I LUKASI 9

Ondae i Yesu tumena ira hopulu ka orua ana guru

9:1-6

(Mat. 10:5-15; Mrk. 6:7-13)

1Onaemo ka Dopoboi ira i Yesu hopulu ka orua ana guru-Do, ka Do'amba moweeako ira roso ka pabawa ka domempabawai ira onitu nsa'o ka dompokotompao luwuno haki. 2Ka Dotena ira mempaleleo Poparentaa-Do Ue Ala ka mpompokotompa mia, 3#Luk. 10:4-11 Dopotaeako ira, ”Si mpowawa hapa-hapa a laro pelempaamiu, si mpowawa tuko ke pebaku, roti ke doi, ke lemba te'orua. 4Ka tewala mentinarima komiumo a laro aasa raha, impo'iamo i tu'ai hawe ka impelungka inso i tu'ai. 5#Tin. 13:51 Ka tewala hinao mia anu nahi behe tumarima komiu, impeluarakomo inso i kotado ka imentapisiomo pampawu inso a ngkarumiu gagi pepopoto'ori ndi ondae.” 6Ka i'amba melako iramo ka domesompoo luwuno inia kontongaado mempaleleo Lele Mawongkoa ka mpompokotompa mia mahaki a luwuno po'ianga.

I Herode ka Ondae i Yesu

9:7-9

(Mat. 14:1-12; Mrk. 6:14-29)

7 # Mat. 16:14; Mrk. 8:28; Luk. 9:19 I Herode, mokole i asa ntia wita, rumongeo luwuno anu gagi atuu ka nami rodo aroano, hangano hinao mia pauo, nine i Yohane mewanguomo inso i olodo mia mate. 8Hinao mbo'u anu pauo, nine i Elia waliomo mesabaako, ka hinao mbo'u anu pauo, nine aasa inso a luwuno nabi nse'elu mewanguomo. 9Sine motae i Herode, ”I Yohane ku'impahiomo uluno. Isema tokoa Ondae andio, anu leleno weweu ira mongkona anu kanandio?” Ka i'amba mo'ungke sala ka ipokontepohaweako Ira i Yesu.

Ondae i Yesu mompaka lima nsowu mia

9:10-17

(Mat. 14:13-21; Mrk. 6:30-44; Yoh. 6:1-14)

10Mansado mpekule tinena atuudo domentutuluako Ira i Yesu hapa anu dome'anggaomo. Ka Do'amba i Yesu wawa ira ka mpeliahako a aasa kota anu meneeako Besaida, ranta butu koa ondae peronga-Do. 11Sine domento'orio mia hadio, ka do'amba mentonda Ira. Dotarima ira ka Dopopauako ira mongkona Poparentaa-Do Ue Ala ka Dopokotompa ira mia anu mpokere tompaa.

12I tempono mompu'uomo wongi mehawe iramo hopulu ka orua ana guru-Do ndi Ondae ka dompotae, ”Itena iramo mia hadio atuu ka domelako a luwuno inia petengi-tengino andio, ka dompo'ungke peratoa ka kaanga, hangano i ndi'ai mpo'ia kita a boni-boniano.” 13Sine Dopotaeako ira, ”Asalakono ka imempaka ira!” Mesangki ira, ”Anu hina ndi omami butu roti olima ka bou orua, sangkadio ba kami melako mpo'oliako ira kaanga luwuno mia hadio andio.” 14Hangano i tu'ai hinao bara'ura lima nsowu mia tama. Ka Do'amba motaeako ira ana guru-Do, ”Imentena iramo ka dompentoro mpelimbu-limbu, bara'ura telima pulu mia asa mpelimbua.” 15Domeweweuo ana guru ka domentena ira luwuno mia hadio atuu mpentoro. 16Ka mansa-Do umalao roti olima ka bou orua atuu, mentombu Ira i langi, Doronsoo, ka Do'amba sumiba-sibao roti atuu ka Doweeako ira ana guru-Do ka domentia-tiaako ira mia hadio. 17Ka luwudo mpongkaa ranta mowohi. Ka i'amba pinumpu siba-sibano roti anu torea hopulu ka orua baki hadiono.

Mangakuno i Peturu

9:18-21

(Mat. 16:13-20; Mrk. 8:27-30)

18Pohona Ondae i Yesu mekakai asa-asa-Do, mehawe iramo ana guru-Do ndi Ondae. Ka Do'amba sumikeno ira, ”Dompotae mia hadio isemake Ongkue andio?” 19#Mat. 14:1-2; Mrk. 6:14-15; Luk. 9:7-8 Mesangki ira, ”I Yohane Puu Mpobaho, hinao mbo'u anu mpotae: i Elia, hinao mbo'u anu mpotae, nine mewanguomo asa mia inso a nabi nse'elu.” 20#Yoh. 6:68-69 Mesikeno Ira i Yesu ndi ondae, ”Montonda omiu, isemake Ongkue andio?” Sumangki i Peturu, ”I Mesia inso ndi Ondae Ue Ala.” 21Ka Do'amba i Yesu umonto ira ntu'u, ka si domempauo mongkona atuu maupo ndi sema.

