Mataio 27
27
1Merea pani aneaka’ane omoro amua a’a uriria, a’a aruru unu mai‐oro ane, voa ipimakei’inave uku Iesu avai.
2Oro pirinave, arekanave ane, Pilato kavana awkunave ane.
3Kurua vaki Iuda Iesu anai‐aviaka u inamu‐oiaka’ane Iesu mua‐awkavakei’?-?inave, u lai urukinave, moni 30 la’a u moawku mi‐anenave omoro amua a’a, mai oro ane, paku ai,
4Erau voa kuruenave ane, Nai namea liane euna uku nai mua eria a’a anai‐aviane euna. Oro erau voa veve’enave, kurua awku ene awku ana? Ai, ni e.
5Moni la’a u kai’inave omoro marea laru ai, elenave ane, una ke konou pirinave iri vao upa mere u imua eokavakei’inave.
6Omoro amua a’a moni la’a mi’inave, erau voa kurunave ane, Opara anana peo ei moni omoro marea anu maua laru ai eiai uku ei moni aro onu kavani moni keina.
7Oro voa ipiaka’ane oro vana karikia a’a anu aura inaeali’inave oro iou ai kikoro imua a’a i’iane‐iai.
8Ou uku eiai kurua aura nawi aro aura oroiakei’inave anea’anea eai.
9Orau Ieremia laikorava a’a anu voa evere’eakei’inave, u erau voa kurunave, Moni la’a 30 oro e‐mi’inave, kurua moni kavani U inaealiakei’?-?inave, kavani Isaraela a’a evere’enave U eiai;
10Ei moni oro awkunave vana karikia a’a anu aura eiai, orau Iehova evere’eaka.
11Iesu kavana anu paku ai oinave, kavana erau voa veve’enave, Ni Isaraela a’a anu amua ana? Iesu erau voa kurunave, Omo amua Nai aku.
12I omoro amua a’a, mai‐oro ane, U onai‐awkava?-?kei’inave ane, U voa eria kurunave.
13Pilato erau voa veve’enave, Ei voa aila oro onai?-?nikana Ni viriapeana?
14U voa eria kurunave onai voa monou eiai, uku U kavani voa eria kurunave kavana varuavakei’inave kapoi.
15Kurua purai pani ai kavana anu opara kipura a’a monou ururuai a’a aruru eiai, kurua kipura vaki a’a aruru ie’enave.
16Kipura uru vaki monou oro miaka nawi Baraba oroiakei’inave.
17Oro kaupukiaka’ane Pilato erau voa veve’einave, Nai koama‐ururumau noro eiai? Baraba ana, Iesu ana, U ane U nawi Keriso oroiakeina?
18U ipali’inave uku namani eiai oro Iesu piriaka.
19U voa vevea pakara ai pa’avaka’ane, una a’e epo voa u ai okaivirinave, erau voa kurunave ane, Ei opara anana a’a keinamoki; uku kipere ai aiaro lipi aila nai miaka U eiai.
20Omoro amua a’a, mai‐oro ane, a’a aruru ailienave nawki‐awkavai Baraba eiai, Iesu avakeia’ane‐iai.
21Kavana erau voa veve’einave, Ei a’a rere ekara a’a ana noro amalaikora’i nai ururuma noro eiai; oro kurunave, Baraba.
22Pilato erau voa veve’einave, Ei a’a Iesu nawi Keriso oroiakeina nai oiamalimau U eiai? Oro uriria erau voa kurunave, Iri keoa upa mere u avakeinamoki.
23Kavana erau voa veve’einave, Uku oiana, oi lipi ana U liane euna? Oro voa araro erau voa laeali’inave, Iri keoa upa mere U avakeinamoki.
24Pilato inamu‐oiaka’ane una voa eria kei’inave, a’a aruru rawre ia’ia lala’?-?amakei’inave ane, u ere miaka, a’a anu paku ai una eve u ere kikinave, erau voa kurunave ane, Nai mua eria keina ei opara anana a’a anu aro eiai: noro e.
25A’a aruru uriria erau voa kurunave, Una aro ene upa mere keinamoki, ene ukua‐mere upa mere ane.
26Pilato Baraba ururunave oro eiai: u Iesu vaki?-?awmiaka’ane iri keoa upa mere avai u Iesu ururunave.
27Kavana anu aiau Iesu omo mako ai ora’anave, aiau kaupu iki U ai oro kaupukinave ane.
28Una a’a kape oro uninave, aro kapua oro luki‐awmi’inave ane.
29Oro aimu kiku veia?-?ka’ane Una uku upa mere aiaka’ane, amua anu ini awku oro Una eve miki mokono ai aiaka’ane: Una paku ai oro are epo ai’inave, U makiri‐awkavai oro keke voa erau voa kurunave, Akoi’i, Isaraela a’a anu Amua e!
30U upa mere oro kaunere kai’inave, ini U mere mimakei’inave Una uku upa mere oro ini vaki‐awmi’inave.
31Oro keke makiri‐awkavaka’ane, aro kapua U mere oro iou‐mi’‐inave, Una a’a kape oro luki‐awmi’inave, iri keoa upa mere avai oro ora’anave.
32Oro elemanemakei’inave, Kurene a’a oro au‐awkunave, nawi Simona oroiakei’inave: ei a’a Iesu unu iri keoa vakaruai oro oininave.
