मेथा 24
24
को़न्क्षोकगी क्षो़खाङ तोरस्यीक ताङगीनगी कोरला ॱङो़नस्ये
(मारकु १३:१-२; लुका २१:५-६)
1येशु क्षो़खाङने थो़न्दी फेई घाङला, खोङबागी ङेनेक्याई क्षो़खाङगी खाङबाक्या तो़न्येला, खोङबाचारु च्यारपालाक। 2हीना खोङबागी खुङक्याला सुवालाक, “खेक्या दे घीरी थोङी? ङा धेन्पाराङ खेक्याला ॱनाहीन, दुरु हो़गीन धोगोङ च्यीकगी खाला च्यीया लेगीमालाक, घीरी स्यीक्ती ॱयुक्कीलाक।”
थामे धी़गी ताकगी कोरला ॱङो़नस्ये
(मारकु १३:३-१३; लुका २१:७-१९)
3येशु क्युरुस्यीङगी रीला श्युक्ती, खोङबागी ङेनेक्या खोङबाचारु शुरला च्यारती श्यी़वालाक, “दे घीरी नाम झ्युङगीले धेनी खेराङ फेप्कीन धाङ थामे धी़गी ताकगो घी झ्युङगीलाक ॱनेरी, हेक्याला सुङाजे?”
4येशुगी खुङक्याला सुवालाक, “च्याङजे झ्यी, मी सी़या खेक्याला ॱमाली़वास्योक। 5घीझ्येरी ॱनाना ‘ङा मास्यीका हीन’ ॱनेरी, ङी मीङगी थोक्ने मी माङा हुङगीलाक धेनी मी माङक्षेला खुङक्याई गो कोरकीलाक।
6“धेनी खेक्याई ॱमाक्ठुक धाङ ॱमाक्ठुकगी लाबक्या घोरकीलाक। होदे घाङला खेक्या माजीक, घीझ्येरी ॱनाना दे झ्युङ घो़गुलाक हीना थामे धी़गो धोराङा दे मालाक। 7घीझ्येरी ॱनाना मीरीक धाङ मीरीक ठुक्कीलाक धेनी ग्याखाप धाङ ग्याखाप ठुक्कीलाक धेनी सा ढामेढादु मुगे झ्युङगीलाक धेनी सायोम ग्याप्कीलाक। 8हीना दे घीरी केशुकगी गोगो च्योक्रे च्यीगा लाक।
9“धेनी मीमाङक्याई खेक्याला दुक्पु ताङयेला ची ग्याप्कीलाक धेनी सेदु च्युक्कीलाक धेनी ङी मीङगी क्षीला मीरीक घीरीगी खेक्याला दाङा झ्यीगीलाक।
10“धेनी माङक्षे धेपाने लोक्कीलाक धेनी च्यीकगी च्यीकला गो कोरकीलाक धेनी च्यीकगी च्यीकला दाङा झ्यीगीलाक। 11धेनी ॱङो़नस्येखेन शोक्पोक्या माङा थो़न्गीलाक धेनी मी माङाला ॱली़गीलाक।
12“धेनी ङेन्पा फेरी मी माङक्षेगी चेवा ङ्याम्गीलाक। 13हीना था थुक्पे शो़पा घोम्गीनगोला, थारपा थोप्कीलाक। 14धेनी ग्यासीगी ताम्शाङ दे जीक्तेन क्युनदु मीरीक घीरीगी क्षीला, पाङपो झ्येरी ख्याप्कीलाक धेनी थागो हुङगीलाक।
दुक्ङेल क्षेन्बो
(मारकु १३:१४-२३; लुका २१:२०-२४)
