Tutura Rasul 12
12
Yakobus laipatehi pade Petrus laibakaha lako tarungku
1Tempo ee mai nopamulami Magau Herodes Agripa nangkahekei bahangkua dua jumaa. 2Laituduna tauna bona mampatehi Yakobus ompi Yohanes hante tono lampa. 3Hangka laihilona Herodes ane to laibabeina ee mai laipokagoera to Yahudi, laipetuduina muimi bona Petrus rahoko. Tempo ee mai eo bohe Roti to Moma Lairagii.#12:3 Eo bohe Roti to Moma Lairagii ee mai eo bohe to Yahudi to kahaena pitu eo pitu mengi naliu eo bohe Paskah. To Yahudi nangkoni roti to moma lairagii apa nampalinga bewa tumpulokora hahu-hahuna nehuwu lako Mesir, hampena laikenira labu gando to napumi laigonta to poma'i lairagii (hilo Kel. 12). 4Laihokopi Petrus, Herodes nampetudui bona rapahua rara tarungku'i pade laituduna opo reguu tantara mampodoo'i. Butu reguu naria opo dua tantara. Patuju Herodes, maliu eo bohe Paskah rakenimi Petrus nabotuhi i tingoora todea. 5Weemi Petrus laitarungku. Naupawee jumaa hante rarara mpuu nampahambayani dola'i hi Alatala.
6Ngkawengia kapomana Herodes mangkeni Petrus rau rabotuhi i tingoo todea, Petrus noturu laipalentongoira rodua tantara. Pale Petrus ntimaliana laipou laipomekararini hante pale rodua tantara ee nampake rongu rante. Pade naria muirapa tantara ntanina nepodoo i womo tarungku. 7Ngkali nokangkoremi hadua malaeka Pue i humpii Petrus, pade naria baa newanta rara tarungku. Malaeka ee mai nampatalepe uhu Petrus pade nampalike'i, iulikana'i, “Pematamoko mahomi!” Ngkali natebolemi rante ee mai lako pale Petrus. 8Napu ee malaeka ee nangulika Petrus, “Pou pekomu pade pohapatumoko!” Laibabeinami Petrus to iuli malaeka ee mai. Iulina muimi malaeka ee, “Pahuami waru pokarolapiimu pade tuku'amo!” 9Laitukuna mpuumi Petrus malaeka ee nehuwu. Moma incanina Petrus ane to laibabei malaeka ee mai mpuu-mpuu nadupa. Iulina hia, nampahilo hangu pehiloa moto'i. 10Lailiurapi womo pampodooa pamulana pade womo pampodooa to karonguna, narataramo i womo ahe dala mehua rara ngata. Natebea motomi womo ee mai laipantaraira. Karatara i hawalikuna, nomakora nantara dala kodi hampe naratara i wuntu dala, pade ngkali narontomi malaeka ee nampalahi Petrus.
11Nanotopi rara Petrus, rara bongona nanguli, “Laincaniku mpuumi ane Pue to nantudu malaeka-Na nampakahalama'a lako pale Herodes pade lako humawee to laiharumakara to Yahudi madupa hi aku.” 12Napu Petrus nampekiri humawee lauria, raumi i hou Maria tina Yohanes. Yohanes ei mai to biahana mui laikio Markus. I hou ee mai nadea tauna nahiromu nohambaya.
13Laikadona Petrus womo hou, pade naratami hadua batua bangkele to laikahangai Rode mampahilo hema to nokado womo ee mai. 14Laincanina ane Petrus to nekio. Keni kagoena moma'i nobea womo, molelau nehuaki i rara houdi pade nangkewokara ane Petrus nokangkore i tingoo womo hou. 15Laiulikara'i, “Ba momamoko nanotoda.” Naupawee laiulina oa ane nakono Petrus nokangkore i womo. Iulikara'i, “Malaekana etu.”
16Laikadona dola Petrus womo ee mai. Hangka laibeara womo pade laihilora'i, nahera purara. 17Naupawee Petrus namporaokara bona malinora. Napu ee laituturanami Petrus bewa Pue nangkeni'i nehuwu lako rara tarungku. Petrus nangulikara, “Kewo to nadupa ei hi Yakobus pade ompi-ompita to ntanina.” Napu ee nehuwumi Petrus pade rau ngata ntanina.
18Hampepulo kanailena nagadoramo tantara. Naingu mpuu rarara nampekiri napa to nadupa hi Petrus. 19Herodes nantudu tauna mampali Petrus, naupawee moma'i lairatara. Napu ee Herodes nampekune bo namparehara tantara to nampodoo Petrus pade nampetudui bona rapatehira. Nahudu ee Herodes neongko lako Yudea rau i Kaisarea pade natida i ria.
Magau Herodes namate
20To Tirus pade to Sidon nahintuwu rau mampotomuka Magau Herodes, apa nahodo mpuu'i hi hira. Aji, lailanaira Blastus to nobago rara hou Herodes, hampena Blastus nopahamika hi hira. Napu ee rauramo nampotomuka Herodes nerapi pohingkabelo, apa ngatara namparata pangkoni lako poparentaa Herodes.
21I eona to laipakatantu amimi, Herodes nampake waru kamagauana pade noncuna i poncunaa kamagauana pade nojarita hi todea. 22Nangepe Herodes nojarita, nogoraramo todea nanguli, “Ei mai jarita dewa, moma jarita manuhia!” 23Tempo ee mui malaeka Pue nampahapa Herodes apa moma'i nebila hi Alatala. Pade Herodes laikuku kalinoro duuna namate. 24Naliu ee lolita Alatala natetambai potolelena pade natetambaiki mui kadea tauna to nangepe.
Barnabas pade Saulus laipelihi mangkeni Kareba Belo
25Nahudupi bagora Barnabas pade Saulus nangkeni doi rau Yerusalem, nanculiramo rau i Antiokhia. Laikenira Yohanes to laikio mui Markus laipodohera.
Currently Selected:
Tutura Rasul 12: MYL
Highlight
Share
Copy
Want to have your highlights saved across all your devices? Sign up or sign in
