Tutura Rasul 11
11
Honoia Petrus hi jumaa i Yerusalem nangkambelai popadiu Kornelius
1Rasul-rasul pade ompi-ompi to hangu kaparahayaa i Yudea nangepe ane tauna to moma Yahudi mui nantarima lolita Alatala. 2Karata Petrus i Yerusalem, bahangkua duara to neparahaya hi Yesus lako kahiromua to laitini nampahalai'i. 3Laiulikara'i Petrus, “Napa ialamu rau hou tauna to moma laitini pade nangkoni dohera?”
4Lauparia Petrus nantuturakara humawee to nadupa lako pamulana, iulina, 5“Bulaku nohambaya i ngata Yope, ngkali laiwaika'a hangu pehiloa. Laihiloku naria ewa kae to napeka to natetoe i opo hunona laiulu lako langi rau i tingooku. 6Laipenotoku kae ee, hiloku i rarana, nengila binata to nopaa opo, binata to naila, binata to nengkanele pade tonci. 7Napu ee iepeku naria to pojarita nangulika'a, ‘Petrus pokangkoremoko, hamaleramo binata etu pade konimi.’
8Naupawee laihonoiku to pojarita ee, ‘Moma, Pue. Poma'a naria nangkoni to narumu pade to laipetagii.’
9Naupawee, iepeku to pojarita lako langi nangulika'a karongkanina, ‘Napa to laiuli Alatala mamala rakoni, nemo mu'uli narumu.’ 10Tolu ngkani-'I nojarita ewa ee mai. Napu ee nateoremi kae ee rau langi.
11Tempo ee mui tolu dua tauna lako Kaisarea to laitudu mampotomuka'a, narata i hou po'ohaa kami. 12Pade Inoha to Nagaha nangulika'a, ‘Koimoko dohera. Nemoko mokarara.’ Aji rau mpuu'amo i Kaisarea, pade ompita to ono dua ei mai nampodohe'a. Karata kami ria, nehuamo kami i rara hou tauna to moma Yahudi ee. 13Tauna ee nampotuturaka kami bewa'i nampahilo hadua malaeka nokangkore rara houna pade nangulika'i, ‘Tudu tauna rau Yope mangkio Simon to laikahangai mui Petrus. 14Hia mei moparata hi komi hangu kareba to mampakahalamako hante humawee tauna to i rara houmu.’
15Lako pamulakudi nojarita, ngkali nehompomi Inoha to Nagaha hi hira, ewa to nadupa hi kita ilodo. 16#Kis. 1:5Lauparia lailingakumi napa to iuli Pue, ‘Yohanes nediu hante ue, naupawee komi mei radiu hante Inoha to Nagaha.#11:16 Radiu hante Inoha to Nagaha, batuana: mantarima Inoha to Nagaha. ’ 17Aji, Alatala nampopewai Inoha to Nagaha hi hira to moma Yahudi nahibali hante to laiwaika-Na hi kita tempota nopamula neparahaya hi Yesus Kristus. Ane wee dota Alatala, bewa pade kutagi-'I?”
18Pangepera to iuli Petrus lauria, nalinoramo pade laipemaboherami Alatala. Iulira, “Ane wetu, tauna to moma Yahudi mui laiwaika Alatala loga mancoro lako dohara bona mamalara mantarima katuwua to moma maria kahuduana.”
Barnabas pade Saulus rau i Antiokhia
19Naliu Stefanus laiwunu watu duuna namate, nopamularamo tauna to neparahaya hi Yesus i Yerusalem laipakaheha hampena nalairamo rau i ngata ntanina. Nariara to nalai rau Fenisia pade naria muira to nalai rau i Siprus pade Antiokhia. I ngata palaiara ee, Kareba Belo laiparatara muntu hi to Yahudi aga. 20Naupawee, naria muira to neparahaya hi Yesus lako Siprus pade Kirene rau i Antiokhia. Hira ee mai nangkarebai Kareba Belo nangkambelai Pue Yesus hi to moma Yahudi. 21Baraka Pue nantulungira hampena nadea tauna neparahaya pade negoli hi Pue.
22Kareba nangkambelai hira ee mai laiepera jumaa Pue i Yerusalem. Lauparia, jumaa i Yerusalem nantudu Barnabas rau i Antiokhia. 23Karata Barnabas i Antiokhia, nagoe mpuu rarana apa laihilona tauna to moma Yahudi i Antiokhia laitiroi Alatala. Barnabas nopatudura bona matigu mpuura hi Pue hante kabuloli rarara. 24Barnabas ee mai tauna to nabelo rarana, naroho peparahayana pade naponu hante Inoha to Nagaha. Alaana nadea tauna i Antiokhia neparahaya hi Pue.
25Napu ee raumi Barnabas i Tarsus nampali Saulus pade hangka laipotomukanapi laibawaina'i napodohe rau i Antiokhia. 26Nagana hampaera Barnabas pade Saulus no'oha dohe jumaa i Antiokhia. Rarana hampae ee mai nadea tauna laipatudura. I Antiokhia eemi pamulana to neparahaya hi Yesus laikahangai to Karahitee.
27Tempo ee mai nariara bahangkua dua nabi lako Yerusalem narata i Antiokhia. 28Hadua lako nabi ee to laikahangai Agabus nokangkore pade hante baraka Inoha to Nagaha nanguli ane maria mei oro mpai madupa i humangkulili dunia. To laiulina lauria nadupa mpuu tempo Magau Bohe Klaudius noparenta. 29Lauparia humawee to neparahaya hi Yesus i Antiokhia, naboturamo mopahiruru doi mantuku pakuleara, pade rapakatukara hi ompi-ompi to hangu kaparahayaa to natida i Yudea. 30Kabotuara lauria laibabeira mpuu, pade doi to laipahirurura laipakatura hi penatua-penatua i Yerusalem, laikenira Barnabas pade Saulus.
Currently Selected:
Tutura Rasul 11: MYL
Highlight
Share
Copy
Want to have your highlights saved across all your devices? Sign up or sign in
