Chan 12

Meli ʋt Chisʋs iyi ya̱ nan‐ahama im ahʋmmi ma, yʋmmʋt ai ʋlhpesa ho̱ yohmi hatuk a̱ Chisʋs ʋt miha, 1, 12 Chisʋs ʋt issuba nashoba yo̱ om binili hosh Chelusalem a̱ ona. 20 Klik kanimi kʋt Chisʋs a̱ pisa bʋnna: 23 Chisʋs ʋt ilapʋt kaniohmit illa he, anoli; 27 Chisʋs ʋt chu̱kʋsh anu̱ka̱ka nan isht nukha̱klo in chito mʋt, ʋba pit anumpuli; 37 Hatak pehlichi ʋhleha hʋt laua hosh Chisʋs a̱ i̱ yimmi: yohmi kia Chisʋs a̱ isht anumpuli nukwia.

1Atuk o̱ nan ʋbanʋblit ont ia isht a̱sha chi̱ ka nitak hannalit takanli moma ho̱, Chisʋs ʋt Betani ak o̱ Lasalʋs ʋt ai illi tuk o̱ falaminchit tanichi tuk a̱ yʋmmʋt yʋmmak o̱ ai ʋtta chatuk o̱, ona tok.

2Mihma yʋmmak o̱ opiaka impa yo̱ okla ai im atahli tok; mihma Mahla ak osh nan ai isht im anta ma, amba Lasalʋs ʋto ibai impa hosh ma̱ya kak o̱ iba takla a̱sha tok.

3Yohmi ma Meli ʋt spiknat nan‐ahama holitopa fehna weki achʋfa ka ishi cha, Chisʋs iyi ya̱ ishit a hʋmmi mʋt ilap pa̱shi akinli ho̱ iyi yash isht i̱ kasholichi tok: mihma nan ahama balama kʋt aboha yash alotowa tok.

4Mihma nan im ai ithʋna ʋhleha achʋfa Saimon ushi Chutas Iskaliot ʋt yʋmmak oka inla ibbak fohka he mak osh,

5Nanta katiohmi ho̱ nan ahama ilʋppʋt iskʋli tahlepa tuchina kia isht ik ʋlbi cha, ilbʋsha ya̱ ik i̱ holhpelo ke tuk oh cho? achi tok.

6Ilbʋsha yak o̱ i̱ nukha̱klo kak osh ilʋppa achi tok keyu; amba hu̱kopa yatuk osh, micha yʋmmak osh shukcha ya i̱shi hatuk osh, nana kʋt yʋmma ai ʋlbeha ho̱ shaiyali yatuk ak a tok.

7Mihma Chisʋs ʋt, Ant ik yʋmihchí, ish im aiahnashke, a sa hollopa chi̱ nitak mak a hi o̱, ilʋppa ilatomba hatuk oke.

8Ilbʋsha yak okʋto hʋchim a̱sha na bilia chatuk; amba ʋno ak okʋto hʋchim anta li̱ a bilia he keyushke.

9Yohmi ma yʋmma ant anta ka Chu okla hʋt lauʋt akostininchi tok: mihmʋt Chisʋs ak bano kak o̱ keyu, amba Lasalʋs, yʋmmʋt illi tuk o̱, falaminchit tanichi tuk ash it aieninchit pisa chi̱ hosh okla ai ʋla tok.

10Yohmi kia na‐holitompa isht a̱sha pehlichi ʋhleha hokʋto Lasalʋs ak kia aieninchit illicha hinla kʋt, isht it im anumpulit ma̱ya tok.

11Yʋmmak atuk pulla mak o̱ Chu ʋhleha laua kʋt yʋmma itʋnowʋt, Chisʋs a̱ ai i̱ yimmi kak a tok.

12Nitak ont atu̱kla ma okla laua kʋt ai‐impa holitopa ya̱ itʋnowa tuk ʋt, Chisʋs ʋt Chelusalem a̱ ʋla chi̱ hosh minti na okla haklo mʋt,

13Pam ʋpi naksish a̱ i̱shit, kohchʋt afamʋt okla ia mʋt, chitoli hosh, Hosanna, Islael i̱ mi̱ko Chitokaka i̱ hohchifo ho̱ il ai eshi hosh a̱ya hokʋt holitopa mak oke, okla achi tok.

14-15Saion ushetik chia hʋt chi nukshopa ná, chi̱ mi̱ko ʋt issuba haksobish falaia himita ya̱ on talaia hosh minti hoke, achi hosh holisso hatuk oka, Chisʋs ash ot issuba haksobish falaia himita yo̱ pisa mʋt, yʋmmak ash on talaia tok.

