Chenesis 24
24
1Atuk o̱ Eblaham ʋt sipoknit nitak lauʋt in taiyaha hatok: mihma Chihowah yʋt Eblaham a nana moma ka̱ isht yukpali tok.
2Atuk o̱ Eblaham ʋt in chuka achʋfa tishu sipokni i̱ shahli, yʋmmʋt nana im a̱sha tuk moma ka̱ pehlichi yo̱, Chibbak a̱ saiyubi nuta ya̱ isht ish potolashke, chim asilhha lishke:
3Mikma Kenan okla takla ahanta li ka̱ ushetik ʋhleha ha̱ ohoyo ai ishit sʋso ha̱ chik emo ka he ya̱, Chihowah, ʋba in Chitokaka, micha yakni in Chitokaka ya̱ hochifot anumpa kʋllo chil onochechi lashke.
4Amba a̱ yakni ya̱, a̱ kanomi i̱ yakni ya̱ ish ona cha, ohoyo ha̱ ai ishit sʋso Aisak a̱ ish imashke, im achi tok.
5Mihma tishu hash osh, Ohoyo hʋt yakni ilʋppa si awant ʋla he keyu hokmʋno, chiso ha̱ yakni aiʋttʋt ish minti tok a̱ anonti isht ona la hi pulla hoh cho? im achi tok.
6Mihma Eblaham ʋt, Ahah, ish ahni cha, sʋso ha̱ yʋmma isht chik ono kashke,
7Chihowah, ʋba in Chitokaka yʋt, yʋmmak osh a̱ki in chuka, micha a̱ kanomi i̱ yakni ya̱ a sʋshi tok ʋt, yʋmmak osh ʋm anumpuli cha, anumpa kʋllo ʋm ilonochit, Chim ishtatiaka ya̱ yakni ilʋppa ima la hi oke, ʋm achi tuk ʋt yʋmmak osh im enchel a̱ et pila na, chi tikba a̱yakma, yʋmmak o̱ ohoyo ha̱ ai ishit sʋso ha̱ ish ima hi oke.
8Atuk o̱ ohoyo hʋt chi awant minta he keyukma, anumpa kʋllo ilʋppak ash ish i̱ mokofa hi oke; peh sʋso ha̱ anonti yʋmma isht chik ono kashke, im achi tok.
9Mihma tishu hash osh i̱ shahli Eblaham iyubi nuta ya̱ ibbak ishit potoli cha, nana yʋmma isht anumpa kʋllo im il onochit anumpuli tok.
10Micha tishu hash osh i̱ shahli hʋt kamel im aiasha kash kamel pokoli ho̱ ishi cha ia tok: (i̱ shahli imila̱yak moma kʋt ibbak ak o̱ foyuka hatuk okʋt;) micha wakaya mʋt, Mesopotamia yakni ya̱ onʋt, Naho in tʋmaha holihta ya̱ ona tok.
11Atuk osh opiʋt taha ma, ohoyo hʋt kohchʋt oka ochi chatuk ʋt ont ai ʋlhpesa ma kʋli hofobi tʋmaha holihta kocha ya̱ i̱ kamel a̱ hʋchukbilhkʋchi tok.
12Mihmʋt, Chihowah, a̱ shahli Eblaham in Chitokaka ma, nana ahni li ka̱ himak nitak a̱ is sʋm aia̱hlichi cha, a̱ shahli Eblaham a̱ ish i̱ kanashke, chim asilhha lishke.
13Yakeh, oka kʋli hofobi bili̱ka ilʋppa hikia lishke; micha tʋmaha holihta hatak a̱ ushetik ʋhleha hʋt oka ocha chi̱ hosh et kohchʋshke:
14Atukma yakohmashke, ohoyo himita nana ho̱, Chim isht ochi ya̱ akʋchi na, ak ishkó, chim asilhha lishke, achi likma, Ishkó, micha chi̱ kamel ak kia oka ya̱ ipeta lashke, achikmʋt, yʋmmak osh chin tishu Aisak a̱ ish im atokoli tuk mak ashke; mikma yʋmmak o̱ a̱ shahli ha̱ ish i̱ kana tuk a̱ isht ithʋna lashke, achi tok.
15Atuk o̱ yakohmi tok, anumpulit ont ik tahlo moma ho̱, yakeh, Lebekah ʋt, yʋmmʋt Eblaham itibapishi Naho tekchi Milkah ya̱ ushi Behluel im ʋtta tok ʋt im isht‐ochi ʋt tahchi ha̱ on talaia ho̱ kohcha tok.
