Lakbogogi Wene 13
13
Mbarenabas Saulus iperen lakbogogwa wene
1O Andiyokia andoma it Ala aburi homagu lagagwa enanggelekma it nin navi-navi en Ala yugirigya hegek yugurugwi, ninen wene mamulirugwi, ogagu lagagwa ininis andi, Mbarenabas inim; Simeon inis ambi salek ‘Mudis’ inim; ap awi Kirene menda Lukius inim; ap ambi ap inis ombok Herodes ako inim dugwit sawe agagi inis Menahem inim; Saulus inim; it ako enat ogagu lagagwa. 2It ako erom nenggetek dugwit Nenasin Ala siyabagusigik,#13:2: Ap Yakuri menda erom nenggetek ogagu lagagwa ako adem andi yi o: It Ala siyabagwis, Ala en yonggat-ninisapwak en yiluk nggino yugugwis; “Ai nenomaduk yi o,” yiluk, Ala yugugwis; ap ambi hambigya halok, ayup yagwis; enendawima ilim en dibaluk, Ai, yiluk, Ala wene mamulhedugwi, samban ogagwi; ogagu dugwit erom nenggetek wulugu lagagwa. At Averiniki en yugirigya dugwit, “Mbarenabas Saulus iperen An neyavup ogagu dogop denogo bogogis ako, ogagu dogopwak yiluk mondok okbisines,” yiluk, yugeragagi.
3Yugirigya lagagimu, it ovok erogo erom nenggetek dugwit, ininggis inunggul vakbisiluk, samban okbugu lagagwarik, lakbogogwa.
O Sipurus lagagwa wene
4It Mbarenabas Saulus iperen Averiniki en lakbugu lagagimu, o Seleukia wambugu lagagwarik, andoma en, mburis ombok vaga o is enggema Sipurus andoma lagagwa.
5Lagu lagagwarik, o kota Salamis nonggagagwa. Andoma dugwit, it Yakuri samban ogasagwima adigat Ala wene yugeregek nagu lagagwa. Yugeregek nagusim, at Yohanes Markus ako inim yonggar-inipu lagagi.
6O is enggema akoma en ambima nonggegek ogarit o Papos nonggagagwa. Nunggugu lagagwarik, ap Yakuri menda ambi inis Mbareyesus madis inis vaga ogagya dugwit, ‘An navi Ala wene yagaliga,’ yiluk, ane huluk molalit landiga menda ako inim avuk agagwa. 7At Mbareyesus aswe andi ap endawi anggat menda inis Seregius Paulus, at o is enggema andoma Gubernur welagagi. At akoen Mbarenabas Saulus iperen Ala wene yuknerapwak yiluk enayonggo bagagi. 8Enayonggo bagagi ovara, at madis inis vaga ogasiga ako, inis it Yunani enane vaga Elimas, eke, nit nenane vaga ‘Madis Inis vaga Ogasiga’ yagalagwi akoen, Mbarenabas Saulus inim ogorek dugwit, Ala wene avyarat ombarugwi en yiluk, ap Gubernur ako wene adik menda endawima mabagiluk yugigik adigat ogagagi.
9Ap Elimas akoen wene adik menda ap Gubernur ako endawima yugigik adigat ogagya lagagimu, at Saulus inis ambi salek Paulus ako Averiniki endawima des iri lagagimu, ap Elimas ako il vurek dugwit, 10“Ayai! Hat Sile abut yi, hane huluk wisane erogo yugeregek naliga, eke sek ogarup hanggon dugwit weyak ogarup adigat ombasiga andi, harat. Hat Ala arup amot ovara mbirik ogasiga ako mera hudi mbup yimi? 11Yogak hat hil dogop! At Nenasin Ala en anggin hovaga bagasogon! Hil mbuk akluk, o awiya hil hegetek heyagek, ndugwis maren hudi dogogun,” yiluk, ao yugugu hegek, il agur-agut agya lagagirik, hwis agagi. Il hwis iri lagagimu, “An ninggis vakbanupwak o,” yiluk, inggirenden vaga haverinipigi.
12Enowa Gubernur akoen ap il hwis agagi higya lagagirik, Enowa Inis Ombok Yesus wene mamulirugwi ako “Wi” yiluk vok iri dugwit, Yesus Ala abut denek menda avyarat imbitigi.
