Mak 6

Chisʋs ʋt ʋbanumpa isht anumpohonli: yohmi ma im ai okla achʋfa yʋt kanimanchi, 1, 7 Ʋbanumpa isht anumpula chi̱ ka im anumpeshi auahtuklo ka pit tihleli mʋt, nan‐isht‐ahullo okpulo puta imaiya chi̱ ka im apesa. 14 Helot ʋt Chan a̱ aboha kʋllo fohki; atuk osh tekchi ash osh anukfohkichi ho̱, noshkobo tʋbli tok. 30 Im anumpeshi ʋhleha hʋt falamʋt Chisʋs a̱ im ai ona: 34 Chisʋs ʋt hatak tahlepa sipokni tahlapi ho̱ nan im abʋchit ahanta mʋt, pʋska lumbo tahlapi, micha nʋni tuklo aiena tuk a̱ okla ha̱ impʋchi.

1Atuk osh yʋmmak ash ʋttʋt ia mʋt, ilap i̱ yakni ash inli ho̱ ona; yohmi ma nan im ai ithʋna ʋhleha hʋt api̱hʋt a̱ya tok.

2Atuk o̱ nitak‐hullo nitak ai ona ma, sinakak anu̱kaka yo̱ nana ai ithʋnanchi tok; mihma yʋmma haklo mʋt, lauʋt nukhlakancha mʋt, Katima yak o̱ hatak ilʋppʋt na yakohmi ka ai ithaiyana tuk o̱? mikma isht a hopoyuksa ilʋppʋt nanta hokak osh yʋmmʋt anukfohka tuk o̱, nafehna yakohmi puta kʋt ibbak atuk ma isht ai yʋmohmi cho?

3Ilʋppʋt Meli ushi, Chemis micha Choses, mikmʋt Chuta anonti Saimon aiena ka itibapishi chuka ikbi yash keyu ho̱? mikma in tek ʋhleha mʋt ilʋppa pi takla ma̱ya keyu ho̱? achi tok. Mihmʋt yʋmmak ash o̱ okla isht ai ibetʋbli tok.

4Yohmi kia Chisʋs ash ot, Hopaii ʋt ik holitopo hosh ahanta keyu kia, amba ilap i̱ yakni ak inli, micha i̱ kanomi ʋhleha, mikmʋt in chuka‐chʋfa aiena takla ahantak mak bano chatuk oke.

5Mihmʋt yʋmmak oka na‐fehna nana ka ik ai yʋmihcho ka hi ʋt ahni tok: amba hatak abeka kaniohmi kak illa ho̱ ibbak isht umbitepʋt hlakofichi tok.

6Mihmʋt okla na yimma he keyu kak oka, okokko! aiahni tok. Mihmʋt tʋmahushi taloha ka fullokʋchit a̱yʋt nan‐ithʋnanchi tok.

7Atuk osh auah‐tuklo kash o̱ hoyo cha, tuklo aiyukachit kanima pit tihleli mʋt, nan‐isht‐ahullo okpulo ʋhleha ha̱ ai imaiya he mak o̱ im apesa tok;

8Mihmʋt itʋnowʋt a̱ya kʋt nana kia isht ik a̱yo, amba tʋbi ak illa he; bahta ʋt iksho; pʋska mʋt iksho; tʋli holisso kia i̱ shukcha ya̱ ik fo̱ko ka he;

9Amba shulush ak o̱ honla he; mikmʋt nafohka lumbo tuklochit ik fohko ka chi̱ ho̱ im apesa tok.

10Mihmʋt peh kanima yo̱ aboha ya̱ ont hʋsh chukowakmʋt, yʋmmak o̱ hʋsh ai aha̱shwa tuk osh a kohchʋt hʋsh a̱yashke.

11Mikma kʋna kia ik hʋchi aiokpacho, micha ik hʋchi̱ haponaklo aienakma, yʋmmak ash a kohchʋt hʋsh iakmʋt, nan‐isht im atokoli mak o̱ hʋchi iyi pʋtha nuta hituk tohbi a̱sha ka hʋsh tahtolashke. A̱hli mak o̱ hʋchim achi lishke, Nan‐ʋlhpisa chinto nitak ma Sotom micha Komola aiena kʋto pit im ʋlhpi̱sa kʋt tʋmaha yʋmmak atuk a̱ i̱ shahla hi oke im achi tok.

12Mihma ilhkoli mʋt, hatak puta kʋt ile kostinincha he ak o̱ isht anumpohonli tok.

13Micha nan‐isht‐ahullo okpulo a̱ lauachit kocha weli mʋt, anonti abeka yatuk ash lauachit bila isht a hʋmmichit hlakofichi tok.

14Mihma mi̱ko Helot ʋt yʋmma pit haklo, (hohchifo kʋt kanima annoa kʋt a mominchi hatuk oka;) mihmʋt, Chan Baptist ʋt illi tuk ʋt tani hoka: yohmi hatuk o̱ nafehna puta kʋt yʋmmak ash o̱ ai isht il otʋnihinchishke, achi tok.

