मेथा 23
23
क्षो़ठीमगी ॱलोपो़नक्याला काको़न ॱनाङवा
(मारकु १२:३८,३९; लुका ११:४३,४६;२०:४५-४६)
1धेनी येशुगी मीछोक धाङ राङगी ङेनेक्याला सुवालाक, 2“क्षो़ठीमगी ॱलोपो़नक्या धाङ फारुसीपाक्याला, ॱङो़नस्येखेन मोशेगी काठीम ॱलाप्येला आङजा हो़तालाक। 3होझ्येरी खुङक्याई ॱलाप्ला घीरी झ्यी धेनी ॱरुङ, हीना खुङक्याई झ्यीगीन च्योक्रे माझ्यी घीझ्येरी ॱनाना खुङक्याई ॱलाप्कीनगो च्योक्रे, खुङक्या मीझ्यीदालाक। 4देक्याई खु खुर ॱमीथुप्कीन धाम्दी, मीक्याई ग्यापला कालालाक हीना खोराङक्या राङगी जु च्यीकगीया, होदेला जी़ङी मेदो़दालाक। 5खुङक्या राङगी लेगा घीरी, मी श्येम्मागी थोङये क्षीला झ्यीदालाक। खुङक्या राङगी ॱरुङा#२३:५ ॱरुङा दे कोवागी गाम च्यीमे नाङदु रेला सुङरापगी छीकक्या ढीक्ती च्युक्वालाक धेनी होदेगो खुङक्याई टाल्ले धाङ पुङबा ॱये स्योकला तालाक। श्याङ क्षे शो़ धेनी घो़गी थाजारक्या रीङा शोवालाक। 6धेनी खुङक्या डो़नक्याला तो़टागी धेजा धाङ छोक्खाङक्याला धेजा खाक्क्षेक्याला धेये थेदालाक। 7धेनी ठोमक्याला मीक्याई घुस्याप झ्येरी, छाम्डी श्युगीन धाङ मीक्याई खुङक्याला ‘राब्बी’#२३:७ राब्बी ॱनाना याहुदापा क्षो़गी ॱलोपो़न लाक। ॱनेरी भो़गीनगो थेदालाक।
8“हीना खे घीरी पी़न्दा च्यीक लाक धेनी खेक्याला ॱलोपो़न च्यीकराङ झ्येरी, खेक्याला सी़या ‘राब्बी’ ॱमानास्योक। 9धेनी जीक्तेनदु मी सुला ‘याप’ ॱनेरी माभो़ घीझ्येरी ॱनाना खेक्याला नाम्खे श्यीङखामदु श्युक्कीन याप च्यीक च्यीगा हो़तालाक। 10धेनी खेक्याला सी़या ‘ॱलोपो़न’ ॱनेरी माभो़वास्योक घीझ्येरी ॱनाना खेक्याला ॱलोपो़नगो मास्यीका च्यीगा लाक। 11खेक्या नाङने क्षेस्योकगो खीकी ॱयोक्पो झ्युङास्योक। 12राङगी राङला थोवा क्याक्कीनगोला ॱमा जेगीलाक धेनी राङला ॱमा शोगीनगोला थोवा जेगीलाक।
13“खे शोक्पो क्षो़ठीमगी ॱलोपो़न धाङ फारुसीपाक्याला, दुक्ङेल क्षे हुङास्योक। घीझ्येरी ॱनाना खेक्या नाम्खे ग्यासीगी घोगो मीक्याई दोङला ग्याप्ती, खेराङक्या मीजुलालाक धेनी डोये दो़गीनक्याला काः लाक।
