Yohanes 17

Yesus nampahambayanira to pantuku-Na

1Napupi Yesus nanguli lauria, notingodami nantingara langi nohambaya, iuli-Na, “Tuama-Ku, naratami tempona. Pemabohemi Ana-Mu bona Ana-Mu mui mampemabohe-Ko. 2Apa laiwaika-Mu-'Amo baraka moparenta humawee manuhia bona mamala-'A mampawaika katuwua to moma maria kahuduana hi hira to laiwai-Mu hi Aku. 3Katuwua to moma naria kahuduana ee iwei, laincanira-Ko ane Iko aga Alatala to nakono, pade laincanira mui Yesus Kristus ee to laihuro-Mu. 4Tuama, laipahudu-Kumi bago to laituduka-Mu-'A Kupobago i dunia ei. Lako humawee to laipobago-Ku lauria, laipemabohe-Kumo-Ko. 5Tuama, welau ei pemabohe-'Amo i tingoo-Mu hante kabohe baraka to naria amimi hi Kita kapomana dunia laipajadi.

6Laincaniramo-Ko humawee tauna to laiwaika-Mu-'A lako dunia ei, apa laikewoka-Kuramo nangkambelai Iko. Hira ee mai todea-Mu pade laiwaika-Mu hi Akuramo. Laituruhirami lolita-Mu. 7Welau ei laincanirami ane humawee to laiwaika-Mu-'A, narata lako hi Iko moto. 8Humawee lolita to iulika-Mu-'A laiparata-Kumi hi hira pade laitarimarami. Laincanira mpuumi ane Aku ei narata lako hi Iko pade parahayarami ane Iko to nampahuro-'A. 9Kuhambayanira. Naupawee moma humawee manuhia Kuhambayani, wuwu hira to laiwaika-Mu hi Aku aga to Kuhambayani. Apa hira ee mai todea-Mu. 10Humawee tauna to nawali todea-Ku, nawali todea-Mu mui pade humawee to nawali todea-Mu, nawali todea-Ku mui. Pade kabohe baraka-Ku rahilo i rara katuwura.

11Moma-'Amo mei maria i dunia, apa Aku marata hi Iko-'Amo. Naupawee hira ei mai i dunia heiradapa. Tuama to Nagaha, piararamo hante baraka-Mu to laiwaika-Mu-'A, bona mohangu rarara, ewa Kita nohangu rara. 12Hinungkaina laipodohe-Kura, laipiara-Kura hante baraka-Mu to laiwaika-Mu-'A. Laipodoo-Kuramo pade momara hema haduaa to mamate duu kahae-haena. Naupawee hia to laipakatantu ami aga to mamate duu kahae-haena, bona rapaganaimi to laitulihi rara Buku to Nagaha.

13Naupawee, moma-'Amo mahae marata hi Iko Tuama. Humaweena ei laiuli-Ku bula-Ku i dunia eidipi bona mpuu-mpuura to pantuku-Ku magoe, ewa kagoe-Ku. 14Laiparata-Kumi lolita-Mu hi hira pade tauna to moma neparahaya hi Aku i dunia ei nampodaara, apa momara nohangu pekiri hante tauna to moma neparahaya hi Aku, nahibali hante Aku moma mui-'Akuwo nohangu pekiri hante tauna to moma neparahaya hi Aku. 15Tuama, moma Kuperapi bona Mualara lako dunia ei, naupawee Kuperapi bona Mupotolawaira lako Magau Heta. 16Momara nohangu pekiri hante tauna to moma neparahaya hi Aku i dunia ei, nahibali hante Aku moma mui-'Akuwo nohangu pekiri hante tauna to moma neparahaya hi Aku. 17Pajadira todea-Mu hante patudu-Mu to nakono, apa lolita-Mu etu mai nakono. 18Laihuro-Kura rau hi tau-tauna i dunia ei, ewa pampahuro-Mu-'A rumai i dunia ei. 19Pade laipopewai-Ku humawee katuwu-Ku hi Iko, bona to pantuku-Ku ei muira mampopewai humawee katuwura hi Iko habana laincanira patudu-Mu to nakono.

20Moma wuwu to pantuku-Ku ei laihambayani-Ku. Naupawee Kuhambayani muira humawee tauna to mawali meparahaya hi Aku mei habana mangepe kareba to raparatara to pantuku-Ku ei. 21Kuperapi hi Iko, bona humaweera mohangu rara ewa Iko Tuama nohangu rara hante Aku, pade Aku nohangu rara hante Iko. Kuperapi mui, mohangu rarara hante Kita bona raparahayara humawee manuhia ane Ikomi to nampahuro-'A. 22Laiwaika-Kuramo kabohe baraka to laiwaika-Mu-'A bona mohangu rarara ewa Kita nohangu rara. 23Aku nohangu rara hante hira pade Iko nohangu rara hante Aku bona mpuu-mpuura mohangu rara. Ane iwee, humawee manuhia mangincani ane Ikomi to nampahuro-'A pade laipotowe-Mura nahibali hante pampotowe-Mu-'A.

24Tuama, dota-Ku bona rima kariaa-Ku, dohe-Ku hee muira tauna to laiwaika-Mu-'A, bona rahilora kabohe baraka-Ku, to laiwaika-Mu-'A habana laipotowe-Mu ami-'Amo kapomana dunia laipajadi. 25Tuama to nanoro, moma ami-Ko laincanira manuhia i dunia ei, naupawee Aku laincani-Ku-Ko pade laincanira to pantuku-Ku ane Ikomi to nampahuro-'A. 26Laikewoka-Kuramo nangkambelai Iko, pade Kukewoka dola motora nangkambelai Iko, bona mamalara mampotowe to ntanina ewa pampotowe-Mu-'A pade Aku mohangu rara hante hira.”

Currently Selected:

Yohanes 17: MYL

Highlight

Copy