Mak 13
13
Tempel, micha Chelusalem aiena kʋt aiokpulokʋt taha hi a̱ Chisʋs ʋt tikbanli anoli: micha nana kʋt ont ik a yakohmo ta̱kla ka, nana kʋt isht ahoba kʋt kaniohma he, 1; 14 micha na‐palʋmmi kʋt a kaniohma he aiena ka anoli: 24 mihmʋt ilapʋt a̱ya chi̱kma a kaniohma he puta ka anoli. 28 Fik ʋpi ak o̱ nan isht it apesa hosh nana kʋt ai yakohma chi̱ ka, ai onʋt ma̱ha̱ya hi a̱ anoli: 32 nitak kaniohmi, hʋshi kanʋlli nana ho̱ ai yakohma hi a̱, hatak nana hosh ithana keyu hatuk o̱, moma kʋt il anukta̱hlʋt ʋba pit anumpohonlit im ʋlhtahʋt ma̱ya chi̱ ka, miha.
1Mihmʋt tempel a̱ a kohchʋt iak fehna, nan im ai ithʋna ʋhleha hʋt achʋfʋt, Nan‐ithʋnanchi ma! tʋli hochito puta, micha chuka hochito puta aiena kʋt a kaniohmi hosh yak aiasha ka, pisá, im achi tok.
2Mihma Chisʋs ʋt afalaminchi mʋt, Chuka hochitoka yak hiohma̱ya ka ish pisa cho? tʋli ʋt achʋfa kia aka ik itulo ka hi ʋt it on tʋlkanchit itonla kʋt iksho hoke, im achi tok.
3Atuk osh tempel in chapaka Alif nʋnih paknaka ya̱ a̱sha ma, Pita, micha Chemis, mikmʋt Chan, anonti Antilu aiena kʋt lumʋt i̱ ponaklot,
4Nitak katiohmik mak o̱ ilʋppa puta kʋt yohma hi o̱, micha ilʋppa puta kʋt ont aia̱hla chi̱kma, nanta hosh ai isht atokowa hi oh cho? ish pim anolashke, achi tok.
5Mihma Chisʋs ʋt afalaminchi mʋt, Ahah! hʋsh aiahni na hatak nana kia ik hʋchi yoshublecho kashke.
6Sa hohchifo isht hohchifo kʋt itʋnowa cha, Klaist sia mak oke, achi kʋt laua he, micha lauachit yoshublicha hi oke.
7Yohmikma tʋnʋp a̱sha, micha tʋnʋp a̱sha he annoa puta aiena ka hʋsh haklokmʋt, ik hʋchi komunto kashke: ilʋppa puta kʋt moyumʋt ont a yʋmohmi pulla hi oke; yohmi kia ont ai‐ʋhli kʋto ik ai ono ki̱sha hoke.
8Okla achʋfa kʋt okla makinli ka it amokʋfa he, mikmʋt apehlichika achʋfa kʋt apehlichika mak inli ka it amokʋfa hi oka; yohmikma yakni ilaiyuka ka yakni ʋt a winakʋcha he: mikma hohchʋfo, micha okla ik it im ai achukmo aiena kʋt takala hi oke: yakohmi kak osh nanukha̱klo ai ishtia ʋmmona mak oke.
9Yohmi kia ahah! hʋsh il aiahnashke; okla hʋch ishit nan apesa ʋhleha ibbak a̱ hʋchi fohka he: mikma sinakak anu̱kaka ma a hʋchi a boho̱wa he: micha atokowa hʋsh im anola chi̱ ka, ʋno pulla hatuk mak o̱ na pehlichi ʋhleha, micha mi̱ko puta aiena itikba ya̱ hʋch ishit oho̱na hi oke.
10Yohmikma ʋbanumpa hak osh ti̱kba oklushi moma ka isht ai im anuhumpa pulla hi oke.
11Amba okla hʋch ishit, iʋt okla ibbak a̱ hʋchi fohkikma, nana hʋsh anumpula hi ʋt tikbanli hʋch ik anukfillokmʋt, anonti tikbanli anukfillit ik hʋchim ʋlhtaho kashke: amba hʋshi kanʋlli yʋmma fehna ka nana ho̱ hʋchi nukfohkikma, yʋmmak o̱ hʋsh anumpulashke: hʋchishno ak osh hʋsh anumpula hi o̱ keyu, amba Shilombish Holitopa yak a hi oke.
12Mikma itibapishi hatuk ʋt itibapishi hash illi issakma, anonti i̱ki atuk ʋt iso ha̱ illi issa he; mikma ʋlla ʋhleha hʋt i̱ki, ishki ita tuklo ka i̱ nukkilli cha, illi issa hi oke.
13Yohmikma ʋno pulla hatuk mak o̱ hatak moma kʋt hʋchi̱ nukkilla hi oke: yohmi kia kʋna hosh aia̱hlit ma̱ha̱yʋt ai ʋhli ka ona hok mak osh, mihi yosh okcha̱ya hi oke.
14Yohmi kia hopaii Taniel ʋt isht anumpuli tok nanokpʋni a̱ i̱ nukkilli ʋlhpesa kʋt a hikia he keyu kʋt hikia na hʋsh pisakmʋt, (kʋna hosh ilʋppa it im anumpulikmʋt akostininchashke,) yohmikma Chutea ya̱ a̱sha tuk mʋt nʋnih chaha pit a yihlepashke.
15Mikma kanima hosh aboha paknaka ahanta tuk mʋt aboha ya̱ akowa cha in chuka ya̱ nana kia ai ishit kohcha chi̱ kʋt, ont ik chukowo kashke.
