मरकुस 9

1और ईसू नें बिनते कही, “मैं तुमते सच कैहतूं याँपै कछू लोग एसेऊ हैं, जब तलक बे परमेस्‍वर के राज्य कूं सामर्थ के संग आयौ भयौ नांय देख लिंगे तब तक नांय मरिगें।”

ईसू कौ पहाड़ पै मूसा और एलियाह के संग बात करबौ।

(मत्‍ती 17:1–13; लूका 9:28–36)

2 # 2 पत 1:17,18 छै दिना के बाद ईसू पतरस, याकूब और यूहन्‍ना के संग एक ऊँचे पहाड़ पै एकान्त में गयौ। और बिनके सामने वाकौ रूप बदल गयौ। 3और वाके कपड़ा ऐसे चमकबे लगे और बगुला तेऊ जादा सफेद है गये 4और पतरस, याकूब और यूहन्‍ना कूं ईसू अचानक ते परमेस्‍वर कौ नियम लिखवे बारे मूसा और परमेस्‍वर की ओर ते बात बताबे बारे एलियाह के संग बात करत भयौ दिखाई दयौ।

5तब पतरस नें ईसू ते कही, “हे गुरू य्हांपै हमारौ हैबो कितनों अच्‍छौ है, हमें याँपै तीन कुटिया बनाबन दै, एक तेरे काजै, एक मूसा काजै, और एक एलियाह के काजै” 6जि बात पतरस नें जाके मारे कही चौंकि बे भौत डरप गये हते और वाकी समझ में नांय आ रयौ कै बू का कैहबें।

7 # मत्‍ती 3:17; मर 1:11; लूका 3:22 तब एक बादर नें आयकें बिनै ढांक लियौ, और बादर में ते जि अबाज आयी कै “जि मेरौ प्यारौ बेटा है, जाकी सुनों।”

8और जाके तुरन्‍त बाद में चेलान नैं चारौ ओर नजर करी तौ बिनै केवल ईसू के अलाबा और कोई नांय दिखौ।

9तब पहाड़ पैते उतरते भये ईसू नें बिनै आग्‍या दियौ कै, “जब तक मैं, ‘मनुस्‍य कौ बेटा’ मरे भयेन में ते जीबित नांय है जाऊं तब तलक जो कछु तुमनें देखौ है बू काऊ ते मत कहियों।” 10चेलान नें ईसू कि जि बात मान लयी पर बे आपस में बात चीत करिवे लगे कै मरे भयेन में ते जीबित हैबे कौ का मतलब है।

11 # मत्‍ती 11:14 और बिन्‍नें ईसू ते पूंछी, “सास्त्रन कूं सिखाबे बारे जि चौं जि चौं कैहतै कै एलियाह कौ पैहले आयबौ जरूरिए?”

12ईसू नें बिनै जबाब दियौ कै, “हाँ एलियाह पहिलें आयकै सब कछु ठीक करैगौ, पर ‘मनुस्‍य के बेटा’ के बारे में जि चौं लिखौ है कि बू भौत दुख उठावेगौ और बू अपनांयौ नांय जावेगौ?” 13पर मैं तुमते कैहतूं कै, “एलियाह तौ आ चुकौ है और जैसो वाके बारे में परमेस्‍वर के वचन में लिखौ है, लोगन नें वाके संग बैसौई बुरौ व्‍यवहार करौ है।”

एक लड़का में ते दुस्‍ट आतमा कौ निकारबौ

(मत्‍ती 17:14–21; लूका 9:37–43a)

14जब ईसू तीनों चेलान के संग अपने दूसरे चेलान के जौरें आयौ, तौ बानें देखी कै चेलान के चारौ लंग भौत लोगन की भीड़ लगी भयी है, और कछु सास्त्रन कूं सिखाबे बारे बिनके संग बहस कर रये हैं। 15पर जैसेई लोगन नें ईसू कूं देखौ, सब भौतई अचम्भौ करिवे लगे। और बिन्‍नें भाग के ईसू कूं नमस्कार करौ।

16ईसू नें चेलान ते पूछी कै, “तुम इनते काय बात पै बहस करि रये हौ?”