O Pisidia, Andiyokia lagagwa wene
13At Paulus aswei inim o Papos hekbaluk, mburis vaga nunggugu lagagwarik, inamut ombok laut yanggadek vaga o Pambilia wunggu lagagwarik, o kota Peraga andoma lagagwa. Andoma inigik, at Yohanes Markus ako it bisiluk, o Yerusalem eyami vaga lagagi. 14O kota Peraga andoma en o Pisidia Andiyokia#13:14: O inis Andiyokia mberen werek. Ambi o Siria (Lakbogogi Wene 11; 13:1-3) ambi o Pisidia. lagu lagagwarik, it Yakuri samban ogasagwi vaga it samban ogasagwima nunggugu lagagwarik hora yagagwa. 15Hora yiluk werekma, it samban ogasagwima vagago agarwik menda akoen Ala wene Musa en dirup watigi wene inim, navi-navi wene dirup warek inim, bikhegek yugurugu lagagwarik, “Nit nenendawi aik wakbininaup wene ambi werek halok yuknerapwak yiluk, nenaswei andi, hemerisenes o,” yiluk, yagagwa. 16Yagagwa ako hemerinigu lagagwama, at Paulus ako mendek iri lagagirik, inggis lap-lap iri dugwit “Mbauk erogo dogones,” yugeragagi.
Yugirigya lagagirik, “Hit ap Iserali menda inim, hit Yakuri dek menda ovara Ala henalon ombasagwi andi inim, henaruk holek dogwes, naswei. 17Nit Iserali menda Nenasin Ala en nenombawi miginipu lagagirik, o Mesir andoma huru ovagak inigik, ininis unggul ombok arupwak yiluk, enabyam welagagirik, Ala anye vaga o andoma en wogonombolok wulu wagagi. 18O harumu avakwa dekma akoma 40 tahun ogagu dugwit, enandogon weyak ogarit lagusigik ovara, Ala endawi sagain akluk welagagi. 19Eke, it avakwa o Kanaan menda ininis unggul 7 ako degerogo bisiluk, enavoloma At aburi nit nenombawi ako andok dogopwak yiluk mavorangge hak it enawen mbalogo bogogi. 20Yakup aburi o Mesir lagagwa hudien, Ala en wogonombolok wulu wagya hegek o Kanaan nonggagagwa hudi andi, ara-dek a 450 tahun ogagagwa.”
“Okbaluk, hivis, yi wene ndi wene yugurugu dogopwak yiluk, wene ambi agya halok enowak dilisagwi menda ambi avoloma, ambi mondok okbagek, ogarit lagu dugwit hivis atok vaga Ala en yugugu hegek yugirigya lagagi navi Samuel akoat yi wene ndi wene yugirigya dogopwak yiluk, mendok okbagagi. 21Mendok okbagya lagagimu, hivis, it avakwa en, ‘Nit at avema dogop nenowa inis ombok ambi mondok okbininin o,’ yiluk, yugugu lagagwama, At Ala en Kis abut Saul inis unggul Mbenyamin menda ako, mondok okbagya lagagimu, wene yugirigya hegek, 40 tahun-at ogagagi. 22Eke, at Saul ako hekbaluk, avoloma, ‘At Isai abut Daut ako An nendawi ombasiga ndatak, at ombasiga atma, An nendawi ombasiga adigat ogagya dogosogon higi,’ yiluk, enowa inis ombok Daut-at mendok okbagagi. 23At Ala en at Daut avyarat nggatuk erogo yugogogi hak, Daut ombawi wigalek ambi vaga en avakwa Iserali enagap wendarisiga menda, At Yesus-at endaklagagi.”
24“At Yesus ako ao wagetek hegek, at Yohanes en it Iserali menda ovok erogo yugirigya dugwit, ‘Hit henomaduk andi, henasam hugu hiniselok, ima wombabigigayogon o,’ yiluk, yugirigya lagagi. 25Yugirigya lagagirik, hivis, at ogagya lagagi ako mondok atok weralogo ogagya hegek, at Yohanes en iri dugwit, ‘An sa, nombasagwi o? At warup abyam agipik ako, an dek. Andi an dek ovara, At an nambetaga warisogon ako, wagya halok, At ap ombok atma, anen aropato nggolalogo baup ogo meyan,’ yugirigya lagagi,” yiluk, Paulus en yugeragagi.
