Luka 2
2
1Ei pani ai Kaisara Auguso mere awkia voa okaiviriakei’inave uku pani va’au iki inu a’a akoai.
2Ei a’a akoa opara pinai liakei’inave ou pani ai Kurenio Suria pani va’au unu kavana uarokoanave.
3A’a uriria akoakeiai enanave, a’a kavakava una pai’iri miki ai enanave.
4Iosepa awku Nasareta pai’iri mere, Galilaia eiei mere, Betelehema Davida anu pai’iri ai inanave; Iudea eiei ai uku u Davida anu kiri a’a kei’inave,
5U, Maria ane una awkoia a’e, uku orere akoakeia’ane‐iai; a’e nemo kei’inave ane.
6Orere i‐pokoinave ane a’e enu pani evere’eakei’inave u ukua kiniai.
7Una maura‐ukua u kininave, kapua lukinave ane, animala anu pei ainau laruai ai’inave; uku marea miki laru ai mako eria kei’inave oro eiai.
8Pai’iri arekamu ai mamoe oiviria a’a aura ai i‐pokoimakei’inave, omo mamoe kipere pani ai eivirimakei’inave ane.
9Amua anu aivara‐avaea emoki i‐anenave oro ai, Amua anu evao’evao akuru?-?aviekinave: oro kore‐mai kei’inave.
10Aivara‐avaea erau voa kuruenave, Kore pa liai: uku kopai‐mai inu epo voa nai mi‐anena noro eiai, a’a uriria awku eiai.
11Uku Iawka kiniakeina noro eiai ei lare ai Davida anu pai’iri ai, U ane U Keriso Amua keina.
12Ei awku veia keiakana noro eiai; Upi kapua va’au lukiakeina animala anu pei ainau laru ai keimakina noro auiakana.
13Aivara‐avaea kiripai aivara‐avaea aruru emoki erenave pani muku mere Eloi kopai‐awkamakei’inave, erau voa kurumakei’inave.
14Avioia Eloi eiai pani muku epe’epe ai, Pani va’au ai airu, umu ane, a’a eiai.
15Aivara‐avaea mamoe oiviria a’a ave’eiaka’ane, pani muku ai vairuaka’ane, mamoe oiviria a’a erau voa ekinave, Enei enanamaki Betelehema ai, ei awku evere’eane euna inamu‐oiai, Amua ipakiane euna.
16Oro rokoroko anenave, Maria, Iosepa ane, auienave, upi ane animala anu pei ainau laru ai keimakei’inave.
17Oro upi inamu‐oiaka’ane voa kuruekeiaka Upi eiai oro upurukinave iki ai.
18Oro uriria ei voa virinave mamoe oiviria a’a ekiaka oro varua’anave.
19Ei awku uriria una umu laru ai Maria eivirinave, una lai laru ai ipiemi’inave ane.
20Mamoe oiviria a’a vairunave, Eloi avioimakei’inave, kopai‐awkamakei’inave ane, uku awku uriria oro viriaka, inamu‐eiaka ane, orau ei awku ekikei’inave.
21Lare 8 periaka’ane, pani aneaka’ane upi momoa‐eiai, nawi Iesu u oroiakei’inave, orau aivara‐avaea oroinave pani paku ai U ia‐evere’eakei’inave.
22Maria anu ukua‐au’u pani periakei’inave orau Mose vupu liaka, orere U Ierusalema ai mi‐anenave, Iehova awkuai.
23(Iehova anu vupu orau kikiriakeina, Maura‐ukua kavakava kiniakeina, iaa Iehova eiai oroiakeiakana; )
24Iehova anu vupu orau kikiriakeina, epie pei awkuai, Naureia rere naea, naku kokoro rere naea.
25Ierusalema ai a’a monou, nawi Simeona, uarokoanave; opara anana a’a, iaa a’a u kei’inave, Isaraela a’a anu paioka u aioiaka‐pokoinave: Avaea Iaa u upa mere kei’inave.
