Apostel isht Anumpa 8

1Yʋmmʋt illi ka Sal ʋt ʋlhpesa ahni tok. Micha nitak yʋmma foka ma, ʋbanumpuli iksa Cheluselem a̱shwa tok a̱ i̱ palʋmmichi fehna tok; yohmi ma momʋt ita fimimpʋt Chutia yakni, micha Samelia aiena a mominchi na, ʋbanumpeshi ʋhleha hash illa tok.

2Yohmi ma hatak hochukma yosh Istefin a̱ hohpit taiyahli mʋt, okla isht yaiya fena tok.

3Yohmi ma Sal ʋto, ʋbanumpuli iksa ya̱ okpʋnit, chuka moma iba chukowa cha, hatak puta, ohoyo puta aiena ka halʋllit ishit, aboha kʋllo pit apihinta tok.

4Yʋmohmi hatuk o̱ ita fimimpa tuk ʋhleha hash ot, anumpa ha̱ isht anumpulit kanima moma itʋnowa tok.

5Yohmi ma Filip ʋt Samelia tʋmaha ha̱ ona cha, Klaist a̱ isht im anumpohonli tok.

6Mihma okla hʋt, yʋmmʋt na fehna yʋmihinchi ka haklo, micha pihi̱sa aiena mʋt, im anukfila ai achʋfʋt Filip ʋt nana ahanchi puta ka, haponaklo tok.

7Shilombish okpulo puta a foyuka tuk ʋt chitolit tahpanlʋt la̱wa ka a kocha wiha hatok o̱; micha palsi isht abeka la̱wa tuk, micha imomokpulo aiena tuk ʋt hlakofi tok.

8Yʋmohmi ma tʋmaha yʋmma a yukpa chinto tok.

9Yohmi kia hatak achʋfa Saimon hohchifo hosh, ti̱kba ma tʋmaha yʋmmak inli ka ai isht ahullot ahantʋt, ilap ak osh hatak na fehna mak o̱, mihi̱ha cha, Samelia okla ha̱ nukhlakʋshli tok.

10Yʋmmak o̱, chipunta, micha asʋno aiena kʋt momʋt, Hatak ilʋppʋt Chihowa nan isht im ai a̱hlika chinto mak oke; ahanchi mʋt, okla im antia tok.

11Micha yʋmmak osh isht ahullot, isht nukhlakaha̱shli tok hopaki hatuk o̱, okla im antia beka tok.

12Yʋmohmi tuk kia, Filip ʋt Chihowa apehliechika, micha Chisʋs Klaist hohchifo aiena nana puta ka isht ai anumpohonli na, okla yimmi mʋt, hatak, micha ohoyo puta aiena kʋt baptismo tok.

13Yohmi ma Saimon ʋt ilap ash kia yimmi akinli tok, micha baptismo mʋt, Filip a̱ ibafohkʋt a̱yʋt, na fehna, micha nan isht ahoba puta aiena kʋt a kaniohmi na pisa mʋt, nukhlakancha tok.

14Yohmi ma ʋbanumpeshi ʋhleha Cheluselem ma̱ya tuk ʋt, Samelia ʋt Chihowa im anumpa ha̱ ishi tuk o̱, haklo mʋt, Pita micha Chan aiena ka okla pit in tihleli tok.

15Atuk o̱, yʋmmak ashot itonanchi mʋt, okla Shilombish Holitopa anukfohka chi̱ ka, ʋba pit isht anumpulit oklat tok.

16Yʋmma foka ma, achʋfona kia yʋmmʋt ik onʋtulo ki̱sha ha tok; Chitokaka Chisʋs hohchifo ha̱ isht a baptismo tuk ak illa ha tok.

17Yohmi mʋt okla hash ibbak isht umbitehimpa ma, Shilombish Holitopa yʋt okla anukfohka tok.

18Yʋmohmi ma Saimon ʋt ʋbanumpeshi ʋhleha ibbak isht umbitepa ka, Shilombish Holitopa yʋt ai anukfohka ho̱, pisa mʋt tʋli holisso ant i̱ weli cha,

19Ʋno ak kia nan isht im ai a̱hlika ilʋppa hʋs sama na, kʋna ho̱ ʋno ʋt sʋbbak isht umbitepa likma, Shilombish Holitopa yʋt ai anukfohkashke, ahanchi tok.

20Yohmi kia, Pita yʋt, Chihowa yosh nan ima ya̱, tʋli holisso yʋt isht ʋlhtoba hinla ka, chim ahoba tuk oka, chin tʋli holisso yʋt chi awant aiokpuloka pit kʋniashke.

21Chi chu̱kʋsh ʋt Chihowa ya̱ itikba ya̱ ai ʋlhpiesa keyu hokʋt; nan ilʋppa kaniohmi kia, micha ahalaia kia ik chim ikshoshke.

22Yʋmohmi hoka, nan isht ik chi ai ʋlhpeso ilʋppa ish ile kostininchashke; micha Chihowa pit ish im asihi̱hla na, yohma he yobakma, chi chu̱kʋsh im anukfila yʋt chi̱ kashofa hi oke.

