Mak 7

Chisʋs nan im ai ithʋna ʋhleha hʋt ibbak ik ahchifo hosh isht impa ka. Falisi ʋhleha hʋt nan isht mihachi, 1; 8 mihma ilap ak osh anumpa kochanli nan ʋlhpisa tikba in tonla cha, Chihowa i̱ nan ʋlhpisa ha̱ isht kobʋffi hatuk a̱ Chisʋs ʋt atokolit im anoli: 14 yohmi kʋt nana hosh hatak chu̱kʋsh a̱ a kocha ilʋppak osh hatak a̱ okpʋni hoke, achi, 24 Chisʋs ʋt Silofenisian ohoyo ushetk a̱ hlakofichi mʋt; 31 hatak ʋt ik haponaklo, micha anumpuli anuktuklot aiena tuk a, hlakofichi.

1Yohmi ma Falisi ʋhleha, micha na‐holissochi kanohmi Chelusalem minti tuk aiena kʋt ant im ai itahoba tok.

2Atuk osh nan im ai ithʋna ʋhleha kanimi kʋt, ibbak liteha yo, yʋmmʋt ibbak ik ahchifo kak o̱ miha, pʋska isht ʋpa hosh ma̱ya na pisa mʋt, nan isht a mihachi tok.

3Yohmi kʋt Falisi ʋhleha, micha Chu okla moma aiena kʋt in tikba ʋhleha nan im ʋlhpisa halanli fehna hatuk osh, achukmalit ibbak achifa ha yo̱ keyukmʋt, impa keyu beka tok.

4Mihmʋt ilhpak ai‐itatoba mintit ʋla kʋt, ibbak achifa ha yo̱ keyukmʋt, impa keyu beka tok. Micha nana inla ishtishko, micha ampo, mikmʋt asonak lakna, anonti aiimpa achifa aiena ka a puta chohmi nan‐isht‐a hullocha he im ʋlhpisa tok ʋt lauʋt a̱sha hoke.

5Yohmi mʋt Falisi ʋhleha, micha na holissochi ʋhleha aiena kash osh, i̱ ponaklot, Na katihmi ho̱ na chim ai ithʋna ʋhleha hʋt pin tikba ʋhleha nan im ʋlhpisa ya̱ ik halanlo hosh, amba ibbak ʋt ahchifa keyu ho̱ pʋska isht ʋpa cho? achi tok.

6Mihma afalaminchi mʋt, Nan ilahobi hʋchia ha̱ ʋlhpiesa ho̱ tikbanli Esaias ʋt isht hʋchi anohonli tuk ʋt, okla ilʋppʋt iti‐ʋlbi yokʋno isht sa holitobli kia, chu̱kʋsh okʋto auet a̱ hopakishke.

7Yohmi kia nana abʋchi kʋt hatak i̱ nan‐ʋlhpisa yo̱ ithʋnanchi hokʋt, nana ʋlhpesa hi o̱ keyu ho̱ okla si aiokpahanchishke, achit holissochi tok.

8Yohmi kʋt Chihowa i̱ nan‐ʋlhpisa hoka naksika pit hʋsh bohli cha, hatak i̱ nan‐ʋlhpisa, ampo micha ishtishko aiena achifa ho̱ hʋsh halanlishke; yohmikmʋt nana yʋmma ai itilaui ka hʋsh a yʋmohmi kʋt lauʋshke, im achi tok.

9Mihmʋt hʋchishno hʋchi nan ʋlhpisa ya̱ hʋsh ai a̱hlicha chi̱ kʋt, Chihowa i̱ nan‐ʋlhpisa ya aia̱hli hosh hʋsh shitilemʋshke.

10Moses okʋto, Chi̱ki, micha chishki aiena ka ish holitoblashke: yohmikma, Kʋna hosh i̱ki okmá, keyukmʋt ishki okmá, nana ho̱ shitilemʋt na mihachikmʋt, illi mak o̱ illi pullashke, achi tok.

11Yohmi kia hʋchishno ʋto, Hatak ʋt i̱ki, keyukmʋt ishki okmá nana kash o̱ ʋm isht ish ai yukpa he tuk a̱ Kolban oke, yʋmma achi hokmʋt, ʋba‐isht aiokpʋchi isht ʋlhpisa hoke, achi mak okʋt nan ik i̱ kanihmo kashke, hʋsh achi;

12Yohmikmʋt himmakma i̱ki, ishki ita tuklo ka nana kia isht im ʋtta hi a̱ hʋch ik im ahnot,

13Hʋchin tikba ʋhleha i̱ nan‐ʋlhpisa isht hʋsh abʋchi pulla hosh Chihowa im anumpa ha̱ hʋsh akshochishke; micha nana yʋmma ai itilaui ka a hʋchi yʋmohmi kʋt lauʋshke, im achi tok.

14Micha okla hash mominchit hoyot itahobit taiyahli mʋt, Hʋsh moma kʋt hʋs sa̱ haponaklot, hʋsh akostininchashke.

15Nana hak osh kocha ma̱yʋt hatak a̱ itih fohka kʋt, okpʋna hi ʋt ikshoshke: amba nana kʋt a kohcha hokʋto, yʋmmak osh hatak a̱ okpʋni hoke.