16Micha ohoyo himita yʋt hatak haleli keyu, hatak nana kia ithana tok keyu yosh pisaka aiokli fehna hatok: atuk osh kʋli ya̱ ona cha im isht‐ochi yash alotoli cha, ʋla tok.
17Mihma tishu hash osh malelit ont afama cha, Oka chim isht‐ochi a̱lhto ka̱ kanomosi ka̱ ak ai ishkó, chim asilhha lishke, achi tok.
18Mihma, ohoyo himita yash osh, Ishkó, a̱ shahli ma, achi tok: mihmʋt tu̱shpʋt im isht‐ochi ya̱ akʋchit ibbak isht ishi cha, oka ya̱ ipeta tok.
19Atuk osh oka ya̱ ipetʋt tahli mʋt, Chi̱ kamel ak kia oka ochit ipeta li̱, ishkot im ʋlhpesashke, achi tok.
20Mihmʋt tu̱shpʋt im isht‐ochi ya̱ tosholit oka aiipeta peni ya̱ pit ʋni cha, oka ocha chi̱ hosh anonti malelit kʋli hofobi ya̱ ona cha, i̱ kamel moma ka̱ oka im ochi tok.
21Mihma hatak ash osh ohoyo himita yash aiokchifelit pisa mʋt, nana ahnit a̱ya li tuk a̱ Chihowah ʋt ʋm aiahlichikmá, keyukmá, nanta tuk oh chishba? ahnit ithʋna bʋnna mʋt, nana ik acho tok.
22Atuk osh yakohmi tok, kamel ʋt oka ishkot issa ma hatak ash osh tʋli lakna ibichilu takali weki kʋt shekel iklʋna ho̱, micha ibbak ʋlbeha tuklo kʋt weki kʋt tʋli lakna shekel pokoli ho̱ ishi tok.
23Micha, Kʋta ushetik chia hoh cho? ʋm anolí, chim asilhha lishke: chi̱ki in chuka ya̱ il anusi ʋt a̱sha cho? achi tok.
24Mihma, Milkah ushi yʋmmak oka Naho im eshi tok Behluel ushetik sia hoke, im achi tok.
25Micha achakalinchi mʋt, Onush ʋpi, micha nanʋlhpoa ʋpa aiena kʋt pin laua achukma, micha anusi ʋt a̱sha hoke, im achi tok.
26Mihma hatak ash osh akachunoli cha, aka hlipiʋt Chihowah ya̱ aiokpʋchi tok.
27Chihowah a̱ shahli Eblaham a̱ in Chitokaka yʋt a̱ shahli ha̱ isht i̱ nukha̱klo, micha im anumpa a̱hli ya̱ ik im ai esho kʋt holitopashke: hina a̱ya li ma, Chihowah yʋt sʋsht a̱yʋt a̱ shahli itibapishi ʋhleha ha̱ in chuka ya̱ sʋsht ʋlʋshke, achi tok.
28Mihma ohoyo himita yash osh malelit nana ilʋppa puta ka̱ ishki in chuka ai achʋfa ya̱ ont im anoli tok.
29Yohmi ka̱ Lebekah ʋt i̱ nakfi ʋt anta cha, hohchifo kʋt Laban atok: mihma Laban ʋt kohchʋt malelit hatak ash osh kʋli hofobi ya̱ bili̱ka hikia ka̱ ona tok.
30Atuk o̱ yakohmi tok, ibichilu takali, micha ibbak ʋlbeha aiena kʋt in tek ibbak a̱ ʋlbi̱ha na pisa mʋt, micha in tek Lebekah im anumpa, Hatak ʋt yak ʋm achishke, achi na haklo mʋt, hatak ash im ona tok; mihma yakeh, kamel ʋt kʋli hofobi aiasha na, hatak ash osh bili̱ka hikia tok.
31Atuk osh, Ant chukowá, Chihowah i̱ holitopa chia ma! nanta katiohmi ho̱ kocha ish hikia cho? aboha ya̱ atahli li, micha kamel a̱ aiasha im atahli li hoka, achi tok.
32Mihma hatak ash osh chuka ya̱ ont chukowa tok: mihma i̱ kamel ash ikfoka isht asheha ya̱ shoeli cha, onush ʋpi, micha nanʋlhpoa ʋpa aiena ka̱ ipeta mʋt, iyi, micha hatak apehʋt a̱ya tuk iyi aiena ka̱ isht achifa chi̱ ka̱ oka ya̱ ima tok.
33Mihma ʋpa chi̱ ka̱ ilhpak ʋt itikba taloha tok: yohmi tuk kia, Nana aiahnit a̱ya li tuk ʋt ak anolo ki̱sha kʋt impa la he keyu hoke, achi tok. Mihma, Anumpuli, achi tok.
