Tutura Rasul 10
10
Petrus pade Kornelius
1I Kaisarea, naria hadua balailo to ikahangai Kornelius. Hia ee mai kapitee tantara to laiuli “Tantara Italia.” 2Kornelius ee nengkoru hi Alatala. Hia hante humawee tauna to i houna nepue hi Alatala. Nadea ngkani'i Kornelius nampatulungira to Yahudi to nakahiahi pade nohambaya oa'i hi Alatala. 3Hangkani tempo ba maria tinti tolu ngkinuwia, rara hangu pehiloa, nanoto mpuu laihilona hadua malaeka Alatala nehua rara houna pade nangkio hangana, “Kornelius!”
4Laipenotona malaeka ee mai pade hante ekana nanguli, “Io, Pue.”
Nehono malaeka ee mai, “Laitarima-Nami Alatala humawee hambayamu pade to laipopewaimu hi to nakahiahi. Lailinga-Namoko Alatala. 5Welau ei, tudu bahangkua dua tauna rau i Yope mangkio Simon to laikahangai mui Petrus. 6Hia no'oha i hou Simon to nobago nampakalusu kuliba binata bona mamala rapokae. Houna i wiwi tahi.”
7Raupi malaeka to nojarita hi hia ee, Kornelius nangkio rodua batua to nobago i houna. Pade laikiona mui hadua tantara to laiparahayana to nepue oa hi Alatala. 8Lauparia, laikewokanara napa to laihilona pade laitudunaramo meongko rau Yope.
9Kanailena, ba maria tinti hampulu rongu mpoeo lia, to laitudu Kornelius ee namohuramo i ngata Yope. Tempo ee nengkahemi Petrus rau i lolo ata hou to napele wumuna pade nohambaya. 10Naoro taina pade mingki'i mangkoni. Hamalina laipahadiadipi pangkoni, Petrus laiwaika hangu pehiloa. 11Laihilona langi natebea pade naria to ewa kae napeka, natetoe i opo hunona laiulu rau i tana. 12I rarana naria nengila binata to nopaa opo, binata to nengkanele pade tonci. 13Petrus nangepe naria to pojarita nanguli, “Petrus, pokangkoremoko! Hamalera binata etu pade pangkonimoko.”
14Naupawee Petrus nehono, “Moma, Pue. Poma'a naria nangkoni to laipetagii pade to narumu nantuku agama kami.”
15Laiepena mui Petrus to pojarita karongkanina nangulika'i, “Napa to laiuli Alatala mamala rakoni, nemo mu'uli narumu.”
16Tolu ngkani nadupa ewa lauria, nateongko nculimi kae ee rau i langi.
17Naingu'i Petrus nampekiri napa batua pehiloana ee mai. Hamalina naingu, tauna to laitudu Kornelius ee mai namparata hou Simon pade nokangkore i womo pehuaa rau hou. 18Tauna eera mai nangkio hadua tauna pade nepekune ane nakono i heemi po'ohaa Simon to laikahangai Petrus.
19Pade bulana Petrus nampekiri pehiloana ee, Inoha to Nagaha nangulika'i, “Petrus! Eera ria tauna tolu dua nampaliko. 20Mahomiko mehompo pade peongkomoko rau dohera. Nemoko mokarara, apa Aku to nantudura tumai.”
21Nehompomi Petrus pade iulikanara tauna to nampali'i ee, “Akumi to laipalimi. Naria paraluumi?”
22Nehonora, “Kapitee tantara to laikahangai Kornelius nantudu kami tumai. Kornelius ee mai to nanoro ingkuna pade nengkoru hi Alatala. Humawee to Yahudi nampabila'i. Hadua malaeka Alatala nantudu'i mampaokako rau i houna bona naepe napa to mu'uli.” 23Napu ee Petrus nampopemuara i rara hou, pade laienanara moturu i hee.
Kanailena nematami Petrus pade neongko rau dohera. Bahangkua dua ompi to hangu kaparahayaa i Yope nampodohe'i. 24Kanaipuana narataramo i Kaisarea. Nopearamo Kornelius hante humawee ompina pade bale-bale himputuna to laitungkai okana. 25Pehua Petrus rara hou, naratami Kornelius nampotomuka'i. Kornelius notingkodu pade nampasombaa Petrus. 26Naupawee Petrus nampopokangkore'i pade nangulika'i, “Pokangkoremoko. Aku ei mai manuhia biaha ewa iko moto'a.”
