Lakbogogi Wene 14

O Ikoniyum dugwit, ogagu lagagwa wene

1O Ikoniyum andoma en o Andiyokia ogagagwa ako wane-wane ogagagwa. Paulus, Mbarenabas iperen it Yakuri samban ogasagwima nunggugu lagagwarik, wene eve des erogo yugeragagwa vaga it Yakuri menda inim, Yunani menda inim, wisane enendawi Yesus Ala Abut denek menda ako avyarat umbutugwa. 2Avyarat umbutu lagagwama, it Yakuri nin andi “Yesus Ala abut dek atma, nenanggon,” umbutugwa akoen it weram Yakuri dek menda ako enaninis okbugu dogomundik, Yesus aburi inim ogot larupwak yiluk enendawima mabugu lagagwama, 3at Paulus Mbarenabas iperen andoma ipi erogo dugwit, enalon dek Nenowa Yesus avok vagalogo yugurugu lagagwa. Eke, vagalogo yugurugu dugwit, Ala enabwa en okbisaliga wene ako avyarat ombarupwak yiluk, Paulus Mbarenabas iperen Ala anye wogeragagi ako vaga, inilup arup enalon werek menda ogagwi, nggarogo ogarubuk menda ogagwi, ogagu lagagwa. 4It o kota andoma menda ako ogot lagu dugwit, it nin Yakuri enane wugwi, eke, it nin lakbigik menda ako enane wugwi, ogagagwa.

5Ogagu dugwit, it weram Yakuri dek menda ako inim, it ap Yakuri menda inim, it enasini ap ombok-ombok inim, enendawi ambiat okbaluk, Paulus Mbarenabas iperen nadok-hadok okbisiluk, helep vaga inarusogom yiluk, enavok mbilogo bagagwa. 6Enavok mbilogo bagagwa ovara, it okbisaup wene ako Paulus Mbarenabas iperen enaruk hobaluk, hoda o Likaoniya lagu lagagwarik, o kota Lisera inim, o kota Derebe inim, o andoma avilis ambot yanonggegek yagan lagu dugwit, 7o andoma Sek Wene yugeregek nagu lagagwa.

O Lisera, Derebe dugwit, ogagagwa wene

8O Lisera andoma ap ambi isok weyak endaklagagirikmu, isok anyedek en sup mondok lagatek welagagi. 9Ap ako at Paulus wene yugirigya aruk hunggwiam, Paulus en il vurek dugwit, “Ap yi Ala ova vanggabaluk avyarat imbita dugwit sek okbanup ombasiga,” imbita ako yedok higya lagagirik, 10at yugugu dugwit, “Hisok ngges erogo mondok iru,” yiluk, ane ombok vaga yugugu lagagimu, at ako soklok erogo mondok iri lagagirik, sup lagagi.

11At Paulus ogagagi ako, it avakwa homagagwa ako inil hugu lagagwarik, it Likaoniya enane vaga, “Madis ap ovagak agu lagaruk, ninisa wambu wagao o,” yiluk, enamitmit yagagwa. 12Enamitmit yugu lagagwarik, enomadis inis ako at Mbarenabas inis Seus sanggwis, eke, Paulus wene wisane yagaliga menda halok, inis Heremes sanggwis, ogagagwa.

13Ogagu lagagwama, ap madis Seus moga awi valek o kota weram vikit vagago welagagi akoen, “Avakwa ninim en it lakbigik menda ako enanggom warogo wogerasogom o,” yiluk, sapi nggulok inim, mbungga mudi-mudu mendago inim, sup o kota nunggwisagwima andenam wolok wagagi. 14Wogeraguluk ogagusigik it lakbigik menda Mbarenabas Paulus iperen enaruk hunggu lagagwarik, enasum yirik libilogo baluk, ap wisane homarek werekma vupuk nunggugu lagagwarik, enane ombok vaga yugurugu dugwit, 15“Hit ap yoma wai! Nit eve ap hit ndatak atma, hit nggarogo yiluk yerogo ogasagwi? Hit yi ogagek ndi ogagek enam warogo ogasagwi menda yi, mbobaluk, At mbogot inim, wen inim, inamut yanggadek inim, yi menda ndi menda ovok erogo Ala iluk agarik akoen bagagi At awene wavovok yiluk, Sek Wene wolok yukhera wagyo hegek ovara, hit yoma nggayok ogasagwi.”

