Lakbogogi Wene 15
15
O Yerusalem homagagwa wene
1Akoma werekma, ap ambetap o Yudea en o Andiyokia unggu lagagwarik, nenaswei Ala aburi andoma mamulirugu dugwit, “At Musa en, ‘Ap enagamut mbalup wene yukneragagi ako andi, wane-wane hit okbigitek halok, henagap wendarisogonbuk,’” yiluk, mamuleragagi. 2Wene anderogo mamuleragagwarikmu, it Paulus Mbarenabas akoen, it Yudea en unggugwa ako inim wene winimuk abirirup erogo yugu dugwit danggok-danggok yagagwa. Yugu lagagwama iperen inim, it Andiyokia menda avyarat umbutugwa ambetap inim, denogo bisiluk, yugurugu dugwit, “Hit Yerusalem lagu dogomundik, it lakbigik menda ako inim, Ala aburi enasini ako inim, wene andi hinim mbalilales,” yiluk yugeragagwa.
3Yugurugu lagagwarik, it Ala aburi andoma homago akoen lakbugu lagagwama, o Venisia, Samaria inim, ya nonggegek lagu dugwit, it weram Yakuri dek menda enomaduk mbobaluk Ala wene wogogwa ako, mbilinogo yugeregek lagu dugwit, nenaswei Ala aburi andoma agarwik ako enendawi adenggen wisane okbisilin lagagwa. 4Okbisilin it ako o Yerusalem nunggugu lagagwama, it Ala aburi o Yerusalem homago inim, it lakbigik menda inim, it Ala aburi enasini inim, akoen heyaga wakbugu lagagwama, “Ala en okbininggu hegek anderogoat ogagyo,” yiluk, ovok erogo mbilinogo yugeragagwa. 5Mbilinogo yugeragagwa ovara, it Varisi menda Yesus wene avyarat umbutugwa nin akoen mendok yugu lagagwarik, “Dek o. It weram menda ogo, enagamut mbabaluk, Ala wene Musa dirup watigi ako ogagu dogopwak yiluk yugeraup,” yiluk, yugeragagwa.
6Yugurugu lagagwama, it lakbigik menda inim, it Ala aburi enasini inim, wene andi mbaluguluk, homagagwa. 7Wene ako wisane erogo mbanggugwarikmu, at Peterus mendek iri lagagirik, yugirigya dugwit, “Naswei. O muk erogo Ala en, it weram Yakuri dek menda Sek Wene hobaluk avyarat ombarupwak yiluk, yugeregek lagya dogogiluk, denogo baninggigi ako hinilup. 8Avakwa enendawi Ala ovok ilup atma, it ap weram menda ogo, Averiniki nit wokneragagi ako hak, it wogeragagi. Andi vaga, Ala en it ap weram Yakuri dek menda At aburi okbigas ako yedok helagwi. 9Ala en, it yi iya, it andi meyan, nenombasigadek, nit ovok ndatak nenombasiga atma, it ogo, enendawi Yesus avyarat ombasagwi vaga enomaduk degerogo bisaliga.”
10“Anderogo atma, nit ninim, nenasini-nenombawi inim, Musa wene anggin nenovaga durik hegek ogarup mondok meyan hugu lagagup ako, hit yogak nggarogo yiluk wene andi, it Yesus ane welagwi menda anggin enovaga durogo bisiluk, Ala nggarogo okbugu hamwi, yiluk, avut mbaluguluk yagalagwi? 11Enagap wendarup andi, anderogo dek! Nit Nenowa Yesus nenabwa en okbininaliga andi vaga, nit avyarat umbutu niniselok, nenagap wendakninivisiga hak, it weram Yakuri dek menda ogo anderogo avyarat umbutuselok, enagap wendaginivisiga, yiluk, avyarat ombasagwi o,” yugeragagi.
