Mareko 6

1Ou eiei mere elemanemakei’inave Una eiei ai U anenave; Una aivara e’e’okanave.

2Sabati lare ai omoro marea laru ai U omoro kurunave: a’a aila Una voa virimakei’inave oro varuavakei’inave, erau voa veve’eimakei’inave ane, Ei lai evera awku uriria ei a’a ekei‐ama‐mi’e? oi lai evera ana U awkuakeina, i Una eve ei iva iaki liakeina?

3Ei a’a kapetera a’a peana, Maria anu mere, Iakobo, Iose ane, Iuda ane, Simona ane, enu aroa a’a? Oro ia’ia uruekinave U eiai.

4Iesu erau voa kuruenave, Laikorava a’a kapeo avioia mi’ina una pani va’au ai, una avai a’a kiripai ane, una marea ai ane.

5Iou ai iva iaki U liai liapea, maia a’a ailapea e Una eve oro upa mere U ai’inave, aukariekanave ane.

6Uku omo peroro e’ea eiai U varua’anave. Pai’iri pai’iri ai U aki‐enanave, omoro kurumakei’inave ane.

7U ai aneai aivara 12 U laea‐elau’unave; a’a orere, orere mo, U ekaivirinave; avaea‐lipi laeiai U iva ekunave.

8Aru eria mi‐enavai omo aki eiai U ekinave, iri iei e mi‐enavai U evere’enave; pu eria, puki awku eria, moni eria:

9Rawre are lukinameki; piliue rere pa lukiai.

10U erau voa kuruenave, Marea noro ikiriane, i‐pokoira anea’anea noro kurua pai’iri mere eleane.

11A’a kavakava umu‐nai?-?ape liane, nomo voa viriape liane, noro kurua marea mere ave’eane, kae nomo are mere kikine uku omo opara ioneliai.

12Oro elenave, omoro kurunave ane a’a lai urukiai limakina.

13Avaea‐lipi aila oro laeinave, maia a’a aila upa mere oro muramura orekanave, aukariekanave ane.

14Heroda amua ei awku uriria anu uru virinave; (uku Una uru amai upurukiakei’inave: ) u erau voa kurunave, Ioane Bapatiso imua mere la’avakeina, ou uku eiai ei iva awku u laru ai awkamakina.

15A’a mo erau voa kurunave, U Elia keina. A’a mo kurunave, U laikorava a’a naea, U amua laikorava a’a anu a’a naea.

16Heroda Una uru viriaka’ane, u erau voa kurunave, U Ioane, kurua vaki inu uku nai ei’inave, u imua mere la’avakeina.

17Uku Heroda verukua a’a okaiviriaka, Ioane piriaka, kipura marea laru ai arekapu piriaka ane, uku Herodia eiai una ovaki inu a’e: uku ei a’e u a’e eiai u miaka.

18Uku Ioane Heroda erau voa kuruaka, Opara anana peo ni aroa a’a anu a’e ni miai ni a’e eiai.

19Ou voa eiai Herodia ia’iakei’inave Ioane eiai, Ioane avai u umuli’inave; u liai‐a‐li’inavea.

20Heroda korekei’inave Ioane eiai, uku u ipali’inave Ioane opara anana a’a kei’inave, iaa a’a ane, ou uku eiai u iawkanave; una voa u viriaka’ane u lai kukupuna kei’inave, a una voa viriai u kopaili’inave.

21A Herodia anu kavani pani anenave. Heroda purai karikinave una kinia lare laikora‐awkiai; una paioka a’a, aiau unu marevaki a’a ane, Galilaia eiei inu oiviria a’a ane, oro kaupukinave ei purai eiai;

22Ei pani ai Herodia anu paka ikirimanenave purai a’a anu paku ai ekeli’inave ane, Heroda una a’a ane u kiripai papa’amakei’inave paka kopai‐ekanave; amua paka erau voa kurunave, Kurua kavani ni umuli’ina nawki‐ikane, nai nikuakana.

23Paka kiripai kuruei voa u erau voa kurunave, Kurua awkuni nawki‐ikavakana, lia, na eiei mekai ane, nai nikuakana.

24Paka elenave una mei erau voa veve’enave, Nai oi?-?ama‐nawkilimau? Mei kurunave, Ioane Bapatiso onu uku ni nawki‐awkane.

25Paka amua ai roko?-?roko ikirimanenave, erau voa emoki nawki‐awkanave ane, Nai umuli’ina eu ai, eai ane, Ioane Bapatiso onu uku ainau upa mere ni ikuai.

26Amua lai kukunu ovara mai kei’inave; a uku una kuruei voa, a uku oro awku u kiripai papa’amakei’inave, paka anu nawki u inaka‐a‐li’?-?inavea.