15“ॱङो़नस्येखेन दानीएलगी सुङगीन आम्लोवा क्यो़न ताङगीन ॱमेचाङा च्यीक धाम्पे साजारु लारी धेतागो थोङी घाङला,#दानीएल ९:२७;११:३१;१२:११ (दे ॱलोक्कीनगी ॱहाघोरास्योक), 16युदेयारु हो़गीन मीक्या री स्योकला डो़री डोवास्योक, 17धेनी खाङबागी ताङला हो़गीनक्या, खाङबा नाङदु हो़गीनगो लेन्दु माला भाप्ती माडोवास्योक 18धेनी श्यीङला हो़गीनगो लोक्ती राङगी घो़ लेन्दु माडोवास्योक। 19होदे ङीमाक्याला फोवाला टु हो़गीनक्या धाङ टुला होमा तेरकीन केमीक्याला घीन्गी दुक्पु। 20खेक्या घुङगा याङना ङासुगीन ङीमाला, डो़ माघोवास्योक ॱनेरी सोवा ग्योप। 21घीझ्येरी ॱनाना दे धी़ला जीक्तेनगी थोक्माने धान्दा थुक्पे झ्युङ माङ्युङगीन दुक्ङेल क्षे हुङगीलाक। धेनी हुरे दुक्पु याङ नामा झ्युङगीमालाक। 22धेनी होदे धी़चो़गी ङीमागो ङ्युङा माजे हो़ना, मी सुवा थारये मेक। हीना दाम्दा मीक्याई क्षीला ङीमा देक्या ङ्युङदु जेगीलाक।
23“धेनी मीक्याई ‘तो़, मास्यीकागो दुरु दुक’ याङना ‘हुरु दुक’ ॱनेरी ॱनाना खेक्या यीच्चे माझ्यी। 24घीझ्येरी ॱनाना मास्यीका शोक्पोक्या धाङ ॱङो़नस्येखेन शोक्पोक्या माङा थो़न्गीलाक धेनी खुङक्याई ॱमीच्यीकी ॱहालेगीन ताकक्या धाङ लेगाक्या तो़न्दी गोकोर ताङगीलाक धेनी झ्युङना दाम्दाक्याला गो कोरकीलाक।
25“तो़, ङी खेक्याला एन्दुरु स्येहो़क। 26होझ्येरी खुङक्याई खेक्याला, ‘तो़दाङ, खो रीतोङला दुक’ ॱनाना होदुरु थो़न्दी माडो। धेनी याङ खुङक्याई खेक्याला, ‘तो़दाङ, खो खाङबा बुकतु दुक’ ॱनाना यीच्चे माझ्यी। 27घीझ्येरी ॱनाना स्यारने ॱलोक्मार भारती, नुप स्योकला ख्युक्कीन च्योक्रे, मी-भु हुङगीनगोवा देरे च्योक्रे झ्युङगीलाक। 28रो घारु दुई होदुरु झ्यारको़ जोम्गीलाक।
मी-भु फेप्कीनगी कोरला
(मारकु १३:२४-२७; लुका २१:२५-२८)
29“होदे दुक्ङेलगी धी़चो़गी स्याम्ला, लाम्साङ ङीमा मी़नाक्पा झ्युङगीलाक धेनी दावागी हो़ तेरकीमालाक धेनी ॱनामने कारमाक्या ल्हीम्गीलाक धेनी नाम्खे श्यीङखामगी स्युकक्या ॱयो़गीलाक।#यस्याया १३:१०;३४:४
30“धेनी नाम्खारु मी-भुगी ताकगो झ्युङगीलाक धेनी जीक्तेनगी मीरीक घीरी ङ्याङेन झ्यीगीलाक धेनी मी-भु वाङ धाङ शीजेगी थोक्ने ॱरीङगी खाला फेप्गीनगो थोङगीलाक। 31धेनी खोङगी राङगी भाङछेनक्याला दुङकेक क्षेमुला झाङगीलाक धेनी खुङक्याई छोक श्यीने, नाम्खागी थाने थारु खोङगी दाम्दाक्याला धी़गीलाक।
सेयाप दोङबोगी ॱलापच्या
(मारकु १३:२८-३१; लुका २१:२९-३३)
