Chan 15
15
Chisʋs ʋt pa̱ki ʋpi yosh naksish puta aiena hosh nan isht ʋlhpisa ilʋppak o̱ hatak ʋt ilap ak o̱ pit ai acha̱fa pulla hosh ʋnit waya ka chohma he ai ʋlhpesa hatuk a̱ anoli, 1: 9 micha ilapʋt nan im ai ithʋna ʋhleha ha̱ i̱ hullo fehna hatuk ʋt anoli mʋt, 12 anonti yʋmmakmʋt it i̱ hullo kʋt yʋmmak inli ho̱ chohma hi a̱ in tohno; 19 yakni ilʋppak okʋt ilap, micha Iki ita‐tuklo ka ik ahnincho yatuk okʋt yʋmmakma i̱ nukkillit ilbʋshacha hi a̱ im anoli.
1Ʋno ak osh pa̱k‐ʋpi a̱hli sia hokma, anonti A̱ki ak osh apoksiachi oke.
2Naksish ʋno ak o̱ a sai offo hosh ʋni keyu hokma, mominchit ishit kanchi hoke: mikmʋt naksish ʋt ʋni hokʋto isht i̱ shahlit ʋna chi̱ ka, achukmalit apoksiachi hoke.
3Anumpa isht hʋchim anumpohonli li tuk pulla ho̱ himonasi a̱ isht a hʋchi a kashofʋshke.
4Ʋno a̱ ho sʋbai acha̱fá; mikma ʋno mʋt hʋch ibai acha̱fa lashke. Naksish ʋt ʋpi ak o̱ pit a hikia ho̱ keyukmʋt, ilap illa kʋt ʋna he keyu chatuk a̱, yʋmmak i̱ chiyuhmit hʋchishno ak kia ʋno a̱ hʋs sʋbai acha̱fa ho̱ keyukmʋt, nana hʋsh kanihma he keyushke.
5Ʋno ak osh pa̱kʋpi sia hokma, hʋchishno ʋto naksish hʋchia hoke. Kʋna hosh ʋno a̱ sʋbai acha̱fa na anonti ilap ma ibai acha̱fa li hokma, mihi yosh ʋni fehna chatuk oke: ʋno ak o̱ keyukma nana hʋsh kanihma he keyu hoke.
6Kʋna kia ʋno a̱ sʋbai acha̱fa keyu hokma, naksish mak o̱ ai itilauechit kanchi na bʋshi chatuk; yohmikma hatak puta mʋt yʋmmak ash aiowʋt luak a̱ pila na lua chatuk oke.
7Ʋno a̱ hʋs sʋbai acha̱fa na ʋm anumpa mʋt hʋchi anukfoyuka hokma, nana ho̱ hʋsh aiahni cha hʋsh asilhha hokʋt, hʋchim ai a̱hla hi oke.
8Hʋsh ʋni fehna yʋmmak okmak o̱, A̱ki ʋt isht a holitopa ai a̱hla he; yohmikma nan ʋm ai ithʋna hʋchia mak a hi oke.
9Ʋno a̱ A̱ki ʋt a̱ hullo tok mak o̱, ai itilauechi hosh hʋchi̱ hullo li hoke; a sa holitobli kʋt hʋsh biliashke.
10Ʋm anumpa ʋlhpisa puta ka hʋsh im antia hokmʋt, a sa holitobli kʋt a hʋchi bilia he: ʋno ʋt A̱ki a̱ im anumpa ʋlhpisa puta ka im antia li kʋt, ai i̱ hullo mʋt a sa bilia tok mak o̱ hʋsh chiyuhma hi oke.
11Hʋchishno pulla atuk mak o̱ nan isht ʋm ilaiyukpa hatuk mʋt hʋchin takali bilia na, na hʋchi yukpa kʋt alotowa chi̱ mak o̱, ilʋppa puta ka isht hʋchim anumpohonli li hoke.
12Ʋno ʋt hʋchi̱ hullo li tok mak o̱, chiyuhmichit hʋsh it i̱ hulla he, ilʋppak osh ʋm anumpa ʋlhpisa mak oke.
13Hatak ʋt i̱ kana ʋhleha ha̱ i̱ hullo kʋt im ilhfiopak a̱ aka bohyuli hoka, hatak nana kia yʋmma i̱ shahlichit it i̱ hulla hi ʋt ikshoshke.
