Tutura Rasul 2

Eo panaua Inoha to Nagaha

1Karata eo bohe Pentakosta, humawee to neparahaya hi Yesus nahiromu i hangu hou. 2Ngkali iepera to nomoni ewa ngungu ngolu bohe nanau lako langi. Ngungu ngolu ee nahobo i rara hou to laiponcunaira ee. 3Laihilora naria baa apu ewa tari dila nehompo rau nentuu i butu-butu duara. 4Pade humaweera naponu hante Inoha to Nagaha, pade nopamularamo nojarita hante baha-baha ntanina nantuku napa to laipopewai Inoha to Nagaha ee mai hi hira bona raulira.

5Tempo ee mai i Yerusalem natidara to Yahudi#2:5 To laiuli to Yahudi ei mai hira to noagama Yahudi. Hira ee mai nariara to Yahudi to natida i ngata ntanina, naria muira tauna to lako ngata ntanina to nehua agama Yahudi, pade naria muira koro to Yahudi moto. lako humawee ngata ntanina i dunia ei. Hira ee mai to natigu hi Alatala. 6Nangepe moni to nongungu ee mai, nadea tauna nahiromu. Naingura tauna to nahiromu ee apa iepera tauna to neparahaya eera nojarita nampake butu bahara tauna to naria i hee. 7Namangka pade nahera humawee tauna, iulira, “Apa moma to Galileara to nojarita mai ria? 8Bewa pade namalara nojarita rara bahata to laipaketa i hore-hore ngatata? 9Bo kita ei mai nariata to Partia, Media, Elam, todea Mesopotamia, Yudea pade Kapadokia, Pontus pade Asia, 10Frigia pade Pamfilia, Mesir pade ngata-ngata i Libia to namohu hante Kirene, to rata lako Roma, 11belo to Yahudi ba to ntanina to nehua agama Yahudi, to Kreta pade to Arab. Laiepetara nojarita rara bahata moto nangkambelai humawee to laibabei Alatala to nepakahera.” 12Naingu bo nahera humawee tauna ee mai, pade noneulika hore hira, “Napa batuana humawee ei mai?”

13Naupawee to ntanina mui nepopore iulira, “Nalangu nanginu ue anggur motora tauna ee mai!”

Petrus nopatudu todea

14Nokangkoremi Petrus hante hampulu hadua rasul to ntanina, pade nojarita'i nahimuku hi todea to naria i hee, iulina, “Ompi-ompiku to Yahudi pade humawee tauna to natida i Yerusalem, epe pade pairara mpuu to ku'uli ei mai. 15Tauna eira mai momara nalangu, ewa to iulimi. Apa tinti hahio hampepulodipi lauria. 16Naupawee to nadupa ei mai laiuli-Na amimi Alatala, to laiparata nabi Yoel,

17 # Yl. 2:28-32 ‘Iwei lolita Alatala,

kana madupa mei i eo ngkapurina,

Kupopanau Inoha-Ku to Nagaha hi humawee manuhia.

Ana-anamu balailo bo bangkele moparata peboha Alatala,

tauna to nanguraradapa mampahilo to Kupahiloikara,

pade tauna to natuaramo Kuwaika pangipi.

18Wee mui hi batua-batua-Ku balailo bo bangkele,

i eo ee mei Kupopanaukara Inoha-Ku to Nagaha

pade raparatara peboha Alatala.

19Kubabei kajadia-kajadia to nepakahera i langi

pade tanda-tanda i dunia.

Maria mei raa bo apu pade rangahu to nakumba.

20Eo mawali malimau ngkii

pade wula mawali malei ewa raa

kapomana marata eo Pue, eo bohe to nabaraka.

21Pade hema-hema to mangkio hanga Pue rapakahalama.’

22Ompi-ompiku to Israel, epe to ku'uli ei mai, Yesus to Nazaret ee mai tauna to laihuro Alatala rau hi komi. Nanotomi laihilomi bewa-'I laipake Alatala nobabei kajadia-kajadia bohe bo to nepakahera pade tanda-tanda i tingoomi, ewa to laincanimimi. 23Hia laipopewai Alatala hi komi mantuku to laipakatantu-Na amimi, pade laincani-Nami napa to madupa. Nohangu rara komi hante tauna to nadaa ingkura nampasalib-'I pade nampatehi-'I. 24Naupawee Alatala nampakatuwu nculi-'I pade nampabakaha-'I lako baraka kamatea, apa baraka kamatea moma ami mamala mampataha-'I. 25#Mzm. 16:8-11Apa nangkambelai Yesus ei, Magau Daud nanguli iwei,

‘Laihiloku moto oa Pue naria i tingooku.