16Ʋmmona kʋno nan im ai ithʋna ʋhleha hʋt ilʋppa ik ai akostinincho ki tok; amba Chisʋs ʋt ont a holitopa ha yak o̱, nana kʋt yakohmi hosh yʋmma isht a holisso tok a̱, anonti okla hʋt nana kash ai i̱ yʋmihchi tok aiena ka ithaiyana tok.

17Mihma yʋmmʋt Lasalʋs a̱ ahollopi ai i̱ howʋt kohchit illi tuk a̱ falaminchit tanichi ka, okla api̱hʋt a̱ya tuk ash osh ai ʋlhtokowa ka anohonli tok.

18Yʋmmʋt na‐fehna ilʋppa yʋmihchi tuk a̱ okla ha̱klo tuk atuk osh, ilʋppak atuk pulla kak o̱ okla mak kia ont afama ha tok.

19Yohmi ma Falisi ʋhleha hash ot, Nana hʋsh kanihma he keyu kʋto hʋsh akostininchi cho? yakeh! okla puta hash ot yʋmmak o̱ pit a kanʋllishke, ilap bi̱ka it im achit ma̱ya tok.

20Mihma Klik ʋhleha kanimi kʋt ʋba pit aiokpʋchit a̱yʋt, ai impa holitopa a̱sha ka ai ʋla tuk ʋt takla ma̱ya tok.

21Yohmi hatuk osh yʋmmak ash ot Kalili yakni Betsaita tʋmaha a minti tuk, Filip ash im ai ona mʋt, Pi̱ shahli ma! Chisʋs a̱ pisa pi bʋnnʋshke, achit i̱ ponaklo tok.

22Mihma Filip ash osh iʋt, Antilu a̱ ont im anoli tok; atuk o̱ anonti Antilu ash osh Filip a̱ ita tuklo cha Chisʋs a̱ im anoli tok.

23Mihma Chisʋs ʋt afalaminchi mʋt, Hatak Ushi ʋt a holitopa he tuk a̱ hʋshi kanʋlli ʋlhpisa kʋt ai onʋshke.

24A̱hlishke, a̱hli mak o̱ hʋchim achi lishke, Onush nihi ʋt yakni anu̱kaka yo̱ itola cha, illi ho̱ keyukmʋt, ilap ash biekʋt itonla hoke; amba illi hokmʋto, waya fehna chatuk oke.

25Kʋna hosh ilap im ilhfiopak a̱ i̱ hullo fehna hokʋto, i̱ kʋnia hi oke; amba kʋna hosh yakni ilʋppa ahanta kʋt ilap im ilhfiopak a̱ i̱ nukkilli hokʋto, mihma ieshit okcha̱yʋt a bilia hi oke.

26Hatak nana hosh ʋm antia hokmʋt, siakaiyashke; mikmʋt kanima yo̱ ai ahanta likma, yʋmmak o̱ an tishu hoh kia anta hi oke; hatak nana hosh ʋm antia hokma, yʋmmak o̱ A̱ki ʋt holitobla he mak oke.

27Himak oka sa shilombish ʋt ik im ai ʋlhpesoshke: yohmi ka, A̱ki ma! hʋshi kanʋlli ai ʋlhpisa takali ilʋppa ai isht is sai i̱ hlakofichashke, achi likmá, nanta chi̱ cho? yohmi kia ilʋppak a he mak o̱ hʋshi kanʋlli ʋlhpisa takali ilʋppa im a̱ya li ha tok oke.

28Chi̱ hohchifo ha̱ ish holitoblichashke, A̱ki ma! achi tok. Yohma ma ʋba ya̱ auet ai anumpa kʋt, Yʋmmak oka holitoblichi li tuk osh, anonti himmakma holitoblichi la chi̱ akinli hoke, achi tok.

29Yohmi hatuk o̱ okla hʋt bili̱ka hiohma̱ya tuk ʋt, yʋmma haklo mʋt, Hilohʋshke, achi tok. Mihma kanimi kʋt, Enchil osh auet im anumpuli hoke, achi tok.

30Chisʋs ash osh afalaminchit, Ʋno ak atuk mak o̱ anumpa ilʋppʋt auet takali ho̱ keyu, amba hʋchishno pulla kak oke.

31Himak okʋno yakni ʋt nana im ai ʋlhpisa mak oke: himak okʋno yakni ilʋppa ai i̱ shahli nan im aiyahanchi ash ot issʋt kohcha he mak oke.

32Ʋno ʋt yakni a̱ a mokofʋt ʋba takali li hokmʋt, hatak moma ka halʋllit il a kanʋllichi la hi oke, achi tok.

33Ai‐illi kaniohmi ho̱ isht illa he ak osh anoli hosh ilʋppa achi ha tok.

34Mihma okla hash ot afalaminchi mʋt, Klaist ʋt ahanta na bilia ho̱ nan‐ʋlhpisa holisso ha̱ okla il a haklo chatuk; yohmi ka katiohmi ho̱, Hatak Ushi ʋt ʋba ya̱ takala hi o̱ ish achi cho? Hatak Ushi ilʋppak osh kʋta hokak o̱? okla im achi tok.

