Lakbogogi Wene 12
12
Anggin-mbanggin enovaga bugu lagagwa wene
1Wogera wagu lagagwarik akoma werekma, ap inis ombok o Yudea vagago welagagi Herodes akoen it Ala aburi nin edup-mbedup erogo bisagiluk vaginivit lagu dugwit, 2“At Yohanes owa Yakobus ako, yaga vaga wares,” yiluk, yugirigya lagagimu, watu lagagwama, hombagagi. 3Yakobus watugwa andi vaga it Yakuri menda enendawi sek agwi ako inugu lagagirik, at Peterus ogo, “Heda marilales,” yiluk lakbogogi. (It Isogo Erom Roti Virisigadek Menda ako isagusigik lakbogogi.)#12:3: Isogo Erom Roti Virisigadek Menda ako, saut Maret a, April a, minggu ambiat vaga ogagu lagagwa. Ndugwis endak andi Isogo Vasika, eke ndugwis nin andi Isogo Erom Roti Virisigadek menda ogagu lagagwa. Isogo Vasika ogagu dugwit, wam ndomba eyak warogo nunggu lagagwa, eke Isogo Erom Roti Virisigadek menda ako ogagu dugwit erom roti ragi dek ogarek nunggu lagagwa. It ogagagwa andi, it enombawi o muk Ala en o Mesir en visilogo wogonombolok wulu wagagi ako inilup dogoguluk adenggen ogagu lagagwa. Keluaran 12:17-20 yokhanes. Eke it ninen, inis Isogo Vasika yugu dugwit, adem isogo mberen yi yugu lagagwa. (Wakhegek ambi ayat 4 yokhanes.) 4Lakbisa lagya lagagirik, heda marogo lembaga mabaluk, isogo ombok Vasika nelok, selekma avakwa inivaga owak dilup imbita dugwit, eneyave dambulik 16, ambi homago eneyave 4, ambi homago eneyave 4, anderogo adigat malogo dogopwak yiluk bogogi.
5At Peterus ako lembaga akoma malogo inigik ovara, it Ala aburi en enendawi hora yiluk, at ake samban adigat ogagu lagagwa.
Peterus heda marogo mabiselagwima lembaga en wulu wagagi wene
6At Herodes en hutun owak diligiluk at Peterus o hup mbusi heda vaga inggis venak-venak mago nogo yugu hegek, it ap enayegen werek mberen venak-venak inigik, it nin sup mbanggut vaga malogo werekma, 7Ala yonggo lakbisa wandiga menda malaikat ambi, it kamar ilim akoma werekma, yukdekma mondok yi nunggwigya lagagirik, abya yevedogo bagya lagagirik, ombandu vikit inggis yogovet yugugu dugwit, “Peterus wai. Hodorogo mondok iru,” yiluk, ao yugugu hegek, inggis mbusi heda vaga mago ako endagen visilogo ndan yagagi.
8Visilogo ndan iri lagagimu, malaikat akoen at yugugu dugwit, “Hayum yikhidigya, haropato yikhidigya, ogaru,” yugugu lagagimu, yikhedagagi. Yikhidigya lagagimu, “Sogwesum weram yikhidigya dogomindik, ninim lasogom en, oma,” yugogogi.
9Yugugu lagagimu, wunggu lagagirik, iperen lagagwa. At malaikat akoen avyarat okbagya hegek, Peterus endawima, “Un nabi haliga ai?” embetek iperen lagagwa. 10Ilim-weram suam watusigik wulu wagu lagagwarik, o kota nunggwisagwima sup besi vaga larik ako andenam ari lagusigik, endagen hutlagya lagagimu, it ako wunggu lagagwarik, sup atokma ari lagu lagagwarik, at malaikat ako andenam en hekbaluk winggigi.
11Wunggu lagagimu, at Peterus ako endawi anggat agya lagagirik, “Wi! yiluk, “It Yakuri menda inim, Herodes ako inim, okbanup embetao ako ovok erogo ao ogagetek inigik, At Ala ayonggo lakbisa wandiga menda malaikat ambi lakba wagya lagarik, nagap wendaknetas avyarat higi o,” yiluk, imbitigi.