26I Avaea Iaa ipawkiakei’inave u imuapea anea’?-?anea Amua anu Keriso u inamu‐oiane.
27I Avaea Iaa omoro marea laru ai u oravakei’inave: a’e mai ane upi Iesu omoro marea laru ai mi?-?aneaka’ane U eiai vupu unu opara kamaialiai,
28U Upi uakinave una eve mokono ai, Eloi kopai‐awkanave, erau voa kurunave ane,
29Amua e, Ni voa orau Ni evere’ene Ni aivara eai airu enava’ane‐iai:
30Uku na inamu Ni iawka inamu‐oiane euna,
31Kurua iawka Ni evere’eane euna a’a uriria anu paku ai;
32Pamea lai unuku a’a pamea‐ekavai, avioia ane Ni Isaraela a’a eiai.
33Iosepa, Una mei ane, varua’anave uku voa kuruakei’inave U eiai.
34Simeona kopai‐ekanave, mei Maria erau voa kurunave ane, Ei upi evere’eakeina Isaraela a’a aila anu aramakina, la’amakina ane, veia awku a’a aviakana.
35(Lia, rawve ni imunu ruakana ane,) a’a aila anu lai ipekiakeia’ane‐iai.
36A’e monou nawi Ana, laikorava a’e, Panuela anu paka, Asera avai a’a: u mai‐vaki kei’inave, una a’e paka pani mere u vaki aumeia 7 e miaka;
37Aumeia 84 u a’e kepea kei’inave, omoro marea u a‐ave’enavea, Eloi kamaia‐awkavai u pei larilimakei’inave, nawki‐awkamakei’inave, kipere pani, lare pani ane.
38U omoro marea ikirimakei’inave ou pani ai, u awku Eloi kopai‐awkanave, oro uriria Isaraela anu iawka araea’araea‐limakei’inave upi eiai ei a’e kuruenave.
39Eloi inu vupu orau orere opara uriria liaka’ane, orere Galilaia eiei ai, orere enu pai’iri Nasareta ai vairunave.
40Upi la’anave, venea evere’enave ane, lai evera evopoakei’inave ane; Eloi inu la’aruku U upa mere kei’inave.
41Aumeia kavakava pasova purai pani ai Una a’e, mai ane, Ierusalema ai inanave.
42Una kinia aumeia 12 pani ai, purai opara orau oro Ierusalema ai inanave.
43Purai lare pani miki oro pokoiaka’ane, orere vairumakei’inave, Iesu Ierusalema ai rokoaka‐pokoinave; U i‐pokoinave Iosepa, Una mei ane, a‐ipalinavea.
44Orere laikoramakei’inave U aki a’a kiripai vairumakei’inave, orere lare monou unu aki enanave; orere enu avai a’a kiripai orere voronave.
45Orere auiakape, Ierusalema ai orere vairunave, voromakei’inave.
46Lare rere kaiane periakei’inave orere auinave omoro marea laru ai, lai evera a’a awkono avao ai pa’amakei’inave, omo voa virimakei’inave, U voa veve’eimakei’inave ane.
47Oro Una voa virinave oro uriria varuavakei’inave uku Una lai evera eiai, Una kavani voa ane.
48Orere inamu‐oiaka’ane orere varuavakei’inave, Una mei erau voa veve’enave, Mere e, uku oiana Ni orau alauane euna? Ni mekai, nai ane, lai kukunu nivo?-?roane euna.
49U erau voa kuruenave, Uku oiana norere ivoroane euna? norere ipapeana Na Mai inu iaki Nai liai limakina?
50Ei voa anu miki U kuruenave orere a‐ipalinavea.
51Orere kiripai U ve’enave Nasareta ai, U kamaia‐ekanave ane: Una mei ei voa uriria una umu laru ai eivirinave.
52Lai evera, kape ovara ane, Iesu la’anave, Eloi, a’a ane, paku ai U ima rokoanave.
Currently Selected:
Luka 2: IAR1920
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1920.
