Apostel isht Anumpa 7
7
1Yʋmohmi ma na holitompa isht a̱sha pehlichi ashot, Nana kʋt yakohmi ho̱ mʋhli cho? achi tok.
2Mihma yʋmmak ashot, Hatak itibapishi li ʋhleha, micha an tikba puta ma! hʋsh haiyaklashke. Pin tikba Eblaham ʋt Chalan a̱, ont ik ʋtto ki̱sha hosh, Mesopotemia ak o̱ anta moma ma, Chihowa holitopa yʋt ant i̱ haiaka tok.
3Mihmʋt yʋmmak ash o̱, Chi̱ kanomi ʋhleha i̱ filʋmmit, chi̱ yakni a̱ a kohchʋt a̱yʋt, yakni chi pisachi la chi̱ ka, ish lashke; im achi tok.
4Mihma Kaltia okla i̱ yakni ash a kohchʋt minti cha, Kalan ak o̱ ant ai ahanta tok. Atuk o̱ i̱ki ʋt illi ma, yʋmmak ash o̱ a wihachit yakni ilʋppa himonasi hʋsh ai aha̱shwa ka, isht ʋla tok.
5Ʋlla yʋt ik im iksho ki̱sha ma, ilap micha isht ai‐unchululi aiena ka, yʋmmʋt immi ha he mak o̱, ima hi okʋt, i̱ miha tok nana kia, a binila hi a̱ peh iyi pʋtha a habli achʋfa kia, ilap a̱ ik emo ki tok.
6Micha Chihowa yʋt yakohmichit anumpuli tok: Yʋmma isht ai unchululi ʋhleha hʋt yakni inla ai itʋnowa he; yohmikma okla yukachit ilbʋshahanchi na, afʋmmi tahlepa ushta he.
7Yohmikma oklushi nana ho̱ i̱ yukʋt aha̱shwa tukma, yʋmma na kanichi la hi oke; yohmi ha mʋno, okla kocha wiha cha, ilʋppa ant a si aiokpahancha hi oke; Chihowa yʋt achi tok.
8Mihmʋt hakshup tʋpa nan ʋlhpisa ka ima tok. Atuk o̱ Eblaham ʋt Aisak a̱ ikbi cha, nitak isht untuchina ma, hakshup tʋbli tok. Atuk o̱ Aisak ʋt Chekob a̱ ikbi tok o̱, Chekob ʋt hatak pi̱ki hochitoka auah tuklo ka ikbi tok.
9Yohmi tuk o̱, hatak i̱ki hochitoka yash ot Chosef a̱ i̱ nukkilli hatuk osh, nan isht chumpʋt Echip a̱ pit kanchi tok; yohmi kia Chihowa yʋt awant anta tok.
10Micha nan isht im a palʋmmi puta ka mominchit ai isht kohchi cha, Echip mi̱ko Feleo a̱ itikba ya̱ aholitopa, micha nan imponna aienʋt ahanta chi̱ ka, ima tok; yohmi na yʋmmak ashot Echip yakni, micha in chuka moma pehlichi ikbi tok.
11Yʋmohmi ma Echip yakni moma, micha Kenan aiena ka na hohchʋfo, micha na palʋmmi chinto aiena kʋt onʋtuyula tok; yohmi ma hʋpin tikba ʋhleha hashot nan ilimpa nana kia ik ahayucho ki tok.
12Yohmi kia Echip a̱ tanchi ʋt a̱sha na Chekob ʋt haklo mʋt, hʋpin tikba ʋhleha ak o̱ ʋmmona ka pit tihleli tok.
13Atuk o̱ ont atukla kak o̱, Chosef ʋt itibapishi ʋhleha ha̱ im il anoli tok. Yohmi ma Chosef i̱ kanomi ʋhleha hatuk ʋt Feleo a̱ im annoa tok.
14Yohmi ma Chosef ʋt i̱ki Chekob, micha i̱ kanomi ʋhleha moma kʋt, hatak pokoli untuklo akucha tahlapi ho̱, pit hoyo hosh, pit chʋffichi tok.
15Yohmi na Chekob ʋt Echip a̱ ona tok osh, ilap ash, micha hʋpin tikba ʋhleha aienʋt illi tok.