16“O muk en, yogak yi hudi yi avakwa ndi avakwa enendawi umbutu dugwit ogarit lagusigik, Ala en hekbisaliga ovara, 17At ako yedok havovok yiluk, okbigigaliga. Henabwa en sek okbugugu dugwit, mbogot vaga en musu wokhirigya, yi menda ndi menda enggen yupwak yiluk, ogagya, erom wisane erogo wokhirigya, henendawi adenggen okbugugu, ogasiga o,” yiluk, 18enane anderogo yugeragagwa hegek, enanggom warogo wogeraguluk ogagagwa ovara, moga adigat yugurugu lagagwama, hekbagagwa.

19Hekbagu lagagwama, it ap Yakuri menda o Andiyokia inim, o Ikoniyum inim, wagu lagagwarik, nit ninim aruguluk, avakwa enendawima manggu lagagwama, Paulus helep vaga watu lagagwarik, “Mondok hombagas,” yiluk, nggigilogo o kota weram vikit mbo ha wunggugwa. 20Mbo ha wunggu lagagwama, it Yesus ane wogogwa akoen at eyave walinbaluk welagagwama mondok iri lagagirik, o kota akoma nonggagagi. Nunggwigya lagagirik, nogo yiluk, hutun Mbarenabas iperen o Derebe lagagwa.

Eneyami vaga o Andiyokia lagagwa wene

21Avakwa o kota Derebe andoma Sek Wene yugeragagwa vaga avakwa wisane avyarat umbutu dugwit Yesus ane wogogwa. Wugu lagagwama, eneyami vaga lagu dugwit, o Lisera nunggugwi, Ikoniyum nunggugwi, ogarit o Andiyokia nonggagagwa. 22O akoma yanonggegek lagu dugwit, “At Nenowa Inis Ombok Ala en denogo bagagi ako avema nunggup andi, anggin-mbanggin wisane nenovaga ari wagya hegek nunggusogom,” yiluk, it Yesus ane wogogwa ako, enendawi modo okbugwis, “Wene avyarat embetep ako hekbaup moga o. Ata, henendawi wadokdek vakhedogo-at dogones,” yiluk, mbilape yugurugwi, ogarit lagagwa.

23Avakwa Ala wene homarisagwima adik-adik akoma enasini dogopwak yiluk, Paulus Mbarenabas iperenen ap denogo mondok okbugu lagagwarik, erom nenggetek samban ogagu dugwit, “Nenasin o. It ap yi, enendawi hovaga vanggabaluk avyarat embetao atma, ogarit nagusigik, des erogo vagenombogo dogonyok,” yiluk, enake samban ogagagwa.

24Enake samban okbaluk, o Pisidia nonggegek, o Pambilia nonggagagwa. 25O kota Peraga akoma wene yugurugu lagagwarik, o Atalia wombagagwa. 26Andoma en mburis vaga o Andiyokia nonggagagwa. “Ala eyavup ogarit lavovok yiluk, Ala henabwa en okbugugu dogosogon o,” yiluk, lakbogogwa ako ogarit lagu lagagwarik, mondok nggabup erogo okbaluk, lakbogogwarikmu akoma-at wagagwa.

27O Andiyokia nunggu wagu lagagwarik, Ala aburi ako homakbisiluk, Ala okbugu hegek oginivit lagu lagagwa ako inim, eke, Ala en it weram Yakuri dek menda Nenowa Yesus ane avyarat ombarupwak yiluk, sup hurogo bogogi ako inim, wene mbilinogo yugurugu lagagwarik, 28it o Andiyokia Yesus ane wogogwa menda ako inim dugwit, ndugwis wisane welagagwa.

Currently Selected:

Lakbogogi Wene 14: nbq2013

Highlight

Copy