16Hatak nana hosh haksobish isht haponakla hi ʋt i̱ hinlikmʋt, haklashke, im achi tok.

17Atuk o̱ okla aiasha kash ʋttʋt aboha ont chukowa ma, nan im ai ithʋna ʋhleha hash osh nan‐isht ʋlhpisa kash isht im a ponaklo tok:

18-19Mihma, Hʋchishno ak kia na hʋch ik akostinincho fehna akinli ho̱? peh nana hosh kocha ma̱yʋt hatak a̱ itih fohka kʋt okpʋna he keyu, chu̱kʋsh ak o̱ pit chukowa ho̱ keyu hokʋt, amba takoba yak o̱ ont chukowa tuk mak osh, anonti a hlopulli kʋt ilhpak moma ka ai it im ʋlhpesʋchi ka hʋch ik akostinincho cho? achi tok.

20Mihmʋt, Nana kʋt hatak a̱ a kohcha yʋmmak osh hatak a̱ okpʋni hoke.

21Hatak haknip anu̱ka chu̱kʋsh ak o̱ im anukfila okpulo, haui puta, ohoyo ik im iksho, micha hatak ik im iksho it in luma̱ka:

22Hatak bi̱ka ʋbi, hu̱kopa, inla nan im anushkunna, nan i̱ nukkilli, haksichi, haui anukfohka, nishkin isht ik ai ʋlhpeso, Chihowa ik ahobalo, ilefehnʋchi, im anukfila iksho puta kʋt a kohcha hoke.

23Nan ik ʋlhpeso ilʋppa puta moma kʋt anu̱kaka yak o̱ a̱sht kohcha hosh hatak a̱ okpʋni hoke, achi tok.

24Mihmʋt yʋmmak ash a̱sht wakaya mʋt, iʋt Taia micha Saiton aiena yakni ʋhli ha̱ ona cha, aboha ont chukowa mʋt, hatak nana kia ik akostinincho ka hi a̱ ahni tok: yohmi kia kaniohmit luma he keyu ki tok.

25Ohoyo hʋt ushetik himita ʋt na shilombish okpulo ai i̱ fo̱ka hatuk o̱, yʋmmak ash pit haklo mʋt, onʋt iyi ituma ya̱ hlipia tok oka.

26Ohoyo hʋt Klik osh Silofenisian im okla ai achʋfa a tok: mihmʋt ushetik a̱ na‐shilombish okpulo a̱ ai ishit i̱ kohcha hinla ka yʋmmak ash o̱ im asilhha tok.

27Yohmi kia Chisʋs ʋt, Ʋlla ʋhleha ak osh ti̱kba kaiya ha yo̱; ʋlla ʋhleha i̱ pʋska ya̱ ishi cha ofi puta ka pit i̱ pila he ʋlhpesa keyu hoka, im achi tok.

28Mihma afalaminchi mʋt, A̱hlishke Chitokaka ma! yohmi kia ofi puta kʋt ai impa nuta ya̱ ʋlla ʋhleha im pʋska boshulli yak o̱ ai ʋpa chokʋmo, im achi tok.

29Mihma yʋmmak ash o̱, Anumpa ilʋppa pulla hatuk mak o̱ ish iashke; chiso tek a̱ nan‐isht‐ahullo okpulo ʋt a kohcha hoke, im achi tok.

30Atuk o̱ ilap in chuka yash ona mʋt, nan‐isht‐ahullo okpulo ʋt a kohcha tuk o̱, ushetik ash osh topa paknaka itonla na ont pisa tok.

31Mihma anonti Taia micha Saiton itatuklo yakni ash issʋt ia mʋt, Tekapolis yakni a̱ iklʋnna hlopullit a̱yʋt Kalili okhʋta ha̱ ona tok.

32Mihma achʋfa hosh ik haponaklo, micha anumpuli anuktuklo aiena hatuk o̱ yʋmmak ash isht im ʋla; yohmi mʋt yʋmmak ash o̱ ibbak a̱ isht umbitepa hinla ka, okla im asilhha tok.

33Mihma yʋmmak ash o̱ okla laua ya̱ a kohchit naksika isht ona cha, haksobish a̱ ibbak ushi pit hiohlichi mʋt, tofa cha, isunlʋsh a pit halelichi tok.

34Mihmʋt, pit ʋba chakalit pisa mʋt, hi̱hʋt, Effahlá, im achi tok: yʋmmut ish tiwashke, achi hoke.

35Mihma yʋmmak ash osh ashali̱ka haksobish ʋt wakama ma, anonti isunlʋsh isht talakchi ʋt yuhapa na kohchi achukmʋt anumpuli tok.

36Yohmi ma hatak nana kia okla ik im anolo ka chi̱ ka, im apesa tok. Yohmi kia i̱ shahlichit im apesa kak o̱, anonti okla anoli kʋt isht i̱ shahli fehna tok.

37Mihmʋt nukhlakancha kʋt atampa fehna mʋt, Yʋmmak okʋt nan oklu̱ha kʋt ʋlhpesa bano ho̱ yʋmihchishke: ik haponaklo atuk a̱ haponaklochi mʋt, anonti ik anumpulo atuk a̱ anumpuli ikbishke, achi tok.

Currently Selected:

Mak 7: CHH

Highlight

Copy