Apa nokangkore-'I mali pangkanaku,

bona moma'a mamala ralengka.

26Aji nagoe raraku pade noulia'a hante kagoeku.

Wee mui wotoku marodomi mei habana poharumaka to laiwaika-Mu'a.

27Apa moma'a Mupalele matida i Po'ohaara to Mate,

pade moma Mupalele Batua-Mu to natigu mapope i rara dayo.

28Laikewoka-Mu'a dala mamparata katuwua.

Magoe mpuu'a Mubabei, habana laipodohe-Mu dola'a.’

29Ompi-ompiku, kupakanotoka mpuu komi nangkambelai Magau Daud, tumpulokota. Namatemi pade laitana, pade dayona nariadipi hi kita duu ei. 30Naupawee Magau Daud ee mai kakonona hadua nabi, pade laincanina ane notipami Alatala hi hia hante nosumpa, ane Alatala mampaongko hadua lako mulina mawali magau. 31Magau Daud ei mai laincanina napa mei to kana madupa i eo ngkapurina pade iulina nangkambelai katuwu nculi Magau to Pepakahalama to laitipa Alatala. Laiulina mui ane Magau to Pepakahalama ee moma-'I rapalahi i Po'ohaara to Mate pade woto-Na moma mapope rara dayo. 32Yesus eemi mai to laipakatuwu nculi Alatala. Nangkambelai humawee lauria, kami ei purami habina. 33Yesus ee mai laipemabohe Alatala pade laipoponcuna-Na mali pangkana-Na, pade nantarima Inoha to Nagaha to laitipa Alatala Tuama. Inoha to Nagaha to laitarima Yesus ee mai, welau ei laiwaika-Na hi kami, etumi to laihilo bo laiepemi i hei. 34#Mzm. 110:1Moma Magau Daud to nateongko rau huruga. Magau Daud motomi nanguli nangkambelai kateongko Yesus rau huruga iwei,

‘Pue Alatala nololita hi Pueku:

35“Poncunamo-Ko mali pangkana-Ku,

duuna humawee bali-Mu

Kupopotingkodu i tingoo-Mu.” ’

36Aji, humawee to Israel kana mangincani mpuu ane Yesus to laisalibmi ee mai laiongko Alatala nawali Pue bo Magau to Pepakahalama.”

37Pangepera humawee lauria, laihohora mpuu rarara. Nepekunera hi Petrus pade rasul-rasul to ntanina, “Ompi-ompi, napa to kana kibabei?”

38Nehono Petrus hi hira, “Kancoromo komi lako dohami pade butu duami kana radiu rara hanga Yesus Kristus, bona Alatala mampa'ampuni dohami pade Nawaika mara komi Inoha to Nagaha. 39Apa to kana mantarima tipa Alatala ee mai, komi, ana-anami pade tauna to no'oha i ngata-ngata to na'awa, mantuku kadea tauna to Nakio Pue Alatalata.”

40Nadea ngaadipi to ntanina laiuli Petrus hi hira. Laipaingai bo laipatuduna mpuura, iulina, “Nemopa komi mantuku ingku to nadaa ewa ingkura tauna to natuwu tempo ei, bona nemo komi mei mamparata pehuku Alatala.”

Katuwura jumaa to pamulana

41Tau-tauna to namparahaya napa to laiuli Petrus, nampopewai wotora laidiu. Kadeara to neparahaya eo ee mai nantambai ba maria tolu ncobu dua. 42Natigu dolara nangepe patudu rasul-rasul pade naharora nahiromu. Naharora nangkoni hingkani-ngkani hante notubi-tubi roti nampalinga kamate Yesus pade nohambaya hingkani-ngkani.

43Nadea mpuu to nepakahera bo tanda-tanda laibabeira rasul ee hampena humawee tauna naeka. 44Pade humawee tauna to neparahayaramo nahintuwu moto oara, pade humawee gagu to naria hi hira, laipakera hingkani-ngkani. 45Nariara to nobalu gagura, pade doina laitirakara hi humawee tauna toto-toto kaparaluara. 46Nahiromu bo nohangu rara oara butu eona i karawaa Hou Alatala. Nonehambeira i butu ncouna notubi-tubi roti nampalinga kamate Pue Yesus pade nangkoni hingkani-ngkani hante goe pade kalori rarara. 47Laiunera dola Alatala, pade humawee tauna nampokagoera. Butu eona Pue notambai kadeara hante tauna to laipakahalama.

Currently Selected:

Tutura Rasul 2: MYL

Highlight

Copy