16Yʋmohmi na ishtiʋt Saikam a̱ isht ona cha, Eblaham ʋt ahollopi Saikam i̱ki, Ema ushi ʋhleha ha̱ tʋli holisso isht in chumpa tok a̱, ont fohki tok.
17Yʋmohmi kash o̱ Chihowa yʋt anumpa kʋllo Eblaham a̱ nan isht ai im apihi̱sa tok, nitak ʋt ai ona̱ het ma̱ha̱ya ma, okla hashot Echip a̱ a laua kʋt i̱ shaht isht ma̱ha̱ya na,
18Mi̱ko inla Chosef a̱ ithana keyu hosh hikia tok.
19Yʋmmak ash osh hʋpi̱ kanomi ʋhleha ha̱ haksichi mʋt, hʋpin tikba ʋhleha hash o̱ ilbʋshachi, yʋmohmi cha okcha̱yʋt ik ma̱yo ka chi̱ ka, im ʋllo̱si a̱ isht kampila beka tok.
20Yʋmmak foka ma Moses ʋt ʋtta mʋt, aiukli fehna, yʋmohmi cha i̱ki in chuka ya̱ hʋshi tuchina ho̱, a pishi tok.
21Yʋmohmi tuk o̱ kocha kanchi ma, Feleo ushetik ʋt eshi cha, ilap ushi a chi̱ ho̱ hofantichi tok.
22Yʋmohmi ma, Moses ʋt Echip okla nan ai ithana puta ka mominchit ithaiyana, yʋmohmi mʋt anumpa puta, micha na fehna puta aiena ka isht anta imponna tok.
23Yʋmohmi tok osh hopaki kʋt afʋmmi pokoli ushta ont ʋlhpiesa mʋt, itibapishi Islael ushi ʋhleha ha̱ i̱ nowʋt a̱ya hi oka, chu̱kʋsh anukfoyuka tok.
24Yʋmohmi tok osh, achʋfʋt nan ʋlhpesa keyu ho̱ isht ilbʋsha na pisa mʋt, yʋmmak ash apelʋchi, yohmi cha, issikkopa tuk a̱ atobbit, Echip hatak ash ʋbi tok.
25Yʋmma ibbak ak o̱ Chihowa yʋt isht hlakoficha hi a̱, itibapishi ʋhleha hʋt okla akostininchi hatuk a̱, im ahoba hatuk kia, okla ik akostinincho ki tok.
26Yʋmohmi tuk o̱ nitak ont atu̱kla ma itibi hosh a̱shwa ma, yʋmmak ashot ont i̱ haiaka cha, itin nanaiyʋcha chi̱ hosh, Hatak, itibapishi hʋchia hoke; na katihmi ho̱ hʋsh iti okpʋni cho? ahanchi tok.
27Yohmi kia in chuka panta hatak okpʋni tuk ashot, Kʋta hosh na pi pehlichi, micha na pim apesa aiena ka chikbi tuk o̱?
28Pilashash Echip hatak ish bi tuk ʋt, is sa chomicha chi̱ ho̱? achi mʋt, naksi ka pit tobli tok.
29Yohmi ma ilʋppa ahanchi ka, Moses ʋt kʋnia cha, hatak nowʋt a̱ya yosh, Matian yakni ya̱ ahanta hosh, yʋmmak o̱ ushi tuklo ka ai ikbi tok.
30Atuk o̱ afʋmmi pokoli ushta kʋt ont taha ma, Chitokaka im enchil ʋt yakni haiaka nʋnih chaha Saina ya̱ bʋfaha anu̱ka luak libbi ho̱, ant im a haiaka tok.
31Moses ʋt yʋmma pisa mʋt, na pisa kʋt okokko! aiahni tok; micha akostinincha chi̱ hosh bili̱ka ona ma, Chitokaka im anumpa hʋt im ʋla kʋt,
32Ʋno akosh chin tikba ʋhleha ya̱ in Chihowa sia, Eblaham a̱ in Chihowa, micha Aisak ma in Chihowa, micha Chekob a̱ in Chihowa sia mak oke; ahanchi tok. Yohmi ma Moses ʋt wʋnihinchi mʋt, atokowʋt pisa nukwia tok oke.