16Yohmikma osapa anu̱kaka yo̱ anta tuk mʋt, i̱ nafohka ya̱ isha chi̱ kʋt, falamʋt ik aiyo kashke.
17Yohmikma nitak yʋmma foka ka kʋna hosh ʋlla shanli hatuk, mikmʋt ʋlla pishechi atuk aiena hokʋto ai i̱ palʋmma he mak oke.
18Micha hʋshtula yo̱ hʋch ik yihlepo ka hi ʋt ʋba pit hʋsh anumpohonlashke.
19Nitak yʋmma foka na‐palʋmmi kʋt nana toba ʋmmona Chihowa hʋt nan ikbi tok ai ʋhlit mihinti ka yʋmma chohmi kʋt iksho chatuk: mikmʋt yʋmma chohma he keyu ka hi oke.
20Micha Chihowa yak osh nitak yʋmma foka ka hokohlichi tuk o̱ keyukma, hatak nana hosh okcha̱ya he tuk keyushke: amba nan‐ʋlhtoka ilap ʋt atokoli tok pulla hatuk mak o̱ nitak yʋmma hokohlichi tok oke.
21Micha yʋmma fokakma hatak nana hosh, Yakeh! Klaist ʋt ilʋppak o̱ antʋshke, keyukmʋt yakeh! yʋmma antʋshke, hʋchim achi hoh kia, ik hʋchi yimmo kashke.
22Klaist ilahobi ʋhleha, micha hopaii ilahobi ʋhleha aiena tobʋt hiohli kʋt nan isht atokowa puta, micha nafehna puta aiena ka otʋnihinchit, yohma he yobakma, nan‐ʋlhtoka ʋhleha nana kia yoshublicha hi oke.
23Yohmi kia yakeh! nan oklu̱ha ka tikbanli hʋchim anoli li tuk oke, ahah! hʋsh aiahnashke.
24Amba na‐palʋmmi yʋmmak atuk a̱ misha foka nitak okʋno, hʋshi ʋt okhlilikma, anonti hʋshi ninak a̱ya mʋt ik tommo ka he.
25Mikma ʋba fochik puta kʋt aka fohopakma, ʋba shutik nana aiasha puta kʋt winakʋcha hi oke.
26Yʋmma fokakma, Hatak Ushi ʋt nan‐isht‐aia̱hlika chinto, micha isht a holitopaka chinto aiena ka il ai eshi hosh hoshonti anu̱kaka mihinti na okla pisa hi oke.
27Yʋmma fokakma yʋmmak ash ot im enchil ʋhleha ha̱ pit tihleli na ilap i̱ nan‐ʋlhtoka ʋhleha ha̱ a mahli ushta yakni atahaka ya̱ ai ʋhlit shutik ont ataha pit ai ʋhli ka a hoyot itahoba hi oke.
28Inta! fik ʋpi nan isht ʋlhpisa ka hʋsh ai ithʋnashke; Yʋmmak okʋt hishi toba chi̱ hosh bokoblit tahakma, toffa chi̱ kʋt olanlosi ka hʋsh ithana hoke.
29Yohmi hokʋt hʋchishno ʋt yʋmmak o̱ hʋsh chiyuhmi; na‐yakohmi puta kʋt ont aia̱hli na hʋsh pisakmʋt, ai ʋla̱ hosi, okhissa ak kia ai itukonofa hoka hʋsh ithanashke.
30A̱hli mak o̱ hʋchim achi lishke, Himak a okla ma̱ya ilʋppʋt ont ik taho ki̱sha ho̱, nana ilʋppa puta kʋt a yʋmohma chi̱ hoke.
31Ʋba shutik, micha yakni aiena kʋto ont ai iksho ka he, amba ʋm anumpa puta hatuk ʋto ont ai iksho ka he keyushke.
32Yohmi kia nitak yʋmmak a he, micha hʋshi kanʋlli isht ʋlhpisa yʋmmak a he aiena hokʋno, hatak nana hosh pit ithana keyu, enchil ʋhleha ʋba aiasha, mikmʋt Ushi aiena kak kia pit ik ithano, amba I̱ki ak bano hoke.
33Ahah! aiahnit o̱kchʋt ʋba pit hʋsh anumpohonlashke: mitak ont ai ʋlhpesa hi a̱ hʋsh ithana keyu hoka.
34Hatak Ushi ʋt hatak osh anowa hopaki ia hosh, in chuka issʋt ia mʋt, in tishu ʋhleha hash o̱ chuka apesʋchi atokoli mʋt, mominchit a toksʋli aiyuka im apesa cha, okhissa atoni ash o̱ ahah! ahnit o̱kcha chi̱ ka, im apesa tok o̱ chohmi hoka.
35Yohmi hoka ahah! ahnit hʋchi o̱kchashke: chuka chʋfa pehlichi ʋt opiakmá, keyukmʋt ninak iklʋnna hokmá, aka̱ka ohonla kak okmá, keyukmʋt, onnahinli kak okmá nana ho̱ ʋla hi a̱ hʋsh ithana keyu hokʋt.
36Yʋmmak keyukma ashali̱ka ʋla cha, nusi hosh hʋsh ma̱ya na ant hʋchi pesa hinla hoke.
37Yohmi hoka nana ho̱ hʋchim achi li kʋt moma kak o̱ Ahah! ahnit hʋchi o̱kchashke, im achi li hoke, achi tok oke.
Currently Selected:
Mak 13: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