12Yugirigya lagagimu, it ap homagagwa ako ovok enanedek mbup yugu lagagwarik, enaruk hunggusigik, Mbarenabas Paulus en yugurugu dugwit, Ala en okbugu hegek, it weram Yakuri dek menda ovara, enanggelekma inilup arup enalon werek menda ogagwi, nggarogo ogarubuk menda ogagwi, ogagagwa wene mbilinogo yugeragagwa. 13Wene andi, enaruk hunggu lagagwarik, Yakobus en it lakbigik menda inim, it Ala aburi enasini inim, yugirigya dugwit, “Nowa-nasin. An nane yukheraliga yi, henaruk holes. 14Ala en endak it avakwa weram Yakuri dek menda enanggelekma en nin At aburi denek belalogo miginipigi wene ako Simon#15:14: Simon andi ap Peterus ako. en mbilinogo yukneraga.”
15“Wene Simon yukneraga andi, it navi-navi Ala yugirigya hegek yagagwa menda dirup watugwa ako wane-wane-at yukneraga. Dirup watugwa ako andi ambi yi:
16-18 #
Amos 9:11-12 bikhanes. ‘Eke, hivis An wagya dogomindik,
it Iserali agako higirek, avakwa enanggelekma agarwik ako inim,
eke, it avakwa weram Yakuri dek menda An naburi denek dogopwak yiluk yanggup yugeragagis ovok erogo inim, it akoen
Enasin Ala An namusek wagu dogopwak yiluk,
Daut awi valek masalagagi ako#15:16-18: Adem Daut awi valek masalagagi akoandi, at Daut inis ombok werek hegek, it avakwa Iserali menda at avema sek welagagwa ovara, Daut hambigya hegek ap ambi hivis avoloma mondok iri hegek adik-adik sak yagagwa. Andi vaga, o danggop agagi halok, it navi-navi en wene wakhegek Daut awi valek masalagagi yagagwa. avoloma vanggya,
o danggop avoloma vanggya dugwit, endak valek welagagi hak ogarogo bagya,
ogarisogon.
At anderogo ogasiga menda o muk yagagi ako Henasin Ala enat yagagirikmu, yukheraliga o,’
yiluk, yugeragagi wene dirup watugwa atma, yukheraliga.”
19Yakobus en ambi yugirigya dugwit, “Dirup anderogo watugwarikmu, an ombasiga andi, it weram Yakuri dek menda enasam helok Ala wene welagwi ako, enendawi anggin erogo okbisaup dek ovara, 20nit un surat vaga dirup watu dugwit, ‘Wam madis anggom warek naup moga. Wanggi waup moga. Yi menda ndi menda honak warek amuya winggitek hegek naup moga. Amuya naup moga,’ yiluk, dirup warogo wogerasogom. 21Musa wene ako o muk en yogak yi hudi yi awi ndi awi ndugurek-ndagarek Yakuri samban ogasagwi vaga it samban ogasagwima bikhegek yugerelagwi atma, dirup anderogo warogo wogeraup sek ombasiga,” yiluk, yugeragagi.
It avakwa weram Yakuri dek menda enake dirup watugwa wene
22Yugirigya lagagimu, it lakbigik menda inim, it Ala aburi enasini inim, Ala aburi andoma homagu lagagwa ovok erogo inim, “Paulus Mbarenabas iperen nit yoma menda inim denogo o Andiyokia lakbisasogom o,” yiluk, Ala aburi enasini ap ombok-ombok ambi Yudas, inis ambi Mbaresabas inim, ap ambi Silas inim, denogo bogogwa. 23Denogo bisiluk, dirup watu dugwit:
“Nenaswei wa.
Henaswei nit lakbigik menda inim, Ala aburi enasini inim, akoen nenaswei hit Yakuri dek menda avyarat ombasagwi o Andiyokia, Siria inim, o Kilikia inim, hit andoma agipik ovok erogo wa yukherelagwi.
