Chenesis 21
21
1Atuk o̱ Chihowah yʋt achi tuk mak osh Salah ya̱ i̱ nowa tok: micha Chihowah yʋt anumpuli tuk mak osh Salah ya̱ i̱ yʋmihchi tok.
2Eblaham ʋt sipoknit taiyaha ho̱ nitak ʋlhpisa Chihowah yʋt im anoli tuk a̱ ont ʋlhpiesa ma, Salah ʋt chakali cha, ʋlla nakni yo̱ im eshi tok oka.
3Mihma Eblaham ʋt ʋlla nakni im ʋtta kash Salah ʋt im eshi kash hohchifo ha̱ Aisak achi tok.
4Mihmʋt Eblaham ʋt, Chitokaka yʋt i̱ miha tuk mak o̱, ushi Aisak ʋt nitak untuchina ho̱ hakshup in tʋbli tok.
5Yohmi ka̱ Eblaham ʋt afʋmmi tahlepa achʋfa ho̱, ushi Aisak ʋt im ʋtta tok.
6Mihma Salah ʋt, Chitokaka yʋt sai yukpʋchi tuk oke; yohmi ka̱ kʋna hosh haklo moma kʋt sʋbai yukpa chi̱ hoke, achi tok.
7Micha, Kʋta hosh Eblaham a̱ Salah ʋt ʋlla pishecha chi̱ hoke, im acha hinla tuk oh cho! sipoknit taiyaha ho̱ ʋlla nakni yo̱ im eshi li hoka, achi tok.
8Mihma ʋlla yash osh hofantit iʋt, pishit issa tok: atuk o̱ pishi ka̱ issʋchi nitak makinli ma Eblaham ʋt impʋchi chito ikbi tok.
9Atuk o̱ Echip ohoyo Haka ushi Eblaham im eshi tok ʋt ishit yopulʋt anta na Salah ʋt pisa tok.
10Yohmi kak o̱ Eblaham a̱, Ohoyo yuka ilʋppa, micha ushi itatuklo ka̱ ish kampilashke: ohoyo yuka ilʋppa ushi ʋt aiisha he ʋlhpesa ya̱ sʋso Aisak fehna ka̱ ibai isha he keyu hoke, achi tok.
11Mihma ushi ak atuk pulla mak o̱ nana ka̱ Eblaham ʋt ik im ʋlhpeso fehna tok.
12Mihma Chitokaka yʋt Eblaham a̱, Ʋlla ak atuk pulla mak o̱, micha chi̱ yuka ohoyo ak atuk pulla mak o̱ isht ik chim ʋlhpeso kashke: Salah ʋt nana chim achi tuk mak o̱ moma ka̱ im anumpa ha̱ ish i̱ haponaklashke: Aisak ak o̱ chim ai unchololi hʋt iba holhtinʋt hohchifa hi oka.
13Mikma ohoyo yuka ushi ak kia chim ai unchololi yoka, oklushi ikbi la hi oke, im achi tok.
14Atuk o̱ Eblaham ʋt onnahinli fehna ho̱ wakaya cha̱, ilhpak, micha oka kotoba a̱lhto ho̱ Haka ya̱ imʋt tahchi ya̱ abanʋli hosh ʋlla yash ima cha, chʋffichi tok: mihma Haka ʋt ia tuk osh Bee‐sheba yakni haiaka ya̱ fullokahanchi tok.
15Atuk osh oka kotoba a̱lhto tuk ʋt taha ma, ʋlla yash itʋpushi achʋfa ho̱ nuta pila tok.
16Micha iʋt mishema oski naki a pila hotuk ohmi ho̱ ona cha, et ichapaka yo̱ binili tok: ʋlla yʋt illi ka̱ ak peso kashke, achi hatuk okʋt. Mihmʋt et ichapaka ya̱ binili cha chitolit yaiya tok.
17Mihma Chitokaka yʋt ʋlla ilbʋshʋt pa̱ya ka̱ haklo tok: mihma Chitokaka im enchel ʋt Haka ya̱ ʋba et ai i̱ howʋt, Nanta chi katiohmi cho? Haka ma, Ik chi komunto kashke; Chitokaka yʋt ʋlla yʋt ai itolʋt ilbʋshʋt pa̱ya ka̱ haklo hoka.