32“सेयापगी दोङबोने ॱलापच्या लेन, होदेगी याक्काक्या बोला झ्युरी लोमाक्या छाक्लुङ मेताला, खेक्या ॱयारका ङ्येदुक ॱनेरी स्येलालाक। 33होझ्येरीराङ देक्या घीरी खीकी थोङी घाङला, खोङबा घो डाम्दुराङ ङ्येदुक ॱनेरी स्येलाझ्यी। 34ङा खेक्याला धेन्पाराङ ॱनाहीन, दे घीरी माझ्युङगीन थुक्पे दे मीराप दे येगीमालाक। 35ॱनाम-सा ॱङी येरी डुगीलाक हीना ङी काक्या येगीमालाक।
36“होदे ङीमा धाङ धी़चो़गी कोरला सुला स्येये मेतालाक। याप को़न्क्षोकगी माना नाम्खे भाङछेनक्याला स्येये मेतालाक धेनी सेला स्येये मेतालाक। 37मी-भु हुङगीनगो नोआगी धी़चो़ला झ्युङगीन च्योक्रे झ्युङगीलाक। 38घीझ्येरी ॱनाना होदे ङीमाक्याला क्षुलोक मायुङगीन एन्ला, धेनी नोआगी डुशीङ नाङदु माश्युक्कीन थुक्पे, मीक्या शा-थुङ धाङ ॱनामा लेन-ॱनामा तेर झ्येरी धेबालाक। 39धेनी क्षुलोक होरी खुङक्याला ताक्ती ॱमाखेकीन थुक्पे, खुङक्याला घी झ्युङगीनगो क्षा माझ्युवालाक। मी-भु हुङी घाङला होदेरेराङ झ्युङगीलाक। 40धेनी श्यीङ च्यीकला मी ॱङी हुङगीलाक धेनी च्यीकला खेरकीलाक धेनी च्यीकला भोरकीलाक। 41केमी ॱङी छोरोक थाक्यी धेता हुङगीलाक, धेनी च्यीकला खेरकीलाक धेनी च्यीकला भोरकीलाक।
42“होझ्येरी खीकी चोवो नाम फेप्कीलाक ॱनेरी, खेक्याई ॱमेस्येगीन झ्येरी चाङजे धो़क। 43खीम च्यीकगी दाक्पोला कुमा हुङगीन छेनगी धी़चो़गो स्येये हो़ना, खो चाङजे झ्येरी धेती हो़टु धेनी खोरी नाङदु कुमा जुरु ॱमीच्युक हो़टु। 44होझ्येरी मी-भु खेक्याई ॱमेसाम्गीन धी़चो़ला फेप्ये झ्येरी, खेक्याः डाढीक झ्येरी धो़क।
ॱयोक्पो शाङा धाङ ङेन्पा ॱङी
(लुका १२:४१-४८)
45“ॱलो का थुप्कीन धाङ स्येरापचेनगी ॱयोक्पोगो सुले? खीमगी दाक्पोगी धी़चो़ ताक-ताकगोला ॱयोक्पो श्येम्माक्याला शामा तेरयेला को़गीन ॱयोक्पोगो लाक। 46खीमगी दाक्पो हुङङी घाङला, राङगी दाक्पोगी़ को़गीन च्योक्रे झ्येरी धेता ॱङेना, होदे ॱयोक्पोगो घीन्गी सोदे क्षे। 47ङा धेन्पाराङ खेक्याला ॱनाहीन, खी़ खोरी ग्युनोर घीरीगी ची खोला ग्याप्कीलाक। 48हीना ॱयोक्पो ङेन्पागी़ खोरी दाक्पो गोरा ॱलेप्टु साम्दी, 49ॱयोक्पो श्येम्माक्याला दुरी धेनी क्षाङदुवाक्यामुला शा-थुङ झ्येरी धेना, 50ॱयोक्पोगी़ ॱमासाम्गीन ङीमा धाङ धी़चो़ला खीमगी़ दाक्पोगो हुङगीलाक। 51धेनी खी़ खोला दुबु-दुबुला चेदी शोक्पोक्याई, मुला मीक्या ङुगीन धाङ सो ढीक्कीन साजारु ॱयुक्कीलाक।”
Currently Selected:
मेथा 24: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
