Yohanes 21
21
Yesus nerawa hi ana-ana guru-Na i wiwi Rano Galilea
1Napu ee, nerawa muimi Yesus hi ana-ana guru-Na i wiwi Rano Galilea#21:1 Rano Galilea ee mai biahana mui laiuli Rano Tiberias.. Perawa-Na ee iwei: 2Hangkani tempona, i wiwi rano ee nahiromuramo Petrus, Tomas to laikahangai mui Didimus, Natanael lako ngata Kana to i Galilea, ana-ana Zebedeus pade rodua ana guru ntanina.
3Nojaritami Simon Petrus hi hira iwei, “Rau'akuna olu mohoko bau.”
Nehonora, “Tulau kami dohemu.” Alaana neongkoramo rau nencawi duanga. Naupawee, hamengia ee moma napa lairatara.
4Neberepi eo, Yesus nokangkore i wiwi rano. Naupawee, moma'i laincanira ane to nokangkore ee, Yesus. 5Yesus nangulikara, “Ana-ana-Ku, nariadi baumi?”
Nehonora, “Moma'i naria.”
6Yesus nangulikara, “Tene jalami mali kana duanga etu. Mariami mei bau mirata.” Laitenera mpuumi jalara. Hangka laidiira jalara momami pakulera, apa naponu baumi.
7Ana guru to laipotowe Yesus nangulika Petrus, “Hilo, Pue mairia!” Pangepena Petrus ane Tauna ee Yesus, laipahuanami waruna apa moma'i nowaru, nekawantumi rau i rara ue, pade nonangu rau i lorena.
8Ana-ana guru to ntanina to i rara duangaradapa narata hante nodii jala to naponu bau, apa momara na'awa lako lorena, maria hatu mete aga ka'awana. 9Karatara i lorena, laihilora naria rea apu hante bau laitapa pade roti.
10Yesus nangulikara, “Keni rumai bahangkua maa bau to lako ihokomi etu.” 11Nengkahemi Simon Petrus rau i duanga pade laidiinami jala ee rau i lorena. Jala ee naponu bau to nabohe. Kadea bau ee, hatu alima mpulu tolu maa. Naupawee, bonau wee kadea bau, jala ee moma'i nahia. 12Yesus nangulikara, “Maitamo mangkoni.”
Moma hema haduaa ana guru ee nabia nampekune-'I, “Hema-Ko Tuama?” Apa laincanirami ane Hia ee Pue. 13Napu ee, laimohuki-Naramo Yesus pade laiala-Nami roti laitiraka-Nara. Iwee moto mui bau ee laitiraka-Nara.
14Eemi katolu ngkanina Yesus nerawa hi ana-ana guru-Na hinungkai katuwu nculi-Na lako kamatea.
Yesus nangulika Simon Petrus ewuramo bimba-Ku
15Napurapa nangkoni, nepekunemi Yesus hi Simon Petrus, “Simon ana Yohanes, nelabi pampotowemu-'A lako towera dohemu hi Aku, ba moma?”
Nehono Petrus, “Io Pue, laincani-Mu ane laipotoweku-Ko.”
Iuli Yesus hi hia, “Ewuramo bimba-Ku.”
16Nepekune Yesus karongkanina hi Petrus, “Simon ana Yohanes, laipotowemu-'A ba moma?”
Nehono Petrus, “Io Pue, laincani-Mu ane laipotoweku-Ko.”
Iuli Yesus hi hia, “Ewuramo bimba-Ku.” 17Iuli Yesus katolu ngkanina, “Simon ana Yohanes, laipotowemu-'A ba moma?”
Najuumi rara Petrus apa tolu ngkanimi Yesus nampekune'i. Lauparia nehonomi Petrus hi Yesus iwei, “Laincani-Mu Pue humaweena. Laincani-Mu mui ane laipotoweku-Ko!”
Iuli Yesus hi hia, “Ewuramo bimba-Ku. 18Mpuu-mpuu Ku'ulikako, tempo kanguraamudipi, iko moto to nampou pekomu pade nomako rau rima dotamu. Naupawee ane matuadamoko, kana mupopewai palemu pade to ntanina mopouko pade mangkeniko rau i rima to moma laipodotamu.” 19Yesus nanguli ewa ee nampakanoto bewa'i mei Petrus mamate pade mampemabohe Alatala. Napu ee, Yesus nangulika Petrus, “Tuku-'Amo!”
Ana guru to laipotowe Yesus
20Hangka neili Petrus i talikuana, laihilona naria ana guru to laipotowe Yesus nantukura. Hia eemi ana guru to noncuna humpii Yesus tempora nangkoni Paskah to Yahudi kapomana Yesus namate pade nampekune Yesus, “Pue, hema'i mei to mampopewai-Ko hi bali-bali-Mu?”
21Pampahilona Petrus ana guru to laipotowe Yesus ee, nepekunemi hi Yesus, “Pue, bewa'i mei hia ei?”
22Nehono Yesus, “Ane Kupodota matuwu moto'i duu-Ku marata nculi, moma uruhiamu. Naupawee iko, tuku-'Amo.” 23Lauparia notolelemi jarita hi ompi-ompi to hangu kaparahayaa, ane ana guru to hadua ee moma'i mei mamate. Bo moma iwee patuju Yesus nanguli lauria. Moma iuli-Na ane ana guru ee moma mamate. To iuli-Na, “Ane Kupodota matuwu moto'i duu-Ku marata nculi, moma uruhiamu.”
Jarita kahuduana
24Ana guru eemi to nohabi nangkambelai humawee to nadupa ei. Hiami to notulihi humaweena. Pade ncanita mui ane napa to iulina ee nakono.
25Nadeadipi ntanina to laibabei Yesus. Ane humaweena ee ratulihi pura, pekiriku, moma'i maliu dunia ei rapobolii humawee to ratulihi ee.
Currently Selected:
Yohanes 21: MYL
Highlight
Share
Copy
Want to have your highlights saved across all your devices? Sign up or sign in
