Chan 13
13
Chisʋs ʋt nan im ai ithʋna ʋhleha ha̱ iyi im achifa, 1, 18 Chisʋs ʋt Chutas ak osh ishit inla im issa chi̱ hatuk a̱, nana kʋt isht ʋlhpisa ho̱ isht im atokoli. 31 Chisʋs ʋt ilap nan isht a holitopa hi anoli, mihmʋt nan im ai ithʋna ʋhleha hʋt it i̱ hulla chi̱ ka, i̱ miha mʋt, 36 Pita yʋt hituchina ha yo ilapa ik ithano miha chi ka, tikbanli im anoli.
1Nan ʋbanʋblit ont ia ai‐impa holitopa kʋt ik ai ono ki̱sha ho̱, Chisʋs ʋt ilapʋt yakni ilʋppa ai issʋt, I̱ki a̱ im ia chi̱ hʋshi kanʋlli ʋlhpisa kʋt ai ona ka ithaiyana mʋt, immi hʋt yakni paknaka a̱sha ka i̱ hullo hatuk ʋt, yʋmma i̱ hullo kʋt imomʋt ont illi tok.
2Yohmi ka okhlili ai‐impa yʋt ont ʋlhtaha yʋmma fehna ma, yʋmmak ash ishit inla im issa chi̱ ka Setan ʋt Saimon ushi, Chutas Iskaliot chu̱kʋsh a̱ anukfohkichi hatuk o̱;
3Chisʋs ʋt, I̱ki ʋt nana moma ka ilap ak o̱ ibbak a̱ fohki tok, micha ilapʋt Chihowa hak o̱ a minti ha tok osh, anonti Chihowa hak o̱ im ia chi̱ kʋt ithaiyana mʋt,
4Okhlili impa a̱sha tuk ʋt wakayʋt, im anchi ash o̱ naksika pit bohli mʋt, tikba takali ishi cha, isht il ai ʋskofʋchi tok.
5Yohmi ha yosh oka ya̱ ampo pit ʋnit ishi cha, nan im ai ithʋna ʋhleha iyi yash achifʋt isht ia mʋt, tikba takali isht ai il ai ʋskofanchi tuk ash o̱ ishit isht i̱ kasholichi tok.
6Atuk osh Saimon Pita yash o̱ ont a hikia tok; mihma Saimon Pita yash ot, Chitokaka ma! saiyi ya̱ ish achifa chi̱ hoh cho? im achi tok.
7Chisʋs ʋt afalaminchi mʋt, Nana ka yʋmihchi li ka himonasi kʋno chik akostininchoshke; yohmi kia himmak o̱ ish akostinincha hi oke, im achi tok.
8Pita yash ot, Saiyi yak okʋno nitak nana chik sʋm achifo kashke, im achi tok. Chisʋs ʋt afalaminchi mʋt, Ak chi achifo hokma, is si ahalaia keyu hoke, im achi tok.
9Saimon Pita yash ot, Chitokaka ma! saiyi ak bano keyu kashke, amba sʋbbak, micha sa noshkobo pit aieninchi hosh, im achi tok.
10Chisʋs ʋt, Ʋlhchifa tuk okʋto himmak ma ik ʋlhchifo ho̱ iyi ak bano kia, momʋt kashofa chatuk; yohmi ka hʋchishno ʋt hʋchi kashofa akinli kia, hʋsh moma keyushke.
11Kʋna hosh ilapa ishit inla ibbak fohka chi̱ hoka ithana, yohmi hatuk osh, Momʋt hʋchi kashofa keyushke, achi tok.
12Yohmit iyi ya̱ im achifʋt taiyahli mʋt, im anchi ash ishi cha, falamʋt aka binili mʋt, Nana ka hʋchi̱ yʋmihchi li ka hʋsh ithana cho?
13Ʋno a̱, Na pithʋnanchi, pin Chitokaka hʋs si achi; yohmi ka mih sia ho̱ mʋhli hoka, ʋlhpesa hʋsh mihʋshke.
14Yohmi kia ʋno ʋt hʋchin Chitokaka, micha na hʋch ithʋnanchi sia hatuk osh, hʋch iyi ya̱ hʋchim achifa li hatuk okma, hʋchishno ak kia hʋchishno bi̱ka iyi ya̱ hʋsh it im achifa he ʋlhpesa hoke.
15Ʋno ʋt a hʋchi̱ yʋmihchi li tuk mak o̱ hʋsh a chiyuhmicha he mak o̱, na hʋchim abʋchi li hatuk oke.
16A̱hlishke, a̱hli mak o̱ hʋchim achi lishke; Tishu hʋt i̱ shahli ha̱ imaiya chatuk keyu; mikma nan‐ʋlhtoka yosh a̱ya kʋt nan‐atokoli tuk a̱ imaiya chatuk keyu hoke.
17Ilʋppa puta ka hʋsh ithana cha, yʋmmak o̱ hʋsh yʋmihchi hokmʋt, na hʋchi yukpa mak oke.
18Moma kak o̱ isht hʋchi anumpuli li ho̱ keyushke: kanima kak o̱ ʋno ʋt atokoli li tok okʋto ithana lishke: yohmi kia Holisso Holitopa yʋt, Pʋska sʋbai ʋpa kash ot iyi kotoba ya̱ isht a sai o̱ wakelishke, achi ha tok a̱ yʋmmʋt ont ai a̱hla chi̱ mak oke.
19Yʋmmak ash ot ont ai yʋmohmi ha ma, ʋno ak atuk a̱ hʋchi yimma he mak o̱, ik ai ono ki̱sha ho̱ himak ano hʋchim anoli lishke.