17तब भीड़ में ते एक आदमी नें ईसू कूं जबाब दियौ कै, “हे गुरू! मैं अपने बेटा कूं तेरे जौरें लायो जामें दुस्‍ट आतमा घुसी भयी है और बू जाय बोलन नांय देती। 18और जब दुस्‍ट आतमा जापै आवत है, तब जाय नीचे पटक देते, और जाके मोंह ते झाग निकरिवे लगतें, और जाकी दाँती भिच जाबै है और जि अकड़ जाबै है। मैंनें तेरे चेलान ते बिनती करी हती, कै बे दुस्‍ट आतमा कूं बाहर निकार दै, पर बे बाय नांय निकार सकै।”

19जि सुनकें ईसू नें बिनकूं जबाब दियौ, “हे भरोसौ ना करिबे बारे लोगो, मैं कब तक तुमारे संग रहुंगो, और कब तक तुमैं सहन करुंगो? लड़के कूं मेरे जौरें लै आऔ।”

20तब बे लड़का कूं वाके जौरें लाये और दुस्‍ट आतमा नें ईसू कूं देखिके लड़का कूं मरोड़ दियौ, और लड़का धरती पै गिर गयौ और वाके मोंह में ते झाग निकरबे लगे और बू लोट-पीट करवे लगौ।

21ईसू नें लड़का के बाप ते पूंछी, “जाकी जि दसा कब ते है?”

लड़का के बाप नें कही, “बचपन तेई है। 22दुस्‍ट आतमा जाय मारबे काजै कबऊ आग में गिरा दैवे है और कबऊ पानी में गिरा दैवे, पर तू कछु कर सकतै तौ हम पै दया करिके हमारौ भलौ कर।”

23ईसू नें बाते कही, “तैने ऐसे चौं कही कै तू कछु कर सकतै? भरोसौ करिवे बारे लोगन काजै सब कछु है सकै।”

24जि सुनिकै लड़का के बाप नें तुरन्‍त ईसू ते कही, “हे पिरभू! मैं भरोसौ करतूं, पर मेरौ भरोसौ इतनों मजबूत नांय, तू जाय मजबूत कर।” 25जब ईसू नें देखौ कै लोगन की भीड़ भड़ती जा रयी है, तौ ईसू नें दुस्‍ट आतमा कूं जि कहिकें फटकारौ, “हे दुस्‍ट आतमा तैनें जा लड़का कूं गूंगौ और बहरौ बनांय रखौ है मैं तोकूं आग्‍या देतूं कै जामें ते निकरि जा और दुबारा कबऊ जा लड़का में मत घुसियो।”

26तब दुस्‍ट आतमा चिल्लाई और लड़का कूं भौत जोर ते मरोड़कें बामें ते निकर गई और लड़का मरौ भयौ सौ है गयौ, य्हां तक के भौत ते लोग कहिवे लगे कै जि तौ मर गयौ है 27पर ईसू नें वाकौ हात पकरकै उठायौ और बू खड़ौ है गयौ।

28जब ईसू घर में आयौ, तब वाके चेलान नें एकान्त में ईसू ते पूंछी, “हम बा दुस्‍ट आतमा कूं चौं नांय निकार सके?”

29ईसू नें बिनते कही, “ऐसी दुस्‍ट आतमा बिना पिराथना के नांय निकारी जा सकै।”#9:29 कछू पुराने हात ते लिखे भये लेखन में पिराथना के संग बर्तऊ लिखौ भयौ है

एक बार फिर ईसू नें अपनी मौत के बारे में बतायो

(मत्‍ती 17:22–23; लूका 9:43–45)

30जाके बाद ईसू और वाके चेला मापै ते चल दिये, और बे गलील में ते हैके जा रये हते, ईसू नांय चाहतो कै लोगन नैं जि पतौ चलै कै बे काँपै है, 31चौंकि बू अपने चेलान कूं एकान्‍त में सिछा दैवौ चाहतौ। तब ईसू नें बिनते कही, “मैं, ‘मनुस्‍य कौ बेटा’ लोगन के द्वारा बिसबास घात करिके पकरबायो जाऊंगो और बे मोय मार डारिंगे और मैं मरिवे के बाद तीसरे दिना जी उठूंगौ।” 32पर बे ईसू की जा सिछाए समझ नांय सकै और बे ईसू ते दुबारा पूंछवे ते डरपते।

सबनते बड़ौ कौन है?

(मत्‍ती 18:1–5; लूका 9:46–48)

33फिर बे कफरनहुम में आये, ईसू जब घर में हतो बानें बिनते पूंछी कै रस्ता में तुम का बात पै बहस कर रये हते। 34#लूका 22:24पर बे चुप रये, चौंकि बे रस्ता में चलते भये आपस में जि बहस कर रये हते, कै हम में ते सबनते बड़ौ कौन है।

35 # मत्‍ती 20:26,27; 23:11; मर 10:43,44; लूका 22:26 तब ईसू बैठ गयौ और बानें बिन बारह भेजे भये चेलान कूं अपने जौरें बुलायकै बिनते कही, “अगर कोई सबते बड़ौ हैवौ चाहै तौ बू सबनते छोटो हैके सबकौ सेबक बनें।”