14“[खे शोक्पो क्षो़ठीमगी ॱलोपो़न धाङ फारुसीपाक्याला दुक्ङा क्षे हुङास्योक। घीझ्येरी ॱनाना खेक्या युक्जामाक्याई नाङ ॱहाम्बा झ्येरी ठोक्वालाक धेनी ॱमो़लाम रीङा-रीङा ग्याप्ती, मी ढाङपो हीन दोक-दोक झ्यीदालाक। होझ्येरी श्येम्माने खेक्याला माङा छेपा फोक्कीलाक।]#२३:१४ दे छीक्छे १४ दे एम्मागी गीरीक धेबक्याला मेतालाक।
15“खे शोक्पो क्षो़ठीमगी ॱलोपो़न धाङ फारुसीपाक्याला दुक्ङा क्षे हुङास्योक। घीझ्येरी ॱनाना खेक्या मी च्यीकला याहुदापा क्षो़ला ग्युरतु च्युक्येला, ग्याछो धाङ काम्साक्याला कोरा ग्यालाक। धेनी मी दे याहुदापा क्षो़ला ग्युरसाना, खेक्या खोला राङने दाप ॱङीने ल्हाक ॱङ्यावागी भु शोवालाक।
16“लाम्तो़न्पा श्यारा देरे ॱनागीन खेक्याला दुक्ङा क्षे हुङास्योक, ‘को़न्क्षोकगी क्षो़खाङगी ॱना क्याना घीया मालाक हीना क्षो़खाङदु हो़गीन सेरगी थोक्ने ॱना क्याना, होदे घाङगी झ्येरी हीना ॱरुङ घोवालाक।’ 17खे श्यारा कुक्पाक्या, सेर गेक्षे ले याङना सेरला चाक्षे शो़गीन क्षो़खाङ दे गेक्षे ले? 18धेनी याङ खेक्या ॱनालाक, ‘क्षो़ठीगी थोक्ने पाङपो चुक्ती ॱना क्याना, घीया मालाक हीना क्षो़ठी खाला पुपा क्षो़पागी पाङपो चुक्ती ॱना क्याना, दे हीन्जीमीन्जी ॱरुङ घोवालाक।’ 19खे श्याराक्या, क्षो़पा दे गेक्षे ले याङना क्षो़पा देला चाक्षे शो़गीन क्षो़ठी दे गेक्षे ले? 20होझ्येरी क्षो़ठीला पाङपो चुक्ती ॱना क्यागीनगी, क्षो़ठी धाङ होदे खाला हो़गीन घीरीगी थोक्ने ॱना क्यालालाक। 21धेनी क्षो़खाङला पाङपो चुक्ती ॱना क्यागीनगी़, क्षो़खाङ धाङ होदे नाङदु श्युक्कीनगी थोक्ने ॱना क्यालालाक। 22धेनी नाम्खे श्यीङखामला पाङपो चुक्ती ॱना क्यागीनगी़, को़न्क्षोकगी श्युक्ठी धाङ होदे खाला श्युक्कीनगी थोक्ने ॱना क्यालालाक।
23“खे शोक्पो क्षो़ठीमगी ॱलोपो़न धाङ फारुसीपाक्याला दुक्ङा क्षे हुङास्योक। घीझ्येरी ॱनाना खेक्या दुम्रागी जुगी ढाप धाङ ॱमेन्ना धाङ घो़ङीगी ग्याजा च्युगो को़न्क्षोकला पुलालाक हीना क्षो़ठीमगी गेक्षे ठीम धाङ ॱङीङजे धाङ धेपागोला ॱनाङमेदु ताङालाक। खेक्याई ग्याजा च्यु तेरकीन ठीमगोवा ॱरुङ घोयेहो़क धेनी देक्याला ॱनाङमेदु ताङये मेतालाक। 24खे लाम्तो़न्पा श्याराक्या, खेक्या बु च्युङाक्या चालाक हीना सेम्चेन ॱनाउगो मीयालाक!
