Mak 14

Na‐holitompa isht a̱sha micha na‐holissochi ʋhleha aiena kʋt Chisʋs a̱ illicha chi̱ kʋt anumpa it im achʋfa, 1: 3 micha ohoyo hosh pa̱shi ahama Chisʋs noshkobo yo̱ o̱ fohopli. 10 Chutas Iskaliot ʋt Chisʋs a̱ ishit okla ibbak a̱ fohka chi̱ kʋt inla nan isht it im apesa. 12 Chisʋs ak osh miha ho̱, nan im ai ithʋna ʋhleha hʋt ʋbanʋblit ont ia isht‐ʋlhpisa ha̱ atahli: mihma Chisʋs ʋt ibai impa hosh na‐haksichi a̱ atokolit bihlibli; 22 mihmʋt Chitokaka im ai‐impʋt a̱sha hi a̱ apesa; 27 nan im ai ithʋna ʋhleha hʋt issʋt tʋmoa he, 33 mikmʋt Pita yʋt ilapa ik ithano miha he puta ka Chisʋs ʋt tikbanli anoli. 32 Chisʋs ʋt Ketsemane a̱ ont chukowa cha, ʋba pit anumpuli; micha nan i̱ palʋmmit ahanta. 43 Chutas ʋt ʋla cha Chisʋs a̱ ant yukachit ishi ma, nan ai ithʋna ʋhleha hʋt issʋt tamoa: 53 Chisʋs a̱ Kaiafas a̱ okla isht im ona mʋt, ik ahobalo fehna, mihmʋt illi issa; 66 Pita yʋt i̱ shahli ha̱ ik ithano miha tuk osh anonti falamʋt nukha̱klo.

1Yʋmmak atuk o̱ i nitak tuklo ma, ʋbanʋblit ont ia, micha pʋska ik shatʋmmo aiena kʋt a̱sha tok: mihma na‐holitompa isht a̱sha pehlichi ʋhleha, micha na‐holissochi okla aiena kʋt yʋmmak ash o̱ kaniohmit haksichit okla ishi cha, ʋbi bʋnnʋt ma̱ya tok.

2Yohmi kia, Impa holitopa ma̱ya nitak ano keyu kashke, yʋmmak keyukma, okla hʋt isht ik ai ʋlhpesot a̱sha hinla hoke, okla achi tok.

3Mihma yʋmmak ash osh Betani tʋmaha Saimon leplosi‐ʋbi a tok in chuka yo̱ impa hosh a̱sha ma, ohoyo hʋt spiknat nan‐ahama toba ho̱ alabasta kotobushi ʋlhto, holitopa fehna ho̱ i̱shi hosh ʋla tok: mihmʋt kotobushi ash o̱ koli mʋt, yʋmmak ash o̱ noshkobo ha̱ o̱ fohopli tok.

4Yohmi ma kanimi mʋt chukʋsh anu̱kaka isht ik im ʋlhpeso fehna kʋt a̱sha tok; mihmʋt, Na katihmi ho̱ nan‐ahama ilʋppʋt yakohmit okpulot kʋnia cho?

5Ilʋppʋt iskʋli tahlepa tuchina atampa kia aiʋlbi cha, ilbʋsha ʋhleha ha̱ i̱ holhpela hinla tuk oka, achi tok. Mihmʋt ohoyo hash o̱ okla nan isht mihachi tok.

6Mihma Chisʋs ʋt, Ik a̱shá, nanta katiohmi ho̱ hʋsh achibʋchi hosh? nana achukma fehna mak o̱ a si ai yʋmihchi hoke.

7Yohmi hoka ilbʋsha yak okʋto hʋchim a̱sha bilia chatuk: yohmi hokʋt yʋmmak okʋno peh nitak kaniohmi ho̱ hʋchishno hʋsh ahnikmʋt, nana achukma ka hʋsh i̱ yʋmihcha hinla hoke; amba ʋno ʋto hʋchi takla anta li̱ bilia keyushke.

8Ilʋppak ashot nana ka ai yʋmihcha hinla kʋto yʋmihchi hoke: sa nipi ʋt hollopa chi̱ ka, tikbanli ahʋmma chi̱ hosh ʋla ha tuk oke.

