योहान्ना 16
16
1येशुगी सुवालाक, “खेक्याई धेपा मेङ्याम्येगी क्षीला, दे घीरी ङी स्येपाहीन। 2खुङक्याई खेक्याला छोक्खाङक्याने पी़गीलाक। धेनी खेक्याला सेगीनक्याई देरे लेगा झ्येरी, खुङक्याई को़न्क्षोकला ॱङीङकुर झ्यीदाहीन ॱनेरी, साम्गीन धी़ स्यारकीलाक। 3खुङक्याई यापला ङो ॱमेस्ये धेनी ङालाः ङो ॱमेस्येगीन झ्येरी, देरे लेगाक्या झ्यीगीलाक। 4हीना होदे धी़ स्यारी घाङला, ङी खेक्याला स्येगीनगो खेक्याई डो़न्सो़ झ्यीयेगी क्षीला, ङी दे लाबक्या खेक्याला स्येबी।
धाम्पे थुक्ङीगी जेपा
“ङा खीकीमुला झ्येरी, ङी दे लाबक्या खेक्याला एन्ला ॱमास्ये। 5धा ङा ङाला ॱङाक्कीनगी़ डुङदु डी़हो़क हीना खेक्या सी़या ङाला ‘घारु डोयेहीनो?’ ॱनेरी मीढीलालाक। 6घीहीन्ना ङी खेक्याला दे लाबक्या स्येदी, खीकी सेम दुङागी खाङदुक। 7हीना ङी खेक्याला धेन्पागो स्येदाहीन, ङा डोनाराङ खेक्याला फेन्थोवा हो़तालाक घीझ्येरी ॱनाना ङा मेडोना, रोवा जेगीनगो खीकीचारु ॱमेफेप्कीलाक। हीना ङा डोना ङा खोङला खीकीचारु ताङयेहीन। 8धेनी खोङबा फेई घाङला, खोङगी जीक्तेनगी मीक्याला धीक्पा धाङ ढाङतेन धाङ ठीम्चो़गी कोरला, खुङक्याई सामस्यीगी क्यो़नगो तो़न्दा जेगीलाक। 9धीक्पागी कोरला मीक्याई क्यो़न नी, खुङक्याई ङाला धेपा मीझ्यीदालाक। 10धेनी ढाङतेनगी कोरला ॱनाना, खेक्याई ङाला याङ नामा ॱमेथोङगीन, यापगी डुङदु ङा डोयेहीन। 11धेनी ठीम्चो़गी कोरला ॱनाना, जीक्तेनगी वाङग्युर झ्यीगीनगोला ठीम फोक्सालाक।
12“ङाला धोराङा खेक्याला ॱमीच्यीकी माङा ॱनायेहो़क, हीना धान्दा खेक्याई दे शो़गोम झ्यी थुक्कीमालाक। 13धेनी धेन्पागी थुक्ङी फेई घाङला, खोङगी खेक्याला धेन्पा घीरी नाङदु ठीया जेगीलाक। खोङबागी राङगी थोक्ने सुङगीमालाक हीना खोङगी घी सेन्गीनगो सुङा जेगीलाक धेनी माउपारगी दो़नक्या खेक्याला स्येगीलाक। 14खोङगी ङी शीजे ॱङो़न्दु जेगीलाक घीझ्येरी ॱनाना ङी घी हीन्गीनगो, खोङगी ङाने लेन्दी खेक्याला तो़न्दा जेगीलाक। 15यापला हो़गीन घीरी ङाराङगी हीन होझ्येरी थुक्ङीगी, ङी हीन्गीनगो लेन्दी खेक्याला तो़न्दा जेगीलाक, ॱनेरी ङा स्येदाहीन।
दुङा नी घाटोला ग्युरवा
16“तीते च्यीकने खेक्याई ङाला ॱमेथोङगीलाक धेनी याङ तीते च्यीकने खेक्याई ङाला थोङगीलाक।”
17खोङबागी ङेने रीङगागी च्यीकगी च्यीकला ॱनेवालाक, “खोङबागी होराङला ‘तीते च्यीकने खेक्याई ङाला ॱमेथोङगीलाक धेनी याङ तीते च्यीकने खेक्याई ङाला थोङगीलाक।’ धेनी ‘घीझ्येरी ॱनाना ङा यापगी डुङदु डी़हो़क।’ सुङगीन दे घी ले?”
