Mak 5
5
Chisʋs ʋt nan‐isht‐ahullo okpulo laua ho̱ kohchichi, 1; 13 mikmʋt shukha a̱ya achʋfa ho̱ ont abeha chi̱ ka im ahni. 25 Chisʋs ʋt ia cha ushetik a̱ ont hlakoficha chi̱ ho̱ Chailʋs ʋt im asilhha: mihma ia tuk osh takla ya̱ ohoyo issish ont ia isht abeka yo̱ hlakofichi, 35 mihmʋt Chailʋs ushetik ʋt illi tuk a̱ falaminchit tanichi.
1Atuk osh okhʋta hash mish tʋnnʋp pit tanʋblit Katalenes yakni a̱ okla ona tok.
2Mihma yʋmmak ash ot peni kohchʋt ia kash o̱ chekosi ma, hatak ʋt shilombish okpulo ai i̱ fo̱ka hosh, yʋmmak okʋt hatak illi aiasha ak o̱ takla ʋttʋt a̱ya yosh hatak illi aiasha ya̱ a kohchʋt afama tok.
3Yohmi ka yʋmmak oka hatak nana hosh tʋli itatakʋli yoka isht takcha hi o̱ keyu tok.
4Yʋmmak okʋt iyi isht talakchi, micha tʋli itatakʋli aiena ka isht talaha̱kchi kʋt, tʋli itatakʋli ya̱ hokohlichit, anonti iyi isht talakchi a̱ kobahlihinchi; yohmi hoka hatak nana hosh yʋmmak oka kostinincha he keyu ya tok.
5Mihma ninak, nitak moma ka nʋnih foka, micha hatak illi aiasha aiena kak o̱ ʋttʋt a̱yʋt bilia cha, yaha̱yʋt tʋli puta ka isht ile boli beka tok.
6Yohmi tok kia Chisʋs ʋt mishema ho̱ minti na pit pisa mʋt, malelit ont aiokpʋchit,
7Chitoli hosh anumpulit, Chisʋs, Chihowa nana moma imaiya Ushi chia ka nanta ho̱ ʋno ʋt isht chi ahalaia li cho? chik sʋlbʋshacho ka chi̱ ka Chihowa pulla ho̱ isht a chim apesa lishke, achi tok.
8Yʋmmak ash ot, Shilombish okpulo chia hʋt hatak yʋmma ish a kohchashke, im achi ha tok.
9Mihmʋt i̱ ponaklot, Chi̱ hohchifo hʋt nanta hoh cho? achi tok. Mihma afalaminchi mʋt, Pi laua hoka, sa hohchifo hʋt Lechʋn oke, achi tok.
10Mihmʋt yakni a̱shwa tuk ash a kohchit kanima pit ik tihlelo ka chi̱ ka im asilhha fehna tok.
11Yohmi ma yʋmma nʋnih foka pit bili̱ka ho̱ shukha laua ʋt impa hosh ma̱ya tok.
12Mihma nan‐isht ahullo okpulo ash ot momʋt im ilbʋshʋt, Shukha laua ak o̱ pit ish pi on tihleli na yʋmmak o̱ ont il abehashke, achi tok.
13Mihma Chisʋs ash ot mih mak inli ho̱ ʋlhpesa im ahni tok. Yohmi ma nan‐isht ahullo okpulo ʋhleha hash ot a kohchʋt ilhkoli mʋt, shukha laua yash ont abeha tok: mihma shukha laua yash osh, yʋmmʋt tahlepa sipokni tuklo foka tuk osh, yihlepa fehnʋt sakti chaha yo̱ okhʋta ha̱ pit ai oka kahʋt oka ai illi tok.
14Mihma shukha laua ya̱ impʋchit ma̱ya tuk ash ot yihlepʋt, tʋmaha, micha haiaka a̱sha tuk aiena ka ont okla anoli tok: yohmi ma nana mak osh yʋmohmi tuk okma pisa chi̱ hosh ilhkoli tok.
15Atuk osh Chisʋs a̱ okla im ai ona mʋt, nan‐isht‐ahullo okpulo ai i̱ fo̱kʋt Lechʋn il ai eshi tuk ash ot nafohka fohka cha, im anukfila mʋt achukma hosh a̱sha na, okla pisa tok; mihmʋt okla nukshopa tok.
16Mihma okla pisa tuk ash ot nan‐isht‐ahullo okpulo ai i̱ fo̱ka tuk ʋt im a kaniohmi hatuk; mihma shukha laua yʋt a kaniohmi tuk aiena kash okla im anoli tok.
17Mihma i̱ yakni a kohchʋt a̱ya hinla ka, yʋmmak ash o̱ okla im asihi̱hla tok.
18Yohmi na peni a̱ ont chukowa ma, nan‐isht‐ahullo okpulo ai i̱ fo̱ka tuk ash osh awant a̱ya hinla kʋt im asilhha tok.
19Yohmi kia Chisʋs ʋt ʋlhpesa ik im ahno hosh, amba, Chin chuka ia cha, Chitokaka yʋt chi̱ nukha̱klo cha, na chinto fehna ka a chim ataiyahli tuk a̱ chi̱ kanomi ʋhleha ha̱ ish im anolashke, im achi tok.
20Mihma filʋmmit ia mʋt, na chinto nana mak o̱ Chisʋs ʋt im a tahli tuk a Tekapolis a̱ ai anohonli tok. Yohmi ma okla momʋt nukhlakancha tok.
