I LUKASI 10

Ondae i Yesu montena pitu pulu ana guru

10:1-12

1Ka i'amba umarino atuu Ondae i Ue montiso pitu pulu ana guru anu susua, ka Do'amba tumena ira mpe'oru-orua mese'elungi Ira a sompo kota ka po'ianga anu Ira lumakoario. 2#Mat. 9:37-38 Dopotaeako ira, ”Sowia lano hadio, sine anu mpo'angga tedei. Onaemo pu'uno impo'emamo a Ueno sowia, ka Dopontena anu me'anggao sowia atuu. 3#Mat. 10:16 Imelakomo, menteeano Kutena komiu kana ana bimba i tonga-tongano serigala. 4#Mat. 10:7-14; Mrk. 6:8-11; Luk. 9:3-5 Siimo impowawa kadu-kadu ke pebaku ke sapatu, ka si mpetabe maupo ndi sema a laro pelempaa. 5Tewala komiu mpewinso aasa raha, impotae koa ari: Rodoa tiano raha andio. 6Ka tewala i tu'ai hinao mia anu tekona montarima rodoa, ka petabemiu atuu ta mo'ia ndi onae. Sine tewala naahi, petabemiu atuu mekule ndi omiu. 7#1Kor. 9:14; 1Tim. 5:18 Impo'iamo a raha atuu, impongkaamo ka mpo'inu hapa anu domeweeakomiu mia, hangano asa mia anu mo'angga tekona ipohawe tambono. Siimo impelimba-limba raha. 8Ka tewala mpewinso komiu a laro aasa kota ka mentinarima komiu i tu'ai, impongkaamo hapa anu imempinatindaako, 9ka impokotompa iramo mia memahaki anu mekongko i tu'ai ka imempauako iramo: Poparentaa-Do Ue Ala umpedaomo ndi omiu. 10#Tin. 13:51 Sine tewala mpewinso komiu a laro aasa kota ka nahi imentinarima i tu'ai, imelakomo a luwuno sala langkaino kota atuu ka impebooliakono: 11Pampawuno mbo'u kotamu anu metako a ngkarumami, kimentapisio i aromiu; sine ka imento'oriomo andio: Poparentaa-Do Ue Ala umpedaomo. 12#Teg. 19:24-28; Mat. 10:15; 11:24 Kupauakomiu: a oleo atuu Sodomo ta monongkoopo pinembasaino sekonopo kota atuu.”

Ondae i Yesu kumuahakono ba opia kota

10:13-16

(Mat. 11:20-24)

13 # Yes. 23:1-18; Yeh. 26:1–28:26; Yoe. 3:4-8; Amo. 1:9-10; Sak. 9:2-4 ”Masolakomo Korasi! Masolakomo Besaida! Hangano tewala i Tirusi ka i Sidoni gagi anu mengkinohali-haliako anu gagiomo i tonga-tongamiu, tehineomo dontepidi ka mpo'inombo. 14Sine i tempono pobitaraa, tinembino Tirusi ka Sidoni ta monongkoopo sekono tinembimiu. 15#Yes. 14:13-15 Ka omue Kapenau, nde kotinandeke hawe i langi? Naahi, Omue kopinotii hawe a mpo'iangado mia mate!

16 # Mat. 10:40; Mrk. 9:37; Luk. 9:48; Yoh. 13:20 Ba isema merorongeakomiu, Ongkuemo pinerorongeakono; ka ba isema nahi tarima komiu, Ongkuemo anu nahi tarimao; ka ba isema nahi tarima Aku, onae nahi tarima Ira anu tumena Aku.”

Pekuledo pitu pulu ana guru

10:17-20

17Ka i'amba ana guru pitu pulu atuu mpekule memawongko ka dompotae, ”Ue, luwuno mbo'u onitu nsa'o mpe'urumako ndi omami hangano nee-Miu.” 18Ka do'amba motaeako ira i Yesu, ”Kukitao i Mosa'o tedonta kana koliki inso i langi. 19#Pud. 91:13 Menteeano Kupowee komiumo pabawa ka impolanda ule ka kasi-kasi molea ka pabawa ka imenangio rosono iwali, ranta nahina anu ta sumolangi komiu. 20Sine maupo kanatuu si mpo'unde hangano onitu nsa'o atuudo mpe'urumako ndi omiu, sine impo'undemo hangano neemiu hinao teburi i suruga.”