18खुङक्याई ॱनेवालाक, “खोङबागी दे ‘तीते च्यीकने’ सुङगीनगी दो़न्दाकगो घी हीन्ढी़? खोङबागी घी स्येगीनगी दो़न होराङ ॱहामेघोरालाक।”
19खुङक्याई येशुला ढीवा कुङी दो़गीनगो खोङबागी खेन्दा जेदी, खुङक्याला सुवालाक, “ङी खेक्याला ‘तीते च्यीकने खेक्याई ङाला ॱमेथोङगीलाक धेनी याङ तीते च्यीकने, खेक्याई ङाला थोङगीलाक।’ ॱनागीनगी दो़नगो खेराङक्या नाङदु ढीलाले? 20ङा खेक्याला धेन्पा धेनक्याङ ॱनाहीन, खेक्या ङी़री ङ्याङेन झ्यीगीलाक हीना जीक्तेनगी मीक्या ङ्यामो ताङगीलाक। खेक्या दुङागी खाङगीलाक हीना खीकी दुङा घाटोला ग्युरकीलाक। 21केमी च्यीकला टु केली घाङला, मोला दुङा हुङालाक घीझ्येरी ॱनाना मी़ केशुकगी धी़गो ॱलेप्पालाक हीना मी़ टुगो केसारती, जीक्तेनदु मी ली़ साबा च्यीक झ्युङगीनगी घाटोगी झ्येरी, मी़ केशुकगो मेढेन्दालाक। 22देरे झ्येरीराङ, धान्दा खेक्याला दुङा हो़तालाक हीना ङा खेक्याला धाब्ले थुक्येहीन धेनी खीकी सेम घाटोगी खाङगीलाक। धेनी खीकी घाटोगो सी़याः ठोक थुक्कीमालाक। 23होदे ङीमोगोला, खेक्याई ङाला घीया मीढीगीलाक। ङा धेन्पा धेनक्याङ खेक्याला ॱनाहीन, खेक्याई ङी मीङगी थोक्ने यापला घी श्यी़ना, खोङबागी होदे खेक्याला ॱनाङगीलाक। 24धान्दा थुक्पे, खीकी ङी मीङगी थोक्ने माश्यी़ हो़तालाक। धा खीकी घाटो खाङयेगी क्षीला, श्यी़ धेनी खेक्याला थोप्कीलाक।
25“ङी खेक्याला देक्या पेगी गोने स्येहो़क। हीना यापगी कोरला खेक्याला पेगी गोने मेन्दा सावो स्येयेगी धी़गो स्यारकीलाक। 26होदे ङीमोगो खेक्याई ङी मीङला श्यी़गीलाक। धेनी खीकी छापला ङा यापला श्यी़येहीन ॱनेरी ङा ॱनामेन, 27घीझ्येरी ॱनाना खेक्याई ङाला झाम्पा झ्येवालाक धेनी ङा यापने हुङगीनगोला खीकी धेपा झ्येरी, याप राङगी खेक्याला झाम्पा जेदालाक। 28ङा यापने झ्युरी जीक्तेनदु होवाहीन। धा ङा जीक्तेनने डारी यापगी डुङदु लोक्वाहीन।”
29खोङबागी ङेनेक्याई श्यी़वालाक, “धा खेराङ पेगी थोक्ने मेन्दा, सावो सुङा जेदी। 30धा हीकी ॱहाघोजुङ, खेराङ घीरी खेन्दालाक धेनी सी़या खेराङला श्यी़ घो़गीमालाक। होझ्येरी हेक्या खेराङ को़न्क्षोकने झ्युङगीनगोला धेपा झ्यीदीहो़क।”
31येशुगी कालेनदु सुवालाक, “धा खेक्या धेपा झ्यीदी हो़ते? 32तो़, ॱङोन्ने झ्यीना खेक्या राङ-राङगी साजाला थोरती सोरी, ङाला च्यीका भोरकीन धी़गो ॱलेप्यी हो़तालाक धेनी धी़गो ॱलेप्सादुक। घीहीन्ना याप ङीमुला झ्येरी, ङा च्यीका मेक। 33ङाने खेक्याला श्यीदे थोप्येगी क्षीला, ङी खेक्याला देक्या स्येबी। जीक्तेनदु खेक्याला दुक्पु ङ्याङगीलाक हीना सेम ल्हो़ झ्यी, ङी जीक्तेनला ग्याहो़क।”
Currently Selected:
योहान्ना 16: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