9A̱hli mak o̱ hʋchim achi lishke: Ʋbanumpa ilʋppʋt yakni moma ka kanima fehna ho̱ ai anuhumpakma, nana ai yakohmichi tuk ilʋppak ash kia yʋmmak ash o̱ isht ithaiyana hi a̱, anoho̱wa hi oke, achi tok.

10Mihma auah‐tuklo kash achʋfʋt Chutas Iskaliot ʋt yʋmmak ash o̱ ishit na‐holitompa isht a̱sha pehlichi ʋhleha ibbak fohka chi̱ hosh im ona tok.

11Mihma yʋmma okla haklo mʋt, na‐yukpa mʋt, tʋli holisso ima he apesa tok. Mihma kaniohmi kak osh ai ʋlhpesa na yʋmmak ash o̱ ishi cha, yʋmma ibbak fohka hinla kʋt anukfihinli tok.

12Atuk o̱ pʋska ik shatʋmmo nitak ʋmmona ka ʋbanʋblit ontia ya̱ okla ai ʋbi ma, nan im ai ithʋna ʋhleha hash osh, Katima yak o̱ il ia cha, il atahli na ʋbanʋblit ont ia ya̱ ish impa hinla kʋt ish ahni cho? im achi tok.

13Mihma nan im ai ithʋna ʋhleha hash o̱ tuklochit pit tihleli cha, Tʋmaha ha̱ ont hʋsh chukowashke: mikma hatak ʋt lukfi kotoba oka ʋlhto ho̱ sholi kʋt hʋchi afama chi̱ hoke: api̱hʋt hʋsh iashke.

14Mihma kanima yo̱ ont chukowakma, chuka yʋmma ʋtta hatak ash o̱, Nan‐ithʋnanchi ʋt, Ʋbapotʋlhpo ai impa aboha hʋt katima yak o̱ talaia ho̱, nan ʋm ai ithʋna ʋhleha ha̱ pehlichit ʋbanʋblit ont ia ya̱ it ibai impa la chi̱ cho? achishke, hʋsh im achashke.

15Mikma ʋba‐potʋlhpo yosh chito, nana ʋlhtaha achukma ho̱ hʋchim anola chi̱ hoke: yʋmmak o̱ hʋsh a pim atahlashke, im achi tok.

16Mihma nan im ai ithʋna ash osh iʋt, tʋmaha ha̱ ont chukowʋt okla mʋt, nana ai im anoli tuk ash ai ʋlhpiesa na pisʋt okla tok: micha ʋbanʋblit ont ia ya̱ atahlit okla tok.

17Atuk o̱ ont opia ma yʋmmak ash ot auahtuklo kash o̱ pehlichi cha, ona tok.

18Mihma binohma̱yʋt impa ma, Chisʋs ash ot, A̱hli mak o̱ hʋchim achi lishke; Sʋbai impʋt hʋsh ma̱ya kʋt hʋsh achʋfona mʋt, sʋshit inla ibbak hʋs sa fohka chi̱ hoke, achi tok.

19Mihma okla nukha̱klo fehna mʋt, achʋf‐aiyukʋt, Ʋno ak oh cho? im achi ma, anonti inla mʋt, Ʋno ak oh cho? achit isht ma̱ha̱ya tok.

20Mihma afalaminchi mʋt, Auah tuklo kʋt achʋfʋt ampo achʋfa ho̱ a sʋbai impa kak oke.

21Hatak Ushi yokʋto isht a holihi̱so tok mak o̱ a̱ya ho mʋhlishke: amba Hatak Ushi a̱ ishit inla ibbak fohki yʋmmak okʋto i̱ palʋmma chi̱ mak oke: hatak yʋmmak okʋt ik tobo tok okmak osh im achukma hatuk mak a chi̱ hoke, im achi tok.

22Mihma impa hosh ma̱ya ma, Chisʋs ʋt pʋska ya̱ ishi cha, ʋba isht aiokpʋchi mʋt, tushahlichi cha, yʋmmak ash o̱ ima mʋt, Ishit oh ʋpá, ilʋppʋt sa haknip mak oke, achi tok.

