Chenesis 23
23
1Mihma Salah ʋt afʋmmi tahlepa achʋfa cha pokoli tuklo akucha untuklo tok: ilʋppak osh Salah ʋt okcha̱yʋt ahanta tok afʋmmi holhtina hoke.
2Atuk osh Salah ʋt Kichalh‐alba ak o̱ ai illi tok; yʋmmʋt Kenan yakni talaia Heblon mak oke. Atuk o̱ Eblaham ʋt Salah ya̱ ishit nukha̱klot yaiyʋt a̱ya hosh ʋla tok.
3Mihmʋt Eblaham ʋt wakayʋt im illi yash i̱ filʋmmit hikia cha, Helh ushi ʋhleha ha̱ im anumpulit,
4Okla inla micha himo wihʋt a̱ya sia hosh hʋchi takla ahanta lishke: hʋchi itin takla ya̱ ahollohpi yakni yosh an talaia chi̱ ho̱ micha ʋm illi ya̱ a hohpit sa tikba ya̱ a luhmi la chi̱ ka̱ hʋs sʋmashke, achi tok.
5Mihma Helh im ʋlla ʋhleha hʋt Eblaham a̱ im afalaminchit,
6Ish pi̱ haponaklashke, a̱ shahli ma, Chitokaka i̱ holitopa yosh pi takla ahanta chia hoke: pim ahollohpi achukma i̱ shahli kak o̱ chim illi ya̱ ish a hohpashke: e kanima kia pim ahollohpi ya̱ e chi̱ halʋlla he keyu hoke, yohmi na chim illi ya̱ chik a hohpo ka he keyu hoke, im achi tok.
7Mihma Eblaham ʋt wakayʋt hikia cha, yakni yash okla ha̱, Helh im ʋlla ʋhleha kash im akachunolit aka hlipia tok.
8Mihmʋt itim anumpulit, Ʋm illi ya̱ hohpit sa tikba ya̱ a luhmi la hi ya̱ hʋsh ahnikmʋt, hʋs sa̱ haponaklo cha, Soha ushi Eflon a̱ hʋs sʋm ai im asilhhashke.
9Yohmi na Makpelah hichukbi, yʋmmʋt im osapa ont ʋhli in talaia kʋt ʋmashke; hʋchitin takla ya̱ ahollohpi yakni yosh an talaia chi̱ ho̱ tʋli holisso ho̱ aiʋlli ʋlhpiesakma ʋmashke, achi tok.
10Yohmi ka̱ Eflon ʋt Helh im ʋlla ʋhleha takla ʋtta hatok. Mihmʋt Eflon Hittait hatak ash osh Eblaham a̱ im afalaminchit, Helh im ʋlla ʋhleha, in tʋmaha holihta okhissa ya̱ ont chukowa moma kʋt ha̱klo ho̱,
11Aha̱, a̱ shahli ma, is sa̱ haponaklashke: osapa ya̱ chima li hoke, micha hichukbi ʋt anu̱kaka talaia ka̱ chima li hoke: ʋm okla ha̱ ushi ʋhleha itikba ya̱ a chima lishke: chim illi ya̱ ish a hohpashke, achi tok.
12Mihma Eblaham ʋt yakni yash okla itikba ya̱ akachunolit aka hlipia tok.
13Micha yakni yash okla ʋhleha hʋt ha̱klo ho̱, Eflon a̱ im anumpulit, Yohmi kia is sʋma chi̱ hokmʋt, is sa̱ haponaklashke, chim asilhha lishke: osapa ya̱ tʋli holisso ya̱ chima lashke: is sʋm ishikma, ʋm illi ya̱ a hohpi lashke, achi tok.
14Mihma Eflon ʋt Eblaham a̱ im afalaminchit.
15A̱ shahli ma, is sa̱ haponaklashke; yakni ʋt tʋli hʋta shekel tahlepa ushta ai iti ʋlli ʋlhpesʋshke; yʋmmʋt pim itin takla ya̱ nanta hoh cho? chim illi ya̱ ish a hohpashke, im achi tok.
16Mihma Eblaham ʋt Eflon a̱ i̱ haponaklo tok; micha Helh ushi ʋhleha hʋt ha̱klo ho̱, Eflon ʋt miha tuk mak o̱, Eblaham ʋt tʋli hʋta ya̱ i̱ wekichi tok, nan itatoba ʋhleha hʋt itim ishi chatuk mak osh tʋli hʋta shekel tahlepa ushta hatok.
17Mihma Eflon im osapa yʋmmʋt Makpelah ya̱ talaia Mamle itikba talaia kash osapa, micha anu̱kaka hichukbi talaia aiena ka̱, micha iti moma osapa ya̱ hiohma̱ya tuk, micha aiʋhli fullota ka̱ hiohma̱ya tuk o̱,
18Eblaham i̱ yakni ya chi̱ ho̱ Helh im ʋlla ʋhleha itikba ya̱, micha in tʋmaha holihta chukowa moma ka̱ itikba ya̱ ai im aia̱hlichi tok.
19Mihma i̱ himmak ak o̱ Eblaham ʋt Mamle ya̱ itikba talaia Makpelah osapa hichukbi hikia ak o̱ tekchi Salah ya̱ a hohpi tok: yʋmmʋt Heblon Kenan yakni talaia kak oke.
20Mihma osapa, micha hichukbi anu̱kaka talaia kʋt ahollohpi yakni ya chi̱ ho̱, Helh ushi ʋhleha hʋt Eblaham a̱ im aia̱hlichi tok.
Currently Selected:
Chenesis 23: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