34Mihma, Eblaham in tishu sia hoke.
35Atuk o̱ Chihowah yʋt a̱ shahli ha̱ nayukpali fehna, na holitopa fehnʋt tahʋshke: micha nanʋlhpoa chipinta, micha nanʋlhpoa hochito, micha tʋli hʋta, micha tʋli lakna, micha hatak tishu, micha ohoyo tishu, micha kamel, micha i̱ssuba haksobish falaia aiena ka̱ ima tuk oke.
36Mihma a̱ shahli ha̱ tekchi Salah ʋt sipoknit taiyaha hosh a̱ shahli ha̱ ʋlla nakni yo̱ im eshi tok oke: atuk o̱ yʋmmak o̱ nana im a̱sha tuk ʋt mominchit ima tuk oke.
37Atuk osh a̱ shahli hʋt anumpa kʋllo si ilonochechit Kenan okla i̱ yakni ahanta li tuk a̱ ushetik ʋhleha ha̱ ai ishit sʋso ha̱ ohoyo ish ima he keyu:
38Amba iʋt a̱ki in chuka, micha a̱ kanomi i̱ yakni ya̱ ish ona cha, ohoyo ai ishit sʋso ha̱ ish imashke, ʋm achi tuk oke.
39Mihma a̱ shahli ha̱, Ohoyo hʋt siakaiya he keyu yoba hokmʋno, im achi li tuk oke.
40Mihma, Chihowah yʋmmak o̱ itikba noho̱wa li chatuk ʋt im enchel a̱ chi apehʋchit pila cha, nana ahnit ish a̱ya ka̱ chim aia̱hlicha hi oke; mikma a̱ kanomi yo̱, micha a̱ki in chuka achʋfa yo̱ ai ishit sʋso ha̱ ohoyo ish ima hi oke.
41Yohmikma a̱ kanomi ya̱ ish im onakmʋt, ʋm anumpa kʋllo ilʋppa ish i̱ mokofa hi oke; atuk o̱ achʋfa ka̱ ik chemokma, ʋm anumpa kʋllo ilʋppa ish i̱ mokofa hi oke, ʋm achi tuk oke.
42Atuk o̱ himak nitak a̱ kʋli hofobi ya̱ ʋla li mʋt, Chihowah, a̱ shahli in Chitokaka ma, himak a̱ nana ahnit a̱ya li tuk a̱ is sʋm aia̱hlichi hokma:
43Yakeh, oka kʋli hofobi bili̱ka hikia lishke; atuk o̱ yakohmashke, ohoyo himita hatak haleli keyu yosh et kohchʋt oka ochi na, Oka chim isht‐ochi a̱lhto ka̱ kanomosi ka̱ ak ai ishkó, chim asilhha lishke, achi likma,
44Yohmikma, Ishkó, mikma chi̱ kamel ak kia im ochi lashke; ʋm achikmʋt, Yohmikmʋt ohoyo yʋmmak o̱ Chihowah yʋt a̱ shahli ushi ya̱ im atokoli tuk mak ashke, achi li tuk oke.
45Atuk o̱ sa chu̱kʋsh anu̱kaka anumpuli li kʋt ont ak tahlo ki̱sha ho̱, yakeh, Lebekah ʋt im isht‐ochi yʋt tahchi ha̱ on talaia ho̱ et kohcha tuk oke; micha kʋli hofobi ya̱ okʋtaha cha, oka ochi tuk oke; mihma, Ak ishkó, chim asilhha lishke im achi li tuk oke.
46Mihma tu̱shpʋt im isht‐ochi yʋt tahchi ha̱ on talaia ko̱ akʋchi mʋt, Ishkó, mikma chi̱ kamel ak kia oka ipeta lashke, achi tuk oke: yohmi na ishko li ma, kamel ak kia oka ipeta tuk oke.
47Mihma i̱ ponaklot, Kʋta ushetik chia hoh cho? achi li ma, Naho ushi yʋmmak oka Milkah ʋt im eshi tok Behluel ushetik sia hoke, achi tuk oke: mihma ibichilu takali ibichilu ya̱ takalichi li mʋt, ibbak ʋlbeha aiena ka̱ ibbak abehli li tuk oke.
48Mihmʋt akachunolit aka hlipiʋt Chihowah ya̱ aiokpʋchi li tuk oke; micha Chihowah a̱ shahli Eblaham in Chitokaka, yʋmmak osh a̱ shahli Eblaham itibapishi ushetik o̱ ishit ushi ya̱ ima la chi̱ ho̱ hina aiʋlhpiesa ka̱ sʋsht a̱ya tuk a̱ holitoblichi li tuk oke.
