Apostel isht Anumpa 6
6
1Nitak yʋmmak foka, nan ithʋna ʋhleha hʋt laua kʋt isht i̱ shaht taha ma, im ohoyo ʋlhtakla puta ka nitak moma nana iti hopela ya̱ ahaksichi beka hatuk o̱, Klik okla hʋt Heblu okla ha̱ nanumachit aiasha tok.
2Yohmi ma auahtuklo kashot nan ithʋna ʋhleha laua kash itahobi cha, Chihowa im anumpa ha̱ il issa cha, ai impa yak o̱ isht il ai a̱shwa he, ʋlhpesa keyushke.
3Yohmi hoka il itibapishi ʋhleha ma! hʋsh ai itʋpeha ya̱ hatak untuklo annoa achukma chatuk, nan imponna, micha Shilombish Holitopa anukfohka aiena ho̱ hʋsh atokoli na, yʋmmak o̱ nan ai isht ʋtta ilʋppa e hiohlechashke.
4Amba pishno ak okʋto, ʋba pit anumpuli, micha anumpa isht ʋtta aiena kak o̱, kil isso kʋmohma chi̱ hoke; achi tok.
5Yohmi ma okla la̱wa kash ot momʋt anumpa ha̱ aiokpanchi tok. Yohmi mʋt Istefin hatak na yimmi, micha Shilombish Holitopa yʋt anukfohka fehna, micha Filip, micha Pokolʋs, mikmʋt Naikena, micha Taimon, micha Paminʋs, mikmʋt Nikolis ʋbanumpa nukfohka Antiak ai ʋtta aiena ho̱, okla atokoli cha,
6Yʋmma puta kash o̱ ʋbanumpeshi ʋhleha itikba hiohlechi tok. Mihma okla ʋba pit anumpuli mʋt, ibbak isht umbitepa tok.
7Yohmi ma Chihowa im anumpa hʋt isht i̱ shahlit ia ma, Cheluselem a̱ nan ithʋna ʋhleha holhtina laua kʋt i̱ shahlit ishtia fehna tok; yohmi ma na holitompa isht a̱sha la̱wa fena kʋt ayimmika ya̱ im antiʋt aiasha tok.
8Mihma Istefin ʋt ayimmika, micha isht ai a̱hlika aiena kʋt isht alota mʋt, nan isht ahoba chinto, micha nafehna aiena ka, okla itin takla ya̱ a yʋmihinchi tok.
9Yʋmohmi ma sinakak Laibatin okla i̱ sinakak achi ho̱, a̱sha yatuk, micha Sailini okla, micha Aleksantia okla, mikmʋt Silisia, micha Asia minti aiena kaniohmi kʋt, Istefin a̱ itim anumpulit hieli tok.
10Yohmi kia chu̱kʋsh, micha ahopoyuksaka aiena ho̱ isht ai anumpuli hatuk ash, okla nan isht a miha he keyu tok.
11Yohmi mʋt hatak lumʋt tohno na, Yʋmmak ashot Moses, micha Chihowa aiena ka ik ahobalot isht anumpohonli ka, e haklo kano; achi tok.
12Micha okla puta, mikmʋt i̱ hochitoka ʋhleha micha holissochi ʋhleha aiena kash okla ilhkolihinchi na, okla i̱ kohcha cha yʋmmak ash ishi mʋt, nan apesa ʋhleha ha̱ isht im ona tok.
13Micha hatak nana aholʋbi ya̱ hiohlechi na, yʋmmak ash ot, Hatak ilʋppʋt aholitopaka ilʋppa, micha nan ʋlhpisa aiena ka, anumpa ik ahobalo isht mihachi kʋt ik issoshke.
14Chisʋs Nasalet ai ʋtta ilʋppʋt ilʋppa okpʋna he, micha nan ʋlhpisa puta Moses ʋt hʋp ima tok a̱ inlʋcha he, ilʋppʋt achi ho̱, okla e haklo kamo; achi tok.
15Yʋmohmi ma, itʋnahʋt ma̱ya kash ot momʋt yʋmmak ash aiokchifeli fehnʋt pisa ma, nashuka mʋt enchil nashuka yo̱ chiyuhmi na, pisa tok oke.
Istefin a̱ im asilhhʋchi hatuk o̱ isht il anumpuli.
Currently Selected:
Apostel isht Anumpa 6: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
