मेथा 22
22
क्षाङसागी डो़नगी पे
(लुका १४:१५-२४)
1येशुगी याङ पेगी थोक्ने देरे सुङा जेपालाक, 2“नाम्खागी ग्यासी दे, ग्यावु च्यीकगी राङगी सेगी क्षाङसाला श्युक्टा कागीन च्योक्रे लाक। 3धेनी क्षाङसाला भो़पा मीक्याला भो़रु, खी़ खोरी ॱयोक्पोक्याला झावालाक हीना खुङक्या हुङङी मादो़पालाक। 4याङ खी़ खोरी ॱयोक्पो श्येम्माक्याला देरे ॱनेरी झावालाक, ‘डो़न्बोक्याला देरे ॱनो़, धा घीरी डाढीक हो़क धेनी ङी ॱलुङक्या धाङ भालाङ शाङाक्या सेदी श्येलाक डाढीक झ्येहो़क। धा डो़नला फेप्रोझ्यी।’ 5हीना खुङक्याई या माझ्येवालाक। धेनी रीङगा खोरी श्यीङला धेनी रीङगा खोरी छोङला सोवालाक। 6धेनी मी श्येम्माक्याई खी़ ॱयोक्पोक्याला शीम्दी ङोजा पाप्ती सेपालाक। 7धा ग्यावुगो ॱमीच्यीकी श्येताङ लारी, राङगी ॱमाक्मीक्या तारी होदे मी सेगीनक्याला मेताला तारी, खुङगी ग्याजागो मेला ॱराक्पालाक।
8“धेनी खी़ खोरी ॱयोक्पोक्याला ॱनेवालाक, ‘क्षाङसागी डो़नगो डाढीक दुक हीना भो़पा डो़न्पोक्या, दुरु हुङरीन खाये मीदुक। 9होझ्येरी लाम्गाक्याला सोरी, खेक्याई घाङ माङ-माङ थुक्कीनक्या डो़नला भो़।’ 10धेनी होदे ॱयोक्पोक्या लाम्गाक्याला सोरी ॱङेगीन मी शाङा धाङ ङेन्पा घीरीला रुक्पालाक। धेनी क्षाङसागी डो़न्खाङगो खावालाक।
11“हीना ग्यावुगो डो़न्बोक्याला तारु हुङी घाङला, खी़ होदुरु क्षाङसागी घोलाक माघो़न्का मी च्यीक थोवालाक। 12धेनी खी़ खोला ॱनेवालाक, ‘छोटोओ, ख्यो़ क्षाङजी घोलाक माघो़न्पा घाङगी झ्येरी दुरु होवा?’ धेनी होदे मीगो घीया ॱना ॱमाथुक्पालाक। 13धेनी ग्यावुगी खोरी ॱयोक्पोक्याला ॱनेवालाक, ‘खी़ लाक्पा-काङबाक्या धाम्दी खोला फीदी मी़नाक्पाला ॱयुक। होदुरु मी ङुगीन धाङ सो ढीक्कीन हुङगीलाक।’”
14धेनी येशुगी सुवालाक, “घीझ्येरी ॱनाना भो़पाक्या माङा हो़तालाक हीना दाम्दाक्या ङ्युङा हो़तालाक।”
ठा झाङयेगी कोरला ॱलापच्या
(मारकु १२:१३-१७; लुका २०:२०-२६)
15धा फारुसीपाक्या सोरी, येशुगी सुङगीनक्यानेराङ खोङबाला घाङगी झ्येरी, ॱङ्योक्टा ॱलाङये दुई ॱनेरी ढो़ झ्येवालाक। 16धेनी खुङक्याई खोरी ङेनेक्या, हेरोदेगी मीक्यामुला येशुचारु झावालाक। धेनी खुङक्याई श्यी़वालाक, “गेन्ला, हेक्याला स्येयेहो़क। खेराङ नी, ढाङपो धाङ को़न्क्षोकगी लाम ढाङपो तो़न्दी। धेनी खेराङ मीगी ङो तेरी क्षाक्ले मेजेगीन झ्येरी, खेराङ मी श्येम्मागी साम्लोला या मेजेदालाक। 17धा केसार#२२:१७ रोमापा ग्यावुला ठा जाङये दे क्षो़ठीमला थी़न्दाले याङना ॱमीथी़न्दाले? खेराङगी सामस्यी हेक्याला सुङाजे।”
18हीना येशुगी खुङक्याई साम्लो ङेन्पागो खेन्दी सुवालाक, “खे शोक्पोक्या! ङाला घीझ्येरी छो़ लेन्दा? 19ठा जाङयेगी टाङगा ङाला तो़न।” धेनी खुङक्याई ॱङुगी टाङगा च्यीक खोङबाचारु खेरती होवालाक।
20धेनी येशुगी खुङक्याला सुवालाक, “दे टाङगा दुरु सी़ रीमो धाङ यीक दुक ओ?”