36और ईसू नें एक बालक कूं लैके बिनके बीच में खड़ौ करौ, और फिर बाय अपनी गोद में बैठायकै बिनते कहबे लगौ, 37#मत्‍ती 10:40; लूका 10:16; यूह 13:20जो कोई मेरे नाम ते जा जैसे काऊ बालक कूं अपनातो है, बू मोय अपनातो है, और जो कोई मोय अपनातै बू मोय और मेरे भेजवे बारे परमेस्‍वर कूं अपनातो है।

जो हमारौ दुसमन नांय बू हमारौ साथी है

(लूका 9:49–50)

38एक दिना यूहन्‍ना नें ईसू ते कही, “हे गुरू! हमनें एक आदमी कूं तेरे नाम ते दुस्‍ट आतमांन कूं निकारते भयौ देखौ है, हमनें बाते मनें करी कै तू ऐसौ मत करै। चौंकि बू हम में ते नांय हतो।”

39ईसू नें कही, “तुम बाय मत रोको, चौंकि जो कोई मेरे नाम ते चमत्‍कार के काम करतै, बू तुरन्‍त बाद मेरे काजै बुरी बातें नांय कह पावेगौ। 40#मत्‍ती 12:30; लूका 11:23जो हमारौ दुसमन नांय बू हमारौ साथी है। 41#मत्‍ती 10:42जाके मारे जो कोई तुमैं मेरे चेला समझकै एक गिलास पानी पियाबेगौ, तौ मैं तुमते सच कहुं कै बू अपनों इनाम कबऊ नांय खोवेगौ।”

दूसरेन काजै पाप कौ कारन मत बनों

(मत्‍ती 18:6–9; लूका 17:1–2)

42और जो कोई इन छोटे बालकन में ते काऊ है, जो मोपै भरोसौ रखत हते, पाप के रस्ता पै लै जातैं वाके काजै तौ जि अच्‍छौ होतो#9:42 बू नरक में जाऊते भयंकर सजा पावेगौ कै वाके गले में एक चाकी कौ पाट बांधकै समुन्दर में धकेल दियौ जातो। 43#मत्‍ती 5:30और अगर तेरौ हात तोय पाप के रस्ता पै लै जातै तौ बाय काट डारियो। चौंकि दोनों हातन के रैहत भये तू नरक में डारौ जाये जाकी आग कबऊ भुजत नांय, जाते तौ तेरे काजै जि अच्‍छौ होतो कै तू लूलो बनके कबऊ नांय खतम हैबे बारे जीबन में पिरवेस करतो 44नरक कौ कीड़ा कबऊ नांय मरे और वहाँ की आग कबऊ नांय बुझे। #9:44 कछू यूनानी हात लिखित लेखन में जि आयत नांय पाई जात 45और तेरौ पाँम तोय पाप के रस्ता पै लै जावे तौ बाय काटि डारियो चौंकि दोनों पांमन के रैहत भये अगर तू नरक में डारौ जाये जाकी आग कबऊ नांय भुजत, जाते तौ तेरे काजै जि अच्‍छौ होतो कै तू लंगड़ो बनके कबऊ नांय खतम हैबे बारे जीबन में पिरवेस करै। 46नरक कौ कीड़ा कबऊ नांय मरे और मांकी आग कबऊ नांय बुझे। #9:46 कछू यूनानी हात लिखित लेखन में जि आयत नांय पाई जात 47#मत्‍ती 5:29और अगर तेरी सीधी आँख तोय पाप के रस्ता पै लै जाबै तौ तू बाय निकार डारियो चौंकि दोनों आँखन के रैहत भये तू नरक में डारौ जाये जाकी आग कबऊ भुजत नांय, जाते तौ तेरे काजै जि अच्‍छौ होतो कै तू काँनों बनके परमेस्‍वर के राज्‍य में पिरबेस करतो 48नरक कौ कीड़ा कबऊ नांय मरे और मांकी आग कबऊ नांय बुझे।

49हरेक आदमी नौन और आग ते सुद्ध करौ जावेगौ।

50 # मत्‍ती 5:13; लूका 14:34,35 “नौन तौ अच्‍छौ है। पर नौन अगर अपनों नुनखरौ पन छोड़ दैवे तौ तुम बाय दुबारा कैसै नुनखरौ बना सकतौ? नौन भौत सी चीजन के काजै लाभदायक है बैसेई तुमारो व्‍यवहार दूसरेन के काजै लाभदायक होनों चहिऐं और हर एक तै मेल-जोल के संग रहौ।”

Currently Selected:

मरकुस 9: BRAJ

Highlight

Copy