23Anonti isht‐ishko ya̱ ishi cha, ʋba pit aiokpʋchit issa mʋt, yʋmmak ash o̱ ima tok: mihma momʋt okla ishko tok

24Mihma, Ilʋppʋt sʋssish nan‐isht‐ʋlhpisa himona hosh la̱wa ka i̱ fohopa mak oke.

25A̱hli mak o̱ hʋchim achi lishke, Pa̱kʋpi a waya ka himmakma ak ishko mak atuk osh himonʋchit Chihowa apehlichika yak o̱ ai ishko la he nitak mak a hi oke, im achi tok.

26Mihma ʋba‐isht‐taloa ya̱ okla taloa mʋt, kohchʋt Alif nʋnih ha̱ pit ilhkoli tok.

27Mihma Chisʋs ash osh, Hʋsh moma kʋt himak ninak a̱ ʋno pulla kak o̱ hʋsh ibetʋbla chi̱ hoke: Chukfʋlhpoba apesʋchi a̱ issot boli likma, chukfʋlhpoba ʋt it a fimimpa hi oke, achit holisso hatuk oka.

28Yohmi kia tani li ha mʋto, hʋchi ti̱kba iʋt Kalili a̱ ona la chi̱ hoke, im achi tok.

29Yohmi kia Pita ash osh, Moma kak osh ibetʋbli ik nana kia, si yʋmohma he keyu, im achi tok.

30Mihma Chisʋs ʋt, A̱hli mak o̱ hʋchim achi lishke, Himak nitak peh himak ninak akinli, aka̱ka yʋt hitukla ha ola takla ka hituchina ha chik sʋthano ish miha chi̱ hoke; im achi tok.

31Yohmi kia Pita ash ot i̱ shahlichit kʋllochit anumpulit, Chi awant sʋlli hokmʋt, kaniohmi kak osh ak chithano ka miha la he keyushke, achi ma, momʋt yʋmmak inli ho̱ miha tok.

32Mihma osapushi Ketsemane hohchifo talaia ho̱ okla ai ona tok: mihma nan im ai ithʋna ʋhleha hash o̱, Ʋba pit anumpuli la chi̱ ta̱kla ka ilʋppak inli ho̱ ho chi̱yá, im achi tok.

33Mihmʋt Pita, micha Chemis, mikmʋt Chan aiena ka pehlinchit ia mʋt, okokko! ahni fehna mʋt, anonti nukha̱klot isht alotowa tok.

34Mihmʋt yʋmmak ash o̱, Sa shilombish ʋt nukha̱klo atampʋt illi hoke: ilʋppakinli ho̱ o̱kchʋt hʋsh chi̱yashke, im achi tok.

35Mihmʋt itikba iʋt olanlosi ona mʋt, aka ont hlipia mʋt, yohma hinla hokma, hʋshi kanʋlli ai ʋlhpisa atuk ʋt i̱ kanʋlla hinla ka, asilhha tok.

36Mihmʋt, A̱ki Abba ma! nan oklu̱ha kʋt a chim aia̱hli bano hoke; isht‐ishko ilʋppa is sa̱ kanʋllichashke: ik yohmi kia ʋno ak osh nan ahni li kak keyu, amba chishno ak osh nana ho̱ ish ahni mak ashke, achi tok.

37Micha ʋla mʋt, nusi hosh ma̱ya na ant pisa cha, Pita ash o̱, Saimon chia hʋt chi nusi ho̱? hʋshi kanʋlli ʋlhpisa achʋfa takla ka chi o̱kcha he keyu cho?

38O̱kchʋt ʋba pit hʋsh anumpʋlashke, yʋmmak keyukmʋt anukpʋli ho̱ ish iba chukowa hinlʋshke. Shilombish okʋto im ʋlhtaha ho mʋhli kia, amba haknip ak osh tikambi hoke, im achi tok.

39Mihmʋt anonti kanima ia cha, ʋba pit anumpuli mʋt, anumpa mihi ash inli ho̱ miha tok.

40Micha falamʋt ʋla ma, nishkin ak osh weki hatuk osh, anonti nusi hosh ma̱ya na ant pisa tok: mihma nana ho̱ okla im acha hi ʋt ik ithano ki tok.