20A̱hlishke, a̱hli mak o̱ hʋchim achi lishke, Kʋna kia ʋno ak osh nan tohno li ho̱ a̱ya ka ahninchi hokʋt, ʋno ak o̱ si ahninchi hoke; micha kʋna kia, ʋno a̱ si ahninchi hokmʋt, auet sa kanchi tok mak o̱ ahninchi hoke; im achi tok.
21Chisʋs ʋt yakohmiechit anumpuli mʋt, chu̱kʋsh anu̱kaka ai ik im ʋlhpieso mʋt, atokolit anolit, A̱hlishke, a̱hli mak o̱ hʋchim achi lishke, Hʋsh achʋfona kʋt sʋshit inla ibbak o̱ hʋs sa fohka chi̱ hoke, achi tok.
22Mihma nan im ai ithʋna ʋhleha hash ot kanima kak o̱ miha hatuk a̱ ik ai akostinincho mʋt, filemoʋt okla iti pisa tok.
23Yohmi ma nan im ai ithʋna ʋhleha ha̱ achʋfa ka Chisʋs ʋt holitobli yatuk o̱, Chisʋs ikkishi ha̱ ʋtayʋt a̱sha tok.
24Yohmi tuk o̱ yʋmmak ash osh kʋna hak o̱ miha hatuk ma a ponakla chi̱ ka, Saimon Pita yʋt i̱ yuchunukli tok.
25Mihma Chisʋs ikkishi ha̱ ʋtayʋt a̱sha hosh, Chitokaka ma! kʋta hak o̱ cho? im achi tok.
26Mihma Chisʋs ʋt afalaminchi mʋt, Itih fohka achʋfa ka pit okʋchit kohchi li kʋt, kanima ho̱ pit ima likma, yʋmmak osh mih mak a chi̱ hoke, achi tok. Atuk osh itih fohka achʋfa ka pit okʋchit kohchi mʋt, Saimon ushi Chutas Iskaliot ak o̱ ima tok.
27Mihma itih fohka achʋfa ishi ma, Setan ʋt yʋmmak ash ont chukowa tok. Mihma Chisʋs ʋt, Nana ka ish yʋmohma chi̱ kʋt tu̱shpʋt ish yʋmihchashke, im achi tok.
28Nana ka a kaniohma hi o̱, ilʋppa im achi ka, impʋt ma̱ya tuk ʋt hatak achʋfa kia ik akostinincho ki tok.
29Chutas ak osh shukcha ya̱ ishi hatuk oka, ai impa holitopa a̱sha takla ka nana ho̱ pi bʋnna hinla ka chumpakmá, keyukmʋt ilbʋsha ʋhleha yak o̱ nanasi kia i̱ hopela hinlakmá, nana ho̱ Chisʋs ʋt i̱ miha hatuk a̱, kanimi kʋt im ahoba tok.
30Mihma itih fohka achʋfa ka ishi makinli hosh kocha ia tok; mihma yʋmmʋt ninak a tok.
31Yʋmmak ash ot kocha ia ma, Chisʋs ʋt, Himak okʋno Hatak Ushi ʋt ai a̱hlit holitopakma, anonti Chihowa yʋt yʋmmak o̱ isht a holitopa ai a̱hla chi̱ mak oke.
32Chihowa yʋt yʋmmak o̱ isht a holitopa ai a̱hli hokmʋt, Chihowa yʋt anonti ilap inlit yʋmmak ash o̱ ai isht i a holiloblichi ai a̱hla chi̱ a̱kinli: micha chekosi fehna yʋmmak ash o̱ holiloblichi ai a̱hla chi̱ mak oke.
33Chipota ʋhleha ma! chekosi takla kak o̱ hʋchi takla a̱sha lishke; yohmi ka hʋs sa hoya chi̱ hoke; Chu okla ha̱, Kanima yo̱ ai ia li hoka, hʋsh ona he keyushke, im achi li tuk mak osh anonti hʋchishno ma himonasi a̱ hʋchim achi lishke.
34Hʋsh it i̱ hullo kʋt, ʋno ʋt hʋchi̱ hullo li tuk a̱ ohmichi hosh hʋchishno yak kia hʋsh it i̱ hulla he mak o̱, nan ʋlhpisa himona ka hʋch ima lishke.
35Hʋchishno bi̱ka yʋt hʋsh it i̱ hullo ilʋppa pulla kak o̱ nan ʋm ai ithʋna hʋchia hatuk a̱, hatak moma kʋt isht ithaiyana he mak oke, achi tok.
36Saimon Pita yash ot, Chitokaka ma! katima ko̱ ish ia chi̱ hoh cho? im achi ma, Chisʋs ʋt afalaminchi mʋt, Kanima yo̱ ia li hoka, himonasi kʋno pit is siakaiya he keyushke; yohmi kia i̱ himmak o̱ pit is siakaiya hi oke, im achi tok.
37Pita yash osh, Chitokaka ma! Na katihmi ho̱ himo nasi akinli kʋno pit ak chiakaiyo ka hinla cho? chishno a̱ pulla kak o̱ ʋm ilhfiopak a̱ aka bohyuli lashke.
38Chisʋs ʋt afalaminchi mʋt, Ʋno a̱ pulla kak o̱ chim ilhfiopak aka ish bohyula chi̱ cho? A̱hlishke, a̱hli mak o̱ chim achi lishke; Aka̱ka yʋt ik olo ki̱sha ho̱, hituchina ha chik sʋthano ish miha chi̱ hoke, im achi tok.
Currently Selected:
Chan 13: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