27Amua una oiviria aiau monou emoki okaivirinave, Ioane enu uku mi‐aneai u awkinave ane: u enanave Ioane enu uku kipura marea laru ai u ei’inave ane.

28Una uku ainau upa mere u mi‐anenave, paka awkunave ane: paka uku una mei awkunave ane.

29Ioane enu aivara uru viriaka’ane ei awku eiai, oro anenave Ioane enu kape uakinave, lauoi ai i’inave ane.

30Iva a’a Iesu ai vairuaka’ane, awku uriria oro liaka, ipawkiaka ane, oro awkinave.

31U erau voa ekinave, Anene, noro uriria e, kekepere ai, pani mau’u laikaiai: uku a’a aila i‐anemakei’?-?inave, i‐enamakei’inave ane, oro pani eria miaka pei navai.

32Oro mapea ai kekepere ai vauavaua enanave.

33Oro enamakei’inave a’a aruru inamu‐ei’inave, omo a’a aila ipa‐ulau’unave, iou ai area‐enanave pai’iri uriria mere, oro paku ai pinai pai’inave ane.

34Iesu piaka’ane a’a aruru ovara U inamu‐ei’inave, U umu‐awkavakei’inave oro eiai uku oro mamoe orau oiviria a’a miape: awku aila U ipekinave.

35Lare enu eua pani arekamu ai aneaka’ane Una aivara U ai anenave, erau voa kurunave ane, Kekepere mako eu aku, lare enu eua pani ane.

36A’a aruru ekaivirira, oro pai’iri pai’iri enava’ane‐iai, pei inaealiane‐iai oro eiai.

37U erau voa ekinave, Noro pei ekune. Oro erau voa veve’enave, Enei ama enamau 100 seleni kavani inu pu inaea‐liai, ekuai ane, uku oro na’ane‐iai?

38U erau voa veve’einave, Pu aw ekara’aru ana noro mi’ina? akoai noro enara Oro ipaliane oro erau voa kurunave, Pu aw 5 aku, nava rere ane.

39A’a aruru kaupu‐kaupu papa’avai pono ai ekiai U ekinave.

40Oro epea epea papa’anave, epea varomo a’a 100, epea mo a’a 50.

41U pu aw 5, nava rere ane, miaka’ane, pani muku i U inamu‐ekinave, nawki‐awkanave ane, pu aw U vepenave, la’a aivara ekunave a’a aruru unu paku ai aiai; nava rere awku U kokoranave oro uriria eiai.

42Oro uriria pei na’anave, lai aukiakei’inave ane.

43Pei kakai, nava la’a ane, uakei’inave, oro roikinave, kekai 12 oro pei kakai evoponave ane.

44Pei na’a a’a uriria oro a’a 5,000 akoakei’inave.

45Aivara mapea lakeai U emoki ekinave, oro pinai Ururu keane‐iai Betasaida ai, U pokoiane‐iai a’a aruru omo mako ai ekaiviriai.

46U ekaiviriaka’ane, uku nawki‐awkavai U akapu ai inanave.

47Lare euaka’ane mapea Ururu vimu ai kei’inave, U epuri pokoinave pani va’au ai.

48Oro pala‐awkamakei’?-?inave U inamu‐eimakei’inave; kavaea paku mere evu?-?kimakei’inave: pani merea anu kokora viki pani U oro ai anenave, ere aura upa mere are rokoamakei’inave, U e’epeai orau enamakei’inave.

49Oro inamu‐oiaka’ane ere aura upa mere are‐rokoamakei’inave oro laikoranave U avaea kei’inave, oro vikirinave ane kore eiai.

50Oro uriria inamu‐oinave, lai kukupuna‐ekavakei’inave ane. U erau voa emoki kuruenave, Iviri li’ine: Nai aku, kore pa liai.

51Oro ai mapea ai U lakenave; kavaea eikinave: omo lai laru ai oro kore‐kei’inave.

52Uku pu aw anu ipawkia miki oro ipaliakape: omo lai pauapaua kei’inave.

53Oro keaka’ane, Genesereta eiei ai oro anenave, miri ai rawre ururunave ane.

54Oro mapea mere piaka’ane a’a aruru emoki ipa‐ulau’unave,

55Eiei iki oro area‐enanave, omo maia a’a kile upa mere oro vakarunave U ai.

56Pai’iri ovara, pai’iri mau’u, avari ai ane, omo maia a’a oro kanikara ai ai’inave, oro nawki‐awkanave oro Una a’a kape enu puru e nekeane‐iai; oro ane oro nekenave oro uriria aukariekavakei’inave.

Currently Selected:

Mareko 6: IAR1920

Highlight

Copy