Mareko 1

1Iesu Keriso, Eloi inu Mere enu Iva voa erau voa pinai‐li’ina,

2Voa orau Isaia laikorava a’a anu buka laru ai kikiriakeina, Akoi’i, Na iva a’a Ni paku ai Nai okaivirimakina, Ni kapea u evere’eakana Ni paku ai.

3A’a monou voa araro laealimakina: Kekepere ai kapea karikine Iehova eiai, Una kapea anana‐eine.

4Ioane ere bapatiso‐liaka kekepere ai, lai urukia anu ere bapatiso omoro kuruaka ane namea anu paue‐awmia eiai.

5Iudea eiei inu avai a’a uriria mere, Ierusalema anu avai a’a mere awku, a’a u ai elenave, i u oro uriria ere bapatiso‐ekavakei’inave Ioridana aiara ai, omo namea iki e’emakei’inave.

6Ioane kamela kimari a’a kape lukiakei’inave, kape awre una mako ai piriakei’inave ane, kira’a, venoko ane, u na’anave.

7Erau voa u omoro kurunave, U ane U nai neko ai aneliviai anelia U epe’epe keina nai, U ane, ipi’ipiapea, nai a’a ima peo are epo aiai Una are rawre uniai.

8Nai ere bapatiso‐naka’?-?ane euna: a U Avaea Iaa bapatiso‐nakavakana.

9Ou pani ai Galilaia anu Nasareta mere Iesu anenave, i Ioane U ere bapatiso‐awkavakei’inave Ioridana anu aiara ai.

10Emoki ere inamakei’inave vapai kaia ai U inamu‐oinave, Avaea naku orau lilimakei’inave U upa mere:

11Voa awku pani muku mere erau voa laealimakei’inave, Ni Na naumuki Mere keina, uku Ni Na kopai evere’eakeina.

12Kekepere ai eleai Avaea emoki oininave.

13Lare 40 kekepere ai U uarokoanave, i Satani ailiakei’inave; lekuleku a’uri kiripai U uarokoanave; aivara‐avaea oro kamaia‐awkanave.

14Ioane enu piria pani neko ai kipura marea laru ai Iesu Galilaia eiei ai anenave, Eloi inu eiei Iva voa omoro kurumakei’inave.

15Erau voa kurumakei’inave, Pani evere’eakeina, Eloi inu eiei arekamu ai keina: noro lai urukine, Iva voa pirimaroakone ane.

16U Galilaia anu Ururu ai are‐rokoamakei’inave, Simona, Anederea ane Simona anu aroa a’a, U inamu‐ei’inave, keve Ururu ai ururumakei’inave: uku orere nava evoroa a’a kei’inave.

17Iesu erau voa kuruenave, Norere e’e’ikane, a’a evoroai Nai ipanakiakana.

18Keve orere emoki ave’einave, e’e’okanave ane.

19U paku ai mau’u enavaka’ane, Iakobo Sebede enu mere, Ioane ane una aroa a’a, U inamu‐ei’inave, orere mapea ai keve ekoromakei’inave.

20Orere U emoki laea‐elau’unave: orere enu mekai una aivara a’a kiripai mapea ai orere ave’enave, e’e’okanave ane.

21Oro Kaperanauma ai inunave, Sabati lare U omoro marea ikirinave, omoro kurunave ane.

22Uku Una ipawkia voa eiai oro varuavakei’inave: uku lai evera a’a orau U ipekinave, kikiria a’a orau apea.

23Omoro marea laru ai avaea‐upu mia a’a rokoanave; voa araro u laeali’inave.

24Erau voa kurumakei’inave, Enei oiamali’i Ni eiai, keinamaki Iesu Nasareta a’a e? Ni ama’ane’i a’avai? nai ipanilauna, Ni Eloi inu Iaa A’a.

25Iesu una voa ei’inave, erau voa kurunave ane, Voa oaio, ei a’a mere ni elemanene.

26Avaea‐upu kurua a’a kukunu‐awkavaka’ane, voa araro laealiaka’ane, u elemanenave.

27Oro uriria varuavakei’inave, erau voa ekinamakei’inave ane, Oi opara ana eire? ipawkia voa nawawrea eire, amua a’a anu voa U avaea‐upu ekina, oro kamaia‐awkana ane.

28Una uru emoki upurukinave makomako ai Galilaia eiei iki ai.

29Oro omoro marea elemaneaka’ane, oro Iakobo, Ioane ane kiripai emoki anenave Simona, Anederea ane, enu marea ai.

30Simona anu kimi a’e kou’upua varuvaru maia kei’inave, oro Iesu awkinave a’e enu maia eiai.

31A’e ai U enanave, a’e enu eve U mi’inave, U a’e la‐okanave; maia a’e emoki ave’enave, pei ekuai a’e la’anave.

32Eua pani ai lare euaka’ane, maia a’a uriria U ai oro mi‐anenave, oro awku avaea‐lipi miaka.

33Pai’iri a’a uriria kikau ai kaupukiakei’inave.

34A’a oro maia e e miaka oro aila U aukariekanave, avaea lipi aila U laeinave; uku avaea lipi ipa‐ulau’unave oro voa kuruai U ei’inave.

35Merea pani ai, lare ina pani paku ai, U la’anave, epuri mako ai U elenave, nawki‐awkanave ane.

36Simona, oro awku U kiripai marea ai pokoinave, e’e’okanave.

37Oro auiaka’ane oro erau voa kurunave, A’a kavakava nivoromakina.

38U erau voa kuruenave, Enei enanamaki pai’iri pai’iri arekamu ai, Nai iou ai awku omoro kuruane‐iai: ou uku eiai Nai Eloi mere anenave.

39Omo omoro marea uriria laru ai Galilaia eiei ai U omoro kurunave, avaea‐lipi awku laeinave.

40Apa auma a’a U ai anenave, U paku ai are epo ai’inave, erau voa nawki‐awkamakei’inave ane, Ni umuliane urupu‐i’iai Ni liai li’ina.

41Iesu umu‐awkanave, Una eve oiokanave, apa auma a’a nekenave ane, erau voa kurunave ane, Nai umu li’ina, urupu evere’enamoki.

42Apa auma emoki aukarikavakei’inave, a’a urupu‐eakei’inave ane.

43Iesu emoki okaivirinave, erau voa awkinave ane,

44Oivirine ni a’a e awkinavaia, enara, ni kape omoro a’a ipawkira, urupuliakeia la’aruku ekura orau Mose awkinave, iki e’ea voa eiai a’a anu paku ai.

45U elenave, uru upurukinave ane, a’a kavakava awkinave ane, ei uku eiai a’a anu paku ai Iesu pai’iri ikiriai a‐li’inavea: pai’iri iki ai epuri mako mako ai U pokoinave: mako‐mako mere oro U ai anenave.

Currently Selected:

Mareko 1: IAR1920

Highlight

Copy