33Yʋmohmi ma Chitokaka ashot, Shulush a̱ chiyi ish a shuelashke; ish a hikia yʋmmʋt yakni holitopa hoka.
34Ʋm okla ʋhleha Echip ai aha̱shwʋt ilbʋsha ka pisa kʋt pihi̱sa li: micha okla yaha̱ya ka haha̱klo li chatuk; yʋmohmi cha kocha weli la chi̱ hosh aka minti lishke. Yohmi ka mintí, chishno ak o̱ himonasi a̱ Echip a̱ pit chi chʋffichi lashke; im achi tok.
35Moses ilʋppa, okla shitilema cha, Kʋta hosh na pehlichi, micha nan apesa aiena ka chikbi tok o̱? ahanchi tok ash fena akinli ka, na pehlichi, micha na hlakofichi aiena ka, enchil bʋfaha anu̱ka ai i̱ haiaka ka ibbak o̱, Chihowa yʋt isht a pit chʋffihinchi tok.
36Mihma na fehna, micha nan isht ahoba puta aiena ka, Echip yakni, micha okhʋta humma, mikmʋt afʋmmi pokoli ushta ho̱ yakni haiaka ya̱, isht a kaniminchi hosh, yʋmma pehlichit kohcha tok.
37Moses ilʋppak osh Islael ushi ʋhleha ha̱, Chihowa hʋchin Chitokaka yʋt hʋsh itibapishi hatuk a̱, hopaii ʋno chohmi ho̱, ikbit hʋchi̱ hilecha he; yʋmmak o̱ hʋsh i̱ haponakla hi oke; im ahanchi tok oke.
38Ilʋppak osh yakni haiaka okla ai itʋnaha ka ibafohka, enchil ʋt nʋnih chaha Saina ya̱ ai im anumpuli ka awant anta; micha hʋpin tikba ʋhleha ma ibafohka tok; yʋmmak osh isht ai okcha̱ya, nan ʋlhpisa puta ka hʋp ima chi kʋt, ishi tok mak oke.
39Yʋmmak o̱ hʋpin tikba ʋhleha hʋt im antia he keyu hosh, amba naksi ka pit tobli cha, chu̱kʋsh ʋt falamʋt Echip a̱ ia mʋt,
40Alon ash o̱ Pi tikba ilhkola chi̱ ka, Chitokaka puta ka, pim ikbí; Moses ilʋppa pi pehlichí Echip yakni ai isht pi kohchi ano, nana mak osh isht a kaniohmi tuk chishba, kil ithaiyano hoka, im ahanchi tok.
41Micha nitak yʋmma foka ma, wak ushi okla ikbi cha, na holba toba yash nan isht aiokpʋchi ya̱, isht im ai ʋla cha, ilap ibbak nan ikbi tuk a̱ isht il ai yukpʋt aiasha tok.
42Yohmi ma ʋba fochik puta ka, okla aiokpʋcha chi̱ mak o̱, Chihowa yʋt issʋt i̱ filʋmmi tok. Hopaii ʋhleha i̱ holisso ha̱ a holihi̱so kʋt, Islael in chuka achʋfa ʋhleha hʋchia ma! afʋmmi pokoli ushta ka yakni haiaka, nan ʋlhpoba nipi puta, micha nan isht ai okpʋchi puta aiena ka, isht hʋs sʋm ahanla cho?
43Amba Molak im ʋlhtipo a̱, micha Limfan chin Chi howa i̱ fochik aiena, na holba hʋsh aiokpʋcha chi̱ mak osh, hʋsh ikbi tok ʋt shoyulit hʋsh a̱ya cha tok. Yʋmohmi hoka wihachit Babulon misha pilla, hʋch isht a̱ya la hi oke, achi hoka.
44Yʋmmak okʋt Moses a̱ i̱ mihʋt, kaniohmi ho̱ pi̱sa tuk ʋt, holba ho̱ ikba he o̱, apesa tok mak o̱, hʋpin tikba ʋhleha hʋt yakni haiaka ya̱ isht ai atokowa ʋlhtipo ʋt in takali tok.
