Tutura Rasul 3

To napungku laipopomako Petrus

1Hangkani tempo tinti tolu ngkinuwia lau pohambayaami, Petrus pade Yohanes rau i Hou Alatala. 2I ria naria hadua balailo to laikowa habana tauna ee mai napungku lako laiote. Butu eona tauna ee mai laiboli i humpii womo pehuaa Hou Alatala, to ikahangai Womo to Naramba. Tauna ee mai laipoponcunara i hee bona merapi doi hi tau-tauna to mehua i karawaa Hou Alatala. 3Nampahilo Petrus pade Yohanes madota mehua i karawaa Hou Alatala, to napungku ee mai namperapi doira. 4Laipenotora tauna ee mai pade Petrus nangulika'i, “Hilo kami.” 5Tauna ee mai nampenotora hante noharumaka maria to rawaikara'i.

6Naupawee Petrus nanguli, “Bulawa bo halaka moma naria hi aku, naupawee napa to naria hi aku kuwaikako: Hante baraka Yesus Kristus to Nazaret ee mai, pomakomoko!” 7Napu ee Petrus nangkakamu pale kana tauna ee mai pade laitulungina'i nokangkore. Tempo ee mui narohomi paa tauna ee mai. 8Nekawantu'i nokangkore pade nopamulami nomako. Pade laitukunaramo Petrus hante Yohanes nehua i karawaa Hou Alatala. Nomako bo nekawantu-kawantu'i nampaune Alatala. 9Humawee tauna nampahilo'i nomako hamalina nampaune Alatala. 10Laincanira ane tauna ee mai to biahana noncuna nerapi doi i Womo to Naramba i Hou Alatala. Nahera mpuura pade moma natepojarita nampahilo napa to nadupa hi tauna ee mai.

Petrus nopatudu nangkambelai Yesus

11Tauna ee mai nantuku dolara Petrus pade Yohanes. Alaana humawee tauna nahera mpuu pade narata nahiromu i Gandaria Salomo i karawaa Hou Alatala. 12Laihilonara Petrus todea ee mai, pade iulikanara, “Ompi-ompiku to Israel, napa pade nahera komi nampahilo napa to nadupa ei mai? Napa pade nepenoto komi hi kami? Iulimi komi tauna ei mai namala nomako habana baraka bo katigu kami moto? 13Alatala tuamata Abraham, Ishak pade Yakub, Alatalara tumpulokota, nampemabohe batua-Na Yesus, to laipopewaimi pade laiporaumi i tingoo Pilatus, naupa Pilatus nanguli ane Yesus ee mai kana rabakaha. 14Naupawee komi namporau Tauna to Nagaha pade Nanoro, pade namperapi hadua to pepatehi rabakahaka komi. 15Weemi mai Yesus to kakonona puu katuwua, laipatehimi. Naupawee Alatala nampakatuwu nculi-'I lako kamatea. Nangkambelai humawee lauria kamimi habina. 16Baraka Yesus eemile nampakaroho tauna to laihilomi pade laincanimi ei. Ei mai nadupa habana peparahayana hi Yesus. Peparahayana hi Yesus eemi to nampakauri'i ewa to laihilomi motomi.

17Ompi-ompi humawee, laincaniku ane komi pade to pangkenimi nampatehi Yesus habana poma laincanimi to laibabeimi. 18Naupawee, ewa eemi Alatala nopaganai peboha-Na lako owi to laiparatara nabi, ane Magau to Pepakahalama to laitipa Alatala ee mai kana maheha. 19Etumo, kancoromo komi pade pegolimo komi i dala Alatala bona doha-dohami ra'ampuni, 20pade Nawaika komi Pue Alatala tempo kasanaa rara, pade Nahuro Yesus rau hi komi. Apa Yesus ee laipakatantu ami mawali Magau to Pepakahalamami. 21Yesus ee mai kana matida i huruga duuna humawee to naria Napakabouki Alatala ewa lolita-Na to laiparatara nabi-Na to laipelihi-Na owi. 22#Ul. 18:15, 18-19Naria iulina Musa nangkambelai Magau to Pepakahalama, ‘Pue Alatala mei mohuro hadua nabi lako ompimi to Israel, to nahibali hante aku. Epemi humawee to Naulika komi mei. 23Humawee tauna to moma mangepe pade manturuhi napa to Nauli nabi ee mai, rapatani lako todea Alatala pade rapatehi.’ 24Pade humawee nabi to nojarita, nopamula lako nabi Samuel, pade nabi-nabi to ntanina to natepaipuri, humaweera nangkarebai napa to nadupa i dunia tempo ei. 25#Kej. 22:18; 26:4Komimi to nangkami peboha Alatala to laiparatara nabi ee mai pade namparata bagia rara potipa Alatala hi tumpulokota. Alatala nololita hi Abraham iwei, ‘Lako mulimu, humawee tauna i dunia Kutiroi.’ 26Aji, Alatala nampakatuwu nculi Batua-Na pade laihuro-Na-'I pamula-mulana rau hi komi, bona Natiroi komi. Popakeni-Na komi mancoro lako tuwumi to nadaa, eemi mai petiroi-Na hi komi.”

Currently Selected:

Tutura Rasul 3: MYL

Highlight

Copy