41Atuk o̱ ont isht atuchina ʋla mʋt, Himmak mak o̱, ma̱yʋt nusit hʋsh fohashke: ont ai ʋhli hoke, hʋshi kanʋlli ʋlhpisa hʋt ai onʋshke: yakeh! Hatak Ushi a ishit nan‐ashʋchi ʋhleha ibbak a̱ fohka chi̱ mak oke.

42Ho taní; kiloh ilhkoli, sʋshit okla ibbak sa fohka chi̱ hokʋt olanlosi ʋlʋshke, im achi tok.

43Yohmi ma mih makinli ho̱ anumpuli moma na auah tuklo atuk achʋfa Chutas ʋt okla chinto na‐holitompa isht a̱sha pehlichi ʋhleha, micha na‐holissochi ʋhleha aiena aiasha ka a minti hosh bʋshpo falaia, micha iti tʋptua aiena sholi ho̱ it apehʋt ʋla tok.

44Yohmi kʋt ishit okla ibbak fohka chi̱ yʋmmak osh ot nana apesʋt, Kʋna ho̱ i̱ su̱ksowa likma, yʋmmak osh mi̱h mak achi̱ hoke; yʋmmak o̱ hʋsh ishi cha, achukmalit ishit hʋsh iashke, im achi tuk a tok.

45Atuk osh ʋla makinli hosh, yʋmmak ash o̱ apissanlit iʋt im ona mʋt, A̱ shahli ma! A̱ shahli ma! achi mʋt, i̱ su̱ksowa tok.

46Mihma yʋmmak ash o̱ ibbak onochit okla ishi tok.

47Mihma bili̱kasi hiohma̱ya tuk ʋt achʋfʋt bʋshpo falaia yo̱ ishit shu̱fi mʋt, na‐holitompa isht a̱sha pehlichi in tishu ha̱ ishit fahamʋt haksobish a̱ chanlit tʋbli tok.

48Mihma Chisʋs ʋt anumpuli mʋt, Hatak hu̱kopa yo̱ a̱yʋt i̱ kohcha ho̱ chiyuhmit bʋshpo falaia, micha iti tʋptua aiena sholi hosh hʋs sʋsha chi̱ kʋt hʋsh itʋnowa cho?

49Nitak moma ka tempel anu̱kaka ya̱ hʋchi takla antʋt, nan ithʋnanchi li ka, hʋch ik sasho chatuk: yohmi kia Holisso Holitopa yʋt ont aia̱hli pulla chi̱ kak o̱ hʋsh yakohmishke, im achi tok.

50Mihma momʋt yʋmmak ash o̱ issʋt yihlepa tok.

51Mihma hatak himita achʋfa nipi bano hosh linen anchi kʋt, yʋmmak ash iakaiyʋt a̱ya tuk o̱, hatak himita ʋhleha hʋt it i̱ hokli tok.

52Mihma linen anchi ash o̱ kanchi cha, nipi bano hosh mokofit mʋllelit i̱ kʋnia tok.

53Mihma Chisʋs ash o̱ na‐holitompa isht asha i̱ shahli yo̱ okla isht im ia tok; mihma yʋmma na‐holitompa isht a̱sha pehlichi ʋhleha, micha hochitoka ʋhleha, mikmʋt na‐holissochi okla aiena kʋt momʋt im ai itʋnahʋt ma̱ya tok.

54Yohmi ma Pita yʋt auet mishemanchi hosh pit iakaiyʋt ma̱ya mʋt, na‐holitompa isht a̱sha i̱ shahli im aboha holitopa yak kia ona tok: mihmʋt tishu ʋhleha ha̱ ta̱kla a̱shʋt luak libesha tok.

55Mihma na‐holitompa isht a̱sha pehlichi ʋhleha, micha nan‐apesa moma aiena kʋt Chisʋs a̱ nan isht im ai atokowa na ʋba chi̱ kʋt, okla akostininchi bʋnna tuk osh, ik akostinincho ki tok.

56Yohmi ka yʋmma nan isht atokoli ilahobi hokʋto laua kia, nan isht atokoli kak osh ai it im achʋfa keyu ki tok.