21खुङक्याई ॱनेवालाक, “केसारगी दुक।”
धेनी खोङबागी खुङक्याला सुवालाक, “देरे हीन्ना केसारगी हीन्गीनगो केसारला तेर धेनी को़न्क्षोकगी हीन्गीनगो को़न्क्षोकला पु।” 22दे घोरती खुङक्या ॱहालेवालाक। धेनी खुङक्या खोङबाला भोरती सोवालाक।
सो़न्पो श्याङयेगी कोर
(मारकु १२:१८-२७; लुका २०:२७-४०)
23होदे ङीमागोलाराङ स्यीम्पोक्या याङ सो़न्गीलाक ॱनागीन, लाबला यीच्चे मीझ्यीगीन सादुकीपाक्या येशुचारु च्यारती, देरे ढीवा श्यी़वालाक, 24“ॱलोपो़न ला, मोशेगी सुङ हो़तालाक, ‘मी च्यीकला टुवा माझ्युवा स्यीना, खी़ नोगो खी़ युक्जामागोला ॱनामा लेन्दी, खोरी आज्योगी क्षीला टु के घो़गुलाक।’#काठीम २५:५ 25धा हीकी घुङदु पी़न धी़न हो़तालाक। क्षेस्योकगो ॱनामा लेन्दी, टुवा माझ्युवा स्यीवालाक। धेनी खी़ केमीगो खी़ नोला भोरपालाक। 26दुक झ्येरी पी़न ॱङीवा धाङ सुम्बा धाङ धी़न्बा थुक्पे देरेराङ झ्युवालाक। 27धेनी खुङ घीरीगी स्याम्ला केमीगोवा स्यीवालाक। 28धा सो़न्पो लाङाराङ पी़न धी़नने, मो सी़ केमी झ्युङगीले? घीझ्येरी ॱनाना खुङ धी़न्गारा मी़ ख्योवा झ्युवालाक।”
29धेनी येशुगी खुङक्याला सुवालाक, “खेक्या नोरदुक घीझ्येरी ॱनाना, खेक्याला सुङराप धाङ को़न्क्षोकगी वाङगी कोरला स्येये मीदुक। 30घीझ्येरी ॱनाना सो़न्पो लाङाराङ, खुङक्या ॱनामा लेन्ये धाङ ॱनामाला तेरये मीझ्यीदालाक हीना नाम्खे श्यीङखामदु भाङछेनक्या च्योक्रे झ्युङालाक। 31धेनी स्यीम्बुने सो़न्पो लाङगीनगी कोरला, को़न्क्षोकगी खेक्याला घी सुङगीनगो खीकी माढोक हो़ती? 32‘ङा नी आब्राहामगी को़न्क्षोक, ईसाकगी को़न्क्षोक धाङ याकोबगी को़न्क्षोक हीन।’#धेप्थो़न ३:६ खोङबा स्यीम्बुगी को़न्क्षोक मेन्दा सो़न्पोगी को़न्क्षोक लाक।” 33दे घोरती मीछोकक्या खोङबागी सुङगीनला ॱहालेवालाक।
क्षो़ठीम गेक्षेस्योक
(मारकु १२:२८-३४; लुका १०:२५-२८)
34धा फारुसीपाक्याई क्षो़ठीमगी सादुकीपाक्याला, येशुगी घीया ॱनाये मेगीन शो़दुक ॱनेरी ॱहाघोरती, खुङक्यामुला जोम्बालाक। 35धेनी खुङक्याने ठीम्पो़न च्यीकगी खोङबाला छो़ झ्यीयेला ढीवा च्यीक श्यी़वालाक, 36“ॱलोपो़न ला, क्षो़ठीमगी का नाङने गेक्षेस्योकगो घी ले?”
37खोङबागी खोला सुवालाक, “ख्यी़ ‘राङगी चोवो को़न्क्षोकला राङगी ॱङीङ घीरीने, राङगी सेम घीरीने धाङ राङगी यीद घीरीने चेवा झ्यी।’#काठीम ६:५ 38देराङ का क्षेस्योक धाङ धाङपोगो लाक। 39धेनी ॱङीवागोवा दे च्योक्रे च्यीक लाक। ख्यी़ ‘राङगी खीम्चेला राङला च्योक्रे चेवा झ्यी।’#लेवी १९:१८ 40दे क्षो़ठीम ॱङीउलाराङ क्षो़ठीम घीरी धाङ ॱङो़नस्येखेन घीरी तेन्दालाक।”
दावीदगी सेगी कोरला
(मारकु १२:३५-३७; लुका २०:४१-४४)
41धा फारुसीपाक्या मुला जोम्दी, धेती घाङला येशुगी ढीवा च्यीक ताङा जेदी 42सुवालाक, “मास्यीकागी कोरला खेक्याई घी सामी हेतो? खोङबा सी़ से ले?”
खुङक्याई खोङबा दावीदगी से लाक ॱनेरी लेन श्यी़वालाक। 43खोङबागी खुङक्याला सुवालाक, “देरे हीन्ना दावीदगी घाङगी झ्येरी सेम्ङीने, खोङबाला ‘चोवो’ ॱनेरी भो़वाले? दावीदगी ॱनेवालाक,
44‘चोवो को़न्क्षोकगी ङी चोवोला सुजुङ,
ख्यी़ डाक्याला ख्यी़ श्याप होकदु ङी ॱमाच्युक थुक्पे,
ख्यो़ ॱङी लाक्पा ॱये स्योकला धो़क।’#सुङगुर ११०:१
45“धा दावीदगी खोङबाला ‘चोवो’ ॱनेरी श्यी़ना, खोङ घाङ झ्येरी दावीदगी से झ्युवाले?” 46धेनी सी़या खोङबाला छीक च्यीया लेन श्यी़ ॱमाथुक्पालाक धेनी होदे ङीमाने ॱहाला सी़या, खोङबाला ढीवा कुयेगी ॱलोगोक माझ्येवालाक।
Currently Selected:
मेथा 22: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