35Mihma Chisʋs ʋt, Himonasi ta̱kla kak o̱ tohwikeli hʋt hʋch in takanli hoke. Tohwikeli hʋt hʋchin takanli ta̱kla kak osh hʋsh nowashke, yʋmmak keyukma okhlili hʋt hʋchi onʋtula hinla hoke. Kʋna hosh okhlili ho̱ nowʋt a̱ya hokʋto, kanima yo̱ ia kʋt ithana keyu hoke.

36A tohwikeli hʋt hʋchin takanli ta̱kla kak osh a tohwikinli ʋlla hʋchia ha chi̱ kʋt, a tohwikeli ha̱ hʋsh i̱ yimmashke, im achi tok. Ilʋppak o̱ Chisʋs ʋt anumpohonli mʋt, ai i̱ filʋmmit kʋnia cha, ik i̱ haiako ki tok.

37Na‐fehna laua ho̱ itikba ya̱ yʋmmak ash ot ai yʋmihinchi hoh kia, okla ai i̱ yimma he keyu ki tok.

38Yohmi kʋt hopaii Esaias ʋt anumpuli mʋt, Chitokaka ma! nana il anoli ka kʋta hosh pi̱ yimmi cho? micha kʋta hak o̱ Chihowa i̱ shakba mʋt i̱ haiaka tuk oh cho? ahanchi tok a̱ ont aia̱hla chi̱ mak a tok.

39-40Anonti Esaias ʋt i̱ himmakma, Nishkin a̱ isht ik peso, mikmʋt chu̱kʋsh ma ik akostinincho kish, chukʋsh himona ik anukfoyuko ki̱, ak hlakoficho ka chi̱ ka, nishkin a̱ im akʋmmi mʋt, anonti chu̱kʋsh ma i̱ kʋllochishke; achi tok oka, okla yimma he keyu ki tok.

41Yʋmma im isht a holitopa ya̱ pisʋt yʋmma pit isht anumpuli mak osh Esaias ʋt ilʋppa puta ka achi tok.

42Yohmi kia nan apesa hochito̱ka ʋhleha hʋt i̱ yimmi kʋt laua akinli tok: yohmi kia sinakak a̱ a kohchicha hinla hatuk o̱, Falisi ʋhleha pulla kak o̱ yʋmmak ash i̱ yimmi hatuk ʋt okla ik otʋnincho ki tok.

43Hatak ai im aholitopa yak o̱ im achukma kʋt, Chihowa ai im a holitopa ka im i̱ shahli hatuk osh.

44Chisʋs ʋt chitoli hosh, Kʋna hosh ʋno a̱ a̱ yimmi kʋt ʋno ak o̱ a̱ yimmi ho̱ keyu, amba auet sa kanchi tok yʋmmak o̱ i̱ yimmi mak oke.

45Micha kʋna hosh ʋno a̱ sa pi̱sa hokmʋt, auet sa kanchi tok ma pi̱sa mak oke.

46Kʋna hoh kia ʋno a̱ a̱ yimmi hokʋt ai‐okhlilika ya̱ ik ai ahanto ka chi̱ mak o̱, nan‐tohwikeli mak osh a̱yʋt yakni a̱ ʋla li ha tok oke.

47Yohmi kia hatak nana hosh ʋm anumpa ha̱ haklo cha, ik yimmo hokma, nan im apesʋt ilbʋshali la hi o̱ keyushke; yakni ak o̱ nan im apesʋt ilbʋshali la hi osh a̱ya li tok keyu; amba yakni a̱ okchalinchi la chi̱ ha tok oke.

48Kʋna hosh ʋno a̱ sa shitilema cha, ʋm anumpa ha̱ ik ahnincho hokʋno, achʋfa hosh nan im apesʋt ilbʋshali kʋto a̱sha hoke; anumpa anumpohonli li tuk ash fehna akinli kak osh nitak ai ishtaiyopikma nana im apesʋt ilbʋshala he mak oke.

49Ʋno akinli hosh nana ka ahnit anumpuli li tuk keyu hoka; amba auet sa kanchi tok A̱ki ak osh nana ho̱ achi la he, mikmʋt nana ho̱ anumpuli la he aiena ka nana ʋm apesa ha tok.

50Yohmi ka i̱ nan‐ʋlhpisa ʋt ai‐okcha̱yʋt bilia yoka ithaiyana lishke; yohmi hatuk osh nana ho̱ anumpohonli li ka, yʋmmʋt A̱ki ʋt ʋno a̱ a̱ miha tok a̱ mih mak o̱ anumpuli li hoke, achi tok.

Currently Selected:

Chan 12: CHH

Highlight

Copy