योहान्ना 15
15
घुन्डुम स्यीङदोङ धाङ याक्काक्याई पे
1“ङा नी घुन्डुम स्यीङदोङ धेन्पागो हीन धेनी ङी याप नी घुन्डुम दुम्रा क्योङगीनगो हीन। 2ङी नाङ हो़गीन याक्का घीरीने ढेबु ॱमेक्षाक्कीन याक्काक्या, खोङबागी च्ये जेदालाक धेनी ढेबु क्षाक्कीन याक्का घीरी देले ल्हाक ढेबु क्षाक्येला, खोङबागी होदे घीरी ढेक्चो़ जेदालाक। 3ङी स्येगीन का दी, खेक्या एन्दुरु चाङमा झ्युसावालाक। 4ङी नाङ ॱने धेनी ङा खेक्या नाङ ॱनेलाहीन। याक्का नी घुन्डुम स्यीङदोङला ॱमेनेना, राङस्यीनगी ढेबु ॱमेकेगीन च्योक्रे, खेक्याः ङी नाङ ॱमेनेना, ढेबु क्षाक ॱमीथुक्वालाक।
5“ङा नी, घुन्डुम स्यीङदोङ हीन धेनी खेक्यागो याक्काक्या हीन। ङी नाङ सु ॱनेली धेनी खी़ नाङ ङा ॱनेना, खोला ढेबु माङा क्षाक्कीलाक घीझ्येरी ॱनाना ङाने डारी, खेक्याई घीया झ्यी ॱमीथुक्कीलाक। 6ङी नाङ ॱमेनेगीनगोला याक्का च्योक्रे, फीला ॱयुक्कीलाक धेनी काम्गीलाक। धेनी होदे याक्काक्या रुक्ती मेला ॱयुक्ती ॱरालाक। 7खेक्या ङी नाङ ॱनेती, ङी का खेक्याई नाङ ॱनेना, खीकी घी दो़गीनगो श्यी़, धेनी होदे खीकी क्षीला डुप्कीलाक। 8खेक्याला ढेबु माङा क्षाक्ती, ङी ङेने हीन्गीनगो पाङपो झ्यीना, दी गोनेराङ ङी यापगी शीजे झ्युङगीलाक।
9“यापगी ङाला चेवा जेगीन च्योक्रे, ङीयाः खेक्याला चेवा झ्येहो़क। खेक्या ङी चेवे नाङदु ॱने च्यीक। 10ङी यापगी काक्या ॱरुरी, खोङबागी झाम्पा नाङदु ॱनेगीन च्योक्रे, खेक्यागीया ङी काक्या ॱरुङना, खेक्या ङी झ्याम्पे नाङदु ॱनेगीलाक। 11ङी घाटो खेक्याई सेम नाङ ॱनेये धाङ खेक्याई घाटो खाङयेला, ङी खेक्याला दे लाबक्या स्येबी।
12“ङी खेक्याला झाम्पा झ्यीगीन च्योक्रे, खेक्या च्यीकगी च्यीकला झाम्पा झ्यी। दे नी ङी काठीम हीन। 13राङगी ढोक्पोक्याई दो़न्दु राङ ॱरोक ॱलो़ ताङगीनने ल्हाक, झाम्पा श्येम्मा मेक। 14ङी खेक्याला तेरकीन कागो खेक्याई ॱरुङना, खेक्या ङी छो़ढोक हीन। 15धा देने ॱहाला ङा खेक्याला ॱयोक्पो ॱनामेन घीझ्येरी ॱनाना पो़न्पोगी घी झ्यीगीनगो ॱयोक्पोगी ॱमेस्येलालाक। हीना ङा खेक्याला छो़ढोक ॱनाहीन घीझ्येरी ॱनाना यापने ङी घी जाज्या घीरी ङी खेक्याला स्येहो़क। 16खेक्याई ङाला दाम्बामेन हीना ङी खेक्याला दाम्बाहीन। धेनी खेक्या सोरी ढेबु क्षाक्ये धाङ ढेबु दे ताक्दु ॱनेयेला, ङी खेक्याला को़वाहीन। होझ्येरी खेक्याई ङी मीङगी थोक्ने यापला घी श्यी़ना, खोङबागी खेक्याला ॱनाङगीलाक। 17च्यीकगी च्यीकला झाम्पा झ्यी, देराङ खेक्याला ङी कागो हीन।”
जीक्तेनगी मीक्याई ङेनेक्याला दाङवा
18“जीक्तेनगी खेक्याला दाङा झ्यीना, खेक्याले एन्ला ङाला दाङा झ्यीगीनगो खेक्याई स्येलालाक। 19खेक्या जीक्तेनगी हीन्गीनगो हीन्ना, जीक्तेनगी राङगी हीन्गीनगोला झाम्पा झ्यीयेहो़क हीना खेक्या जीक्तेनगी मालाक। ङी जीक्तेनने खेक्याला दाम्दा झ्येरी जीक्तेनगी खेक्याला दाङा झ्यीदालाक। 20ङी खेक्याला, ‘ॱयोक्पो च्यीक राङगी पो़न्पोने क्षे मेयोङालाक।’ ॱनागीन छीकला ढेन्सो़ झ्यी। खुङक्याई ङाला ॱनो़ क्याना, खुङक्याई खेक्याला ॱनो़ क्यागीलाक। धेनी खुङक्याई ङी का ॱरुङना, खेक्यागीयाः काक्या ॱरुङगीलाक। 21हीना ङी मीङगी केनगी, खुङक्याई दे घीरी खेक्याला झ्यीगीलाक घीझ्येरी ॱनाना ङाला ॱङाक्कीनगोला खुङक्याई ङो ॱमेस्येलालाक।
22“ङा होरी खुङक्याला ॱमास्ये हो़ना, खुङक्याला धीक्पागी क्यो़न मेक हीना धा खुङक्याला खोरी धीक्पा माझ्येहो़क, ॱनायेगी ग्युम्जे मेक। 23ङाला दाङा झ्यीगीनगी़, ङी यापलाः दाङा झ्यीदालाक। 24सी़या माझ्येगीन झ्यावागो ङी खुङक्याई घुङदु माझ्ये हो़ना, खुङक्याला धीक्पागी क्यो़न मेक। हीना धान्दा खुङक्याई ङी झ्येजा झ्यावा देक्या थोरीया, खुङक्याई ङा धाङ ङी यापला दाङा झ्येवालाक। 25हीना दे खुङक्याई क्षो़ठीमला ढीक्टा का दे डुप्येगी क्षीला लाक; ‘खुङक्याई ङाला दो़न्मेदु दाङा झ्येजुङ।’
26“हीना यापगी डुङने फेप्कीन, धेन्पा थुक्ङी, रोवा जेगीनगो फेप्कीलाक। धेनी यापगी डुङने ङी ॱङाक्कीन देगी ङी पाङपो जेगीलाक। 27धेनी खेक्या गोमाने ङीमुला हो़गीन झ्येरी, खेक्यागीया ङी पाङपो झ्यीघो़।”
Currently Selected:
योहान्ना 15: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