33Oro Golagota ai paiaka’ane, kurua nawi inu miki, La’aro Epamu unu mako,
34Ere iara oro awkunave U nava’ane‐iai: U ere ke?-?vere’eaka’ane U navakape.
35Iri keoa upa mere oro a’anave, Una a’a kape oro kokoranave, aua aua ie’enave ane, orau i laikorava a’a kuruakei’inave, Oro awkono avao ai Na a’a kape oro kokoranave, aua aua ie’enave ane.
36Uku oiviriai oro i‐pa?-?pa’amakei’inave;
37Una uku upa mere ei avia voa kikiriakei’inave oro ai’inave, Iesu eire, Isaraela a’a anu Amua.
38U piria avapu a’a rere e‐avakei’inave iri keoa upa mere, monou Una eve miki mekai, mo, Una eve keau mekai.
39Oro awawpemakei’inave, makiri voa a’ika a’ika erau voa kurumakei’inave,
40Ni ane Ni omoro marea lare rere kaiane enakanave, moawku la‐okanave ane, Ni inikane. Ni Iehova anu Mere keia’ane, iri keoa mere liline.
41Omoro amua a’a, kikiria a’a ane, mai‐oro ane, oro keke erau voa kurumakei’inave,
42A’a e U i’ekanave, U iawkavai liapea. U Isaraela a’a anu Amua U iri keoa mere lilinamoki, enei pirimaroakoakana.
43U Iehova pirimaroakoanave, Iehova umuliane U iawkanamoki, uku U erau voa kurunave, Nai Iehova anu Mere keina.
44Avapu a’a orere U kiripai iri keoa upa mere avakei’inave, orere awku makiri‐awkavai anara voa kurunave.
45Lare iki pani mere anea’anea pukurua pani arekamu ai pani va’au iki mu?-?rukei’inave.
46Pukurua pani ai voa araro Iesu erau voa laeali’inave, Eli, Eli, lama sabachthani? Ou voa anu miki eire, Na Iehova e, Na Iehova e, uku oiana Ni ave’i’ina?
47A’a varomo i‐oimakei’inave, oro ou voa viriaka’ane, oro erau voa kurunave, Ei a’a Elia laea‐ulauna.
48Omo a’a monou emoki area‐enanave, ina ere iara evoponave, ini va’au pirinave, la‐okanave Iesu nava’ane‐iai.
49A’a mo erau voa kurunave, Keinamoki, enei inamu‐oinamaki Elia anea’ane iawkavai.
50Iesu voa araro moawku laealiaka’ane U imunave.
51Omoro marea anu mai kapua emoki koravakei’inave upa mere arau ai miki; pani va’au awku oioili’inave, rawre‐ovara oro awku kokoranave;
52Lauoi‐oro auakei’inave; Eloi inu a’a aila oro imua anu awaw kei’inave oro lala’anave,
53Iesu unu imua mere la’ava pani neko ai omo lauoi mere oro elemanenave, iaa pai’iri ikirinave ane, a’a aila paku ai oro erenave ane.
54Aiau unu marevaki, oro awku u kiripai oiviriai i?-?pokoimakei’inave, oro pani va’au unu vanovano inamu‐oiaka’ane, awku‐oro liakei’inave ane, oro erau voa kurunave, Ei a’a Iehova anu Mere kapoi.
55A’ero aila amai mere inamu‐ekimakei’inave, oro ane oro Iesu Galilaia mere e’e’okavaka, paiokavaka ane:
56Maria Magadala, Maria Iakobo, Iose ane enu mei, Sebede enu ukua‐mere enu mei, ei a’ero kaupu awkono avao ai kei’inave.
57Lare eua pani ai amua a’a monou nawi Iosepa, Arimatea mere anenave, u awku Iesu unu aivara a’a kei’inave:
58U Pilato ai anenave, Iesu unu kape miai u nawki‐awkanave ane. Kape Iosepa awkuai Pilato aiau ekinave.
59Iosepa kape miaka’ane, kapua urupu u kape luki‐awmi’inave.
60Una lauoi nawawrea laru ai Iesu unu kape u i’inave, lauoi rawre ovara laru ai koravakei’inave, rawre ovara lauoi inu kikau ai u pa‐okanave, u ave’enave ane.
61Maria Magadala, Maria e ane, i‐rokoanave, lauoi paku ai orere i‐papa’amakei’inave.
62Purai lare enu namai lare omoro amua a’a, Parisea a’a ane, Pilato ai anenave,
63Erau voa kurumakei’inave ane, Amua e, enei laikora‐akina ei ewaea vaki Una rokoa pani erau voa kurunave, Lare rere kaiane periane imua mere Nai moawku la’avakana.
64Ou uku eiai lauoi oiviriai a’a ekine, Una aivara kipere pani anenavaia, Una kape avapu iou‐mi’inavaia, a’a aruru erau voa kurunavaia, Imua mere U la’ane euna: orau pinai kukupuna anu ovara ika pani inu kukupuna ovara ipi’ipiapea.
65Pilato erau voa kuruenave, Oiviria a’a e‐mi’ine, enara, lauoi kane piriai, orau noro umuli’ina.
66Oro enanave, lauoi kane pirinave, kikau unu rawre ane, oiviria a’a ane oro ai’inave ane.
Currently Selected:
Mataio 27: IAR1920
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1920.