23Chishno ʋt basunlʋsh homi, micha nan ai ashʋchika abonunta aiena chia hatuk o̱, akostininchi li hoka; im achi tok.

24Mihma Saimon ʋt afalaminchit, Chitokaka ya̱ pit im ilbʋshʋt isht hʋs si anumpuli na, na yakohmi hʋsh anumpuli tuk a̱ achʋfona kia ant ik si onʋtulo kashke; achi tok.

25Mihma yʋmmak ash ot, Chitokaka im anumpa ha̱ atokowʋt anolit, isht anumpohonli cha falama mʋt, Samelia okla in tʋmahushi la̱wa ka ʋbanumpa isht ai anumpohonlit, Cheluselem a̱ itʋlachi tok.

26Yʋmohmi ma, Chitokaka im enchil ʋt Filip a̱ im anumpulit, Wakaya cha, oka mahli pila iʋt, hina Cheluselem ʋttʋt, Kesa ia bachaya chukushmi foka yʋmma ish onashke, im achi tok.

27Mihma wakaya cha ia tok. Atuk o̱ Ehliopia hatak, Kantisi ohoyo Ehliopia okla i̱ mi̱ko im anumpeshi holitompa hosh, yʋmmak osh tʋli holisso a mominchit i̱ shoyuli yosh ʋba pit aiokpʋcha chi̱ hosh, Cheluselem a̱ ʋla tok osh,

28Falamʋt ia kʋt im iti chanʋlli anu̱kaka binilit, Esaias hopaii i̱ holisso ha̱ itim anumpʋli tok.

29Mihma Shilombish ʋt, Filip a̱, Bili̱ka ona cha, iti chanʋlli ilʋppa ont ibafohká; im achi tok.

30Mihma Filip ʋt pit o̱ malelit ona cha, Esaias hopaii i̱ holisso itim anumpuli ka haklo mʋt, Nan ish itim anumpuli kʋto ish akostininchi cho? achi tok.

31Mihma, Katiohmi li kak osh, hatak nana hosh ʋm abʋchi ho̱ keyukma? achi tok. Mihmʋt, Filip ʋt pit oiya cha, awant a̱sha hinla ka; ahni tok.

32Anumpa holisso holitopa ai itim anumpuli ka ilʋppak a tok. “Chukfi ʋlhpoba chohmi ho̱ yʋmma ai illi hʋllat ishtia tok; micha chukfi ʋlhpo‐ushi yosh hishi im ʋmo in tikba hikia kʋt, nan ik ayo chatuk a̱ chohmit, yʋmmʋt itih ha̱ ik wakʋmmo ki tok:

33“Ilbʋsha fena ma, nan ai ʋlhpiesa ka im ishi tok. Im ilhfiopak a̱ yakni a̱ ai ishi tok oka; im ai itilaui̱ kʋt aha̱shwa tok a̱, kʋta hosh anola hinla cho̱?”

34Mihma anumpeshi ʋto, Filip a̱ afalaminchi mʋt, Chi̱ ponaklo lishke; Kʋta ho̱ hopaii ʋt ilʋppa isht anumpuli ho̱? Ilapo akinli hokmá, keyukmʋt hatak inla yokmá, nanta ho̱? achi tok?

35Mihma Filip ʋt itih ha̱ wakʋmmi cha, holisso mihi ash inli ho̱ ai isht iʋt, Chisʋs a̱ isht im anumpohonli tok.

36Yʋmohmit hina fohkʋt ma̱ha̱yʋt okla mʋt, oka nana kia ont a hieli tok. Mihma anumpeshi ashot, Yakeh! oka yoke; baptismo la hi a̱ nanta kosh ai ataklʋmmi cho? achi tok.

37Mihma Filip ʋt, Chi chu̱kʋsh mominchit ishit chi yimmi hokma, ʋlhpiesʋshke, achi tok. Mihma afalaminchi mʋt, Chisʋs Klaist ʋt Chihowa ya̱ ushi yoka, sa yimmishke, achi tok.

38Mihma iti chanʋlli ʋt lumʋt hikia chi̱ ka, miha tok; micha Filip ʋt anumpeshi ash ita tuklot pit okʋtahʋt oka ya̱ itonachi na, yʋmmak ash baptismochi tok.

39Yʋmohmi ma oka yash ai a̱shwʋt kochʋt okla ma, Chitokaka imi Shilombish ʋt Filip a̱ isht ia na, anumpeshi ash ot himmakma ik peso ki tok: micha na yukpa hosh i̱ hina fohkʋt ia tok.

40Amba Filip ʋto Asotʋs ak o̱ antʋt haiaka tok; micha a hlopullit a̱ya mʋt, tʋmaha moyuma ka ʋba isht ai anumpohonlit a̱yʋt Seselia ya̱ ʋla tok oke.

Sal ʋt Tamaskʋs pilla ia hosh a̱ya ho̱, Klaist ʋt im anumpuli, 1, 10 Ananaiʋs ʋt a̱yʋt im ona ma, baptismo tok. 20 Pal ʋt nukwa̱ya iksho hosh Klaist a̱ isht anumpohonli.

Currently Selected:

Apostel isht Anumpa 8: CHH

Highlight

Copy