Mataio 28
28
1Sabati lare periakei’inave, namai lare enu merea pani ai, Maria Magadala, Maria e ane, lauoi inamu‐oiai orere anenave.
2Akoi’i, pani va’au oioi ovara li’inave: uku Iehova anu aivara‐avaea pani muku mere lilinave, rawre lai‐awkanave lauoi inu kikau mere, rawre upa mere U i‐pa’anave ane.
3Una paku evao mikirinave, Una a’a kape maina anu urupu mikirinave:
4Oiviria aiau uku kore u eiai oro varuvaruli’inave, imua a’a orau oro evere’einave.
5Aivara‐avaea a’ero erau voa kuruenave, Norere kore pa liai: uku nai ipali’ina Iesu iri keoa upa mere avakei’inave norere vorona.
6U eu ai peo, uku orau U kurunave, U imua mere rokoa la’ane euna, Anene, mako U i’iakei’inave norere inamu‐oine.
7Rokoroko enara, Una aivara ekira, U imua mere la’ane euna, noro paku ai U enanavailia kapoi Galilaia ai; iou ai noro inamu‐oiakana: Akoi’i, nai nakiane euna kapoi.
8Orere lauoi mere emoki enanave, orere kore, kopai ane, kei’inave; aivara ekiai orere area‐enanave.
9Au‐ekuai anemakei’inave orere Iesu inamu‐oinave, U erau voa kuruenave, Norere ouana? Orere anenave, are epo ai’inave, Una are a’akinave ane, avioinave ane.
10Iesu erau voa kuruenave, Kore pa liai, enara Na aivara ekira Galilaia ai enavai, iou ai oro inamu‐i’iakana.
11Orere enamakei’inave oiviria aiau varomo pai’iri ai anenave, awku uriria liakei’inave oro omoro amua a’a ekinave.
12Oro mai‐oro kiripai kaupukiaka’ane, voa ipiaka’ane, moni ovara oro aiau ekunave,
13Erau voa kurumakei’inave, Noro erau voa kuruakana, Kipere pani ai enei awawkeimakei’inave Una aivara anenave, Una kape avapu iou‐mi‐enanave ane.
14Kavana ei voa viriane, paioka voa noro eiai enei kuruakana, noro kukupuna mi’inavaia.
15Oro moni mi’inave, orau oro ipekiakei’inave oro li’inave: Isaraela a’a awkono avao ai eai ei voa upurukiakeina.
16Aivara 11 Galilaia eiei ai elenave, kurua akapu ai Iesu ekiaka.
17Oro inamu‐oiaka’ane, oro avioinave: a’a varomo peroro e’eanave.
18Oro ai Iesu anenave, erau voa kuruenave ane, Iva uriria ikuakeina pani muku ai, pani va’au ai ane.
19Ou uku eiai noro enara, kaki a’a uriria ipekira, i Mai inu nawi, i Mere enu nawi, i Avaea Iaa anu nawi, bapatiso‐ekara:
20Oro ipekira awku uriria kamaia‐ekavai Nai nakiane euna: Akoi’i, Nai noro kiripai pokoi‐liviai panipani ai anea’anea pani va’au periane.
Currently Selected:
Mataio 28: IAR1920
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1920.
