde, rupano tolino ka langi imento'orio mpetondonio, tembio ka nahi impokompetondonio tempo andio?

57 # Mat. 5:25-26 Ka tembioke nahi upakosio mbo'u omuemu hapa anu mentee? 58Hangano, tewala omue saru anu umewaiko lumako me'aro a anu moparenta, pari-pariomo pesintuwuakono da i laansala, ka si wawako a mpuu mpobitara ka puu mpobitara meweengakomu a mpuu mpodagai torungku ka puu mpodagai torungku metendeakomu a laro torungku. 59Kupauakomiu: Nahi komeluarako inso i ra'ai, ba napi u'owahio pasuamu hawe ka ileso.”

Currently Selected:

I LUKASI 12: XMZ

Highlight

Copy