Apostel isht Anumpa 5
5
1Yohmi kia hatak achʋfa Ananaiʋs hohchifo hosh, tekchi Safaila itatuklot, osapa kanchi,
2Micha isht ʋlhtoba tuk ash kashʋblit i̱shi tok; tekchi ak kia im akostininchi ho̱; micha a kashampa ho̱ isht ʋla cha, ʋbanumpeshi ʋhleha iyi ituma ant bohli tok.
3Yohmi ma Pita yashot, Ananaiʋs, nanta katiohmi ho̱ Shilombish Holitopa ya̱ ish i̱ holabi cha, osapa isht ʋlhtoba tuk a̱ kashʋblit ish i̱sha chi̱ ka, Setan ʋt chi chu̱kʋsh a̱ anukfohki tok oh cho?
4Tala̱ya moma mʋt, chishno ak o̱ chimmi ha tok keyu̱? micha yʋmmʋt kʋnia ha ya̱, chishno chibbak o̱ fo̱ka tuk keyu̱? nanta katiohmi ho̱, ilʋppa chi chu̱kʋsh anu̱ka̱ka isht chim anukfiela tuk oh cho? Hatak o̱ ish i̱ holabi tuk keyu, amba Chihowa ak atuk oke; achi tok.
5Yʋmohmi ma, Ananaiʋs ashot anumpa ilʋppa haha̱klo mʋt, aka itulʋt fiopissa tok; yohmi ma na yakohmi ka ha̱klo kʋt momʋt nukhlakancha fehna tok.
6Mihma hatak himita ʋhleha yosh wakayʋt, nan abonullit isht kohcha cha, ont okla hohpi tok.
7Mihma yʋmmak atuk a̱ hopaki kʋt hʋshi kanʋlli isht ʋlhpisa tuchina foka ho̱, tekchi ʋt nana kʋt yʋmohmi tuk a̱, ik akostinincho hosh ant chukowa tok.
8Mihma Pita yʋt im anumpuli mʋt, Yakohmi ho̱ osapa ya̱ hʋsh kanchi tuk okmá, nanakmʋt, is sʋm anolashke; achi tok, mihma, Yau, yʋmmak okʋno; achi tok.
9Mihma Pita yashot, Katiohmi ho̱ Chitokaka imi Shilombish a̱ imoma ka hʋsh pisa chi̱ kʋt, hʋchim anukfila hʋt ai achʋfa tuk oh cho? Chi̱ hatak a̱ hohpi tuk, micha chishno ma isht chi kohcha chi̱ ʋhleha iyi ʋt okhissa ya̱ a̱sha ka̱, pisá; im achi tok.
10Yohmi ma mih makinli ho̱ yʋmmak ash ot iyi ituma ya ont itula mʋt fiopissa tok; mihma hatak himita ʋhleha yash ot ant abeha cha, yʋmmʋt illi tuk o̱ pisa mʋt, ishit kohcha cha, i̱ hatak ont apotulit hohpi tok.
11Mihma ʋbanumpuli iksa yʋt moma, micha kaniohmi hosh na yakohmi ka ha̱klo tuk ʋt momʋt nukshopa fena tok.
12Yʋmohmi ma ʋbanumpeshi ʋhleha ibbak a̱ nan isht ahoba, micha na fehna aiena laua kʋt okla itintakla ya̱ isht a yʋmohmi tok. Mihma momʋt im anukfila hʋt ai achʋfʋt Solomon im apishia nutaka chieya tok.
13Mihma inla hokʋto nukwia kʋt hatak achʋfa kia ik ibafohko ki tok; yohmi kia okla hokʋto yʋmma ahninchi tok.
14Mihma na yimmi ʋhleha hatak nakni, micha ohoyo puta aiena kʋt, laua hosh Chitokaka ya̱ ai ibʋlhkaha kʋt i̱ shahlit ia tok.
15Yohmi hatuk o̱ Pita yʋt a̱yʋt ont iakma shilombish ak illa kia kaniohmi ka pit o̱ hoshontikacha hi a̱, abeka puta ka isht kohchʋt hina puta isht onʋt topa, micha topushi aiena paknaka ont okla o̱ kahpulli tok.