Amba-ambano Dopauo i Yesu mongkona tebobarasai-Do ka ba kana'upe pesalaa tumonda Ira

9:22-27

(Mat. 16:21-28; Mrk. 8:31–9:1)

22Ka Dopotae i Yesu, ”I Ana Manusia asalakono mompembasai hadio marasaia ka nahi domentarima Ira mia memota'u, petewawado sando mpesomba ka guru agama, ka Do'amba pinepate ka winangu a oleo ko'otolu.” 23#Mat. 10:38; Luk. 14:27 Dopotaeako ira luwu, ”Sompo mia anu ta tumonda Aku, asalakono ipebungkuio koroino, po'ahao keu pinotambano sompo oleo ka itonda Aku. 24#Mat. 10:39; Luk. 17:33; Yoh. 12:25 Hangano ba isema ta kumaduduio penaano, ta tetadi penaano; sine ba isema tetadi penaano hangano Ongkue, onae ta kumaduduio. 25Hapa tuduno asa mia humaweo asa wawontolino, sine ipepateo ke mokorugio koroino onaeno? 26Nde ba isema mokoko'ii hangano Ongkue ka hangano pau-Ku, i Ana Manusia mbo'u Ira mokoko'ii hangano mia atuu, ba Dohawe te'ipua a laro maramba-Do ka a laro maramba-Do i Ama ka luwuno mala'eka mempori. 27Kupauakomiu: Menteeano i olodo mia anu mekongko i ndi'ai hinao anu nahi ta mate ba napi domengkitao Poparentaa-Do Ue Ala.”

Ondae i Yesu pinokomaramba a wawo ntorukuno

9:28-36

(Mat. 17:1-8; Mrk. 9:2-8)

28 # 2Pet. 1:17-18 Bara'ura ta te'oalu oleo umarino luwuno pompaguru atuu, Ondae i Yesu wawa ira i Peturu, i Yohane ka i Yakobu, ka Do'amba mporake lumako a wawo ntorukuno ka Dopekakai. 29Tempono kontongaa-Do mekakai, tadeno rupa-Do baali ka sangka-Do gagi mopute tesosangkilo. 30Ka tengkitaomo orua mia mepauako Ira, onaemo i Musa ka i Elia. 31Orua ira meposaba a laro marambaa ka mepau mongkona lako-Do anu Ira umihiio i Yerusale. 32Tempo atuu i Peturu ka wali-walino ntekoturi iramo ka mansado ntelike domengkita Ira i Yesu a laro maramba-Do: ka orua mia anu mentade umpeda ndi Ondae atuu. 33Ka tempono orua mia atuu iramo binta Ira i Yesu, motae i Peturu ndi Ondae, ”Guru, tedoa kami meme'ura mekongko a mpo'ianga andio. Moikoomo kanandio-andio kimpowangu te'otolu kema, aasa tia-Miu, aasa tiano i Musa ka aasa tiano i Elia.” Sine nahi to'orio i Peturu hapa anu pinauno atuu. 34Kontongaano mepau kanandio, haweomo seru umengoi ira. Ka tempono dompewinso a laro nseru atuu, medoito iramo. 35#Yes. 42:1; Mat. 3:17; 12:18; Mrk. 1:11; Luk. 3:22 Ka terongeomo suara inso a laro nseru atuu, anu motae, ”Ndiomo Ana-Ku anu bininiki-Ku, imperorongeako-Nomo.” 36Tempono iteronge suara atuu, tengkita Iramo i Yesu Ondaemo koa asa-asa-Do. Ka domerahasiao ana guru atuudo, ka i tempo atuu nahi domentutuluo maupo ndi sema hapa anu domengkitaomo atuu.

Ondae i Yesu sumaario onitu nsa'o inso a aasa nana'ote anu mahaki

9:37-43a

(Mat. 17:14-21; Mrk. 9:14-29)

37Tisomono tempono Dopetii inso a ntorukuno atuu, mehawe iramo mia hadio ntehuhu ntepohaweako Ira i Yesu. 38Asa mia inso a mia hadio atuu mebooli, ipotae, ”Guru, ku'emao ka I'aiwa kumitao anaku, hangano onae asa-asano anaku. 39Metempo-tempo ipewinsokio onitu nsa'o, ka i'amba mepobingko kumora ka onitu nsa'o atuu nggumenggetoo ranta mewure ngangano. Onae ibobarasaio mpiha onitu nsa'o atuu ka ilawu nahi behe bintao. 40Ka ku'emaomo a ana guru-Miu ka domensaario onitu nsa'o atuu, sine nahi domempolio.” 41Onaemo ka Dopotae i Yesu, ”Hei omiu mia anu nahi mpompe'ala-ala ka anu ntepopo'oo, ta te'opiapo mbo'u tehineno Kupo'ia i olomiu ka sabara ndi omiu? Wawaomo anamu atuu ramai!” 42Ka tempono nana'ote atuu umpedaako Ira i Yesu, onitu nsa'o atuu mobangkuo a wita ka inggenggetoo. Sine Ondae i Yesu kumuahakono onitu nsa'o atuu ka Dopokotompao nana'ote atuu, ka Do'amba mokuleo a amano. 43aKa mengkohali-hali iramo mia atuudo hangano langkaino pabawa-Do Ue Ala.