26Yugirigya lagagirik, “Naswei. Hit Averakam ombawi inim, hit Yakuri dek ovara Ala henalon ombasagwi menda ako ogo hinim, hit ninim nenagap wendarupwak yiluk, nit nenake wene yiat lakba wagagi! 27Anderogoat ovara, it avakwa Yerusalem menda enasini ap ombok-ombok inim akoen, ‘At Yesus andi, nenagap wendarisiga menda aro,’ yiluk, yedok hegetek dugwit, ndugurek-ndagarek it Yakuri samban ogasagwi vaga, it ap navi-navi wene dirup warek bikhegek yagalagwi ako, At warup hobaluk, warogo bagagwa vaga, wene andi atma-at agagi. 28‘At nano ogaga vaga waruk?’ yiluk, adem belanggugwa ovara, adem degat hegek, waruguluk, at Pilatus yugogogwa. 29Eke, ‘Anderogo okbasogom o,’ yiluk, yugu lagagwarik dirup watugwa ako wane-wane okbagu lagagwama, yo winik vaga lobalogo bagagwa ako visilogo wombaba wagu lagagwarik, hambuguselok wimu mabiselagwima akoma mabagagwa. 30Wimu mabagagwa ovara, Ala en hambuluk lendagwima en iluk erogo mendok okbagagi. 31At ao watitek hegek, At inim Galilea en Yerusalem lagagwa ako, At mondok okbagya lagagimu, eyave inil neyapwak yiluk inugirigya dugwit, ndugwis wisane welagagi. Eke, it inil hagagwa akoen yogak nit avakwa Iserali menda vagalogo yukneregek lendagwi.”
32-33 #
Mazmur 2:2 yokhanes. “Ala en nit nenombawi avyarat nggatuk erogo yugeragagi ako, Yesus hambuluk lendagwima en iluk erogo mendok okbagagi ako vaga, it enombawi nit nenake atma des iri lagagimu, Sek Wene yiat yukherelagwi. Anderogo atma, At Ala en iri dugwit:
‘Hat An Nabut,
eke yogak An Hat Hasin agi o,’
yiluk, mbuku Ndawi Wene pasal 2 vaga dirup watigi.”
34“Ala en ‘At hambuluk lendagwima en iluk erogo mendok okbagya neyalok, At hivis vidis arisogonbuk,’ yiluk, iluk erogo mendok okbagagi ako andi, At Ala en iri dugwit:
‘An sek okbayogon o, yiluk,
wene eve adik denek mondok avyarat ombarup menda Daut yugogogis ako, hirat okbigigayogon o,’#13:34: Yesaya 55:3. Eke 1 Tawarikh 17:7-14 yokhanes. Ala en Daut yugugu dugwit, “Hat vaga wigalek menda ambi, adigat, mondok-mondok yerogo ogarup, nderogo ogarup, yugirigya dogopwak yiluk, Anen mondok okbayogon o,” yiluk, yugogogi.
yiluk, yagagi. 35#Mazmur 16:10 bikhanes. Eke, Daut en ambi inim iri dugwit:
‘Habut Endawi Sek Adigat Denek ako,
eyave hambuluk, vidis agya haoen, hekbayogonbuk,’
yiluk, yagagi ako dirup warek agarik.”
36“Ala en at Daut ogagya dogopwak yiluk denogo bagagi ako, wane-wane-at ogagya lagagirik, hombagagi. Hambigya lagagimu, ombawi hombagagwa inim sabalagagwarikmu vidis agagi ovara, 37At Ala en iluk erogo mendok okbagagi ako andi, vidis agetek. 38Vidis agetek, iluk-at werekma, hit weyak ogasagwi andi, At Yesus vaga Ala en degerogo bigigaup hinilup arovovok yiluk, yukheraliga o, naswei.”