15Kanimi kʋto, Elias ak oka, achi ma: kanimi kʋt Hopaii oka: keyukmʋt hopaii ʋhleha ha tok achʋfona ma chohmi hoka, achi tok.

16Yohmi kia Helot ash ot yʋmma haklo mʋt, Chan noshkobo tʋbli li chash oka: illi tuk ʋt tani hoke, achi tok.

17Helot ʋt itibapishi Filip a̱ tekchi, Helotias ak atuk pulla mak o̱, ilap inlit pit on tihlelit, Chan a̱ ishit takchi mʋt, aboha kʋllo fohki tok: yʋmmak oka itauwaya tuk okʋt.

18Chan ʋt Helot a̱, Chitibapishi tekchi a̱ ish itauawaya hi a̱ chim ʋlhpesa keyu hoke, im achi tuk a tok.

19Yohmi hatuk o̱ Helotias ʋt yʋmmak ash o̱ i̱ nukkilli cha, ʋbi ka ahni; yohmi kia na kanihma he keyu ki tok.

20Helot ʋt Chan yʋmmak okʋt hatak ai ʋlhpiesa, micha ai a̱hli achukma hoka ithana hatuk osh, holitoblit nan ik i̱ kanihmo ka hi a̱ ahni tok; mihmʋt yʋmmak ash im a haponaklot, nana ka lauachit ai yʋmoho̱mi, mihmʋt na yukpʋt i̱ haponaklo beka tok.

21Atuk osh ont ai ʋlhpiesa nitak ʋt‐ai ona ma, Helot ʋt ilap ai ʋtta tok nitak o̱ i̱ hochitoka ʋhleha, kʋpitʋni hochito, mikmʋt Kalili i̱ holitompa ʋhleha aiena ka opiaka impa im ikbi tok.

22Atuk o̱ Helotias yʋmmak ash ushitek ʋt ant chukowa cha, hihla ma, Helot micha apehʋt binohma̱ya tuk aiena kash ot na‐yukpa ma, mi̱ko yash ot ohoyo himita ash, Peh nana ho̱ ish ahni cha is sʋm asilhhakma, chima lashke, im achi tok.

23Mihmʋt anumpa kʋllo im isht il ai onochit peh nana ho̱ is sʋm asilhhakma, apehliechi li iklʋnna hatuk ik nana kia, chima lashke, im achi tok.

24Mihma yʋmmak ash ot kohchʋt ia mʋt, ishki ash o̱, Nanta hak o̱ asilhha la chi̱ cho? ont im achi ma, yʋmmak ash osh, Chan Baptist noshkobo hak o̱, achi tok.

25Mihma tu̱shpʋt chekosi makinli ho̱ ont chukowʋt, mi̱ko ash im ona mʋt, Chekosi mak o̱, Chan Baptist noshkobo yosh ampo fohka ho̱, is sʋma he ak o̱ ahni lishke, achit im asilhha tok.

26Mihma mi̱ko ash ot nukha̱klo fehna tok: yohmi kia ilap ʋt anumpa kʋllo ikbi tuk pulla, micha apehʋt binohma̱ya hatuk pulla mak o̱ ik im ai a̱hlo ka hi a̱ ik ahno ki tok.

27Mihmʋt mi̱ko ash ot ashali̱ka nan‐atoni pit chʋffichi mʋt, noshkobo ya̱ isht ʋla hi a̱ im apesa tok; mihma ia mʋt, aboha kʋllo anu̱kaka akinli ho̱ noshkobo ya̱ ont a tʋbli tok.

28Mihmʋt noshkobo hash ampo fohkit isht ʋla cha, ohoyo himita yash o̱ ima na, ohoyo himita yash ot ishki a̱ ont ima tok.

29Yohmi ma nan im ai ithʋna ʋhleha hash ot yʋmma haklo mʋt, okla ai ʋlʋt illi haknip ash ishit, hatak illi aiasha yo̱ bohli tok.

30Mihma anumpeshi ʋhleha hash ot Chisʋs a̱ ant im ai itahoba cha, nana ka a kaniohmi tuk, micha nan abʋchi tuk puta ka mominchit im anoli tok.

31Mihma yʋmmak ash o̱, Hʋchishno banot filʋmmit haiaka oh ia cha, chekosi takla ka ma̱yʋt ho fohá, im achi tok; lauʋt ai ahanla ma, anonti ilhkohonli aiena hatuk o̱, peh ma̱ya cha impa kak kia impa he keyu chohmi tok.

32Mihma lumʋt peni pit ʋlhto cha, a haiaka ka pit ilhkoli tok.

33Mihma ilhkoli ka okla pi̱sa ma, anonti ithana kʋt laua tok: micha tʋmaha puta ka a kohchʋt aka itʋnowa hosh yʋmmak ash pit yihlepa tuk osh, yʋmmak ash o̱ imaiya cha, ont im itʋnaha tok.

34Atuk o̱ Chisʋs ash ot ont kohcha cha, okla laua fehna ho̱ pisa mʋt, chukfʋlhpoba yosh apesʋchi iksho ho̱ itilaui hatuk o̱ i̱ nukha̱klo tok: mihmʋt himona nana ka lauachit im abʋchit isht ia tok.