57Mihma kanohmi hosh wakaya mʋt, nan isht im atokoli ilahobit,

58Ilʋppʋt ibbak o̱, isht toba tok tempel ilʋppa okpʋni lish, nitak tuchinakma, inla yosh ibbak o̱ isht toba keyu ho̱ ikbi la chi̱ hoke, achi ka e haklo tuk oke, achi tok.

59Yohmi kia yʋmmʋt okla nan isht atokoli kʋt ont ik itibai achʋfo akinli tok.

60Mihma na‐holitompa isht a̱sha i̱ shahli ash osh iklʋnna wakayʋt hikia mʋt, Chisʋs ash o̱ i̱ ponaklot, Afalaminchit nana kia chik acho cho? yakohmi kʋt nan isht chi atokoli ka katiohmi hatuk oh cho? achi tok.

61Yohmi kia nana ik acho hosh lumʋt a̱sha tok. Mihma anonti na‐holitompa isht a̱sha i̱ shahli ash ot i̱ ponaklot, Chishno ak osh Na‐holitopa ya̱ Ushi Klaist chia mak oh cho? im achi tok.

62Mihma Chisʋs ʋt, Mih sia mak oke: yohmi ka Hatak Ushi ʋt nan‐oklu̱ha imaiya ibbak ishtimpakimma ya̱ binili, mikmʋt ʋba hoshonti anu̱kaka minti aiena ho̱ hʋsh pisa he mak oke, achi tok.

63Mihma na‐holitompa isht‐a̱sha i̱ shahli yash ot i̱ nafohka ya̱ it a hlilʋffi mʋt, Na katihmi ho̱ himmakma nan isht atokowa ka iloh ahna hinla cho?

64Chihowa isht ik ahobalo anumpa ha̱ hʋsh hakloshke: nanta hʋchim anukfila cho? achi tok. Mihma illa he ʋlhpesa kak o̱, momʋt okla anumpa onochi tok.

65Mihma kanimi kʋt on tuftua mʋt, anonti nashuka ya̱ ompohomo cha, ibbak bonunta isht isso cha, Akostininchit anolí, achi tok: mihma tishu ʋhleha hʋt ibbak pʋtha ya̱ okla isht pʋsa̱ha tok.

66Mihma Pita yʋto nutaka aboha holitopa anu̱kaka ya̱ a̱sha na ohoyo himita na‐holitompa isht a̱sha i̱ shahli in toksʋli ʋhleha hʋt achʋfʋt ʋla tok.

67Mihma Pita yʋt libisha hosh a̱sha na ont pisa cha atokolit pisa tok: mihmʋt Chishno ʋt Chisʋs Nasalet ʋtta ya̱ awant ish a̱ya tuk akinlishke, achi tok.

68Yohmi kia Pita yʋt ik ithano ilahobit, yʋmma ithana li keyu; mikmʋt nana ish miha kak kia ak chim akostininchoshke, acki tok. Micha kohchʋt apishia ya̱ ona ma, aka̱ka yʋt ola tok.

69Atuk o̱ anonti ohoyo himita yosh yʋmmak ash o̱ pisa mʋt, bili̱kasi hiohma̱ya kash o̱, Ilʋppak osh yʋmma pit ai achʋfa mak oke, im achi tok.

70Mihma anonti yʋmma ik ithano, miha tok. Yʋmmak atuk a̱ in chekosi ma bili̱ka hiohma̱ya tuk ash ot anonti Pita yash o̱, Chishno ak kia okla yʋmma ish ibai achʋfa yatuk o̱ pullʋshke: Kalili hatak chia hatuk osh, chim anumpa hʋt pit ai achʋfa hoke, im achi tok.

71Yohmi kia Pita yash ot, Hatak ilʋppa isht anumpulit hʋsh ma̱ya ka ithana li keyushke, achit ik ahobalot anumpulit anumpa kʋllo isht ile ononchit ishtia tok.

72Mihma atukla ma aka̱ka ʋt ola tok. Mihma Pita ash osh, Aka̱ka yʋt hitukla ha ik olo ki̱sha ho̱ hituchina ha chik sʋthano ish miha chi̱ hoke, im achi tok Chisʋs im anumpa hash pit ithaiyana tok. Mihma yʋmma anukfieli mʋt, yaha̱ya tok.

Currently Selected:

Mak 14: CHH

Highlight

Copy