12Imbita lagagirik, at Yohanes inis ambi salek Markus ako, isa Maria amwa avakwa wisane homakbaluk, samban ogagusim enadema lagagi. 13Enadema lagya lagagirik, sup weram vikit larik ako inggi-vaga sup nggolen-nggolen ogagya lagagimu, hwavyak enayeloman inis Orode en, “Sa wagya lagarik, ogasiga?” yiluk, bikhelagagi. 14Bikhelagya lagagirik, “Peterus ane iri higi,” yiluk, endawi adenggen en sogop huthegetek, “Peterus ako wasim agarik o,” yiluk, yugeralagagi.
15Yugera lagya lagagimu, it akoen, “Hwavyak yi nenek hovaga danggup yagarik yagaliga?” yiluk, yugugu lagagwama, at hwavyak akoen, “Dek o. Avyarat waga higi!” yiluk, ane avuput vaga yugirigya lagagimu, “Andi halok, malaikat ambi at malogo dogopwak yiluk lakba waga hegen a?”
16Yugusigik, at Peterus ako sup nggolen-nggolen hunik adigat ogagya lagagimu, sup hutu lagagwama, at eyave-at halok, “Wi!” yiluk, vok yagagwa. 17Vok yugu lagagwama, at ako inggis lap-lap iri dugwit, “Mbauk erogo dogones,” yugirigya lagagirik, Nenasin Ala en lembaga akoma en wolok wulu waga ako mbilinogo yugeragagi. Yugirigya lagagirik, “At Yakobus#12:17: At Yakobus yi ako Ala aburi o Yerusalem vagago welagagi. At Yesus aot ambetaga menda. inim, nenaswei nin inim, wene andi yugeregek elales,” yugirigya lagagirik, hekbisiluk, o adikmu lagagi.
18Hutun o yanggo iri lagagimu, it ap enayegen werek akoen, “Peterus nggarogonggan winggas?” yiluk, nane-hane yugu dugwit belalit nagu lagagwa. 19At Herodes en, “Des erogo belalit elales,” yugirigya lagagimu, belalit lagagwa ovara, dek halok, unat wagu lagagwama, “Hit nano ogagu hinigik, winggas?” yiluk, yugirigya lagagirik ap en it malogo welagagwa ako inirupwak yiluk yugeragagi.
At Herodes hombagagi wene
Anderogo okbaluk at Herodes o Yudea en Kaisarea lagya lagagirik, andoma welagagi.
20Andoma dugwit, it avakwa o Tirus menda inim, Sidon menda inim, mberirigya dugwit, inim ogorek welagagwa. Welagagwa ovara, it ako enendawi ambiat agu lagagwarik, Herodes inim dambuluguluk, homari wagu lagagwarik, at Herodes yugiri nungguguluk, ap ambi Herodes eyavup ogasiga menda endawi hunik inis Belatus ako yugogogwa. Yugugu dugwit, “Nit erom nelagwi ako andi, Herodes andok agarikmu, ogorek dogop andi weyak atma, ninim dambuluguluk wagyo atma, yuguru,” yiluk, yugugu lagagwama, “Eo! Yugirisogon,” yugeragagi.
21“Wene andi o yi vaga ogarusogom,” yiluk, iri lagagirik, o andi vaga at Herodes ako yum ap ininis ombok yikhedelagwi menda yikhidigya lagagirik, wene amburup mbalisigama akoma hora inggya lagagirik, avakwa andoma wene yugeragagi. 22Yugirigya lagagimu, it avakwa akomaen, “Wi! Yi ap en yagaligadek. Ala ane ovagak yagaliga,” yiluk, enane naik-naik yugu dugwit siyabagagwa. 23Siyabagu lagagwama, aren Ala siyabagetek, ‘An iya neyalok, yagao’ yiluk, siyabatigya lagagimu, Ala yonggo lakbisa wandiga menda malaikat ambi mbikit wagya lagagirik, warogo bagagi. Warogo bagya lagagimu, wanggo en endawima libinggusigik, hombagagi.
24Ala wene Yesus avok ako ombogat mbigalit lagya hegek, it avakwa wisane avyarat umbutu dugwit, wugu lagagwa.
25Eke, at Mbarenabas Saulus iperen o Yerusalem ogaruguluk lakbogogwa ako, mondok-at ogagu lagagwarik, at Yohanes inis ambi salek Markus ako wolok eneyami vaga o Andiyokia lagagwa.
Currently Selected:
Lakbogogi Wene 12: nbq2013
Highlight
Share
Copy
Want to have your highlights saved across all your devices? Sign up or sign in
