Lakbogogi Wene 11

Peterus en Ala aburi o Yerusalem yugeragagi wene

1It lakbigik menda inim, enaswei o Yudea andoma menda inim, iren ap weram Yakuri dek menda ogo Ala wene welagwi enaruk hunggugwarikmu, 2at Peterus o Yerusalem inggya lagagimu, it enagamut mbalek menda ninen at Peterus enane weyak enovaga bagu dugwit, 3“Hat nggarogo yiluk it enagamut mbalekdek menda enamwa nunggwigya lagindik, hinim dambulik dugwit erom nenggen?” yiluk, yugogogwa.

4Enane weyak yugugu lagagwama, at Peterus akoen wene eyave adem oklagagi ako ovok des erogo mbilinogo yugirigya dugwit, 5“Dek, nasini. An o kota Yope akoma samban ogagya lagima, nogo heda nabi heda higya dugwit, yum obak atok venak-venak vakbaluk mbogot vaga en nadema wombaba wagya higi. 6Nil higya lagirik, swa-bagas inim, ndimbu-nggusa inim, mindom-mbolom inim, ovok erogo yidik higi. 7Higya lagima, ane yuknugu dugwit, ‘Peterus wai. Mondok iri dogomindik, yi ambi warogo namin,’ yuknugu ako naruk hunggis.”

8“Yuknugu ako naruk hunggis ovara, ‘A, dek, Nasin. Nelagwidek menda inim, naup moga menda inim, an mondok naligadekma, naup nanggon o,’ yugugu lagima, 9mbogot vaga en ane ambi inim yuknugu dugwit, ‘Dek. At Ala en ugun nunggu dogop bagagi hegek, haren “Naup moga” yubuk,’ yuknugu higi. 10Nabi elap henggam vaga higya lagirik, yum obak ako mbogot vaga wolok inggya higi.”

11“Wolok inggya hegek, an umwa andoma werekma ap henggam o Kaisarea en an belalnetek lakbisa waga ako wasim ari wagao inigik, 12Averiniki en an yuknugu dugwit, ‘Hendawi yunggup yegetek, ap andi hinimat elalo,’ yuknugu lagama, naswei eneyave 6 yi, ninim lagu lagurik, ap Korenelius amwa nunggwigyo. 13Nunggugu lagyoma, at Korenelius akoen wene mbilinogo yuknirigya dugwit, ‘Malaikat ambi an namwa nunggwigya lagarik mendek werekma nil higi ako, yuknugu dugwit, “Ap Simon inis ambi salek Peterus ako warupwak yiluk belalit o Yope lakbisin. Lakbisamima yugiri laguselok, wagya dogomindik, 14hat haburi hinim henagap wendarupwak yiluk, wene yukhera wasogon o,”’ yiluk, malaikat en yugigas wene ako Korenelius en an yuknigas.”

15“Yuknugu lagama, an it yugeragiluk ogagya neyagek, endak Averiniki nenovaga wombabinina wagagi ako hak, it ogo enovaga wombabisa waga. 16Wombabisa wagya lagama, Nenowa Yesus en iri dugwit, ‘At Yohanes ima wombabugu lagagi ovara, hivis Anen Averiniki henovaga wombabigiga wasogon,’ yagagi wene akoat, nape wenggelaga. 17Anderogo atma, nenendawi Nenowa Yesus Keretus ovaga vanggabaluk avyarat umbutu lagagupmu, Averiniki unat wokneragagi hak, it weram Yakuri dek menda ako wogeragarikmu, Ala en ogarup embetas ako, anenen ogarubuk yup meyan atma, mbup yigi o,” yiluk, Peterus en enagamut mbalek menda yugeragagi.

18Yugirigya ako enaruk hobaluk, it ogo enanedek mbup yagagwa. Mbup yugu lagagwarik, “Andi halok, Ala en it weram Yakuri dek menda ako ogo, it weyak ogasagwi menda enasam helok mbobaluk Yesus ambetaga laguselok, mondok iniluk dogop hologo bogogi higyo,” yiluk, Ala siyabagagwa.

Ala aburi o Andiyokia ogagu lagagwa wene

19At Sepanus helep vaga watu lagagwarik, it nin inarusogom yiluk anggin-mbanggin oginivit nagu lagagwama, enugut en hoda adik-adik sak yagan lagu lagagwarik, o adumu andoma yanonggegek yagan lagu dugwit, o Venisia inim, Sipurus inim, Andiyokia inim, it Yakuri menda adigat wene enaruk hulupwak yiluk, yugeregek nagu lagagwa ovara, 20it nin o Sipurus menda inim, o Kirene menda inim, o Andiyokia nunggugu lagagwarik, it avakwa Yakuri dek menda akoma inim enaruk hulupwak yiluk, Sek Wene Nenowa Inis Ombok Yesus avok ako yugurugu lagagwa. 21Nenasin Ala anye okbugu hegek yugurugu lagagwama, avakwa wisane-at enendawima des erogo hobaluk, avyarat umbutu lagagwarik, Nenowa Yesus ane wugu lagagwa.

22It Ala aburi o Yerusalem homago akoen wene it Yakuri dek menda o Andiyokia avyarat umbutu lagagwa ako enaruk hunggu lagagwarik, at Mbarenabas o Andiyokia lakbagagwa. 23-24At Mbarenabas ako endawi sek, Yesus ovaga vanggabaluk mondok avyarat imbitigi vaga Averiniki endawima des yagagi atma lakbagagwa. Lakbagagwa lagya lagagirik, At Ala enabwa en okbugu ako il higya lagagirik, endawi adenggen wisane akluk, “Hit henendawi mondok wadokdek dugwit, Nenowa Inis Ombok Yesus ovaga vanggabaluk dogones o,” yiluk, enendawi aik wakbugu lagagi. Enendawi aik wakbuguyam, ambi hondo yi nonggegek adigat ogagu dugwit, Ala aburi wisane agagwa.

25Eke, hivis, at Mbarenabas akoen Saulus belaligiluk o Tarusus lagya lagagirik, 26havedogo o Andiyokia wolok wagagi. Wolok wagya lagagirik, iperen tahun ambiat ogagu dugwit, Ala aburi inim homagwi, avakwa wisane wene mamulirugwi, ogagagwa. It Yesus ane welagwi menda ako, ‘Avakwa Kerisen menda’ yagalagwi ako andi, endak o Andiyokia en yugu lagagwa.

27Andoma mamulirugusigik, it navi Ala en yugirigya hegek yugerelagwi menda nin o Yerusalem en o Andiyokia unggugwa. 28It unggugwa ako ap ambi inis Agabus mendek iri lagagirik, yugirigya dugwit, “It ap yi awi ndi awi o Oroma avema agarwik menda ovok erogo erom uvup wisane arisogon o,” yiluk, Averiniki en yugugu hegek, yugeragagi. (Andi arisogon yugeragagi ako, at Kaisar Kolaudius inis ombok dugwit wene yugirigya hegek, atma agagi.) 29Yugeragagi ako erom uvup agya lagagimu, it Yesus ane wogogwa menda o Andiyokia akoma en enendawi umbutu dugwit, “Nit nenadik nenangge agarik bikhegek, wonggabaluk, nenaswei Ala aburi o Yudea agarwik ako enake lakbisasogom,” 30yiluk, wonggalogo baluk, Mbarenabas Saulus iperen lakbugu lagagwama, iren wolok, Ala aburi enasini o Yerusalem ako wogera lagagwa.

Currently Selected:

Lakbogogi Wene 11: nbq2013

Highlight

Copy