Tutura Rasul 1
1
Inoha to Nagaha laitipa
1Teofilus to nabelo, rara bukuku to pamulana, laitulihikumi humawee to laibabei pade to laipatudu Yesus hinungkai-Na nopamula bago-Na, 2duu-Na nateongko rau huruga. Kapoma-Na nateongko rau huruga, hante baraka Inoha to Nagaha laiboha-Naramo rasul to laipelihi-Na. 3Nahudupi Yesus nangkolo humawee kahehaa duu-Na namate, natuwu nculi-'I pade laipoperawa-Na woto-Na hi rasul-rasul pade nadea bakena to laipopahiloi-Na bona raparahayara ane mpuu-mpuu-'I natuwu. Apa rarana opo mpulu eo bahangkua ngkani-'I nampoperawa woto-Na pade laituturaka-Nara bewa Alatala noparenta halaku Magau. 4Hangkani tempo bula-Na nahiromu dohera, laiwaika-Nara parenta ei, “Nemo olu mipalahi Yerusalem. Marodomo komi i hei duuna Alatala mampawaika komi napa to laitipa-Na, to laikewoka-Kumo komi. 5Apa Yohanes nediu hante ue, naupawee momamo komi mahae radiu hante Inoha to Nagaha.”#1:5 Radiu hante Inoha to Nagaha, batuana: mantarima Inoha to Nagaha.
Yesus nateongko rau huruga
6Hangkani tempo bulara nahiromu dohe-Na, nepekuneramo hi Hia, “Pue, ba eimidi tempona Mupopokangkore nculi poparentaa to Israel?”
7Nehono Yesus, “Momami mingki mincani komi bulauma tempona, Tuama-Ku hante baraka-Na moto to nampakatantu eo bo tempona. 8Naupawee, ane manaudimi mei Inoha to Nagaha hi komi, mitarimami baraka, pade komi mei mawali habi-Ku i Yerusalem pade i humangkulili Yudea bo Samaria duuna marata i wuntu dunia.”
9Napu Yesus nanguli humawee lauria, laihilo matara-'I nateongko rau huruga duu-Na nateleru gawu hampena momami lainaara.
10Bulara nantingara langi tempo Yesus nateongko ee, ngkali nokangkoreramo rodua tauna nowaru nabula i humpiira. 11Tauna eera mai nangulikara, “He, komi to Galilea, napa ialami nokangkore pade nantingara langi? Yesus to laihilomi nateongko rau huruga ei mai, marata nculi moto-'I mei. Karata nculi-Na ee mei mahibali hante kateongko-Na rau huruga to laihilo matamimi.”
Matias laipelihi nampahambei Yudas
12Napu ee nanculiramo rasul-rasul ee mai lako bulu to laikahangai Bulu Zaitun, rau i ngata Yerusalem. Ka'awa Bulu Zaitun ee mai lako Yerusalem, ba maria hakilo. 13Karatara i Yerusalem, nehuaramo i hou po'ohaara pade nengkahe rau kamara to i lolona. Hanga rasul eera mai Petrus pade Yohanes, Yakobus pade Andreas, Filipus pade Tomas, Bartolomeus pade Matius, Yakobus ana Alfeus, Simon lako kahiromua Zelot#1:13 Zelot ee mai hanga kahiromua to Yahudi to nampaewa to poparenta Roma. pade Yudas ana Yakobus. 14Humaweera nohangu rara oara nohambaya hingkani-ngkani. Naria mui bahangkua dua bangkele nampodohera nohambaya, pade Maria tina Yesus hante ompi-ompi Yesus.
15Hangkani tempo nahiromuramo ompi-ompi to hangu kaparahayaa. Kadeara ba maria hatu rompulu dua. Nokangkoremi Petrus, iulina, 16“Ompi-ompi humawee, kana rapaganai to laitulihi rara Buku to Nagaha to laiuli Inoha to Nagaha hi Magau Daud nangkambelai Yudas, to nopakenira tauna nampahoko Yesus. 17Ilodo Yudas ee mai doheta to laipelihi mampobago bago Pue hingkani-ngkani hante kita.”
18(Hante tomo to lairatana lako ingkuna to nadaa Yudas ee mai nangoli hamonta tana. Yudas nanawu i tana to iolina ee mai, taina nabonta pade humawee ihi ntaina nehuwu hawalikuna. 19Napa to nadupa hi Yudas ee mai laincanira humawee tauna i Yerusalem, etu pade tana ee mai laikahangaira hante bahara moto ‘Hakal-Dama,’ batuana: Tana Raa.)
20 #
Mzm. 69:26; 109:8 Padolana mui Petrus, “Apa naria laitulihi rara buku Mazmur iwei,
‘Palelemi po'ohaana malino mpii,
pade palelemi houna maboo,’
pade
‘Palelemi bagona napobago to ntanina.’
21Aji, kana rapelihi hadua tauna mawali rasul mantambai kami. Tauna ee kana hadua lako to laipodohe kami tempona nariadipi Yesus laipodohe kami, 22hinungkai Yohanes nopadiu tauna duuna Yesus nateongko rau i huruga nampalahi kami, bona tauna ee mai hingkani-ngkani hante kami mawali habi katuwu nculi Yesus lako kamatea-Na.”
23Lauparia to nahiromu ee nampelihi rodua tauna. Hira ee mai Yusuf pade Matias. Hanga ntani Yusuf ee Barsabas, biahana mui'i laikio Yustus. 24Napu ee nohambaya purara, iulira, “Pue, laincani-Mu rara humawee tauna. Tudoka kami hema lako rodua tauna ei to Mupelihi 25mawali rasul mampahambei Yudas to nampalahi bagona. Apa Yudas namatemi pade raumi i po'ohaa to nahipato hante ingkuna to nadaa.” 26Nahudura nohambaya, nocabu lotramo nampelihi hadua lako rodua tauna ee mai mawali rasul. Matias to nambela lot, aji hiami to nampahambei Yudas nawali rasul, nampatambaira to hampulu hadua rasul.
Currently Selected:
Tutura Rasul 1: MYL
Highlight
Share
Copy
Want to have your highlights saved across all your devices? Sign up or sign in