24It nin ninim welagagup ako, niren yugeregetek hegek, henadema wagu lagarwik, yukhirugu dugwit, “At Musa en, Ap enagamut mbalup wene yukneragagi ako andi, wane-wane hit okbigitek halok, henagap wendarisogonbuk,” yiluk, yukheragao ako vaga, henendawi weyak okbugugu lagaoma, henendawi anggin agipik ako, nenaruk hunggup. 25-26Nenaruk hunggurikmu, yogak nit homagu dugwit nenendawi ambiat okbaluk, ap ambetap denogo bisiluk henadema lakbigiga wendagwi. It ako nenaswei nenendawi hunik Paulus Mbarenabas ako, Nenowa Inis Ombok Yesus Keretus ake yiluk enalon dek hambup segat umbutu dugwit Ala wene yugeregek nelagwi menda inim lakbisa wendagwi. 27Anderogo atma, it ap Yudas Silas en dirup warek yi wane-wane mbilinogo yukherapwak yiluk wolok lakbigiga wendagwi. 28Ala Averiniki ninim en hit ogagu dogop imbito ako andi, nit Yakuri nenombawi ogagu lagagwa mamulik menda ako anggin menda ambi inim henovaga durogo bigigitek, un ogarup menda halok adigat ogagu dogop imbito ako yiat: 29Madis anggom warek nunggwi, amuya nunggwi, yi menda ndi menda honak warek amuya winggitek hegek, ugun nunggwi, wanggi wugwi, ogasagwi ako, mondok ogarubuk. Mondok ogagetek halok andi, hit mondok segat ogagu dogosogom.
Wene andiat yukhirigyo o, nenaswei wa,”
yiluk, dirup warogo, it ap 4 ako inim lakbogogwa.
30Lakbugu lagagwama, o Andiyokia nunggugu lagagwarik, it Ala aburi andoma ako homakbisiluk, dirup warek andi wogeragagwa. 31Wogurugu lagagwama, bikhugu dugwit, wene enendawi aik warogo dirup warek hugu lagagwarik, enendawi adenggen wisane agagwa. 32It Yudas Silas ogo, navi-navi Ala en yugirigya hegek yagalagwi menda atma, it enaswei Ala aburi andoma ako yi wene ndi wene wisane yugurugu dugwit, enendawi aik wakbugwis, enendawi modo okbugwis, ogagagwa. 33Andoma maren hudi welagagwarik, it enaswei Ala aburi andoma en “Yogo, hit sek erogo elalo,” yiluk, it Ala aburi enasini lakbisa wagagwa ako enadema eneyami vaga lakbogogwa. [34Lakbogogwa ako wagagwa ovara, at Silas andi, “Mbup yisogon,” yiluk, andoma-at mbup yagagi.]
35It Paulus Mbarenabas iperen o hunogoma lagetek, o Andiyokia andoma dugwit, it inim, ap nin wisane inim, Nenowa Inis Ombok Yesus ogagya lagagi wene ako yugeregek lagu dugwit mamulirugu lagagwa.
Paulus Mbarenabas wenemuk yugu dugwit enadik agagwa wene
36Akoma welagagwarik, hivis Paulus en Mbarenabas yugugu dugwit, “Yi awi ndi awi Nenowa Inis Ombok Yesus wene ako yugeregek nagu lagagurikmu akoma, nenaswei Ala aburi ako, ‘Nggarogo inisamwi?’ yiluk, biginigik lasogom o,” yiluk, yugogogi. 37Yugugu lagagimu, at Mbarenabas en, Yohanes inis ambi salek Markus ako ‘Ninim lasogom,’ yagagi ovara, 38#Lakbogogi Wene 13:13 bikhanes. Paulus en, “At ninim laup meyan,” yiluk, yugugu dugwit, “Nit o Pambilia dugwit, ninim wene yugeregek laup ovara hekbiniluk winggigirikmu, at yogak ninim laup dek,” yugogogi.
39Yugugu lagagimu, it wenemuk yugu dugwit, iperen enadik agu lagagwarik, at Mbarenabas en Markus wolok mburis vaga o Sipurus lagagwa. 40Eke, at Paulus ako andi, Silas migitu lagagimu, it nenaswei Ala aburi en, “Nenasin Ala henabwa ombasiga atma, hinim lasogom,” yiluk, yugurugu lagagwama, lagu lagagwarik, 41o Siria inim, Kilikia inim, yi awi ndi awi ya nonggegek nagu dugwit, at Paulus akoen it Ala aburi homago ako enendawi wadokdek dogopwak yiluk, yugeregek nagu lagagi.
Currently Selected:
Lakbogogi Wene 15: nbq2013
Highlight
Share
Copy
Want to have your highlights saved across all your devices? Sign up or sign in