Kompenduano ipinau mongkona tebobarasai-Do i Yesu

9:43b-45

(Mat. 17:22-23; Mrk. 9:30-32)

43bTempono luwu mia atuudo da mengkohali-haliakono luwuno anu wineweu-Do atuu, Dopotaeako ira i Yesu ana guru-Do, 44”Imerongeomo ka impe'ihilaroo luwuno pau-Ku andio: I Ana Manusia Ira pineweengako a ngkaedo mia.” 45Nahi dompokonto'orio pinau-Do atuu, hangano pengkonaano tewuni ndi ondae, onaemo ka nahi dompokonto'orio. Ka nahi domensapa mpesikenoakono pengkonaano pau atuu ndi Ondae.

Isema anu lalu langkai i olodo ana guru

9:46-48

(Mat. 18:1-5; Mrk. 9:33-37)

46 # Luk. 22:24 Ka gagiomo pegagaa i olodo ana guru-Do i Yesu mongkona isemake anu lalu langkai i olodo. 47Sine Doto'orio i Yesu pinewowolodo. Onaemo pu'uno ka Do'alao aasa nana'ote kodei ka Donaao i hori-Do, 48#Mat. 10:40; Mrk. 9:37; Luk. 10:16; Yoh. 13:20 ka Dopotaeako ira, ”Ba isema anu tumarimao nana'ote andio a nee-Ku, Ongkuemo tinarimano; ka ba isema tumarina Aku, Ondaemo anu tumena Aku tinarimano. Hangano anu lalu kodei i olomiu luwu, onaemo anu lalu langkai.”

Asa mia anu komba ana guru-Do i Yesu monsaari onitu nsa'o

9:49-50

(Mrk. 9:38-40)

49Motae i Yohane, ”Guru, kimengkitao asa mia monsaari onitu nsa'o a nee-Miu, ka ki'amba me'ontoo mia atuu, hangano komba itonda kita.” 50Dopotaeakono i Yesu, ”Si me'ontoo, hangano ba isema nahi ewai komiu, onae walimiu.”

Ondae i Yesu ka to Samaria

9:51-56

51Mansano tamo haweako tempono Ondae i Yesu winuatako i suruga, Dopo'aroo pengkita-Do Ira lumako i Yerusale, 52ka Dotena ira ba opia mia tinena mese'elungi Ira. Ondae atuu melako, ka Do'amba mpewinso a aasa iniado to Samaria ka dompopatindaako Ira luwuakoano. 53Sine to Samaria atuudo nahi domebehe tumarima Ira, hangano pelempaa-Do te'aro i Yerusale. 54#2Mok. 1:9-16 Tempono orua ira ana guru-Do, onaemo i Yakobu ka i Yohane kumitao teweweu atuu, dopotae, ”Ue, behe Komiuke, ka kimpotena api metii inso i langi ka ipepate ira?” 55Sine mewolili Ira ka Dokuahako ira. 56Ka do'amba melako a inia susua.

Mongkona tumonda Ira i Yesu

9:57-62

(Mat. 8:19-22)

57Tempono Dopotilaloakono i Yesu pelempaa-Do ka ana guru-Do, a ntonga nsala motaeomo asa mia ndi Ondae i Yesu, ”Aku tumonda Komiu, maupo isua Ilako.” 58Motae Ira i Yesu ndi ondae, ”Serigala hinao aano ka manu-manu hinao senono, sine i Ana Manusia nahina pepombolea-Do.” 59Ka Do'amba motaeakono asa mia susua, ”Tonda Akumo!” Sine motae mia atuu, ”I'eheakune ari lumako kumaburu ira amaku.”

60Sine motae Ira i Yesu ndi onae, ”Po'ineeomo mia mate kumaburuo mia mate; sine omue, lakomo ka paleleomo Poparentaa-Do Ue Ala i sua-suamo koa.”

61 # 1Mok. 19:20 Ka asa mia susua mbo'u motae, ”Aku tumonda Komiu, Ue, sine I'eheakune ari lumako pauako ira somboriku.” 62Sine Dopotae i Yesu, ”Sompo mia anu tetinda ta mompadeko sine mewolili i bungkuno, nahi tekona a Poparentaa-Do Ue Ala.”

Currently Selected:

I LUKASI 9: XMZ

Highlight

Copy