14Nana ho̱ hʋchim apesa li ka hʋsh yʋmohmi hokmʋt, a̱ kana hʋchia mak oke.
15Himak pilla kʋno ilhtohno hʋchi achi la he keyu; ilhtohno yokʋto, i̱ shahli hʋt nana ho̱ isht ahanta ka, akostininchi keyu chatuk; amba nana ho̱ A̱ki a̱ im a ha̱klo li tuk ʋt oklu̱yuha hʋchim anoli li hatuk okʋt, a̱ kana ʋhleha hʋchi achi lishke.
16Hʋchishno ak osh hʋs si atokoli tok o̱ keyu; amba itʋnowʋt ʋnit hʋsh waya he ak atuk oke; yohmikma hʋchi a waya kʋt aiasha na A̱ki a̱ nana ho̱ a̱ hohchifo pulla kak o̱ isht hʋsh im asilhhakma, hʋch ima he mak o̱, ʋno ak osh ai atokolit hʋchim apesa li hatuk oke.
17Hʋsh it i̱ hulla he mak o̱, ilʋppa hʋchim apihi̱sa li hoke.
18Yakni ʋt hʋchi̱ nukkilli hokmʋt, ik hʋchi̱ nukkillo ki̱sha hosh ʋno a̱ a̱ nukkilli tok a̱ hʋsh ithaiyanʋshke.
19Yakni ak o̱ hʋsh ai achʋfa hatuk okmʋno, yakni ʋt immi hatuk okʋno holitobla he tuk; amba yakni a̱ hʋsh ai achʋfa keyu; amba ʋno ak osh atokolit yakni a̱ a kohchit hʋch ishi li hatuk; yohmi hatuk o̱ yakni ʋt hʋchi̱ nukkilli hoke.
20Tishu hʋt i̱ shahli ha̱ imaiya chatuk keyu, hʋchim achi li tok anumpa yʋmma hʋsh ithaiyanashke. Ʋno a̱ okla sʋlbʋshachi tok okmʋt, hʋchishno ma hʋch ilbʋshacha he akinli hoke; ʋm anumpa ha̱ im antia tok okmʋt, hʋchim anumpa ha̱ im antia he akinli hoke.
21Yohmi kia auet sa kanchi tok a̱ pit ithana keyu hokʋt, ʋno pulla hatuk mak o̱ ilʋppa puta ka hʋchi̱ yʋmihcha hi oke.
22Ʋno ak osh a̱yʋt ʋlʋt ant ak im anumpulo hatuk okmʋno, ai ashʋchika yʋt okla ik im iksho ka he tuk; amba himak okʋno nan im ai ashʋchika ya̱ isht ompoholma hi ʋt okla ik im ikshoshke.
23Kʋna hosh ʋno a̱ a̱ nukkilli hokʋt, A̱ki ma i̱ nukkilli akinli hoke.
24Ʋno ʋt na‐fehna puta ka, hatak inla nana kia ai yʋmihchi chatuk keyu ka ai itintakla ma ʋno ʋt ai yʋmihchi li tuk keyu hokmʋno, nan ai ashʋchika yʋt okla ik im iksho ka he tuk; amba himak okʋno pi̱sa cha, anonti ʋno, mikmʋt A̱ki ita‐tuklo ka i̱ nukkilli tuk oke.
25Yohmi kia na kaniohmi keyu ho̱ okla a̱ nukkillishke, achi anumpa hʋt i̱ nan ʋlhpisa holisso ha̱ a holisso tok ʋt ont ai a̱hla chi̱ kak o̱, ilʋppʋt ai yakohmi tok.
26Yohmi kia nanuktalali, yʋmmak okʋt Shilombish a̱hli, A̱ki a̱ a kohchʋt a̱ya mak o̱, A̱ki a̱ im ai isht auet hʋchi̱ kanchi li̱ ʋla hokmʋt, yʋmmak osh ai atokowa ka si anohonla he mak oke.
27Yohmikma hʋchishno ʋt nana ʋmmona ka si apehʋt hʋsh a̱ya tuk okʋt, nan ai‐atokowa ka hʋsh anoli akinla hi oke.
Currently Selected:
Chan 15: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