25“खे शोक्पो क्षो़ठीमगी ॱलोपो़न धाङ फारुसीपाक्याला दुक्ङा क्षे हुङास्योक। घीझ्येरी ॱनाना खेक्या फोरा धाङ देरमागी फीगो चाङमा झ्यीदालाक हीना नाङगोला सो़न्ना धाङ राङदो़गी खारी धेदालाक। 26खे फारुसीपा श्याराक्या एन्ला फोरा धाङ देरमागी नाङगो चाङमा शो़ धेनी फीगोवा चाङमा झ्युङगीलाक।
27“खे शोक्पो क्षो़ठीमगी ॱलोपो़न धाङ फारुसीपाक्याला दुक्ङा क्षे हुङास्योक। घीझ्येरी ॱनाना खेक्या छो़ काउ ढी़टा, फीने ताना जेवा थोङगीन धी़ठोक्या च्योक्रे लाक हीना नाङगोला स्यीम्बुक्याई री़गोक धाङ ॱमेचाङा घीरीगी खारी धे हेतालाक। 28देरेराङ खेक्या फीने मी श्येम्माक्याई दोङदु ढाङा थोङालाक हीना खेक्याई नाङगो शोक धाङ धीक्पागी खारी धे हेतालाक।
29“खे शोक्पो क्षो़ठीमगी ॱलोपो़न धाङ फारुसीपाक्याला दुक्ङा क्षे हुङास्योक। घीझ्येरी ॱनाना खेक्या ॱङो़नस्येखेनक्याई धी़ठो चीयालाक धेनी ढाङतेनक्याई धुरखाङक्या गेन्दालाक। 30धेनी ॱनालाक, ‘हेक्या राङगी फामे धी़चो़ घाङला हो़ना, खुङक्यामुला ॱङो़नस्येखेनक्या सेगीन लेगाला लागा जुयेमेक।’ 31देरे ॱनेरी खेक्याराङ ॱङो़नस्येखेनक्या सेगीन मीक्याई ग्युपा हीन ॱनेरी पाङपो तो़न्दालाक। 32धा खीकी फामाक्याई गो चुक्कीन लेगागो, खेक्या छारतु चुक!
33“खे डुलक्या, दुक्डुगी ग्युपाक्या, खेक्या ॱङ्यावागी छेपाने घाङगी झ्येरी थारये? 34होझ्येरी ङा ॱङो़नस्येखेनक्या धाङ मी खेवाक्या धाङ क्षो़ठीमगी ॱलोपो़नक्या खीकीचारु ताङयेहीन धेनी देक्याने रीङगाला खीकी सेगीलाक धेनी रीङगाला ग्याङस्यीङ खाला क्याङगीलाक धेनी रीङगाला खेक्याई छोक्खाङदु ताजाक श्युरकीलाक धेनी यु च्यीकने यु श्येम्माला देदी दुक्पु ताङगीलाक। 35होझ्येरी ढाङपो हाबेलगी ठाकने क्षो़खाङ धाङ क्षो़ठीगी घुङदु, खीकी सेगीन बेरेकीयागी भीजा जेकारीयासगी ठाक थुक्पे धेनी साला जाक्कीन ढाङतेनगी ठाक घीरीगी गेनगो, खेक्याई लेन घो़गुलाक। 36ङा खेक्याला धेन्पाराङ ॱनाहीन, दे घीरीगी छेपा दे मीरापगी खालाराङ भाप्कीलाक।
येरुसालेमगी क्षीला येशुगी सेम्दुक
(लुका १३:३४,३५)
37“के येरुसालेम, येरुसालेम, ख्यो़ ॱङो़नस्येखेनक्याला सेगीन, धाङ ख्यी़चारु ताङगीनक्याला धोगोङ श्युरकीन ख्यो़। झ्यामोगी राङगी टुवाक्याला स्योक्पा होकदु धुगीन च्योक्रे, ङी थेङ माङा ख्यी़ टुवाक्याला दुयेगी दो़पा झ्येवी हीना ख्यी़ झ्यीदु च्युक्की मीदुक। 38तो़दाङ, ख्यी़ क्षो़खाङ तोङबा लेगीलाक। 39घीझ्येरी ॱनाना ङा ख्यो़ला ॱनाहीन, ख्यी़ ‘चोवोगी छेनने फेप्कीनला झ्यीलाप ॱनाङास्योक’#सुङगुर ११८:२६ ॱनेरी ॱमेनागीन थुक्पे, ख्यी़ ङाला धाब्ले थोङगीमालाक।”
Currently Selected:
मेथा 23: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
