Lakbogogi Wene 16

Timotius ako Paulus Silas inim lagagwa wene

1Yugeregek nagu dugwit, o Derebe lagya lagagirik, o Lisera lagagi. O Lisera andoma apsawe ambi Yesus ane wogogi inis Timotius. At isa andi, Yakuri menda Yesus avyarat imbitigi, eke, asin andi, Yunani menda. 2It nenaswei Ala aburi o Lisera menda inim, o Ikoniyum menda inim, Timotius andi endawi sagain helagwi atma, 3Paulus en, “Timotius niperen nagu dogosogon,” imbita lagagirik, it Yakuri o andoma menda ovok erogo Timotius asin andi, ap Yunani menda inilup atma, Paulus en agamut mbalupwak yiluk yugeragagi.

4It Paulus Timotius iperen yi awi ndi awi o kota adik-adik akoma nagu dugwit, wene it lakbigik menda inim, Ala aburi enasini inim, o Yerusalem nggatuk erogo mbanggugwa ako, it dibaluk ogagu dogopwak yiluk yugeregek nagu lagagwa. 5Anderogo yugeregek nagu lagagwa vaga, it Ala aburi o adik-adik homagu lagagwa andoma it Yesus avyarat ombasagwi ako enendawi modo agya lagagimu, ndugurek-ndagarek ambi lambo yi nonggegek ogagu dugwit, Ala aburi wisane agagwa.

O Teroas en Paulus abi hagagi wene

6Eke, at Ala Averiniki en, “O Asia andoma Ala wene yugeregek labuk,” yugirigya lagagimu, Paulus eyaganggom inim lagwi ako, o Virigia en o Nggalatia nagu lagagwarik, 7o Misia nungguguluk hudi bagaoma vanggo yi lagu lagagwarik, o Mbitinia nungguguluk ogagagwa ovara, At Yesus Averiniki en, “Nunggup,” yugeregetekma, 8o Misia hegek mbikit o Teroas nonggagagwa. 9O Teroas nunggugu lagagwarik, andoma nogo yugu dugwit, at Paulus abi vaga ap Makedonia menda ambi mendek dugwit, “Nit yonggat-ninisanok yiluk, o Makedonia yoma oma,” yiluk, nggino yugugu hagagi. 10Higya lagagirik, “Ala en nit Sek Wene ap Makedonia menda yugeregek laguluk, ninayonggo bagas higyo,” yiluk, nit mbikit laguluk vipuk ogagagup.

O Pilipi hwa Lidia avyarat imbitigi wene

11O Teroas en mburis vaga nunggugu lagagurik, mbikit o Samotarake wunggu lagagurik, o hutun, Neyapolis lagagup. 12Lagu lagagurik, o Makedonia kota eve iya ambi inis Pilipi, it ap Oroma menda en vagago welagagwarikmu akoma, nunggugu lagagurik, andoma dugwit, ndugwis maren hudi welagagup.

13It Yakuri samban ogasagwi vaga sup kota nunggwisagwima en wunggu lagagurik, “Is omban vaga samban ogasagwima ambi andoma agarik,” yiluk, lagu lagagurik, it akwa wonggalek werekma ninim hora yugu lagagurik, wene yugeragagup. 14It wene yugeragagup hunggugwa ako, hwa o kota Siyatira menda ambi yum mudu heda ndimbup-ndimbup enggen ovagak sek adigat onggo hundutu lagagi menda inis Lidia akoen Ala inis siyabaliga atma, at Paulus yugeragagi wene ako wapwak yiluk Nenasin Ala en endawi sup hurogo bagagi. Endawi sup hurogo bagagi vaga wene hidigya lagagimu, 15hwa ako at amwa agarwik menda inim ima wombabogogup. Ima wombabugu lagagumu, at hwa akoen, “Hiren, ‘Hwa yi, Nenowa Yesus avyarat embetas o,’ nembetep halok, an namwa ninim dogoguluk omanes,” yiluk, hunik adigat yuknirigya lagagimu, “E o,” yiluk, amwa nonggagagup.

O Pilipi en heda magago mabogogwa wene

16Ndugwis ambi vaga samban ogasagwima lagusim, hwavyak ap enayeloman ambi madis endawima nonggagagirikmu, at madis inis vaga wene hivis arup inunggut menda yugirigya halok yoparip wisane erogo lugurogo asini wogeraligama, suvaga ninim avuk agu lagagurik, lagusim, 17hwavyak akoen, “At Mondok Siyalek Adigat Agarik Ala ayeloman henagap wendarup wene yukhera wendagwi yi, yogisenes o,” yiluk, hwidyak yagan Paulus ninim nenambetaga wagagi. 18Anderogo adigat iri hegek, ndugwis wisane agya lagagimu, ndugwis ambi vaga at Paulus anggon imbita lagagirik, hwavyak avikit elose nomalogo madis ako yugugu dugwit, “Yesus Keretus inis vaga hwavyak yi endawima en wilinok yiluk, yukhisiga,” ao yugugu hegek, madis ako nggigilogo winggigi.