39“Ala wene Musa en dirup watigi ako ogagu lagagup vaga Ala en, “Hit sek,” yiluk, wokhinipitek. Ata, Yesus ovaga vanggabaluk avyarat ombasagwi andi vaga, Ala en “Hit sek,” yiluk, wokninivisiga, yiluk, yukheraliga. 40-41Anderogo atma, Ala en yugirigya hegek yugurugu lagagwa navi-navi akoen yugu dugwit,
‘Hit Ala weyak-edok erogo belagwi yi,
hit agipik yi vaga An ambi okbigigaup ako,
hit yukheraup ovara, avyarat ombarusogombuk ako menda ogarisogon atma,
hit vok yugu dugwit, mondok degat arusogom o,’
yiluk, yugeragagwa ako, hit anderogoat okbugugu haoen, henendawi suam watu dogones,” yiluk, at Paulus akoen wene andi yugeragagi.
42Yugirigya lagagimu, Paulus Mbarenabas iperen it Yakuri samban ogasagwima akoma wunggusigik, it avakwa en, “Wene yukneregep ako, nin hivis samban vaga yukneravovok,” yiluk, yugurugu lagagwama, wunggugwa. 43It avakwa samban okbaluk wunggu lagagwarik, it Yakuri menda inim, it weram Yakuri dek menda Ala enalon umbutu dugwit Yakuri wene wugu lagagwa inim, wisane erogo Paulus Mbarenabas inim lagu dugwit, “Ala henabwa en Yesus vaga henomaduk dek okbigigiluk henagap wendarisiga ako, henendawi dibaluk, ogarit lagu dogones,” yiluk, wene mamulirugwi, enendawi aik wakbugwis, ogagagwa.
44Hivis samban ogasagwi vaga o kota andoma avakwa ovok erogo Nenowa Yesus wene huluguluk, homagagwa. 45Homari wagwi ako vaga it Yakuri menda inil inigu lagagwarik, “A! Nit nenane hulup ovagera, it enane adigat hulup andi, nenanggon!” yiluk, enaninis en at Paulus ane iris ako saganggu dugwit, wiyiknom-weyaknom yugogogwa.
46Wiyiknom-weyaknom yugugusigik, it Paulus Mbarenabas enalon dek yugurugu dugwit, “Ala wene hit Yakuri menda henendak yukheraup ovara, ‘Nit niniluk dogop wene andi, waup ndak dek o, yiluk, nenanggon,’ yegep atma, hit hekbigiluk, it weram Yakuri dek menda akoat yugeregek nagu dogosogon. 47#Yesaya 49:6 bikhanes. Nenasin Ala en iri dugwit:
‘Avakwa enagap wendarogo bisaup wene hologo bogogis ako,
it avakwa ininis unggul adik-adik o atok-atokma andoma,
enanggelekma awiya erogo bugu dogonyok yiluk,
Anenen denogo bagagigis o,’
yiluk, yagagi ako, yogak yukneraliga atma, it weram Yakuri dek menda yugeregek lendagwi o,” yiluk, yugeragagi.
48Yugeragagi ako, it weram Yakuri dek menda akoen enaruk hobaluk, enendawi adenggen wisane umbutu dugwit, “Nenasin Ala wene yi andi, iya!” yiluk, siyabagagwa. Eke, it avakwa iniluk mondok-mondok dogop denogo bogogi akoen wene andi vaga enendawi vanggabaluk Yesus ako avyarat umbutugwa.
49Nenowa Inis Ombok wene ako, o andoma ovok erogo wigak yagagi ovara, 50Paulus Mbarenabas iperen anggin-mbanggin okbisapwak yiluk, it Yakuri menda akoen akwa ininis werek menda Ala enalon umbutu lagagwa inim, it o kota andoma menda enasini ap ombok-ombok inim, enendawima mali wagu lagagwama, o andoma en haryogo wibogogwa. 51Haryogo wibugu lagagwama, it akoen, “Hit henovadombok,” yugu lagagwarik, inisok vaga mupwak hak horogo mbobisiluk, o Ikoniyum wunggugwa. 52Wunggu lagagwama, it o Andiyokia andoma Yesus ane wogogwa ako, Averiniki enendawima des yi nunggwigya lagagimu, enendawi adenggen wisane agagwa.
Currently Selected:
Lakbogogi Wene 13: nbq2013
Highlight
Share
Copy
Want to have your highlights saved across all your devices? Sign up or sign in