35Atuk o̱ nitak ash ot ont shohba̱ hosi ma, nan im ai ithʋna ʋhleha hash osh im ai ona mʋt, Ilʋppak okʋt yakni haiaka, anonti nitak mʋt shohbit ma̱ha̱yʋshke.

36Kanima pit ish tihleli na yakni auet i̱ bili̱ka tʋmahushi puta ka itʋnowʋt, nana ʋpa hi ʋt ik im iksho hatuk okʋt, pʋska okla chumpashke, im achi tok.

37Mihma, afalaminchi mʋt, Ilimpa ha̱ oh ipetá, im achi tok. Mihma, Iʋt pʋska iskʋli tahlepa tuklo ai ʋlbi o̱ ont e chumpa cha, ilimpa ha̱ il ipeta chi̱ hoh cho? im achi tok.

38Mihma, Pʋska katohmi ho̱ hʋsh i̱shi ho? ont ho pesá, achi ma; okla pisa mʋt, Tahlapi cha, nʋni tuklo hosh aienʋshke, achi tok.

39Mihma it a kʋshkolit mominchit hʋshuk okcha̱ki ya̱ ai o̱ binohlicha chi̱ ka, im apesa tok.

40Mihma tahlepa achʋfa, anonti pokoli tahhapi, yohmit it a kʋshkoʋt binohli tok.

41Mihma pʋska tahlapi, micha nʋni tuklo aiena kash o̱ ishi cha, ʋba pit chakalit aiokpʋchi mʋt, pʋska yash tushalichi cha, okla ha̱ in talohla chi̱ ho̱, nan im ai ithʋna ʋhleha hash o̱ ima tok: mihmʋt nʋni tuklo kash o̱ okla mominchit in tushtuli tok.

42Yohmi ma momʋt impʋt okla kaiya tok.

43Mihma boshulli ʋt nʋni pit aiena kʋt kishi auah‐tuklo ho̱ ishi tok.

44Yohmi ka pʋska ya̱ okla ʋpa tuk ʋt hatak tahlepa sipokni tahlapi foka tok.

45Mihma ilap ʋto okla ha̱ kanima pit tihlelit anta ta̱kla ma, nan im ai ithʋna ʋhleha hash osh peni pit ʋlhto cha, ti̱kba iʋt mish tʋnnʋp Betsaita okla ona chi̱ ka̱, mih makinli ho̱ i̱ miha tok.

46Atuk osh okla hash kanima pit tihleli mʋt, ʋba pit anumpula chi̱ hosh nʋnih chaha yo̱ pit oiya tok.

47Atuk o̱ ont opiʋt taha ma, peni ashot okhʋta iklʋnna ya̱ a̱ya ma, ilap bano hosh haiaka ya̱ anta tok.

48Atuk o̱ mahli ak osh a sanali hatuk o̱ peni mofi kʋllo fehnʋt aiasha na pit pisa tok: atuk osh ninak isht ʋlhpisa ont ai ushta foka ho̱ okhʋta paknaka ya̱ a noho̱wʋt, a̱yʋt im ona, yohmi kʋt ont ia hi a̱ aiahni tok.

49Yohmi kia yʋmmʋt okhʋta paknaka ya̱ a noho̱wʋt a̱ya na okla pisa mʋt, shilup atuk o̱ okla im ahoba mʋt, tahpʋla tok.

50Momʋt okla pisa hatuk osh komunta ha tok. Mihma ashali̱ka pit im anumpulit, Hʋchi nuktanla achukmashke. Ʋno ash sia hoke, hʋchi nukshopa ná, im achi tok.

51Mihmʋt peni ash ont ibachukowa ma, mahli hash osh issa tok: mihma okla nukhlakancha atampa fehna mʋt, okokko! aiahni tok.

52Yohmi kʋt okla ak osh chu̱kʋsh kʋllo hatuk osh, pʋska yatuk ash okla pit ik anukfillo kak a tok.

53Atuk osh yʋmmak ash pit tanʋblit Kenesalet yakni a̱ okla ai ʋla mʋt, ʋhli ha̱ ont ataiyʋli tok.

54Mihma peni ash okla a kocha wiha ma, mih makinli ho̱ yʋmmak ash okla pit ithana tok.

55Mihmʋt yihlepʋt yakni auet a bili̱ka ka mominchit hlopullit a̱yʋt, abeka puta tuk ash topa onochit sholit, yʋmmak ash osh kanima yo̱ anta na haklo mʋt, isht itʋnowa tok.

56Mihmʋt tʋmahushi, okmá, keyukmʋt, tʋmaha chito yokmá, yakni kocha yokmá nana peh kanima yo̱ ona hoka, abeka ya̱ okla ai itʋnaha ya̱ ashachi mʋt, yʋmmak ash o̱ im ilefoka a̱ aposhokʋchi ak oh kia okla potola hinla ka, okla im asilhha tok: mihma yʋmmak ash okla potonli aiyuka hokʋto, momʋt hlakofi tok.

Currently Selected:

Mak 6: CHH

Highlight

Copy