49Yohmi ka̱ himak a̱ a̱ shahli ha̱ i̱ kanʋt hʋsh im aia̱hla chi̱ hokmʋt, hʋs sʋm anolashke: keyukmʋt hʋs sʋm anolashke: yʋmohmi ho̱ ishtimpak imma, keyukmʋt ʋlhfʋbekimma pit fullota lashke, achi tok.
50Yohmi ma Laban, micha Behluel ʋt afalaminchit, Nana ka̱ Chihowah ak osh ahni tuk pullʋshke: okpulo hokma, achukma hokma nana kia e chi̱ miha he keyushke.
51Yakeh, Lebekah ʋt chi tikba a̱shʋshke, ishi cha iá, mikma Chihowah yʋt anumpuli tuk mak o̱ chi̱ shahli ushi ya̱ tekchi yashke, achit okla tok.
52Atuk o̱ yakohmi tok, Eblaham in tishu hʋt im anumpa ha̱ haklo mʋt, aka hlipia cha, Chihowah ya̱ aiokpʋchi tok.
53Mihmʋt tishu hash osh tʋli hʋta ishit shema, micha tʋli lakna ishit shema, micha nafohka ishit kohchi cha, Lebekah ya̱ ima tok. Micha Lebekah i̱ nakfi, micha ishki itatuklo ka̱ naholitopa puta ka̱ ima tok.
54Mihma yʋmmak ash, micha hatak apehʋt a̱ya tuk aiena kʋt okla impʋt nan ishko tok, micha a̱sha na onna tok: atuk osh ont onna ma wakaya tok: mihma tishu hash osh A̱ shahli ha̱ pit hʋs sa pelashke, achi tok.
55Mihma i̱ nakfi, micha ishki yash osh, Ohoyo himita ʋt nitak holhtina, peh nitak pokoli hokʋno pi takla ahantashke; yohmi ha yosh iashke, achit okla tok.
56Mihma, Hʋs sʋm ataklʋmmi ná, nana ahnit a̱ya li tuk a̱ Chihowah yʋt ʋm aia̱hlichi hatuk oka: hʋs sa pila na a̱ shahli ha̱ im ona lashke, im achi tok.
57Mihma, Ohoyo himita ako̱ e hoyo cha, ilap itih akinli ho̱ ai il im aponaklashke, achit okla tok.
58Mihma Lebekah ya̱ hoyot okla cha, Hatak ilʋppa awant ish ia chi̱ cho? im achi ma, Ia la chi̱ hoke, achi tok.
59Mihma in tek Lebekah, micha ilaueli yatok, micha Eblaham in tishu, micha hatak apehʋt a̱ya tuk aiena kash okla pila tok.
60Micha Lebekah ya̱ nayukpalit, Pin tek chia hʋt; milyʋn tahlepa sipokni puta hoh kia ishki chia hashke; mikma chim ishtatiaka yʋt i̱ nukkilli puta i̱ holihta okhissa ya̱ ieshashke, im achi tok.
61Mihma Lebekah, micha ohoyo himita im a̱sha aiena kʋt wakaya cha, kamel ash on chieya mʋt, hatak ash iakaiya tok: mihma tishu hash osh Lebekah ya̱ ishi cha, ia tok.
62Mihma Aisak ʋt kʋli hofobi Lahai‐loi pilla ha̱ minti tok: oka mahli yakni ak o̱ ʋtta hatuk okʋt.
63Atuk osh opiʋt taha ma, Aisak ʋt osapa ya̱ nan anukfillit hikiki̱a chi̱ hosh kohchʋt ia tok: atuk osh akachakali cha pisa ma, yakeh, kamel ash osh minti na pisa tok.
64Mihma Lebekah ʋt akachakali cha, Aisak a̱ pisa mʋt, kamel a̱ om binili tuk ʋt akowa tok:
65Tishu hash, Hatak ilʋppʋt kʋta hosh osapa noho̱wʋt pi afamʋt minti cho? im achi na tishu hash osh, A̱ shahli yoke, achi tuk atuk oka; yʋmohmi ma nashuka isht ompoholmo ishi cha il ompohomo tok.
66Mihma tishu hash osh nana kaniohmi tuk ʋt moma Aisak a̱ im anoli tok.
67Mihma Aisak ʋt ishki Selah im ʋlhtipo ak o̱ isht ona tok, micha Lebekah ya̱ ishi na tekchi toba tok: mihma holitobli tok: micha Aisak ʋt ishki illi tuk a̱ hopohla tok.
Currently Selected:
Chenesis 24: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