21Mihma Chisʋs ash ot peni fohka cha okhʋta in tʋnnʋp ash inli ho̱ pit tanʋbli ma, okla laua hosh im itahoba tok; mihma okhʋta pit bili̱ka ho̱ anta tok.
22Mihma sinakak apesʋchi ʋhleha achʋfa Chailʋs hohchifo hosh ʋla cha, yʋmmak ash ant pisa mʋt, iyi ituma ya̱ hlipiʋt,
23Im ilbaha̱sha fehnʋt, Sʋso tek iskitini ʋt illi mak osh itonlʋshke: ish ona cha, hlakofa he mak o̱ chibbak a̱ ont isht ish umbitepa hokbano chim ahni lishke: yohmikma okcha̱ya he banoshke, im achi tok.
24Mihma Chisʋs ʋt awant ia tok: mihma okla laua kʋt a hahlihinchit apehʋt a̱ya tok.
25Atuk o̱ ohoyo achʋfa hosh yʋmmʋt issish ont ia ʋbi tok a̱ afʋmmi auah tuklo;
26Yohmi hatuk o̱ alikchi la̱wa ka nan isht i̱ palʋmmi ai im a pisʋt, nana im a̱sha tuk ʋt moma kampilʋt tahli; yohmi kʋt achukma hi ʋt iksho, amba okpulo kʋt i̱ shaht ia bano tok.
27Atuk osh Chisʋs a̱ haklo mʋt, okla itakantʋli ka asha ka imma yo̱ ont chukowʋt, im anchi ya̱ ont potoli tok.
28Yohmi kʋt im anchi ak illa ho̱ ont ak potoli kia, sa hlakofa hinla hoke, ahnit im anukfila hatuk osh.
29Mihma issish a mitafa yash osh ashali̱ka shipa tok: mihma ililli yʋmmak atuk a̱ a hlakofi kʋt ilap haknip anu̱ka ak inli ka isht akostininchi tok.
30Mihma Chisʋs ash osh isht‐a‐hlakofi ʋt im a kohcha kʋt mih‐makinli ho̱ akostininchi hatuk osh, okla laua itintakla ash a filemoʋt, Kʋta hosh ʋm anchi ya̱ potoli cho? achi tok.
31Mihma nan im ai ithʋna ʋlheha hʋt, Okla laua hʋt chi a kantʋlit kʋnia ka ish pisa kʋt, Kʋta hosh sa potoli cho? ish achi há cha, im achi tok.
32Mihma yʋmma yʋmihchi tuk ash o̱ pisa bʋnna kʋt filemoa tok.
33Yohmi ma ohoyo hash osh nana kʋt ai i̱ kaniohmi tuk ʋt ithana hatuk osh, nukshopʋt wʋnihinchi hosh ʋlʋt, itikba ya̱ ant hlipia mʋt, ai a̱hli mak o̱ im anoli tok.
34Mihma yʋmmak ash osh, Sʋso tek ma! na chi yimmi yak osh chi hlakofichi hoke; nuktaiyalʋt, micha ililli hatuk a̱ ai i̱ hlako̱fit ish a̱yashke, im achi tok.
35Anumpuli kʋt isht anta moma na kaniohmi kʋt sinakak apesʋchi in chuka minti hosh ai ʋla mʋt, Chiso tek ʋt illishke; na katihmi ho̱ nan‐ithʋnanchi a̱ ish im ahchibali na himak a cho? achi tok.
36Chisʋs ʋt anumpa hʋt anumpa na haklo makinli hosh, sinakak apesʋchi ash o̱, Chi komunta ná; amba na chi yimmi kak illashke, im achi tok.
37Mihmʋt hatak nana kia apehʋt a̱ya hi a̱ ik ahno mʋt, amba Pita, micha Chemis, mikmʋt Chemis itibapishi Chan aiena kak illa tok.
38Atuk osh sinakak apesʋchi in chuka ash ʋla mʋt, okla yahapa, micha nishkin okchi minti, mikmʋt chitolit yaiya fehna aiena hosh ma̱ya na pisa;
39Yohmi cha pit chukowa mʋt, Na katihmi ho̱ yakohmit yaha̱pʋt, yaiyʋt hʋsh aiasha cho? ohoyo himita ʋt illi ho̱ keyu, amba nusi hoke, im achi tok.
40Mihma ishit yopulʋt olʋli tok. Yohmi kia yʋmmak ash o̱ mominchit kocha welit tahli mʋt, ohoyo himita i̱ki micha ishki itatuklo, mikmʋt apehʋt a̱ya tuk ash aiena ho̱ pehlichi cha, kanima ohoyo himita ʋt ai itola kash pit chukowa tok.
41Mihmʋt ohoyo himita yash ibbak a̱ ont halʋlli mʋt, Talihla kumi, im achi tok; yʋmmʋt toshowa kʋt, Ohoyo himita ma! taní, chim achi lishke, achi hoke.
42Yohmi ma ohoyo himita yash ot ashali̱ka tani cha, nowa tok, ʋtta tok afʋmmi auah‐tuklo hatuk okʋt. Yohmi ma nukhlakancha chinto fehna okla nukhlakancha tok.
43Yohmi ma yʋmmak oka hatak nana kia ik akostinincho ka hi a̱ i̱ miha tok; mihmʋt nanasi kia i̱ hoyo na impa hinla ka miha tok.
Currently Selected:
Mak 5: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
