Chenesis 22
22
1Atuk o̱ ilʋppa puta kʋt yʋmohmi ha ya yakohmi tok, Chitokaka yʋt Eblaham a̱ imomaka pisʋt, Eblaham ma, achi tok. Mihma, Yakeh, yak a̱sha lishke, achi tok.
2Mihma, Himak a̱ chiso hash, chiso yʋmmak bieka Aisak ash ish holitobli chatuk ʋt ishi cha, Moliah yakni ya̱ ish onashke; micha nʋnih achʋfalit chim anoli la chi̱ ka̱ paknaka ya̱ hukmit im issa mak o̱ ikbit ont ai is sʋm issashke, achi tok.
3Mihma Eblaham ʋt onnahinli fehna ho̱ wakaya cha, im issuba haksobish falaia ya̱ umpatali mʋt, hatak himithoa im a̱sha tuk ash tuklo ho̱, micha ushi Aisak aiena ka̱ pehlichi cha, ishit hukmit im issa iti ya̱ pʋhli mʋt, wakaya cha Chitokaka ʋt im anoli tuk mak o̱ ai ona tok.
4Yʋmohmi tuk osh nitak ont atuchina ma Eblaham ʋt akachakalit hopo̱koyo mʋt, ushi ai im issa chi̱ nʋnih hʋt hopaki ho̱ et hikia na pisa tok.
5Mihmʋt Eblaham ʋt hatak himithoa yash, Ilʋppa issuba haksobish falaia ya̱ awant hʋsh ai a̱shwa na ʋno, micha ʋlla ya̱ il ita tuklo kʋt yʋmma ont il ai aiokpʋchi cha, anonti e hʋchim ʋlashke, im achi tok.
6Mihmʋt Eblaham ʋt ishit hukmit im issa iti ya̱ ishi cha, ushi Aisak a̱ shalichi tok; mihmʋt luak, micha bʋshpo aiena ka̱ ilap ibbak a̱ isht ai ishi cha, itatu̱klot ia tok.
7Mihma Aisak ʋt i̱ki Eblaham a̱ im anumpulit, A̱ki, achi tok. Mihma, Yak a̱ya lishke, sʋso ma, achi tok. Mihma, Yakeh! luak, micha iti okʋto yak ashʋshke, amba hukmit im issa chukfʋlhpoa ushi mʋto? achi tok.
8Mihma Eblaham ʋt, Sʋso ma, Chitokaka yʋt ilap akinli hosh hukmit isht aiokpʋchi chukfʋlhpoa ushi ya̱ ahayucha chi̱ hoke, achi tok: yohmi ma ita tu̱klot ia tok.
9Atuk osh Chitokaka yʋt im anoli tuk nʋnih ha̱ onʋt okla tok: mihma Eblaham ʋt yʋmmak o̱ alta ikbi cha, iti ya̱ achukmalit bohlit tahli tok; mihmʋt ushi Aisak a̱ takchi cha, alta paknaka iti on a̱sha tuk a̱ onochi tok.
10Mihmʋt Eblaham ʋt ushi ya̱ ʋba chi̱ hosh ibbak a̱ pit welit bʋshpo a̱ ishi tok.
11Mihma Chihowah im enchel ʋt ʋba ya̱ et i̱ howʋt, Eblaham ma! Eblaham ma! ahanchi tok. Mihma, Yak hikia lishke, achi tok.
12Mihma, Chibbak a̱ ʋlla nakni yash ish onochi ná, micha nana kia chik i̱ kaniohmecho kashke: himak a̱ chiso hash, chiso yʋmmak illa kash chik sʋm i̱ halʋllo hokʋt, Chitokaka ya̱ ish i̱ nuksho̱hompa ka̱ ithana li hoka, achi tok.
13Mihma Eblaham ʋt akachakalit hopo̱koyo ma, yakeh, im asha̱ka ya̱ chukfʋlhpoa nakni ʋt abohli ho̱ lapish isht talakchi hosh hikia tok: mihmʋt Eblaham ʋt iʋt chukfʋlhpoa nakni ash ont ishi cha, ushi ya̱ atobbichit hukmit isht aiokpʋchi mak o̱ im issa tok.
14Mihma Eblaham ʋt yʋmma Chihowah‐chileh hochifo tok: yʋmmak atuk mak o̱, Chihowah i̱ nʋnih ha̱ nana kʋt aiʋlhtaiya hoke, himak nitak a̱ achi moma hoke.
15Mihma Chihowah im enchel ʋt atukla ma, Eblaham a̱ ʋba et ai i̱ howa tok.
16Micha Chihowah ʋt, Ʋno ak o̱ ʋno akinli ho̱ hochifot anumpa kʋllo il onochit, Nana ilʋppa ish yʋmihchi hatuk oka, micha chiso hash, chiso yʋmmak illa kash chik sʋm i̱ halʋllo hatuk oka;
17Nayukpa̱hanlit chi yukpali la hi oke, micha chim ishtatiaka ya̱ apaknʋchi hokʋno apakna̱hanchit ʋba fochik a̱ choyuhmichi likmʋt, okhʋta ʋhli shinuk aiasha kak o̱ choyuhmichi la hi oke; mikma chim ishtatiaka yʋt in tʋnʋp i̱ holihta okhissa ya̱ iesha hi oke.
18Mikma ʋm anumpa ha̱ ish im antia hoka, chim ishtatiaka ak o̱ oklushi moma yakni paknaka aiasha kʋt nan isht aiyukpa hi oke, achi li tuk oke, achi tok.
19Yohmi ma Eblaham ʋt hatak himithoa im aiasha kash osh falamʋt im ona tok; micha okla wakaya mʋt itapehʋt Bee‐sheba ya̱ ona tok: mihma Eblaham ʋt Bee‐sheba ak o̱ ʋtta tok.
20Atuk o̱ ilʋppa puta kʋt yʋmohmi ha ya̱ yakohmi tok, Eblaham a̱ im anolit, Yakeh! Milkah yʋmmak kia chitibapishi Naho ya̱ ʋlla im ehi̱shishke;
21Ushi ʋtta ahpi Hus, micha itibapishi Bus, micha Alam i̱ki Kemuel,
22Micha Cheset, micha Haso, micha Piltash, micha Chitlaf, micha Behluel.
23Micha Behluel ʋt Lebekah ya̱ tobachi tok: untuchina ilʋppak o̱ Milkah ʋt Eblaham itibapishi Naho ya̱ im eshi tok.
24Mihma im itaiena yʋt yʋmma hohchifo kʋt Leumah atuk osh yʋmmak kia Tebah, micha Kaham, micha Hlahash, micha Maakah aiena ka̱ im eshi tok, achi tok.
Currently Selected:
Chenesis 22: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