18Wakayá, ʋlla yash wakayachi cha, chibbak a̱ isht ish ieshashke; oklushi chinto ikbi la hi oka, im achi tok.
19Micha Chitokaka yʋt nishkin i̱ fatummi na, kʋli hofobi oka ya̱ pisa tok: mihmʋt iʋt kotoba yash oka alotoli cha, ʋlla yash ishkochechi tok.
20Mihma Chitokaka yʋt ʋlla ya̱ iba foyuka tok; atuk o̱ hofantit taha mʋt, yakni haiaka ʋtta cha, ititanampo eshi imponna toba tok.
21Micha Palan yakni haiaka ak o̱ ʋtta tok: mihma ishki ʋt Echip yakni ak o̱ ohoyo ha̱ ai ishit ima tok.
22Atuk o̱ nitak yʋmma foka ma yakohmi tok, Abimelek, micha Fikol in tʋshka chipota pehlichi ita tuklo kʋt Eblaham a̱ im anumpulit, Nana ho̱ ish a kaniohmi moma ka̱ Chitokaka yʋt chiba foyuka hoke;
23Yʋmohmi hoka himak a̱ Chitokaka hochifot anumpa kʋllo a̱ mihʋt ʋno, micha sʋso, micha sʋso ha̱ ushi aiena ka̱ nana kia haksichit chik pi yʋmihcho kashke; amba chi̱ kana hosh chi yʋmihich li tok a̱ choyuhmit ʋno, micha okla inla yosh yakni ish ai ahanta tuk ʋt i̱ yʋmihcha he osh (achit) is sʋm il onochashke, achit okla tok.
24Mihma Eblaham ʋt, Anumpa kʋllo il onochi lashke, achi tok.
25Mihma Eblaham ʋt Abimelek in tishu ʋhleha hʋt kʋli hofobi ya̱ afoʋt im ishi tuk ak o̱, Abimelek a̱ nukfohkichi tok.
26Mihma Abimelek ʋt Kʋna hosh nana ilʋppa yʋmihchi tuk a̱ ithana li tuk keyu: micha is sʋm anoli tuk keyu ho̱ himak nitak illa ho̱ haklo lishke, achi tok.
27Mihma Eblaham ʋt chukfʋlhpoa, micha wak aiena ka̱ ishi cha, Abimelek a̱ ima tok: mihma ita tuklo kʋt nan itim apesa tok.
28Mihma Eblaham ʋt chukfʋlhpoa ya̱ ai ishit chukfʋlhpoa ushi tek untuklo ho̱ ila hiohlichi tok.
29Mihma Abimelek ʋt Eblaham a̱, Chukfʋlhpoa ushi tek untuklo ilʋppak o̱ nanta ho̱ ish miha hosh ila ish hiohlichi cho? achi tok.
30Mihma, Chukfʋlhpoa ushi tek untuklo ilʋppa sʋbbak ish ai isha chi̱ hoke; yʋmohmi ho̱ kʋli hofobi ilʋppa kulli li tuk a̱ nan isht ʋm atokowa ya chi̱ hoke, achi tok.
31Yʋmohmi hatuk o̱ yakni yʋmma Bee‐sheba hochifo tok; yʋmmak o̱ ita tuklo kʋt anumpa kʋllo ai il onochi tuk okʋt.
32Yakohmi hosh Bee‐sheba ya̱ nana ai itim apesʋt okla tok: yohmi ma Abimelek, micha in tʋshka chipota pehlichi Fikol ash ita tuklo kʋt wakaya cha, falamʋt Filistin okla i̱ yakni ya̱ onʋt okla tok.
33Mihma Eblaham ʋt Bee‐sheba ak o̱ iti lokoli hilechi cha, yʋmmak o̱ Chihowah Chitokaka bilia hohchifo ha̱ ai i̱ pa̱ha̱ya tok.
34Mihmʋt Eblaham ʋt Filistin okla i̱ yakni ya̱ okla inla yosh ahanta na nitak laua tok.
Currently Selected:
Chenesis 21: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