16Mihma auet abili̱ka tʋmaha talohma̱yʋt fullota ka a̱sht minti kʋt laua hosh abeka puta, micha na shilombish okpulo puta isht issikkopa ʋhleha hatuk aiena isht a̱yʋt, Cheluselem a̱ ai ʋla tok; mihma momʋt hlakofit taiyaha tok.
17Yohmi ma na holitompa isht a̱sha pehlichi, micha apeha tuk ʋt, (yʋmmʋt Satusi iksa yatuk osh,) momʋt wakaya mʋt, anukhobela fehna tok.
18Mihmʋt ʋbanumpeshi ʋhleha ha̱, okla ibbak isht ieshi cha, okla moma im aboha kʋllo yo̱ pit apitta tok.
19Yohmi tuk kia Chitokaka im enchil ʋt ninak a̱ aboha kʋllo okhissa ya̱ ant tiwit tahli cha, pehlichit kohcha mʋt,
20Oh ia cha, ai okcha̱ya ilʋppa isht anumpa ha̱ mominchit tempel anu̱kaka ya̱ ont hielit okla ha̱ isht hʋsh im anumpohonlashke; achi tok.
21Mihma yʋmma okla haklo mʋt, onnahinli fehna tempel a̱ ont abeha cha, nan ithʋnanchit aha̱shwa tok. Yohmi kia na holitompa isht a̱sha pehlichi ʋt apeha tuk ash aienʋt ai ʋla mʋt, nan apesa ʋhleha, micha Islael okla i̱ hochitoka moma i̱ howʋt itahobi mʋt, yʋmmak ash isht ʋla chi̱ ho̱, aboha kʋllo a̱ pit tihleli tok.
22Yohmi tuk kia nan ʋlhtoka ʋhleha hash ot ai ʋla cha, aboha kʋllo anu̱kaka ya̱, yʋmmak ash ant ik a peso mʋt okla falamʋt ont anolit,
23Aboha kʋllo yokʋto ʋlhka̱ma achukma bano, yohmi ma apistikeli yʋt okhissa puta itikba kocha ya̱ hieli ho̱, ont e pisa ho mʋhli tuk, yohmi kia e tiwi mʋt, hatak nana kia anu̱kaka ya̱ a̱sha na ke peso kano; ahanchi tok.
24Yʋmohmi ma na holitopa isht a̱sha pehlichi i̱ shahli micha tempel atoni, mikmʋt na holitompa isht asha pehlichi ʋhleha aiena kʋt, na yakohmi ka haklo mʋt, nana ak o̱ ilʋppʋt ont ai ʋlhpiesa hinla ka, ik ai akostininchot okla aiasha tok.
25Yohmi ma achʋfa kʋt a̱yʋt okla hash ant im anohonli kʋt, Yakeh! hatak aboha kʋllo pit hʋsh apitta tuk ash o̱ tempel anu̱kaka ya̱ hielit, okla ha̱ nan im abahanchishke, achi tok.
26Yohmi ma nan atoni ash ot, nan ʋlhtoka ʋhleha hash itʋpeha cha ia mʋt, okla ha̱ i̱ nukshopa, yʋmmak keyukmʋt, tʋli okla isht boa hinla hatuk osh, yʋmmak ash o̱ nan ik kanihcho hosh ont pehlichit ʋla tok.
27Ont okla pehlichit ʋla mʋt, nan apesa ʋhleha itikba ya̱ hiohlichi tok: yohmi ma na holitompa isht a̱sha pehlichi yʋt im a ponaklot,
28Hohchifo ilʋppa isht im abʋchit hʋchik ahanto ka hi a̱, kʋllochi fehnʋt okla e chim apesa tuk keyu̱? Yohmi kash o̱ Cheluselem a̱ hʋchim anumpa isht ai alotolit hʋsh kaiyanchi; yohmi mʋt hatak ilʋppa im issish a̱ pishno ak o̱ isht pi onochi hʋchi bʋnnʋshke; ahanchi tok.
29Yohmi ma, Pita, micha ʋbanumpa isht ʋtta ʋhleha inla aiena kashot afalaminchi mʋt, Chihowa yak o̱ il im antia kʋt hatak a̱, il i̱ shahlicha he tuk oke.