19Wunggu lagagimu, hwavyak ako asini en, “Ai! Yoparip lugurogo woknirigya dogop nenape wenggelek agurik ako dek aga o,” umbutu lagagwarik, at Paulus Silas iperen vakbisiluk, nggigiliniviluk, o pasar ogasagwima ambi agya halok wene mbalisagwima akoma enasini ap ombok-ombok enadema bisa lagagwa. 20-21It enasini ap ombok-ombok o kota vagago ako enadema bisa lagu lagagwarik, yugurugu dugwit, “Nit ap Oroma menda en ogagu dogop moga hegek, ap Yakuri yi, it ogasagwi menda mamulnirugu dugwit, nit nenawi o kota yoma nadok-hadok erogo bagu selagwi,” yiluk, yugeragagwa. 22Yugurugu lagagwarik, ap ombok homago mondok yugu dugwit, inarusogom yiluk ogagu lagagwama, enasini ap ombok-ombok o kota vagago akoen, “Enasum yirik andi libilogo bisiluk, yo vaga enares,” yugeragagwa. 23Yugurugu lagagwama, yo sagalogo initu lagagwarik, nggigilogo o lembaga mabugu lagagwarik, ap malenombogo welagagi ako, “Mondok des erogo malenombogo dogwen,” yiluk, yugogogwa. 24Yugogogwa ako aruk hunggu lagagirik, kamar ambi o ilim higirekma andoma mabugu lagagirik, inisok yo elola silup okbisiluk hekbogogi.

25Andoma werekma, o hup agako it nin heda mago andoma enaruk hunggusigik, it Paulus Silas iperen samban ogagwi, Ala inis siyabagu dugwit ndawi watwis, ogagusim, 26mbikit yukdekma o wadok ombok iri dugwit, o lembaga owak valek ako ovok wadok yagagi. Iri lagagimu mbikit sogop ovok erogo hutlagya dugwit, mbusi heda mago ovok erogo visilogo ndan yagagi. 27Ndan iri lagagimu, at ap heda mago malenombogo welagagi akoen iluk akluk, lembaga sogop hutlagagi il higya lagagirik, “It heda mago ako ovok winggao ai,” imbita lagagirik, yaga varam nggigis erogo wakhedagiluk ogagyama, 28at Paulus en, “Nasin! Hat wakhedabuk! Nit ovok erogo yoma agurik,” yiluk, ane ombok vaga yugogogi.

29Yugugu lagagimu, at heda mago malenombogo welagagi akoen, “Yunda yividiluk wolok omanes,” yugirigya lagagirik, alon en owak dede yagan vupuk Paulus Silas iperen enavema hora yi lagagi. 30Hora yi lagya lagagirik, iperen wogonombolok weram wibugu lagagirik, “Ai nasini, an nagap wendakhedagiluk, nggarogo ogarik?”

31Yugirigya lagagimu, iren yugugu dugwit, “Dek o. Hendawi Nenowa Yesus ovaga vanggabaluk avyarat imbita heyalok, hat hinim, hat hamwa agipik inim, henagap wendarisogon o,” yugogogwa. 32Yugugu lagagwarik, at inim, it avakwa at amwa agarwik inim, it ovok erogo Ala wene yugeragagwa. 33O hup andi vaga at heda mago malenombogo welagagi akoen it wogonombolok lagya lagagirik, heda mago dugwit enagamut mbalarit lagagi ako horinipu lagagimu, at inim, at amwa agarwik inim, ima wombabogogwa. 34Ima wombabugu lagagwama, wogonombolok at amwa nunggugu lagagwarik erom wogeragagi. At inim, at aburi inim, enendawi Ala ovaga vanggabaluk avyarat umbutugwa vaga enendawi adenggen wisane agagwa.

35O yanggo iri lagagimu, it enasini ap ombok-ombok o kota andok akoen, “Ap heda mago malenombogo agarik en it ap mberen heda marek ako heda visilogo wibisapwak yiluk, yugiri elales,” yiluk, it inaori enayegen werek lakbisa lagagwa.

36Lakbisa lagagwa ako yugiri lagu lagagwama, ap heda marek mabiselagwima malenombogo welagagi akoen Paulus yugugu dugwit, “Nasini o kota vagago agarwik akoen hiperen heda visilogo wibisapwak yiluk yukniri wagarukmu, wunggu dogomundik, henendawi ugunat elales.”

37Yugeragagi ovara, at Paulus en it enayegen werek yugirigya dugwit, “Dek o. Nit Oroma menda ovara,#16:37: Ap Oroma menda halok, wene hudi bago werekma, enanggadi watu dugwit enowak dilup andi moga. Eke, yawi initwis, yo vaga lobalogo bugwis ogarup andi moga. It ap nin Oroma dek menda enanggadi watu dugwit enowak dilup andi segat. Eke yawi initwis, yo vaga lobalogo bugwis, ogarup andi moga dek. At Paulus ako ap Yakuri menda ovara o kota Tarusus endaklagagirikmu, ap Oroma menda-at yugu lagagwa. Andi halok at yawi warup andi moga. adem sek erogo yenaga wokbaluk nenowak dinggitek dugwit, ombokma yo yawi nenakbaluk lembaga mabininggao atma, nit yogak yonggo yegetek mbauk erogo wibininaup yiluk yagarukmu, yagalagwi yi? Dek! Irenat nit woknenombolok wulupwak yiluk warupwak.”

38Yugirigya lagagimu, it enayegen werek en it o kota vagago agarwik enasini ap ombok-ombok ako enadema lagu lagagwarik, “Paulus Silas ako it Oroma menda hegek oginivup,” yugeragagwa ako enaruk hunggu lagagwarik, “Wi, nit weyak ogagyo,” yiluk, enalon agagwa. 39Enalon agu dugwit, it ako enadema wagu lagagwarik, “Ai, nenaswei! Weyak okbugugup atma,” yiluk, it ako lembaga en mo bisa lagu lagagwarik, “O kota yoma dogobuk. Elales,” yugurugu lagagwama, 40akoma en, wulu wagu lagagwarik, hwa Lidia amwa akoma nonggagagwa. Nunggugu lagagwarik, andoma enaswemuni nin inim dambunggu lagagwarik, enendawi aik wakbisiluk, wunggugwa.

Currently Selected:

Lakbogogi Wene 16: nbq2013

Highlight

Copy