Mataio 25
25
1Pani muku eiei pakoro 10 mikiriakeiakana, omo lamepa oro e‐mi’inave, vaki nawawrea au‐awkuai oro elenave.
2Pakoro 5 lai evera kei’inave, pakoro 5 e avuavu kei’inave.
3Avuavu pakoro omo lamepa miaka’ane, ere omo lamepa eiai oro miakape:
4Lai evera pakoro lamepa ere ane, mi’inave.
5Uku vaki nawawrea pani va’au aneakape, oro uriria inamu mu’u awawkei’inave.
6Kipere mokono pani ai laea araro liakei’inave, Akoi’i, vaki nawawrea ei‐anema?-?kei! Au‐awkuai noro elene.
7Pakoro uriria lala’anave, omo lamepa iau ekunave ane.
8Avuavu pakoro lai evera pakoro erau voa kuruenave, Nomo ere mau’u akune uku ene lamepa nawmokiakeima?-?kina.
9Lai evera pakoro erau voa kuruenave, Ai, ere ovara peo naea enei uriria eiai: kikoa ai enara ere inaeli’ira noro eiai.
10Oro ere inaealiai eleaka’ane vaki nawawrea anenave; pakoro lamepa ima miaka a’e mia purai navai u kiripai marea ikirinave, kikau awkuakei’inave ane.
11Neko mere ai pakoro e anenave, erau voa kurunave ane, Amua e, Amua e, kikau aune enei eiai.
12U erau voa kuruenave, Nai kurunaina kapoi, Nai ipanalauapea.
13Ou uku eiai awaw pa keiai, uku A’a anu Mere enu anea lare, pani eiei ane, noro ipapea.
14Pani muku eiei a’a orau pani va’au e amai aki enanavailia, una aivara u laea‐elau’unave, una aru eiviriai u ekunave ane.
15Aivara monou u taleni 5 awkunave, aivara mo u taleni rere awkunave, aivara mo u taleni monou awkunave; a’a monou‐monou una lai evera ipi’ipia u taleni awkunave; u aki enanave.
16Kurua vaki taleni 5 miaka ou taleni u kavani‐kavani li’inave anea’anea u taleni 5 mo akoaka’ane.
17Kurua vaki awku u taleni rere miaka u orau li’inave anea’anea u taleni rere mo akoaka’ane.
18A kurua vaki u taleni monou e miaka, u ena ovai’?-?inave, una amua anu moni laru ai vaua’awkanave ane.
19Pani va’au periakeia’ane ei aivara anu amua vairunave, oro kiripai voa ipinave taleni eiai.
20Kurua vaki taleni 5 miaka taleni 5 mo u mi‐anenave, erau voa kurunave ane, Amua e, taleni 5 ni ikuaka: akoi’i, taleni 5 mo nai roikiane euna.
21Amua erau voa kurunave, Ni ima liane euna ima miki aivara e: uku ni miki liane euna moni ailapea eiai, nai areniakana aru aila eiviriai: ni amua anu kopai ni aua‐mi’ine.
22Kurua vaki awku u taleni rere miaka u anenave, erau voa kurunave ane, Amua e, taleni rere ni ikuaka, Akoi’i, taleni rere mo nai roikiane euna.
23Amua erau voa kurunave, Ni ima liane euna ima miki aivara e: uku ni miki liane euna moni ailapea eiai, nai areniakana aru aila eiviriai: ni amua anu kopai ni aua‐mi’ine.
24Kurua vaki taleni monou miaka u anenave, erau voa kurunave ane, Amua e, nai ipanilau’unave ni manipu a’a kei’inave, roikimakina iou ai ni voeakape, ie’emakina iou ai ni kiniakape.
25Nai kore kei’inave, ni taleni nai ka’e ai vaua‐awka?-?nave: akoi’i, ni moni eire.
26Amua erau voa kurunave, Namea eapa vaki e, ni ipali’inave nai roikina iou ai nai voeape, ie’ena iou ai nai kiniape:
27Ou uku eiai na moni ni moni kavani‐kavani a’a ekuaka livilia nai vairuane na moni, moni inu kavani awku, nai miane‐iai.
28Ei vaki inu taleni iou‐mi’ine, taleni 10 mia vaki awkura ane.
29Uku awku mia a’a kavakava awku mo awkuakeiakana, u awku veruku miakana: a awku eria vaki mere kurua awku mau’u u mi’ina u mere iou‐miakeiakana.
30Ei eria mia vaki muru ai laoine, iou ai vikirimakeiakana, ni’iri ekikimakeiakana ane.
31A’a anu Mere Una evao’evao aivara‐avaea uriria kiripai anea’ane, Una evao’evao pakara ai U pa’avakana:
32Kaki a’a uriria Una paku ai roikiakeiakana: oro mekai mekai U kokorava?-?kana, mamoe oiviria a’a orau mamoe nani mere kokorana:
33Mamoe Una eve miki mekai U eravakana, a nani Una eve keau mekai U eravakana.
34Oro Una eve miki mekai Amua erau voa kurueakana, Anene, Na Mai inu kopai a’a e, eiei pani va’au unu ea pani mere noro eiai evere’eakei’inave noro roikine.
35Uku Nai pei navai‐navailiane, noro pei ikunave; Nai kamuri lavere kei’inave ane, noro ere ikunave: Nai kikoro a’a kei’inave ane, noro kamaia?-?ikanave.
36Nai irikaiva kei’inave, a’a kape noro ikunave; Nai maia kei’inave, inamu‐i’iai noro anenave: kipura marea ai Nai piriakei’inave, noro umu‐ikavai anenave.
37Opara anana a’a erau voa kuruakana, Amua e, ekarapani ai enei inamu‐ama‐ni’e pei navainavaili’inave, pei nikunave ane? kamuri lavere ane, ere nikunave?
38Ekarapani ai kikoro a’a enei inamu‐ama‐ni’e, enei kamaia‐nikanave? irikaiva ane, a’a kape enei nikunave?
39Ekarapani ai Ni maia enei inamu‐ama‐ni’e, kipura marea laru ai ane, enei Ni ai anenave?
40Amua erau voa kurueakana, Nai kurunaina kapoi, Orau noro li’inave Na aroa a’a anu rurupu a’a monou eiai, orau noro li’inave Nai eiai.
41Oro Una eve keau mekai U erau voa kurueakana, Enara, ivave‐mia a’a e, opai iau laru ai, diabolo una aivara‐avaea ane noro eiai evere’enave.
42Uku Nai pei navai?-?navaili’inave, pei eria noro ikunave, Nai kamuri lavere kei’inave, ere eria noro ikunave:
43Nai kikoro a’a kei’inave, noro kamaia‐a‐ikana?-?vea; irikaiva kei’inave, a’a kape eria noro ikunave: kipura marea pokoinave, inamu‐i’iai noro a‐anenavea.
44Oro awku erau voa kuruakana, Amua e, ekarapani ai enei inamu‐ama‐ni’e pei navai‐navaili’inave, kamuri lavere kei’inave, kikoro a’a kei’inave, irikaiva kei’inave, maia kei’inave, kipura marea laru ai pokoinave enei kamaia‐a‐nikanavea.
45U erau voa kurueakana, Nai kurunaina kapoi, Orau noro li’inave Na aroa a’a anu rurupu a’a monou eiai, orau noro li’inave Nai eiai.
46Ei kaupu enavakana kavani miai opai keiakana: a opara anana a’a opai rokoa ikiriakana.
Currently Selected:
Mataio 25: IAR1920
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1920.