27Bulara nomako nehua rara hou, Petrus nampojaritaka Kornelius. Laihilona Petrus, nadea tauna nahiromu i rara hou ee mai. 28Petrus nangulikara, “Laincanimi moto ane laitagi mpuu to Yahudi mampodohe bo mantako tauna to moma Yahudi. Naupawee laipahiloi-Na'amo Alatala ane moma'a mamala mangulika tauna narumu ba nemora rapodohe. 29Etu pade moma'a nalohe laikio narata tumai hei. Aji, mingki kuncani napa pade laikiomi'a.”
30Nehono Kornelius, “Opo eo to naliu wei, ba maria tinti tolu ewa welau ei mai, bulaku nohambaya i hou, ngkali naria tauna nokangkore i tingooku. Tauna ee mai nowaru nabula neringkila, 31pade iulikana'a, ‘Kornelius, laitarima-Nami Alatala humawee hambayamu pade to laipopewaimu hi to nakahiahi. Lailinga-Namoko Alatala. 32Tudu bahangkua dua tauna rau i Yope mangkio Simon to laikahangai mui Petrus. Hia no'oha i hou Simon to nobago nampakalusu kuliba binata bona mamala rapokae. Houna i wiwi tahi.’ 33Etu pade dungku laituduku tauna tulau nampotomukako. Nabelo mpuu raramu naratamoko ei mai. Welau ei nahiromumo kami i hei i tingoo Alatala, bona kiepe napa pura to laituduka-Nako Alatala mukewoka kami.”
34Napu ee nopamulami Petrus nojarita, iulina, “Welau ei laipahaku mpuumi ane Alatala ee mai moma nampelihi tauna. 35Humawee tauna to nengkoru hi Alatala pade noingku nanoro, laitarima Alatala naupa ba lako rima ngatana. 36Ompi-ompi, laincanimimi napa peboha to laiparata Alatala hi to Israel. Peboha ee mai Kareba Belo nangkambelai Yesus Kristus, Pue humawee tauna, to nampopohingkabelo manuhia hante Alatala. 37Laincanimimi napa to nadupa i humangkulili Yudea, nopamula lako Galilea, naliu Yohanes to Pediu nangkarebai bona humawee tauna mancoro lako dohara pade mampopewai wotora radiu. 38Laincanimimi nangkambelai Yesus to Nazaret to laiongko Alatala hante nampawaika-'I Inoha to Nagaha pade baraka. Laincanimi muimi ane Yesus ee mai to nomako i butu ngata nobabei to nabelo pade nampakauri humawee tauna to laipehua Magau Heta, apa Alatala nampodohe-'I.
39Kami eimile habi to nampahilo mata humawee to laibabei Yesus i butu ngata to Yahudi pade i Yerusalem. Naupawee, to Yahudi ee moto muiramo to nampasalib-'I pade nampatehi-'I. 40Eo katoluna Alatala nampakatuwu nculi-'I lako kamatea pade nampoperawa-'I hi manuhia. 41Moma-'I nerawa hi humawee tauna, wuwu hi kami aga to lako pamulana laipelihi Alatala mawali habi-Na. Natuwu nculipi Yesus lako kamatea, kamimi to nangkoni bo nanginu dohe-Na. 42Pade Yesus nampawaika kami bago mangkarebai hi humawee tauna pade mohabi ane Hiami to laiongko Alatala mawali to pobotuhira tauna to natuwu bo tauna to namateramo. 43Nangkambelai Hia eemile humawee nabi owi nohabi ane hema to meparahaya hi Hia, ra'ampuni dohana habana petolohi Yesus.”
44Bula Petrus nojaritadipi, nehompomi Inoha to Nagaha hi humawee tauna to nangepe kareba ee mai. 45Humawee to neparahaya hi Yesus lako kahiromua to laitini to nampodohe Petrus nahera, apa laihilora ane tau-tauna to moma Yahudi mui laiwaika Alatala Inoha to Nagaha. 46Apa laiepera tauna eera mai nojarita nampake baha Inoha to Nagaha pade humaweera nampemabohe Alatala.
Nampahilo lauria, Petrus nanguli, 47“Momara mamala tatagi tauna to moma Yahudi ei mai radiu hante ue, apa laihilomi motomi ane laitarimarami Inoha to Nagaha to nahibali hante to laitarimata.” 48Napu ee Petrus nantudura tauna to lako neparahaya ee radiu rara hanga Yesus Kristus. Napura laidiu, laiperapira bona mo'oha dohera heemi olu Petrus bahangkua mengi.
Currently Selected:
Tutura Rasul 10: MYL
Highlight
Share
Copy
Want to have your highlights saved across all your devices? Sign up or sign in