45Atuk o̱ hʋpin tikba ʋhleha hak kia, yʋmma ishi tok osh, Choshua a̱ apehʋt oklushi nan ik ithano, yʋmmak o̱ Chihowa yʋt pin tikba ʋhleha itikba ya̱ a kohchit tihlihinli tok, i̱ yakni a̱ isht chukowa tok o̱, ituyula na, Lewi ʋt ahanta nitak a̱ oyuna tok.
46Mihma yʋmmak osh Chihowa itikba ai isht il ayukpa ahayuchi, yʋmohmi cha, Chekob in Chihowa ya̱ aboha im atahli bʋnna tok;
47Yohmi tuk kia Solomon ak o̱sh chuka ya̱ im ikbi tok.
48Yohmi kia Moma i̱ shahli hʋt tempel puta ibbak o̱ isht ikbi yokʋno, ai ahanta cha tuk keyu;
49Ʋba yʋt ʋm aiasha okma, yakni ʋt saiyi ai o̱ hikia yoke. Chuka nanta ho̱ hʋs sʋm ikba chi̱ ho̱? mikma a foha li ak osh nanta ho̱?
50Ʋno sʋbbak ak osh nana ilʋppa moma ka ikbi tok keyu cho? Chitokaka yʋt achishke; hopaii ʋt achi hoka.
51Ikunla kʋllo, micha chu̱kʋsh mikmʋt haksobish aiena wishakchi ik tapo hʋchia hʋt, Shilombish Holitopa ya̱ i̱ sʋnalit hʋsh bilia. Hʋchin tikba ʋhleha hʋt yohmi tok a̱, hʋsh chiyuhmishke.
52Hopaii ʋhliha ha̱ katima kak o̱ hʋchin tikba ʋhleha hʋt ik ilbʋshacho ki tok o̱? Micha Aia̱hli ʋt a̱ya hi a̱, tikbanli anoli ʋhleha, yʋmma okla ʋbi tok o̱ mihi o̱ himak a̱ hʋchishno ʋt na haksichi, micha nan ʋbi aiena hʋsh a toyuba tuk oke.
53Micha enchil ʋhleha hosh nan ʋlhpisa ya̱ auet tosholi na, hʋsh eshi tok; yohmi kia hʋchik holitoblo cha tuk oke: achi tok oke.
54Yohmi ma na yakohmi ka okla haiyaklo mʋt, chu̱kʋsh ʋt nʋhla tok; micha yʋmmak ash noti isht o̱ shakanlichi tok.
55Yohmi kia yʋmmak okʋt Shilombish Holitopa anukfohkʋt kʋnia hatuk osh, ʋba ya̱ pit ai okchifeli fehnʋt hopo̱koyo mʋt, Chihowa im aholitopaka, micha Chisʋs ʋt Chihowa im ibbak ishtimpak imma ya̱ hikia aiena ho̱, pisa tok.
56Micha, Ʋba yʋt tiwa, micha Hatak Ushi ʋt Chihowa ibbak isht impak imma ya̱ auet hikia aiena ho̱, pisa lishke; achi tok.
57Yohmi ma chitoli fehnʋt okla tasali mʋt, haksobish a̱ akʋmmi cha, achʋfa chohmit o̱ yihhlepʋt tʋmaha ha ishit a kohchi cha, tʋli ishit boli tok.
58Yohmi ma nana atokowa anoli ʋlheha hashot, ilap anchi a̱ hatak himita Sal hohchifo ho̱, iyi ituma ont ashachi tok.
59Micha Istefin ʋt pit im pa̱yʋt, Chitokaka Chisʋs ma! Sa shilombish a̱ ish ishashke; ahanchi na, okla tʋli ishit boli tok.
60Yohmi ma hʋchukbihlepʋt hikia cha, chitoli hosh, Chitokaka ma! ai ashʋchika ilʋppa isht ish onochi ná; achi tok. Micha ilʋppa ahanchi mʋt, nusit kʋnia tok oke.
Filip ʋt Samelia ya̱ ʋbanumpuli iksa a̱hilichi, 5, 26 Ehliopia hatak anumpeshi yo̱ baptismochi.
Currently Selected:
Apostel isht Anumpa 7: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