Pontarimakasi ka me'uraa

10:21-24

(Mat. 11:25-27; 13:16-17)

21I tempo koa mbo'u atuu mawongkoomo aroa-Do i Yesu a laro Penaa Mempori ka Dopotae, ”Montarima kasi Aku ndi Omiu, Ama, Ueno langi ka tolino, hangano luwuno atuu Iwuniako ira mia pande mposongka ka mia mempande, sine Ipokomengkaao a mia kodei. Oo Ama, onaemo atuu anu pinemoiko-Miu. 22#Yoh. 3:35; 10:15 Luwuno Dopeweengakonomo Ama-Ku ndi Ongkue ka nahina maupo te'asa mia anu tumo'orio isemake i Ana sangkadio Ondae i Ama, ka isemake Ondae i Ama sangkadio i Ana ka mia anu Dopemoikoo Ana atuu mokomengkaao ndi onae mongkona atuu.”

23Umarino atuu mewolili Iramo i Yesu a ana guru-Do butu ndi ondae ka Dopotae, ”Me'uraomo mata anu kumitao hapa anu kinitamiu. 24Hangano Kupauakomiu: Hadio nabi ka mokole mingki mengkitao hapa anu kinitamiu, sine nahi domengkitao, ka mingki merongeo hapa anu rinongemiu, sine nahi domerongeo.”

To Samaria anu me'aroa

10:25-37

25 # Mat. 22:35-40; Mrk. 12:28-34 Pohona mentadeomo asa anu monto'ori Taura ta umara-arahako Ira i Yesu, ipotae, ”Guru, Hapa kupoweweu ka kupohawe tuwua anu nahina tampulaano?” 26Dosangkio i Yesu, ”Hapa anu teburi a laro Songka? Hapa anu binasamu i ra'ai?” 27#Ima. 19:18; Win. 6:5 Sumangki mia atuu, ”Pehohawa Iramo i Ue, Ue Alamu, tompaano aroamu ka tompaano sumangamu ka tompaano rosomu ka tompaano pinewowolomu, ka pehohawaomo pe'asa miamu kana koroimu.” 28#Ima. 18:5 Dopotaeakono i Yesu, ”Sangkimu atuu mentee, weweuomo kanatuu, asalakono kotuwu.” 29Sine ta mokomenteeo koroino mia atuu motaeako Ira i Yesu, ”Ka isemake pe'asa miaku?” 30Sumangki Ira i Yesu, ”Hinao asa mia anu metii inso i Yerusale lumako i Yeriko; onae domentowokio puu mporontu anu komba butu melolohio sangkano, sine dimentunduhio mbo'u ka umarino atuu melako mebintao ilawu mate. 31Komoikoano hinao aasa sando mpesomba metii telalo a nsala atuu; ikitao mia atuu, sine ilaloo inso i asambalino sala. 32Kanatuu koa mbo'u aasa to Lewi hawe a mpo'ianga atuu; mansano ikitao mia atuu, ilaloo inso i asambalino sala. 33Ka i'amba hawe aasa to Samaria i tu'ai, anu kontongaano a laro mpelempaa; ka mansano kumitao mia atuu, teleluomo aroano mehohawao. 34Ilako dumaduo ka i'amba walu ira mobelano, umarino sumiwuiakono lana ka anggoro. Ka i'amba wuatakono mia atuu a wawo ngkalide pesawiano ka i'amba wawao a mperatoa ka ipekakaakono. 35Tisomono ipeweengakono orua dinare a ueno peratoa atuu, ipotae: Pekakaakono temoiko ka tewala inolimu torea inso a doi andio, aku koa umeuo, tempono kupekule. 36Isemake i olodo otolu mia andio, montonda pohawemu, onaemo pe'asa miano mia anu tinowokido puu mporontu atuu?” 37Sumangki mia atuu, ”Mia anu mopokitaomo pompehohawano ndi onae.” Dopotaeakono i Yesu, ”Lakomo, ka weweuomo kanatuu!”

I Maria ka i Marita

10:38-42

38 # Yoh. 11:1 Tempono Ondae i Yesu ka ana guru-Do a laro pelempaa, hawe Iramo a aasa inia. Asa beine anu meneeako i Marita tumarima Ira i rahano. 39Beine atuu hinao pepaekompono asa mia anu meneeako i Maria. I Maria andio mentoro umpeda a ngkaru-Do i Ue ka merorongeakono mpiha pinau-Do, 40sekono i Marita mepui-puika ntu'u mompekakaako. Irangkuhi Ira i Yesu ka ipotae, ”Ue, nahi Iperiooke, pepaekompoku mo'inee aku mo'angga asa-asaku? Itenaomo ka itulungi aku.” 41Sine Dosangkio i Ue, ”Marita, Marita, omue sala-laro ka hadio rupa minasusaakomu, 42Sine butu aasa anu kinere: I Maria mo'alomo tiano anu lalu moiko, anu nahi ta inala inso ndi onae.”

Currently Selected:

I LUKASI 10: XMZ

Highlight

Copy