30Hʋpin tikba puta in Chihowa yʋt, Chisʋs yʋmma iti a takalichit hʋsh bi tuk a̱, tanichi tok.
31Yʋmmak o̱ Mi̱ko, micha Nan okchalinchi aiena cha, ilekostininchi Islael a̱ anukfohki, micha ai ashʋchika aiena ma kashofa chi̱ ka, Chihowa yʋt ilap ibbak ishtimpak imma ya̱ isht holitobli tok oke.
32Yʋmohmi ka pishno ak osh nan ilʋppa puta ka isht im a atokowʋt anoli pia; yohmikma Shilombish Holitopa, yʋmma Chihowa yʋt im antia ʋhleha ha̱ ima tok a̱, yohmi akinli hoke; achi tok.
33Yʋmma haklo mʋt, okla anukhobela fehna mʋt, ʋba chi̱ kʋt, isht anumpulit ma̱ya tok.
34Mihma achʋfʋt Falisi hatak, Kameliel hohchifo, nan ʋlhpisa ikhananchi, okla momʋt i̱ holitopa cha tuk o̱, nan apesa ʋhleha itin takla ya̱ hikia mʋt, ʋbanumpeshi ʋhleha hash, chekosi takla ka kocha pit ashacha chi̱ ka, miha tok.
35Yʋmohmi mʋt, Islael okla hʋchia hʋt hatak ilʋppa imma yo̱, nana kanihcha chi̱ ka, hʋsh aiahni hokʋto, ahah! isht hʋsh il aiahnashke.
36Himak nitak takla ka, Hlutas ʋt ilap ak osh hatak fehna mak o̱, mihʋt ahanta na yʋmma hatak holhtina kʋt tahlepa ushta fokʋt iba kaha tok o̱; yʋmmak ash o̱ ʋbi ma, im antia ʋhleha hatuk ash ot momʋt, ita fimimpʋt, ont aiokpulokʋt taha tok.
37Chutʋs Kalili hatak osh hatak ilʋppak ash acha̱kʋt, okla holhtinʋt ma̱ya nitak ash ahanta cha, okla la̱wa ka isht il akanʋllichi tok osh, yʋmmak ash kia illi tok: yohmi ma kaniohmi hosh im antia tuk ʋt, momʋt itatiapʋt taha tok.
38Yʋmohmi hoka, Hatak ilʋppa nan isht hʋchik ahalaio ho̱, peh a̱sht ik itʋnowá; chim ahanchi lishke Anumpa, micha, nan isht ʋtta aiena ilʋppʋt hatak atuk okma, ont aiokpulokʋt taha chi̱ hoka.
39Amba yʋmma Chihowa yak atukmʋno, ai okpʋnit hʋsh kancha he keyushke. Yʋmmak keyukmʋt, Chihowa yak o̱ itibi hosh hʋsh aha̱shwa na hʋchi ahayucha hinla hoke; im ahanchi tok.
40Mihma, ʋlhpesa okla im ahni tok. Micha ʋbanumpa isht ʋtta ʋhleha hash i̱ howa cha, fʋmmit ashachi mʋt, Chisʋs hohchifo ha̱ okla isht ik anumpolo ka chi ka̱, im apesʋt taiyahli cha, kʋnompit tihleli tok.
41Yohmi ma yʋmma hohchifo pulla ho̱ na hofahya ka isht ile pisa he a̱, ont ai ʋlhpiesa tuk ʋt, na yuhu̱kpʋt nan apesa ʋhleha itikba ya̱ a̱sht okla ia tok.
42Micha nitak moma tempel anu̱kaka, micha chuka taloha moma ka, nan im abʋchi, micha Chisʋs Klaist isht anumpuli aiena kʋt okla ik isso tok.
Ʋbanumpeshi ʋhleha hʋt hatak ilbʋsha ithana, micha anumpa ha̱ isht anumpuli aiena, 1, 5 Hatak ʋlhtoka untuklot ʋlhtoka tok.
Currently Selected:
Apostel isht Anumpa 5: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
